Los Hechos 12

1Ajta, aɨjna xɨcajra'a jetze, aɨjna ɨ rey ɨ Herodes, aɨ pu autyejche tɨ hua'avivi'i seica ɨ mej tya'atzaahuate'e tɨ'ij a'ij pua'a hua'uruuren. 2Aɨ pu raataijtaca'a maj raaje'ica ɨ Jacobo, ɨ tɨ ja'atzaara'an pueen aɨjna ɨ Juan. Aɨ mu ra'antiveijchaca'a ɨ muura'an. 3A'ini aɨ pu ramua'areeraca'a tɨ hua'aranajchaca'a aɨme ɨ mej Israel jetze ajtyama'acan tɨ aɨn ayan tyu'uruu, aɨ pu ajta huateevi'i aɨjna ɨ Pedro, ajna matɨ'ɨj maɨn tí'iyestyajcaa maɨjna cɨme'e maj racua'aca ɨ pan tɨ cai cujchira'a. 4Ayaa pu aɨjna cɨn huarɨj ɨ Herodes tɨ ra'ityaana aujna carcel. Eihua mu rachaɨca'a meyan muaacua ma'a. Majtahua'a meyee mamuaacua ma'a. Majtahua'a muaacua ma'a. Majtahua'a meyee muaacua ma'a. Ayaa pu aɨn ti'imuajcaa tɨ ajna ru'irajtuaani mej mi raaseij naijmi'i ɨ tyaɨte. Ayaa pu tyu'umuá'a tɨ ayan huarɨni, tɨ'ɨj tya'anaara'an ɨ maj tyu'uyé'este maɨjna cɨme'e canya'axɨ maj cui'ica. 5Aɨj pu cɨn aɨn Herodes rachaɨca'a aɨjna ɨ Pedro. Ma majta ɨ mej tya'atzaahuate'e, aɨ mu a'ujca'anyaacan cɨn rahuauca'a ɨ Dioj jemi maɨjna cɨme'e ɨ Pedro. 6Yaa ruijmua'ate'e yee pu huatyatɨca'araca'a pu ru'irajtuaniche'e mej mi raaseij ɨ tyaɨte, ajta aɨn ɨ Pedro i'icujcaa. A e'ita'a a'ura'aca'itɨ anajɨ'ɨqui'ihuaj cadeena cɨme'e ruɨɨca jetze, ajta rumuajca'a jetze. Majta ɨ xantaaru'u maj hua'apua, aɨ mu ajtatápi'ihuajma'acaa maɨjna jetze ɨ Pedro. Majta seica ɨ xantaaru'u, au mu a e'ityáuuca'a ta'apueerta, maj rachaɨca'a. 7Aj pui'i iye'itzi cɨme'e, saɨj huataseijre jemin. Aɨ pu aɨn pueen saɨj tɨ ti'ivaɨre'e u tajapua ɨ tavastara'a jemi. Ajta uhuanyeeri'icɨra'ajraa aujna u carcel. Aj pui'i raataruurajxɨ aɨjna ɨ tevi. Raajɨste aɨjna ɨ Pedro. Ayan tɨcɨn: ―Ca'anacan, ájchesi. Aj pui'i a á'avatzɨjxɨ ɨ cadeena a chuaata'a aɨjna tɨ cɨn ɨ'ɨqui'ihuaca'a ɨ Pedro. 8Aj pui'i ayan tiraata'ixaa tɨcɨn: ―Uca'achejte'e mua'asiicu'u, ajta ajtá'aca'acaite'e. Aj pu'i ayan huarɨj aɨjna ɨ Pedro. Ajtahua'a ayan tiraata'ixaa aɨjna ɨ tɨ ti'ivaɨre'e u tajapua tɨcɨn: ―Uca'achejte'e mɨ seij mua'acɨɨxu. Pata'aj naatavaj inyeetzi. 