Los Hechos 11

1Aj mu mi aɨme ɨ maj tamuaamuata'a japuan hua'apua ara'ase, majta aɨme ɨ mej ihuaamua'ame'en pueen ɨ maj maun a'uchaatɨme nainjapua ɨ Judea, aɨ mu raamua'areeri'i tɨcɨn aɨ mu majta ra'ancura'a ɨ nyuucari ɨ tɨ aɨjna jetze a'uve'eme ɨ Dioj aɨme ɨ mej seij chuejra'a japua e'ema'acan. 2Tɨ'ɨj aɨn Pedro anna a'ará'a anna Jerusalén, majta e'eyan aɨme ɨ mej tya'atzaahuate'e, ɨ maj ra'antisi'iche ɨ runavij, a'ij mu pua'a tiraatajee maɨjna. 3Meyan tɨcɨn: ―A'ij paj pua'a huarɨj a'ini aɨme paj huaja'uvá'amuaaraca'a ɨ maj cai ra'antisi'iche ɨ runavij, pajta hua'a jamuan tyu'ucuaa.―Ayaa mu tyu'utaxajtaca'a aɨme. 4Aj pui'i Pedro autyejche tɨ tihua'uta'ixaate'en nain a'ij tɨ ti'itɨ huarɨj. 5Ayan tɨcɨn: ―Au nu chajta'a a'utyavaaca'a ajna Jope. Nyaraatyáhuausima'acaa ɨ Dioj jemi. Aj pui'i ti'itɨ inyeetzi jemi huataseijre, saavana ti'itɨ tɨ ute'e a e'icaanye. Muaacuaque'e pu ajtaujhue'isquiinajmee, ajta antijɨ́'ɨqui'ihuacaa. An pu hui e'icaanye a'u nyaj a'ujcatii. 6Nyaa nu raseijracaa. Aj nu ni aɨme huaseij aɨjna tzajta'a ɨ saavana eihua mu animaalis, ɨ maj muaacuaca ajtyaɨɨcajmee, majta ɨ maj simuaruuni, majta ɨ maj chuaata'a huacɨ'ɨca ɨ maj a'usinuurejye'i, majta ɨ maj rá'ara'ive. 7’Nyatɨ'ɨj ni nyaɨjna huanamuajri'i. Aj pui'i a'atɨ ayan tinaata'ixaa tɨcɨn: “¡Pedro, ájchesi! Iiya'a huá'ucui'i, pata'aj huá'ucua'ani.” 8Ayaa nu hui tyu'utanyúu tɨcɨn: “Nyavastara'a, canu xaa nya'u, a'ini canu a'anaj raacuaa ti'itɨ tɨ cai tata'aca ɨ taye'irá nusu ti'itɨ tɨ xana'avi'ire'e.” 9’Ute'e pu hui pujme'en ajtahua'a a'atɨ ayan tinaata'ixaa tɨcɨn: “A'ini nain pu tyu'utaahuaca'a ɨ Dioj, capej che'e peyan ti'ixajta yee xana'avi'ire'e.” 10Hueica pu ayan tyuju'urɨj. Ajta e'eyan tíraa ute'e u tajapua aɨjna ɨ saavana. 11’Cɨme'en pu'u tíraa, seica mu hui u a'ará'a aujna a'u nyaj a'ucatii inyaa. Ma hueicaca'a aɨme. Au mu nu'u huaja'utaityaca'a u Cesarea mej mi naahuauni inyeetzi. 12Ajta aɨn ɨ xaijnyu'ucara'ara'an ɨ Dioj, aɨ pu naataij nyaj nu'u a'ura'ani hua'a jamuan, nyaj nu'u cai hua'atzɨɨnya'a. Aɨ mu majta a'ucɨj nya jamuan aime i ta'ihuaamua'a i maj arájsevi. Naijmi'i tu a'utyajrupi u chi'ita a'u tɨ e'eche aɨjna ɨ a'atɨ. 13’Aɨ pu taata'ixaa tɨ nu'u saɨj huataseijre ajna a'u tɨ e'eche. Aɨjna ɨ tevi, aɨ pu aɨn pueenya'a saɨj tɨ nu'u ti'ivaɨre'e u tajapua ɨ Dioj jemi. Ayaa pu nu'u tiraata'ixaa aɨjna ɨ tevi tɨcɨn: “Pata'aj hua'utaite mɨ tyetyaca aujna u Jope mej mi u ya'utajeeve aɨjna ɨ Simón tɨ ajta ayan antyahuaa tɨcɨn Pedro. 