Los Hechos 15

1Seica mu maun a'ará'a aujna u Antioquía. Aɨ mu aɨn pueen ɨ mej Israel jetze ajtyama'acan. Au mu a'araacɨ aujna Judea. Matɨ'ɨj mi autyajhuii mej tihua'umua'aten ɨ ru'ihuaamua'a. Meyan tɨcɨn: ―Tɨ pua'a sacai ra'antisi'iche ɨ runavij ta'antyújvi'irajmee mɨ a'amua sa'atapu'u jetze a'ij tɨ tyu'utaxajtaca'a aɨjna ɨ Moisés tyaacan, tɨ pua'a sacai seyan huarɨni, saɨj ajta saɨj, capu a'ij ti'irɨ'ɨri tɨ Dioj tyajamuaatauuni'i. 2Ma majta aɨjna ɨ Pablo, ajta ɨ Bernabé, eecan mu tihue'ixaatya'acaa tzaahuati'ira'a cɨme'e. Aj mu mi aɨme ru'ihuaamua'a meyan tyuíjca aɨme ɨ maj hua'apua, hua'a jamuan ɨ seica mej mi a'ujcɨɨnye anna Jerusalén, mej mi raaxa'apɨ'ɨntare'en aɨme jamuan ɨ maj tamuaamuata'a japuan hua'apua ara'ase, majta ɨ vaujsi ɨ mej tyujsa'ɨrihua'a u teyujta'a anna Jerusalén. 3Majta maɨn ɨ mej tyujsa'ɨrihua'a aujna Antioquía, aɨ mu hua'utaij. Matɨ'ɨj mi a'ucɨj. Au mu Fenicia a'uré'enye, majta maujna u Samaariya. Nainjapua mu tihua'uta'ixaa maɨjna cɨme'en maj tya'antzaahuate'en ɨ Dioj jemi, aɨme ɨ mej seij chuejra'a japua e'ema'acan. Aɨj mu cɨn huataujtyamua'ave tyamua'a naa aɨme ɨ hue'ihuaamua'a matɨ'ɨj hua'unamuajri'i a'ij mej tí'ixajtacaa. 4Matɨ'ɨj maun a'ará'a anna Jerusalén aɨjna ɨ Pablo, ajta aɨjna ɨ Bernabé, eecan mu hua'ancure'evi'itɨ tyamua'a naa aɨme ɨ mej tyujsa'ɨrihua'a u teyujta'a, majta ɨ maj tamuaamuata'a japuan hua'apua ara'ase, majta ɨ vaujsi. Matɨ'ɨj mi meyan tihua'uta'ixaa nain tɨ Dioj tyu'utyájtua eitze'e hua'a jemi ɨ seica ɨ tyaɨte. 5Majta seica aɨme ɨ fariseos ɨ mej tya'atzaahuate'e, aɨ mu anna a'utyáuuca'a. Meyan tɨcɨn: ―Eecan pu hui ruxe'eve'e mej meyan huarɨni aɨme ɨ mej tya'atzaahuate'e ɨ mej seij chuejra'a japua e'ema'acan. Miche'e hui ra'ara'asten nain cɨme'e a'ij tɨ tyu'utaxajtaca'a aɨjna ɨ Moisés tyaacan. Miche'e ra'antísiichixɨ'ɨn ɨ runavij. 6Aj mu mi tyujsaɨj aɨme ɨ maj tamuaamuata'a japuan hua'apua ara'ase, majta ɨ vaujsi mej mi tihuaurixaate'en maɨjna cɨme'e. 7Matɨ'ɨj a'atzu a'ateevi'ica mej ti'ixa, aj pu i aɨn Pedro ajchee. Ayaa pu tihua'uta'ixaa tɨcɨn: ―Ne'ihuaamua'a, muan xu hui seri ramua'aree a'anaj tɨ ɨmɨ Dioj na'antihuau inyeetzi nyaj a'amua jetze ajtyama'acan, nyej ni tihua'uta'ixaate'en ɨ nyuucari cɨme'e tɨ cɨn Dioj tihua'utauuni'i ɨ maj cai Israel jetze ajtyama'acan mej mi rá'antzaahuate'en. 8Ajta aɨn Dioj, ɨ tɨ ru'umua'aree a'ij tɨ a'atɨ ti'imua'atze ɨ rutzajta'a, aɨ pu taataseijra tɨ aɨn mijmu hua'ancure'evi'itɨ. Ayaa pu che'eta na'a tihua'uta'a tɨ aɨn xaijnyu'ucara'ara'an huatyaturan aɨme tzajta'a tɨj titaatá'a itejmi. 