Los Hechos 16

1Aɨjna ɨ Pablo, ajta aɨjna ɨ Silas, aa mu a'ucáanye maujna u Derbe, majta maujna u Listra. Au mu seij huátyau tɨ tya'atzaahuate'e. Ayaa pu antyahuaaca'a aɨjna tɨcɨn Timuteeyu. Ajta aɨjna ɨ naanajra'an, Israel pu jetze ajtyama'acan, ajta taatajra'an, griego pu púeenya'a aɨjna. 2Rɨ'ɨ mu tirajchaɨca'a aɨjna ɨ Timuteeyu aɨme ihuaamua'ame'en ɨ mej Listra e'ema'acan, majta ɨ mej Iconio e'ema'acan. 3Aɨjna ɨ Pablo, ayaa pu ti'ijxe'eva'acaa tɨ aɨn Timuteeyu u á'ume'en hua'a jamuan. Aɨj pu cɨn raataityaca'a maj ra'antisijche ɨ naviira'an mej mi cai huataninyu'ucacun aɨme ɨ mej Israel jetze ajtyama'acan. Ayaa pu'u, a'ini'i naijmi'i ɨ maj maun a'uchaatɨma'acaa aujna aunɨmɨ tɨj na'a aun tɨ huatacá'a, aɨ mu ramua'areeraca'a tɨ taatajra'an aɨjna ɨ Timuteeyu, aɨ pu griego puéenya'a. 4Matɨ'ɨj mi maun a'ará'a seij jetze ɨ chajta'ana, au mu hua'uta'ixaate ɨ tyaɨte a'ij mej tiraaxa'apɨ'ɨntarej ɨ maj tamuaamuata'a japuan hua'apua ara'ase, majta ɨ vaujsi ɨ maj Jerusalén a'ujti a'ij mej ti'ijxe'eva'acaa mej meyan huarɨni ɨ tyaɨte. Matɨ'ɨj ra'anticɨ'ɨ ɨ tyaɨte mej tihua'uta'ixaa, seij jetze ɨ chajta'ana, majtahua'a meyee meyan huarɨj, majtahua'a meyee. 5Aɨj pu cɨn aɨme ɨ maj tyújsa'ɨrihua'a, aɨ mu ahuaujca'anye mej mi eitze'e tya'antzaahua. Majta huatamui'iraca'a. 6Nainjapua mu huacɨj aujna tɨj na'a aun tɨ huatacá'a u Frigia. Aru capu hua'uta'a aɨjna ɨ xaijnyu'ucara'ara'an ɨ Dioj maj a'utyarute aujna tɨ ayan tyaja'arajtyahuaa tɨcɨn Asia, mej mi tihua'uta'ixaate'en ɨ nyuucari tɨ cɨme'en ra'axa ɨ Dioj. 7Aj mu mi ajna vejli'i a'atanye a'u tɨ a'avastɨme seica chuejra'a japua tɨ ayan tyaja'arajtyahuaa tɨcɨn Misia. Au mu a'utyarutyeeche'e aɨjna chuejra'a japua tɨ ayan tyaja'arajtyahuaa tɨcɨn Bitinia, aru capu a'ij tyu'utarɨ'ɨristaraca'a a'ini capu hua'uta'a aɨjna ɨ xaijnyu'ucara'ara'an ɨ Jesús. 8Matɨ'ɨj mi antacɨj u jetze pujme'en u Bitinia. Matɨ'ɨj mi aun pujme'en a'ucajrupi chajta'a tɨ ayan tyaja'arajtyahuaa tɨcɨn Troas. 9Tɨca'ɨmɨ pu ti'itɨ huamaaraca'a aɨjna ɨ Pablo. Tɨ nu'u aun a'utyejvee utan pujme'en a'atɨ tɨ seij chuejra'a japua e'ema'acan tɨ ayan tyaja'arajtyahuaa tɨcɨn Macedonia. Eecan pu nu'u hua'utahuaviiri'i ayan tɨcɨn: ―Xa'icɨɨnichi yu jetze pujme'en, muan, sata'aj hui taatavaɨɨre'en ityejmi.