Los Hechos 13

1Meenti, ajna a'ahua'a, chajta'a tɨ ayan tyaja'arajtyahuaa tɨcɨn Antioquía, au mu a'utyáuuca'a ɨ tyaɨte ɨ maj tya'atzaahuate'e. Seica mu tí'ixajtacaa ɨ Dioj jetze ma'acan, majta seica mu tihua'amua'atyajcaa ɨ tyaɨte. Ai mu aɨn pueen aɨjna ɨ Bernabé, ajta aɨjna ɨ Simón, tɨ ajta ayan antyahuaaca'a tɨcɨn tɨ xu'umuara'a. Ajtahua'a aɨjna ɨ Lucio tɨ Cirene e'ema'acan, ajta ɨ Manaén. (Aɨjna ɨ Manaén, aɨ pu amiincura'an pu eenya'a ɨ Herodes tɨ tie'ijtacaa nain japua u Galileeya.) Ajta pu aɨn aun a'utyavaaca'a aɨjna ɨ Saulo. 2A'anaj mu tyenyuuva'a majta rú'itzi'iva'acaa, aj pu i aɨn xaijnyu'ucara'ara'an ɨ Dioj ayan tihua'uta'ixaa tɨcɨn: ―Sahua'ave'evi'itɨchi samɨjna mɨ Bernabé, sajta samɨjna mɨ Saulo mata'aj hui meyan tyu'utyavaɨre'en maɨjna cɨme'en nyej nyeri tihua'utaiti'iri'i. 3Aj mu mi raatahuaviiri'i ɨ Dioj, majta ru'itzi'iva'a. Matɨ'ɨj mi hua'ava'amuara'axɨ ɨ hua'amuutze'e. Aj mu mi hua'utaityaca'a maj nu'u a'ucɨɨne. 4A'ini aɨjna ɨ xaijnyu'ucara'ara'an ɨ Dioj, aɨ pu hua'utaityaca'a aɨjna ɨ Bernabé, ajta aɨjna ɨ Saulo, au mu pujme'en a'ucɨj aujna a'ahua'a, chajta'a tɨ ayan tyaja'arajtyahuaa tɨcɨn Seleucia. Aj mu mi atyaacɨ ɨ baarcu jetze. Matɨ'ɨj mi aun jetze pujme'en antacɨj seij chuejra'a japua tɨ a'araahuachi tɨ ayan tyaja'arajtyahuaa tɨcɨn Chipre. 5Au mu vejli'i e'ejteenye aujna a'ahua'a baarcu tɨ a'utéecha'aca. Ayaa pu tyaja'arajtyahuaa ɨ chajta'ana tɨcɨn Salamina. Matɨ'ɨj mi autyajhuii mej tihua'uta'ixaate'en a'ij tɨ tihua'uta'ixaa ɨ Dioj. Aú pu tihue'ixaatya'acaa hua'ateyuu tzajta'a aɨmej ɨ mej Israel jetze ajtyama'acan. Ajta aɨjna ɨ Juan, aɨ pu hua'a jamuan huama'acaa, ajta pu aɨn hua'avaɨra'acaa. 6Nain japua mu u'ucɨɨnyacaa tɨj na'a a tyaja'aráahuachi. Matɨ'ɨj mi maun a'ará'a chajta'a, tɨ ayan tyaja'arajtyahuaa tɨcɨn Pafos. Au mu ra'antinajchaca'a seij ɨ tɨ Israel jetze ajtyama'acan tɨ ayan antyahuaaca'a tɨcɨn Barjesús. Támua'aree aɨjna. Ajta tí'ihue'itaca tɨ nu'u ti'ixaxa'ata'a ɨ Dioj jetze ma'acan. 7Aɨjna tɨ támua'aree, aɨ pu ravaɨra'acaa ɨ tajtuhuan ɨ tɨ cɨn antyujmua'aree. Ayaa pu antyahuaaca'a aɨjna ɨ tajtuhuan tɨcɨn Sergio Paulo. Eecan pu tyá'umua'areeracaa aɨjna ɨ tajtuhuan. Aj pu i hua'utaijtaca'a aɨjna ɨ Bernabé, ajta aɨjna ɨ Saulo aɨjna cɨme'e tɨ aɨn tajtuhuan ayan ti'ijxe'eva'acaa tɨ hua'unamua a'ij tɨ een cɨn huaja'utaityaca'a ɨ Dioj. 8Ajta aɨn tɨ támua'aree, aɨ pu ayan antyahuaaca'a tɨcɨn Elimas. Aɨ pu hua'a jetze ma'acan huatyeechaxɨ tɨ'i cai tya'antzaahuate'en aɨjna ɨ tajtuhuan. 