9’Jemin ɨ Dioj, naijmi'i tu teyan tyaxá'a tyana'a een. A'ij tɨ aɨn raajajcuare ɨ taxaijnyu'uca tyatɨ'ɨj rá'antzaahua, ayaa pu che'eta na'a tihúa'ajajcuaren ɨ hua'axaijnyu'uca aɨme. 10Aɨj pu hui cɨn, a'ini een cɨn seyan ti'ijraaxaijte'e ɨ Dioj saɨjna cɨme'e sej tihue'ijcate'e aɨme ɨ mej tya'atzaahuate'e ye'ira cɨme'e ɨ maj cai raviicue'iraca'a ɨ tavaujsimua'a tyaaca, tyajta ityan. 11’Ma ajta, ayaa pu tita'amitejte'e ityejmi tyaj cai tí'inajchita, tyaɨjna cɨme'e tɨ tavastara'a tajapua huanyu ityejmi. Ayaa pu hui che'eta na'a hua'a japua ti'inyuuni aɨme.―Ayaa pu tihua'uta'ixaa. 12Aj mi mu raatapua'ajtaca'a naimi'i ɨ mej tí'ixajtacaa. Eecan mu hua'anamuajracaa matɨ'ɨj tihue'ixaatya'acaa maɨjna ɨ Pablo, majta maɨjna ɨ Bernabé. Nain mu hua'uta'ixaa tɨj na'a tɨ hua'uta'a ɨ Dioj ɨ hua'a tzajta'a aɨme ɨ mej seij chuejra'a japua e'ema'acan. Eihua mu rɨ'ɨ huarɨj ɨ maj cɨn rɨ'ɨ tya'utaseij. Dioj pu hua'utavaɨ aɨme ɨ maj hua'apua. 13Matɨ'ɨj ra'anticɨ'ɨ mej ti'ixa, aj pu i Jacobo ayan tyu'utaxajtaca'a tɨcɨn: ―Ne'ihuaamua'a, xaanamuajri'i ɨ nyaj amuaata'ixaate'esin. 14Amɨjna ɨ Simón auchan pu hui titaata'ixaa tɨ Dioj hua'a cɨme'en hua'utavaɨ aɨme ɨ mej seij chuejra'a japua e'ema'acan, seica tyaɨte tzajta'a mej mi rɨ'ɨ tiraata'an. 15A'ij tɨ ti'ixa aɨjna, ayaa mu hui che'eta mana'a mejmi'i tira'uyu'uxaca'a aɨme ɨ mej ti'ixaxa'ata'a ɨ Dioj jetze ma'acan. Ayaa pu xaa nya'u te'eyu'usi'i ɨ yu'uxari jetze. 16Ayan tɨcɨn: Tɨ'ɨj antipua'aren, nyaa nu uve'enyejsin. Aɨjna ɨ chi'ira'an ɨ David, ɨ tɨ'ɨri a'ave, nyaa nu nyajtahua'a rajajsin. Nyaa nu ra'ajtaahua jajcuacan nyaɨjna jetze ɨ tɨ auj a e'ejnyee. 17Majta ɨ seica ɨ tyaɨte, miche'e naimi'i raahuauni ɨ tavastara'a aɨme ɨ tyaɨte ɨ mej seij chuejra'a japua e'ema'acan, mej mi náamua'ati a'ij nyej antyahuaa inyaa. 18Yaa pu ti'ixa ɨ tavastara'a ɨ tɨ jajcua'ɨmɨ hua'uta'ixaa aɨjna ɨ ti'itɨ ɨ maj nu'u raamua'ati. 19’Aɨj nu hui cɨn neyan tyajamue'ixaate'e tyaj cai teyan tihúa'ajaaxaijvi'ira aɨme ɨ mej seij chuejra'a japua e'ema'acan ɨ maj mauchan tya'antzaahuate'esin. 20Eitze'e pu ti'ivaɨre'e tyej tihua'utaiti'i yu'uxari jetze, tyej ti teyan tihua'uta'ixaate'en maj nu'u cai ti'icua'aca ɨ tɨ ti'icue'iri'i ɨ maj raamuaɨ'ɨvajtaca'a hua'a jemi ɨ hua'a dioosi, majta nu'u cai ruxana'acɨra'a juucate jamuan, ajta maj cai ɨ juuca ruxana'acɨra'a ɨ tyetyaca jamuan. ’Majta maj nu'u cai racua'aca hue'ira'ara'an ti'itɨ maj raatyacue'imi'in, ajta maj cai racua'aca ɨ xuura'ara'an. 21Ai pu ayan tyu'ujxe'eve'e, a'ini matɨj mana'a titya'utyajhuii aujna a'u maj a'uchaatɨme ɨ tyaɨte, ayaa mu tihua'uta'ixaa a'ij tɨ tyu'utaxajtaca'a aɨjna ɨ Moisés tyaacan, majta hua'ateyujta'a mu ra'ujijve ɨ yu'uxari jetze tɨ aɨn ra'uyu'uxaca'a.