―Ayaa pu tyu'utaxajtaca'a aɨjna ɨ a'atɨ. 10Tɨ'ɨj ayan tyu'umaaraca'a aɨjna ɨ Pablo, ca'anacan tu huátacate tej ti antacɨɨnye aujna a'ahua'a Macedonia, a'ini ayaa pu tita'amityejtya'acaa tɨ aɨn Dioj taatajee tej ti tihua'uta'ixaate'en ɨ nyuucari cɨme'e tɨ cɨn Dioj hue'iratuaasin. 11Tyatɨ'ɨj huiiraacɨ taujna u Troas, au tu antacɨj ɨ baarcu jetze aujna u Samotracia aujna a'u tɨ chuej a'utacá'a aata'a. Yaa ruijmua'ate'e yee tu a'antanyej aujna chajta'a tɨ ayan tyaja'arajtyahuaa tɨcɨn Neápolis. 12Tyatɨ'ɨj huiiraacɨ tyaujna, aj tu ti taun a'ará'a seij jetze ɨ chajta'ana tɨ ayan tyaja'arajtyahuaa tɨcɨn Filipos. Au mu mejmi'i a'achajcaa aɨme ɨ maj Roma jetze ajtyama'acan. Ajta, aujna Filipos, ai pu aɨn pueen ɨ chajta'a tɨ eitze'e ruxe'eve'e tɨj na'a aun tɨ huatacá'a u Macedonia. Au tu a'atzu a'atee tyej tyaun a'utyáuu. 13A'anaj matɨj pua'a rusa'upihua'a, au tu huiiraacɨ a pua'aque u chajta'a. Au tu a'ahua'a a'uré'enye vejli'i jate'e tej ti raahuauni a'u tɨ a'arɨ'ɨri tyej huatyejnyuuni ɨ Dioj jemi. Au tu a'ura'asaca'a. Aj tu ti autyajhuii tej tihua'uta'ixaate'en ɨ juuca ɨ mej tyujsaɨj maujna aɨjna cɨme'e ɨ nyuucari tɨ jetzen ra'axa ɨ Dioj. 14Seij ɨ jɨita'a, ayaa pu antyahuaaca'a tɨcɨn Lidia. Tiatira pu e'ema'acan aɨjna. Aɨ pu cɨɨxuri ti'itua'aracara'a tɨ ti'inacámua. Aɨ pu ajta ranajchimɨ'ɨca'a ɨ Dioj. Aj pu i Dioj raata'a tɨ rá'antzaahuate'en a'ij tɨ tyu'utaxajtaca'a aɨjna ɨ Pablo. 15A pu i huámua'ɨvijhuaca'a, majta aɨme ɨ i'ihuaamua'ame'en. Aj pu i ayan titaatajee aɨjna ɨ Lidia tɨcɨn: ―Tɨ pua'a ayan tyajamua'amityejtya'a aɨjna cɨme'e ɨ nyej nyeri ra'atzaahua'ate'e nyaɨjna ɨ tavastara'a, sata'aj mu a'uva'aju'un nyaj jamuan sej si saun a'utyáu xa'ara'ani a'u nyej e'eche.―Ayaa pu titaata'ixaa. Aɨ pu ta'antimue'itɨ. 16A'anaj ayaa pu titaaruu. Au tu auju'uca'a aujna mej yá'ana'amiche ɨ Dioj. Au tu ti ra'antinajchaca'a seij ɨ tyamueij tɨ tiyaaru'u tzajta'an seijra'acaa. Jɨita'a pu pueenya'a aɨjna. Aɨjna ɨ tiyaaru'u, aɨ pu raayɨ'ɨtɨhua'a tɨ ti'itɨj huámua'aree. Eihua pu hua'amue'itɨchihua'a aɨjna ɨ jɨita'a ɨ tumin hua'a jemi ɨ maj rachaɨca'a. 17Tɨ'ɨqui aɨn taataven. Aa pu e'evé'ejijhuajma'a ayan tɨcɨn: ―Amɨme mɨ tyetyaca, ai mu hui ravaɨre'e ɨ Dioj ɨ tɨ ta japua e'eseijre'e naijmi'ica japua mata'aj meyan tyajamuaata'ixaate'en a'ij tɨ ti'irɨ'ɨri tɨ Dioj tyajamuaatauuni'i. 18Ayaa pu a'urɨjnya'a nain xɨcaj tzajta'a asta tɨ'ɨj cai che'e tye'eviicue'i aɨjna ɨ Pablo. Aj pu'i pɨ a'ure'eve. Tɨ'ɨqui ayan tiraata'ixaa aɨjna ɨ tiyaaru'u tɨcɨn: ―Ayaa nu hui ti'imue'ijte'e aɨjna jetze ma'acan ɨ Cɨriistu'u paj huiirajra'ani pamɨjna jetze mɨ tyamueij. ―Ayaa pu tiraata'ixaa. Cɨme'en pu'u ayan tyu'utaxajtaca'a, aj pu'i e'eyan huiirajraa aɨjna ɨ jɨita'a jetze. 