9Ajta aɨn ɨ Saulo, tɨ ajta ayan antyahuaa tɨcɨn Pablo, aɨ pu aɨjna jetze araujca'anyajca'a ɨ xaijnyu'ucara'ara'an ɨ Dioj. Aj pu i ra'araaseij tyamua'a naa. 10Tɨ'ɨqui ayan tiraata'ixaa tɨcɨn: ―Muaa pa tí'ihue'itaca, ɨ tɨ tiyaaru'u ataata pueen, muaa pa cai raxe'eve'e naijmi'i tɨj na'a tɨ í'ixa'apɨ'ɨn. ¿Ni qui hui pacai a'anaj ra'antipua'arite'esin paj cai muaa tihua'antyu'uuni'ira'an mej meyan rɨcɨ a'ij tɨ ti'ijxe'eve'e ɨ Dioj? 11Pu'uri Dioj pueijtzi muaata'asin ijii. Pua'aracúuni paj pua'ame. Capej hui che'e ma'unyeeri pua'ame tujca'ari tzajta'a. Tɨ'ɨqui ayan te'irajraa a'ij tɨ tiraata'ixaa aɨjna ɨ Pablo. Tyamua'a pu tya'aracúuni'i a'araa aɨjna tɨ támua'arajcaa. Cu xuee tɨ cuj huatyatɨca'are ɨ jemin, ajta cumu tɨ huame'en queeniste'e. Aj pu i a'atɨ huáhuau tɨ ra'anaví'ira'a, ayan tɨcɨn capu mauunyee. 12Ajta aɨn ɨ tajtuhuan, tɨ'ɨj raaseij a'ij tɨ ti'itɨ huarɨj, tɨ'ɨqui rá'antzaahua a'ini rɨ'ɨ pu naa tira'utaseij a'ij maj ye'i tihua'umuá'ate maɨjna cɨme'e ɨ tavastara'a tɨ ranyuuca. 13Aj mu mi a'ucɨj, aɨjna ɨ Pablo, majta maɨjna ɨ maj jamuan á'ujhua'anya'a. Au mu atyaacɨ ɨ baarcu jetze. Matɨ'ɨj mi maun a'ure'enyáa ajna a'ahua'a seij chuejra'a japua tɨ ayan tyaja'arajtyahuaa tɨcɨn Panfilia. Au mu a'ará'a ajna chajta'ana japua tɨ ayan tyaja'arajtyahuaa tɨcɨn Perge. Tɨ'ɨqui aɨjna ɨ Juan, au pu huaja'utyatuaaxɨ. Ajta aun a'iraanye u Jerusalén. 14Majta maɨn ɨ seica, aɨ mu huiiraacɨ aujna Perge. Matɨ'ɨj mi maun a'ará'a ajna a'ahua'a aɨjna chuejra'a japua tɨ ayan tyaja'arajtyahuaa tɨcɨn Pisidia. Matɨ'ɨj mi maun a'ará'a aujna Antioquía. Au mu a'utyajrupi hua'a teyuu tzajta'a aɨjna xɨcajra'a mej jetzen rusa'upi. Matɨ'ɨj mi huatyára'asaca'a. 15Aj mu mi seica ra'ujijve ɨ yu'uxari ɨ tya'anxɨvi, majta ɨ seica ɨ yu'uxari ɨ maj tya'uyu'uxaca'a ɨ mej ti'ixaxa'ata'a ɨ Dioj jetze ma'acan. Matɨ'ɨj mi ɨ mej tie'ijta teyujta'a, aɨ mu meyan tihua'uta'ixaa tɨcɨn: ―Ta'ihuaamua'a, tɨ pua'a ti'itɨ sahue'ixaatya'acu ɨ tyaɨte, e'eyan sahua'utá'ixaate'e ijii. 16Aj pu i aɨ a'utyeechaxɨ aɨjna ɨ Pablo. Tɨ'ɨj i rumuajca'a cɨn hua'uta'ijmɨjri'i tɨcɨn maj cai a'ij tyáruaasime'en. Ayaa pu tihua'uta'ixaa tɨcɨn: ―Muan tyetyaca mɨ saj Israel jetze ajtyama'acan, muan mɨ saj sajta ra'atzaahuate'e ɨ Dioj, xaanamuajri'i hui seijna i nyuucari. 