―Ayaa pu tihua'uta'ixaa. 22Aj mu mi maɨn ɨ maj tamuaamuata'a japuan hua'apua ara'ase, majta ɨ vaujsi, aɨ mu raaxa'apɨ'ɨntare maj seica ava'ahuauni ɨ rujemi mej mi hua'utaite aɨjna jamuan ɨ Pablo, ajta aɨjna ɨ Bernabé, mej mi a'ucɨɨne aujna Antioquía. Aɨme mu antíhuau aɨjna ɨ Judás tɨ ajta ayan antyahuaa tɨcɨn Barsabás, majta maɨjna ɨ Silas. Aɨme ɨ maj hua'apua, ai mu aɨn pueen hua'avaujsi mej ti'ixa'apɨ'ɨntare'e. 23Aɨme mu jemin raataityaca'a ɨ yu'uxari tɨ ayan aɨjna cɨn tira'axa: “Ityan, i tyaj tamuaamuata'a japuan hua'apua ara'ase, tyajta i tyej i'i vaujsi i tyaj titasa'ɨri u teyujta'a, yaa tu á'amuataujte'e mɨ sej tya'atzaahuate'e, mɨ sej seij chuejra'a japua a'uchaatɨme saujna Antioquía, sajta aman tɨ huatacá'a aujna a'ahua'a Siria, ajta saujna a'ahua'a u Cilicia. 24’Tu'uri raamua'areeri'i maj seica ɨ tyaj cai huata'aca, aɨ mu ya a'ucɨj iiya Jerusalén. Eecan mu a'amua'ɨtziitya'aca'a maɨjna cɨme'e ɨ mej tyajamue'ixaa. Eecan pu utyaavatzɨ ɨ a'amuatzajta'a. 25A'ini naimi'i tu'uri teyan tyu'uta'a ɨ nyuucari cɨme'e, ayaa pu tita'amitejte'e tɨ i'i xa'apɨ'ɨn tyaj hua'antihuauni seica ɨ tejmi jetze mej ajtyama'acan. Aɨme tu ti antíhuau tyej ti hua'utaite mueetzi jemi, mej mi u a'uju'un ɨ tyaɨte aɨme jamuan ɨ Pablo, ajta aɨjna ɨ Bernabé. 26’Aɨme ɨ maj hua'apua, aɨ mu meyan titya'ahuaujca'ane tɨ pua'a ayan tyu'ujxe'eva'a maj huacui'ini aɨjna cɨme'e metihua'uta'ixaate'en ɨ tyaɨte aɨjna jetze ma'acan ɨ tavastara'a ɨ Jesús tɨ i'i Cɨriistu'u. 27Aɨj tu cɨn tihua'utaityaca'a tyaɨjna ɨ Judás, tyajta tyaɨjta ɨ Silas. Aɨ mu tyajamuaata'ixaate'esin rujɨɨmua'a mueetzi jemi mej mi nain cɨn tyajamuaata'ixaate'en ɨ nyuucari cɨme'e a'ij tyej teri tiraaxa'apɨ'ɨntarej. 28’Ee xaa nya'u, ayaa pu tira'amitejte'e aɨjna ɨ xaijnyu'ucara'ara'an ɨ Dioj, ajta ityejmi, ayaa pu tita'amitejte'e tɨ i'i xa'apɨ'ɨn tyaj cai eihua ti'itɨ cɨn tyaja'amueijcatya'a, silu aij tu'u ɨ tɨ eitze'e ruxe'eve'e. 29Caxu racua'aca ɨ hua'ahue'ira'a ɨ ya'amuaate ɨ maj hua'umuaɨ'ɨvejtaca'a ɨ hua'a dioosi jemi. Caxu sajta racua'aca hue'ira'ara'an ɨ tɨ huatyácue'imi'inihuaca'a na'ari ti'itɨ xuura'ara'an. ’Caxu sajta tyu'uxana'acɨra'a juucate jamuan, majta mamɨjna ɨ ma juuca, maj cai tyu'ujxana'acɨra'a ɨ tyetyaca jamuan a'ij tyej tyaja'amue'ixaate'e. Rɨ'ɨ xu tityeetyáturaasin ɨ Dioj jemi tɨ pua'a seyan huarɨni saɨjna cɨme'e. Che'e a'ij tyaja'amuavaɨra'a.” 30Matɨ'ɨj mi meyan huarɨj, matɨ'ɨj mi maun huajauiityaca'a aujna Antioquía. Aj mu mi a'ucɨj. Au mu e'etyujsaɨj naijmi'i ɨ mej tya'atzaahuate'e. Matɨ'ɨj mi hua'utapij ɨ yu'uxari. 31Majta maɨn ɨ hue'ihuaamua'a, matɨ'ɨj ra'ujijve ɨ yu'uxari jetze, eecan mu huataujtyamua'ave a'ini naa pu hua'uta'a aɨjna ɨ yu'uxari. 32Ajta, aɨjna ɨ Judás, ajta aɨjna ɨ Silas, aɨ mu rujɨɨmua'a mana'a antyujmua'areeraca'a majta maɨjna cɨn mej mi tyu'utaxaj ɨ Dioj jetze ma'acan. Aɨj mu cɨn ca'anijra'a eihua hua'uta'a ɨ hue'ihuaamua'a aɨjna cɨme'e ɨ mej tihua'uta'ixaa. Rɨ'ɨ mu tyamua'a naa tihua'uta'a. 33Matɨ'ɨj mi a'atzu maun a'atee. Aj mu mi maɨn ɨ hue'ihuaamua'ame'en meyan tihua'uta'ixaa maj á'ucɨɨnye ruxé'evi'ira'a cɨme'e a'u maj a'araacɨ, mej mi majtahua'a maun a'ara'asti aɨme jemi ɨ maj huaja'utaityaca'a. 34Ma ajta, aɨjna ɨ Silas, ayaa pu tira'aranajchaca'a tɨ aun a'utyaturan. 35Majta maɨn, ɨ Pablo, ajta ɨ Bernabé, aɨ mu auna a'utyajturaa aujna Antioquía. Majta jamuan ɨ seica, mauche'e mu metihua'amua'atyajca'a. Majta tihue'ixaatya'acaa ɨ nyuucari cɨme'e tɨ cɨme'en raxaj ɨ tavastara'a. 36A'atzu a'atyeevi'ica, aj pu i aɨn ɨ Pablo ayan tiraata'ixaa aɨjna ɨ Bernabé tɨcɨn: ―Tiche'e tyajtahua'a huaja'uva'amuaare ɨ ta'ihuaamua'a ɨ maj maun a'uchaatɨme nain japua a'u tyej teri huaja'uta'ixaa ɨ nyuucari tɨ cɨme'en raxaj ɨ tavastara'a, tyata'aj raamua'aree a'ij tɨ ye'i tihua'avaɨre'e. 37Ajta aɨn ɨ Bernabé, aɨj pu húavi'itɨjma'a aɨjna ɨ Juan, tɨ ajta ayan antyahuaa tɨcɨn Marcos. 38Ma ajta aɨjna ɨ Pablo, capu ra'avi'itɨmɨ'ɨca'a a'ini aɨ pu Marcos aun huaja'uhua'axɨ ajna a'ahua'a u Panfilia. Capu che'e ti'imuara'acaa hua'a jamuan. 39Eihua mu huaujtya'axɨ. Aɨj mu cɨn rusáaxu'ima'a a'ucɨ́jxɨ. Ajta aɨjna ɨ Bernabé, aɨ pu xaa ya'uvi'itɨ aɨjna ɨ Marcos. Baarcu jetze mu a'ucɨj mej mi maun a'ara'asti aujna u Chipre. 40Ajta aɨn ɨ Pablo, aɨ pu ra'antihuau aɨjna ɨ Silas. Majta maɨn ɨ hue'ihuaamua'a, aɨ mu raijca ɨ Dioj ɨ tɨ hua'uchaɨn ɨ tavastara'a aɨme ɨ maj hua'apua. Matɨ'ɨj mi a'ucɨ́j. 41Aa mu a'uré'enye ajna u Siria, ajta aujna Cilicia. A'u tɨ na'a a'u maj e'etyujsa'ɨri u teyujta'a, aɨ mu ca'anijra'a hua'uata'aca ɨ ru'ihuaamua'a.

will be added

X\