19Majta maɨn ɨ maj rachaɨca'a ɨ tyamueij, matɨ'ɨj raamua'areeri'i tɨ cai che'e a'ij ti'irɨ'ɨri maj raamue'itɨn ɨ tumin aɨjna jetze, aj mu mi hua'uvívi'i maɨjna ɨ Pablo, majta maɨjna ɨ Silas. Matɨ'ɨj mi huaja'uvi'itɨ aɨme jemi ɨ mej tie'ijta aujna a'ahua'a tɨ a'aráyaujta'a a'u mej tyaja'atu'araca ti'itɨj. 20Matɨ'ɨj mi a huajautuaa hua'a jemi ɨ jueesi. Meyan ti'ixaata tɨcɨn: ―Aime i tyetyaca, Israel mej jetze ajtyama'acan, eihua mu hui hua'ajaaxaijte'e iiyu maj huachaatɨme. 21Saɨque mu hui tihua'amua'ate ɨ ye'ira jetze tɨ cai ayan titaavijte'e ityejmi, tyej teyan tira'antzaahuate'en, na'ari tyej teyan huarɨni ityan i tej Roma jetze ajtyama'acan. 22Matɨ'ɨj mi maɨn tyaɨte hua'utajaaxaijvi'iri'i maɨjna ɨ Pablo, majta maɨjna ɨ Silas. Aj mu mi maɨn jueesi meyan tyu'utaijtaca'a maj nu'u tihua'acá'ari'iraxɨn ɨ tihua'acɨɨxu, majta nu'u hua'utyávajxɨ pi'ista cɨme'e. 23Matɨ'ɨj hua'utyávajxɨ eihua, majta hue'ityaana. Majta raijca tɨ maɨjna ɨ tɨ tí'icha'ɨ tɨ hua'uchaɨn tyamua'a naa. 24Aɨjna maj tiráchaɨra, aɨ pu hua'utyajtuaa ujca'ihua'ɨmɨ tɨ jua'ase. Ajta ɨ huáɨɨca, an pu ra'anarujtya'axɨ aɨjna jetze ɨ taabla tɨ ij cai huirácu'ucunyen ɨ huáɨɨca. 25A'atzaj tyauuma'aca tɨca'ɨmɨ, a'atzaj cumu e'ita'a tɨca'a, aɨ mu tyenyuusima'a ɨ Dioj jemi, majta ti'ichuiicaca'a aɨjna ɨ Pablo, ajta aɨjna ɨ Silas. Majta ɨ seica ɨ mej nami'ihuacaa, aɨ mu hua'anamuajracaa. 26Tɨ'ɨj i iye'itzi cɨme'e huatyaujca'atzɨjxɨ ɨ chuej. Ajta ɨ jaxu'u a'u maj á'anami'ihuacaa, ca'anin pu cɨn huatyaujca'atzɨjxɨ. Cɨme'en pu'u ayan huarɨj, aj pu i tya'antacuunirixɨ a'u tɨ a'apueerta, aujna a'u maj á'anami'ihuacaa, ajta ti'ijtza'anixɨ ɨ cadeena ɨ maj cɨn anajɨ'ɨquihuajma'acaa ɨ maj nami'ihuacaa. 27Ajta aɨn tɨ tí'icha'ɨ, tɨ'ɨj huatájɨ, aj pu i raaseij tɨ tya'antacúuni'ihuajma'acaa ajna a'u tɨ a'apueerta. Aɨ pu i ru'ijcupi ɨ ruchuun tɨ'ɨj i huaujje'ica a'ini yaa pu raata'a cumu mu'uri huiiraacɨ ɨ maj nami'ihuacaa. 28Ma ajta aɨn ɨ Pablo, ca'anacan pu huajijhuaca'a. Ayaa pu tiraatajee tɨcɨn: ―Capej hui peyan aruura pej peyan aje'icata. Tyauche'e tu naimi'i huiraati. 29Aj pu i taij huahuáu. Tɨ'ɨqui ayan u a'a utyajrupi taichijmá'a aujna a'u maj a'anami'ihuacaa. Aj pu i a autunutaca'a ajna vejli'i a'u maj a'utyáuuca'a aɨjna ɨ Pablo, ajta aɨjna ɨ Silas. 