17Aɨjna ɨ hua'aDioj ɨ mej uyé'esise'ira'a aujna Israel, aɨ pu hua'ave'evi'itɨ aɨme ɨ taya'upuacɨ'ɨstyamua'a. Aj pu i aɨn hua'utamuí'ire eihua matɨ'ɨj mauj maun e'echajca'a a'u maj cai chuej e'ejchaɨca'a. A mu e'echajca'a maujna a'ahua'a seij chuejra'a japua tɨ ayan tyaja'arajtyahuaa tɨcɨn Egipto. Aj pu nu'u i Dioj hue'irajtuaa, aujna chuejra'a japua, a'ini aɨ pu ayan hua'umuá'amuatya'acaa. 18’Aɨ pu nu'u hua'a cɨme'e hua'uviicue'ire hua'apuate ninye'ira'a matɨ'ɨj á'ujhua'anya'a ajna a'ahua'a ɨtzitá. 19Ajta arahua'apuaca pu antipua'ari ɨ tyaɨte ɨ maj maun a'uchaatɨma'acaa ɨ seij chuejra'a japua, tɨ ayan tyaja'arajtyahuaa tɨcɨn Canaán. Aj pu nu'u i hua'utapueijve ɨ rutyaɨtestyamua'a aɨme ɨ maj huá'achuéra'acaa ɨ maj anacaican maun e'echajca'a. 20’Ira'atee nu'u a'achu cumu muaacua cieentu japuan muaacuajetze ninye'ira'a tɨ ayan hua'utyaamue'itɨ. Ajta e'eyan Dioj nu'u hua'uta'a ɨ ruyaujmua'a tɨ tihua'utaijte'en jueesi cɨme'e. Ayaa pu nu'u tyauuma'aca asta na'a cai huataseijre aɨjna ɨ Samuel ɨ tɨ Dioj jetze ma'acan ti'ixaxa'ata'a. 21’Aj mu nu'u mi raatahuaviiri'i tɨ Dioj tyu'uta'an tɨ saɨj rey tihua'utaijte'en. Aj pu i Dioj ayan raata'a tɨ seij tihua'utaijte'en. Ai pu nu'u aɨn pueenya'a aɨjna ɨ Saúl tɨ yaujra'an pueen aɨjna ɨ Cis, ɨ tɨ hua'a jetze ajtyama'acantacaa aɨme ɨ maj Benjamín jetze a'iraanye. Saúl pu tihua'utaij a'achu cumu hua'apuate ninye'ira'a. 22’Aj pu nu'u i Dioj ra'ari'iri'i aɨjna ɨ Saúl tɨ tihue'ijtya'acaa. Aj pu i aɨjna huata'a tɨ aɨn ɨ David tihua'utaijte'en rey cɨme'e. Cɨme'en pu nu'u tyu'utaxajtaca'a ɨ Dioj, ayan tɨcɨn: “Nyaa nu hui ra'antihuau nyaijna i David, ɨ tɨ yaujra'an pueen aɨjna ɨ Isaí. Rɨ'ɨ pu xaahui tinaata'asin inyeetzi. Naijmi'i pu ayan ti'irɨni a'ij nyej ti'ijxe'eve'e.” 23Seij tɨ nu'u i'ihuaacɨxa'ara'an aɨjna ɨ David tyaacan, ai pu hui aɨn pueen ɨ Jesús ɨ tɨ Dioj ya'utaityaca'a aɨme jemi ɨ maj Israel a'uchaatɨme tɨ ij hua'a japua huanyuuni. Ayaa pu tya'ara'aste ɨ Dioj aɨjna tɨ cɨme'en tya'ataujratziiri'i. 24’Tɨ'ɨj cai xɨ a a'utaseijre aɨjna ɨ Jesús, aɨ pu hui Juan hua'uta'ixaa aɨmej ɨ maj Israel ma a'uchaatɨme. Ayaa pu tihua'uta'ixaa tɨ nu'u ayan ruxe'eve'e maj huámua'ɨvijhua, ajta maj nu'u saɨque tyu'umua'ati ɨ rutzajta'a. 25Ajta, tɨ ari ajna tyaja'ure'enyejsima'aca ɨ xɨcajra'a tɨ jetzen huamɨ'ɨni ɨ Juan, ayaa pu tyu'utaxajtaca'a aɨjna tɨcɨn: “Canu hui nyaa nyaɨn pɨrɨcɨ ɨ saj rachu'eve'e. Seij pu aɨn pueen, auche'e pu me e'eve'eme. Aɨjna jemi, capu hui ayan tinaavijte'e inyeetzi nyaj ti'itɨj cɨn raatyavaɨre'en ti'itɨj cɨme'e tɨ cɨle'en. Aɨ pu eitze'e va'acan cɨn ti'ityavaa a'ame nyacai inyaa.” 