9Aj pui'i huiirajraa aɨjna ɨ Pedro, cujta'an aɨjna ɨ tɨ ti'ivaɨre'e u tajapua. Ajta capu ramua'areeraca'a ti ayan ti'ayajna a'ij tɨ ti'itɨ raruurajca'a aɨjna jamuan ɨ tɨ ti'ivaɨre'e u tajapua. Capu ramua'areeraca'a ti ayan ti'ayajna nusu ti'imaaracaa na'a. 10Matɨ'ɨj mi maun a'uré'enye a'u tɨ a'utyavaaca'a saɨj ɨ xantaaru'u tɨ rachaɨca'a ɨ carcel. Majta ayée seij jemi ɨ xantaaru'u. Aj mu mi maɨn a'uré'enye a'utɨ tyapuusti'i pueertara'a e'ityejvee a'u tɨ a'atanyaan ɨ juye. Tɨ'ɨqui antaujcu rusaɨj aɨjna ɨ pueerta. Aj mu mi huiiraacɨ. Aɨj mu jetze a'ucɨ́j ɨ juye. Matɨ'ɨj mi raatyaaxɨjte a'u tɨ hua'ase ɨ juye. Iye'itzi cɨn pu á'uraa aɨjna ɨ tɨ ti'ivaɨre'e u tajapua. 11Aj pui'i raamua'areeri'i aɨjna ɨ Pedro tɨ ayan ti'ayajna. Ayaa pu tyu'utaxajtaca'a tɨcɨn: ―Nu'uri ramua'aree tɨ ayan ti'ayajna tɨ tavastara'a seij u a'utaityaca'a tɨ ti'ivaɨre'e u tajapua tɨ'ij aɨn nu'irajtuaani tɨ'ij cai ayan tinaaruuren a'ij tɨ ti'ijxe'eve'e aɨjna ɨ Herodes, majta aɨme ɨ mej Israel jetze ajtyama'acan. 12Tɨ'ɨj aɨn raamua'areeri'i tɨ ayan ti'ayajna, aj pui'i á'uraa. Au pu a'ará'a Mariiya tɨ e'eche, naanajra'an aɨjna ɨ Juan tɨ ajta ayan antyahuaa tɨcɨn Marcos. Au mu tyujsaɨj eihua ɨ tyaɨte. Aɨ mu rahuauca'a ɨ Dioj jemi. 13Tɨ'ɨqui aɨn te'ejtyatu'asixɨ ajna ta'apueerta ajna ta'antyéninyei. Aj pui'i saɨj huiirajraa tɨ'ij raaseij a'atɨ tɨ pɨrɨcɨ. Tyamueij aɨjna, jɨita'a tɨ ayan antyahuaa tɨcɨn Rode. 14Tɨ'ɨj aɨn raanamuajri'i tɨ huajijhuaca'a, aɨ pu raamua'areeri'i tɨcɨn aɨ pu pɨrɨcɨ ɨ Pedro. Capu ajta tya'antacú. Ayaa pu huarɨj, a'ini huapɨ'ɨ pu rutyamua'ava'acaa aɨjna ɨ tyamueij. Tɨ'ɨqui a'utáichajraa tɨ'ij huaja'uta'ixaate'en tɨ nu'u a a'utyavaaca'a a ta'apueerta aɨjna ɨ Pedro. 15Aj mu mi meyan tiraata'ixaa maɨjna ɨ tyamueij tɨcɨn: ―Pa'atɨmue'i papu'u. Ajta aɨn, eihua pu ayan tí'ixajtacaa tɨ ayan ti'ayajna, tɨcɨn: ―Aɨ pu hui pɨrɨcɨ. Majta maɨn, meyan tɨcɨn: ―Capu aɨn pueen. Xaijnyu'ucara'ara'an pu pueen. 16Meenti auche'e aɨn Pedro, te'ejtyatua'axa'a ɨ pueerta jetze. Aj mu mi xaa tya'antacú. Matɨ'ɨj raaseij, eecan mu a'ij tya'utaseij. 17Rumuajca'a pu cɨn hua'uta'ixaa aɨjna ɨ Pedro mej mi cai che'e a'ij tyáruaasime'en. Aj pui'i hua'uta'ixaa a'ij tɨ ye'i tiru'irajtuaa u carcel aɨjna ɨ tavastara'a. Ajta ayan tihua'uta'ixaa tɨcɨn: ―Sata'aj raata'ixaate'en saɨjna ɨ Jacobo, sajta ɨ seica ɨ ta'ihuaamua'a. Aj pu'i á'uraa. Tɨ'ɨqui u a'ahua'a yee a'ará'a. 18Yaa ruijmua'ate'e yee cumu tapua'arijma'aca. Eihua mu á'upuaapua'ara'a ɨ xantaaru'u. Camu ramua'areeraca'a a'ij tɨ ti'itɨj raaruu aɨjna ɨ Pedro. 