30Tɨ'ɨqui hue'iraavi'itɨ. Aj pu i ayan tihua'utaihua'uri'i tɨcɨn: ―¿A'ini naarɨni tɨ'ij Dioj tinaatauuni'i? 31Matɨ'ɨj mi meyan tiraata'ixaa tɨcɨn: ―Pata'aj rá'antzaahuate'en ɨ tavastara'a, aɨjna ɨ Jesús. Aj pu xaa Dioj timuaatauuni'ira, ajta aɨme ɨ maj a jamuan a e'eche. 32Matɨ'ɨj mi meyan tira'ixaa maɨjna ɨ a'atɨ, majta aɨme ɨ maj jamuan a e'eche aɨjna cɨme'e ɨ nyuucari tɨ jetzen ra'axa ɨ tavastara'a. 33Yaa pu i éenya'a a'atzaj tɨca'ɨmɨ aɨn tɨ tí'ichaɨca'a, aɨ pu hua'uja'usi ɨ maj tzaanicaa. Matɨ'ɨj mi e'eyan huaujmuaɨ'ɨhuaca'a aɨjna ɨ tɨ tí'ichaɨca'a, majta aɨme ɨ maj jamuan a e'eche. 34Tɨ'ɨj i huaja'uvi'itɨ ɨ ruche. Aj pu i tihua'umí. Ajta ɨ maj jamuan a e'eche, eecan mu huataujtyamua'ave maɨjna cɨme'e maj rá'antzaahua ɨ Dioj. 35Tapua'arijma'aca mu maɨn ɨ jueesi hua'utaij ɨ polisiiya. Ayaa mu tiraata'ixaa aɨjna tɨ tí'ichaɨca'a tɨcɨn: ―Che'e hue'irajtuaani ɨ maj nami'i ɨ maj hua'apua. 36Aj pu i aɨn tɨ tí'icha'ɨ, ayaa pu tiraata'ixaa aɨjna ɨ Pablo tɨcɨn: ―Manaataij ɨ jueesi nyaj nu'u amui'irajtuaani. Aɨj pu cɨn, pu'uri rɨ'ɨri saj huiracɨɨnye. Capu a'atɨ che'e a'amuajaaxaíitya'a a'ame.―Ayaa pu tihua'uta'ixaa aɨjna tɨ tí'ichaɨca'a. 37Ajta aɨn ɨ Pablo, ayaa pu tiraata'ixaa aɨjna tɨ tí'ichaɨca'a tɨcɨn: ―Aricu, hua'uta'ixaate'e ɨ polisiiya tɨcɨn: “Ityejmi, i tyej aɨme jetze ajtyama'acan ɨ maj romanos pueen, aɨ mu cai ti'itɨ taataihua'ura a'ij tyaj ti'itɨ cɨn tityautyajturaa, aɨ mu majta taatyaavajxɨ me eijre'e tyaɨte tzajta'a, majta ta'ityaana. ¿Ti'itajni? ¿Ni meri ta'axɨjte'en aviitzi cɨme'e? Catu xaa nya'u huiráaju'un. Miche'e maɨn yéve'eré'enyen mata'aj maɨn tu'irajtuaani.” 38Matɨ'ɨj mi maɨn polisiiya meyan tihua'uta'ixaa aɨme ɨ jueesi a'ij tɨ tyu'utaxajtaca'a aɨjna ɨ Pablo. Matɨ'ɨj raamua'areeri'i tɨ aɨn ɨ Pablo, ajta aɨn ɨ Silas aɨme jetze, mu nu'u jetze a'ajtyáma'acan ɨ romano, eecan mu tyu'utatzɨn aɨme ɨ jueesi. 39Matɨ'ɨj mi u a'uju'un aɨme ɨ jueesi mej mi tyaja'utauruuni'i hua'a jemi ɨ maj hua'apua. Matɨ'ɨj mi hue'irajtuaa. Aj mu mi ca'anijra'a hua'uta'a maj huiracɨɨnye aujna chajta'a. 40Ma majta maɨn ɨ maj hua'apua, matɨ'ɨj huiiraacɨ aujna carcel, au mu a'uju'un Lidia tɨ e'echajca'a mej mi hua'useij ɨ ru'ihuaamua'a ɨ mej tya'atzaahuate'e. Ca'anijra'a mu hua'uta'a ɨ hua'a tzajta'a. Aj mu mi a'ucɨj.

will be added

X\