26’Ne'ihuaamua'a, mɨ sej Abraham jetze huanyej, mɨ sajta Dioj jemi tya'atzaahuate'e, mueetzi pu hui jemi a'ame eijna i nyuucari tɨcɨn a'amua japua huanyuuni ɨ Dioj. 27’Ma majta aɨme ɨ maj Jerusalén me e'echajca'a, majta aɨme ɨ maj tihue'ijtya'acaa, camu a'atzu ramua'areeraca'a a'atɨ tɨ pɨrɨcɨ aɨjna ɨ Jesús, camu majta yau'eitaa mua'araa ɨ nyuucari ɨ maj ra'uyu'uxaca'a aɨme ɨ mej mejmi'i ti'ixaxa'ata'a ɨ Dioj jetze ma'acan. Ayaa mu tira'ara'aste maɨjna ɨ nyuucari maɨjna cɨme'e maj ti'itɨj cɨn jetzen tya'ujpuá'ajte maɨjna ɨ Jesús. Camu rɨ'ɨ a'ij maj ra'ujijva'acaa eijna i nyuucari a'ij tɨ ye'i huataujmua'a a'anaj tɨ na'a tɨ'ɨjta ajna tyaja'ure'enyen aɨjna xɨcajra'a ɨ mej jetzen rusa'upi. 28’Camu hui majta a'ij tirajtyau ɨ maj cɨn raamua'aree tɨ ayan tiraavijte'e tɨ aɨn huamɨ'ɨni. Ma majta, aɨ mu Pilaatu huata'ixaa tɨ aɨn raataijta maj nu'u raaje'ica. 29Matɨ'ɨj mi meyan tyuju'uruurá nain tɨj na'a tɨ te'eyu'usi'ihuaca'a aɨjna ɨ yu'uxari jetze, aj mu mi ra'acajtɨɨ ɨ curuu jetze. Matɨ'ɨj mi ra'ava'ana. 30’Aru Dioj pu hui ayan tiraata'a tɨ huatarun ɨ mɨ'ɨchite tzajta'a. 31Ajta aɨn ɨ Jesús, aɨ pu huataujseijrataca'a aɨme jemi ɨ maj anacaican jamuan a'ujhua'anya'acaa tɨ'ɨj aɨn a'arajraa aujna Galileeya, tɨ'ɨj aun a'ará'a anna Jerusalén. Ijii, ai mu hui aɨn pueen ɨ maj tihue'ixaate'e ɨ tyaɨte cɨme'en aɨjna ɨ Jesús. 32- 33’Tyajta ityan, ayaa tu tyaja'amue'ixaate'e tyeijna i nyuucari ɨ tɨ amuaatatyamua'aviste'esin aijna ɨ tɨ cɨn Dioj tya'ataujratziiri'i aɨme jemi ɨ tavaujsimua'acɨ'ɨ. Aɨ pu hui arauraste ityejmi jemi, ityan i tyaj hua'ayaujmua'a. Aɨj pu cɨn arauraste tɨ aɨn raata'a tɨ huatarun ɨ mɨ'ɨchite tzajta'a aɨjna ɨ Jesús. Ayaa pu te'eyu'usi'ihuaca'a ɨ Chuiicari jetze ɨ tɨ hua'apua tɨcɨn: “Muaa paj ni'iyauj. Ijii nu xaa neri inyaa mue'iya'upua na'ame.” 34’Cɨme'en hui aijna i nyuucari tɨ nu'u Dioj ayan tiraata'a tɨ huatarun ajtahua'a ɨ mɨ'ɨchite tzajta'a tɨ'ij cai a'anaj huatepete ɨ tevijra'a, ayaa pu te'eyu'usi'ihuaca'a tɨcɨn: “Ayaa nu che'eta nyana'a tyajamuaata'asin naijmi'ica a'achu pua'amuaca a'ij nyej neri ti'itɨj cɨn tya'atanratziiri'i nyaɨjna