19Eihua pu raahuau aɨjna ɨ Herodes. Capu ráatyau. Aj pui'i aɨme huataihua'uri'i ɨ xantaaru'u maj rachaɨca'a. Ajta e'eyan aɨn Herodes hua'utaijtaca'a maj nu'u hua'ucui'ini aɨme ɨ xantaaru'u. Aj pui'i aɨn huiirajraa u Judea aɨjna ɨ Herodes. Tɨ'ɨqui aun a'ará'a ajna Cesarea. Au pu a'atee. 20Ajta aɨn ɨ Herodes, tyamua'a pu tihuá'ajaaxaijvi'iracaa aɨme ɨ maj aun a'uchaatɨme aujna u Tiro, majta ɨ maj Sidón e'eche. Aɨ mu tyujsaɨj. Matɨ'ɨj mi naijmi'i u a'atanye aujna Cesarea. Mejxe'eva'acaa mej tyu'uxáj maɨjna jamuan ɨ Herodes. Matɨ'ɨj mi seij huamue'itɨ tumin cɨme'e. Aɨ pu aɨn pueen ɨ tɨ ravaɨra'acaa aɨjna ɨ rey. Ayaa pu antyahuaaca'a aɨjna ɨ a'atɨ tɨcɨn Blasto. Aɨ pu hua'utavaɨ mej mi tyu'uxáj jamuan. Matɨ'ɨj mi raatahuaviiri'i maɨjna ɨ Herodes tɨ'ij cai che'e huá'ajaaxaijvi'ira aɨme, silu che'e rɨ'ɨ tie'enyen. Majta ratzɨɨnya'acaa a'ini au pu tyaja'uve'eye'icaa ɨ tihua'acue'ira ajna a'ahua'a aɨjna chuejra'a japua a'u tɨ tyeje'ijta aɨjna ɨ Herodes. 21Aɨjna xɨcajra'a jetze maj raaxa'apɨ'ɨntare, aɨ pu ucaujchejte ɨ rusiicu'u ɨ maj cɨn raamua'ati tɨ aɨn i'irey. Aj pui'i acaayeijxɨ ɨ ɨpuari jetze. Tɨ'ɨqui tihua'uta'ixaa naijmi'ica ɨ tyaɨte. 22Matɨ'ɨj raanamuajri'i maɨjna ɨ Herodes, ayaa mu tityeetejiihuajraa tɨcɨn: ―Dioj pu hui pɨrɨcɨ mɨ tɨ ti'ixa, capu tevi pueen. 23Ajta aɨn ɨ Herodes, capu rɨ'ɨ tiraata'a ɨ Dioj. Aɨj pu cɨn e'eyan saɨj ɨ tɨ ti'ivaɨre'e u tajapua ɨ tavastara'a jemi, aɨ pu tiraacuí'ini. Tɨ'ɨqui tijcui'inyaca'a. Matɨ'ɨj mi maɨn chu'inute raatyajcɨ'ɨcɨ maɨjna ɨ Herodes. Aj pui'i huamɨ'ɨ. 24Majta, eihua mu raanamuajri'i ɨ nyuucari ɨ maj tavastara'a jetze ma'acan tyu'utaxajtaca'a. Anacaican, aɨ mu raanamuajri'i aɨme ɨ maj a vejli'i antachaatɨme, majta ajca'ihua'ɨmɨ yee maj a'uchaatɨme, majtahua'a ajca'ihua'ɨmɨ maj a'uchaatɨme. Naijmi'ique'e pu huanamuáarajraa. 25Ajta aɨn ɨ Bernabé, ajta ɨ Saulo, matɨ'ɨj arauraste ɨ mej tihuaja'utaiti'iri'i, aɨ mu a'ucɨj aujna Jerusalén. Majta ya'uvi'itɨ maɨjna ɨ Juan tɨ ajta ayan antyahuaaca'a tɨcɨn Marcos.

will be added

X\