ɨ David, ɨ nyaj cɨn tiraata'a, tɨ nyeetzi jemi seijre'e ɨ tɨ xa'apɨ'ɨn een.” 35Aɨj pu hui cɨn ayan te'eyu'usi'ihuaca'a seij jetze ɨ Chuiicari tɨcɨn: “Capaj muaa ti'ita'acare'en tɨ huatepete ɨ tevijra'a aɨjna tɨ muavaɨre'e, tɨ ajta urare'enya'acan cɨn seijre'e mueetzi jemi.” 36’Puj, ayej ti'ayajna xaa, aɨ pu hui ɨ David hua'utyavaɨ ɨ rutyaɨtestyamua'a a'ij tɨ ti'ijxe'eva'acaa ɨ Dioj. Tɨ'ɨqui huamɨ'ɨ, matɨ'ɨj mi ra'ava'ana aɨme jamuan ɨ ruvaujsimua'a tyaaca. Ajta e'eyan huatyejpetzi ɨ tevijra'a, tzɨte'e. 37Ma ajta aɨn ɨ tevijra'a aɨjna tɨ Dioj raata'a tɨ huatarun, capu xaa nya'u huatyejpetzi. 38’Aɨj nu cɨn neyan ti'ijxe'eve'e, ne'ihuaamua'a, saj hui raamua'aree tyatɨj teri tyaja'amue'ixaate'e tɨ Dioj tyajamuaatauuni'ira aɨjna cɨme'e tɨ Jesús huamɨ'ɨ muejmi jetze ma'acan tu i aɨn raatyáuuna ɨ saj cɨn autyajturaa ɨ jemin. 39Aɨj pu jetze hue'irajtuaa naijmi'ica a'achu pua'amuaca mej tya'atzaahuate'e. Aɨ pu hue'iratuaasin naijmi'ica ɨ maj cɨn autyajturaa ɨ Dioj jemi. Ma ajta, aɨjna ɨ yu'uxari tɨ ra'uyu'uxaca'a aɨjna ɨ Moisés tyaacan, capu a'anaj ti'itɨj cɨn hue'iratuaníiche'e. 40’Rɨ'ɨ xu'u muan tɨ'ij cai ayan tyájamuáaruuren a'ij mej mejmi'i tyu'utaxajtaca'a aɨme ɨ mej ti'ixaxa'ata'a ɨ Dioj jetze ma'acan. 41Meyan tɨcɨn: Casi'i, muan xu tya'utaxaahuari'iri'i, che'e utyávatzɨn ɨ a'amuatzajta'a. Sajta muan antipua'are, a'ini ayaa nu rɨni ijii sej che'e ruuri, ti'itɨj nu cɨn neyan rɨcɨ ɨ saj cai a'anaj ra'antzaahuate'esin. Capu amɨn a'ij, tɨ pua'a a'atɨ ayan tyajamue'ixaate'en. 42Aj mu mi huiiraacɨ u teyujta'a. Matɨ'ɨj huiiracɨɨnya, aj mu mi seica raata'inee tɨ tihua'uta'ixaate'en eitze'e aɨjna cɨme'en seij jetze ɨ xɨcaj mej jetzen rusa'upi. 43Tɨ'ɨj antipua'araca'a ɨ mej raanamuajri'i ɨ nyuucari, matɨ'ɨj mi eihua tyaɨte a'ucɨj jamuan aɨjna ɨ Pablo, majta aɨjna ɨ Bernabé. Seica mu aɨn puéenya'a ɨ maj Israel jetze ajtyama'acan, majta seica ɨ maj raataxe'eve ɨ hua'aye'ira, aɨ mu pueen ɨ maj Israel e'ema'acan. Aɨjna ɨ Pablo, ajta aɨjna ɨ Bernabé, eihua mu tihue'ixaatya'acaa. Mahueijcate maj nu'u raahuauni ɨ tɨ nu'u Dioj ayan tiraatyatuaasin. 44Tɨ'ɨj ajtahua'a tyaja'ure'enye ajna xɨcajra'a mej jetzen rusa'upi, naijmi'i mu e'etyujsaɨj ɨ maj maun a'uchaatɨme anna Jerusalén, mej mi raanamua ɨ nyuucari tɨ cɨn tie'ijta aɨjna ɨ Dioj. 45Matɨ'ɨj mi maɨn ɨ mej Israel jetze ajtyama'acan, matɨ'ɨj hua'useij mej eihua tyaɨte tyujsaɨj, eecan mu hua'anchueere. Aj mu mi autyajhuii maj maɨjna jetze tya'ujpuá'ajte'en ti'itɨj cɨme'en maɨjna ɨ Pablo. A'ij mu pua'a ti'ijreevacaa a'ij tɨ tí'ixajtacaa. 46Matɨ'ɨj mi hua'a jetze huatyaujca'ane aɨjna ɨ Pablo, ajta aɨjna ɨ Bernabé. Matɨ'ɨj mi meyan tihua'uta'ixaa tɨcɨn: ―Aɨ pu hui ruxe'eve'e tyaj anacaican tyajamue'ixaate'en ɨ nyuucari tɨ jetzen ra'axa ɨ Dioj, mueetzi jemi mɨ saj Israel jetze ajtyama'acan. A'ini caxu ra'ancura'asin, capu ajta a'ij tyajamua'amitejte'e tɨ ayan tyajámuaavijte'e sej seyan ruuri xa'ara'ani ɨ Dioj jemi tɨj na'a rusen cɨme'e. Aɨj tu cɨn, teri u a'uju'un hua'a jemi ɨ maj cai Israel jetze ajtyama'acan. 47Yaa pu hui te'eme, a'ini ayaa pu titaataij ɨ tavastara'a tɨcɨn: Nyaa nu amua'antihuau sata'aj tihua'uta'ixaate'en ɨ maj cai Israel jetze ajtyama'acan, sajta nain japua tɨj na'a iiyan chaanaca japua. Aɨ mu ramua'areeran meijna i nyuucari i nyaj cɨn hue'iratuaasin. Ayaa mu tihua'uta'ixaa. 48Matɨ'ɨj raanamuajri'i ɨ maj cai Israel jetze ajtyama'acan, eecan mu huataujtyamua'ave. Eecan mu rɨ'ɨ tiraata'a ɨ nyuucari tɨ jetzen ra'axa ɨ Dioj. Majta naijmi'i ɨ tɨ Dioj anacaican u huaja'antíhuau mej mi ruuri mua'ara'ani tɨj na'a rusen cɨme'e a'u tɨ e'eseijre'e ɨ Dioj, aɨ mu rá'antzaahua. 49Aɨj pu cɨn, eecan mu hua'uta'ixaa nainjapua aujna chuejra'a japua. Tɨ'ɨj pɨ na'a tɨ tápuaapua'are, eitze'e mu tyaɨte meyan tiraanamuajri'i ɨ nyuucari tɨ cɨn Dioj hue'iratuaasin hasta mana'a cai raanamuajri'i naijmi'i ɨ maj maun a'uchaatɨme. 50Ma majta maɨjna ɨ mej Israel jetze ajtyama'acan, aɨ mu ca'anijra'a hua'uta'a mej mi tinínyu'ucacun seica ɨ uuca ɨ maj eecan ra'atzaahuate'e ɨ Dioj, ɨ uuca maj eitze'e ti'itɨj cɨn ruxe'eva'acaa ɨ chajta'ana. Majta seica ca'anijra'a hua'uta'a ɨ tyetyaca ɨ mej eihua ti'itɨ cɨn ruxe'eva'acaa aujna u chajta'a. Ca'anijra'a mu hua'uta'a mej mi a'ij pua'a hua'uruuren maɨjna ɨ Pablo, majta maɨjna ɨ Bernabé. Aj mu mi hua'utamuari aujna a'u maj a'uchaatɨme. 51Majta maɨn ɨ maj hua'apua, aɨ mu tyu'utyaaca'atzɨ ɨ tyu'ujca'acai tɨ'ij caaxɨn ɨ chuej, mej mi maɨn tyaɨte meyan tiraamua'aree maj autyajturaa ɨ Dioj jemi. Aj mu mi a'ucɨj. Aa mu a'ará'a a'ahua'a chajta'a tɨ ayan tyaja'arajtyahuaa tɨcɨn Iconio. 52Majta maɨn ɨ mej tya'atzaahuate'e, eecan mu huataujtyamua'ave. Majta maɨjna jetze rucá'anyajcaa ɨ xaijnyu'ucara'ara'an ɨ Dioj.

will be added

X\