14Aɨ pu nu'u timuaata'ixaate'esin a'ij tɨ ye'i Dioj timuaatauuni'ira ajta naijmi'ica aɨme a'atyaɨtestyamua'a.” Ayaa pu hui tiraata'ixaa aɨjna ɨ a'atɨ. 15’Nyatɨ'ɨj autyejche nyej tihua'uta'ixaate'en, aj pui'i yava'acaanye aɨjna ɨ xaijnyu'ucara'ara'an ɨ Dioj. Aɨ pu hui a'utyajturaa hua'a tzajta'a aɨme. Ayaa pu che'etana'a tyu'utyajturaa ityejmi tzajta'a. 16Aj nu ni ra'utamua'areeri'i nyaɨjna ɨ tɨ ayan tyu'utaxajtaca'a ɨ tavastara'a tɨcɨn: “Ayaj xaa nya'u ti'ayajna, aɨjna cɨme'e ɨ Juan, aɨ pu nu'u hua'umuaɨ'ɨhuacara'a jaj cɨme'e. Aru aɨ pu xaijnyu'ucara'ara'an ɨ Dioj huatyaturaasin mueetzi tzajta'a.” Ayaa pu tyu'utaxajtaca'a aɨjna ɨ tavastara'a. 17’Aɨj pu cɨn, tɨ pua'a Dioj ayan che'etana'a tihua'utapueijve'en ɨ tɨ ajta taatapueijve ityejmi tyatɨ'ɨj rá'antzaahua aɨjna ɨ Jesús ɨ tɨ Dioj an yá'ujra ɨ ɨpuari japua, a'ini auj ti'irɨ'ɨri nyaj ra'antimue'itɨn ɨ Dioj.―Ayaa pu'u tyu'utaxajtaca'a aɨjna ɨ Pedro. 18Matɨ'ɨj raanamuajri'i maɨjna i'ihuaamua'ame'en ɨ maj maun a'uchaatɨme aɨnna Jerusalén, camu che'e ti'itɨ xajtaca'a, silu rɨ'ɨ mu tiraata'a ɨ Dioj tɨcɨn: ―Huatyaxcui'ihua, pu'uri hui Dioj hua'uta'a ɨ mej seij chuejra'a japua e'eche mej mi jajcuacan cɨn tyu'umua'ati mej mi ruuri mua'ara'ani tɨj na'a rusen cɨme'e. 19Majta maɨn ɨ maj a'ucɨ́jxɨ maɨjna cɨme'e ɨ maj seica raaje'ica maɨjna ɨ Esteban, majta a'ij pua'a hua'uruu aɨme ɨ mej tya'atzaahuate'e, aɨ mu a'ɨmɨ a'ucɨ́jxɨ. Au mu a'ará'a ajna a'ahua'a Fenicia, majta seica ajna a'ahua'a Chipre, majta seica ajna a'ahua'a tɨ ayan tyaja'arajtyahuaa tɨcɨn Antioquía. Aɨme mu huata'ixaa ɨ nyuucari ɨ mej Israel jetze ajtyama'acan. 20Majta ɨ seica ɨ mej Chipre e'ema'acan aɨme jamuan ɨ mej Cirene e'ema'acan, aɨ mu maun a'atanye maujna u Antioquía. Aj mu mi autyajhuii maj hua'uta'ixaate'en aɨme ɨ maj hua'anyuuca cɨn ti'ixaxa'a ɨ griego. Aɨj mu hua'uta'ixaa ɨ nyuucari ɨ tɨ tyu'utyamua'aviste'e aɨjna jetze ma'acan ɨ tavastara'a aɨjna ɨ Jesús. 21Eihua pu hua'utavaɨ ɨ tavastara'a. Aɨj mu cɨn mui'itɨ rá'antzaahua. Majta ra'ancure'evi'itɨ ɨ tavastara'a. 22Majta maɨn ɨ mej tya'atzaahuate'e, ɨ maj maun a'uchaatɨme anna Jerusalén, matɨ'ɨj maɨn raanamuajri'i a'ij tɨ ti'itɨ huarɨj, aɨj mu huataityaca'a ɨ Bernabé aujna Antioquía. 23Tɨ'ɨj aun a'ará'a aɨjna ɨ Bernabé, tɨ'ɨqui raaseij tɨ Dioj rɨ'ɨ tyu'uruu hua'a jemi. Aɨj pu cɨn eecan huataujtyamua'ave aɨjna ɨ Bernabé. Ayaa pu tihua'uta'ixaa maj nu'u u huatyaujca'anen ɨ rutzajta'a mej mi mauj ra'atzaahuatya'a ɨ tavastara'a. 24Ayaa pu tyu'uruu aɨjna ɨ Bernabé, a'ini rɨ'ɨ pu ti'itevistacaa. Eecan pu aɨjna jetze araujca'anyajca'a ɨ xaijnyu'ucara'ara'an ɨ Dioj. Ajta eihua pu tya'atzaahuatya'acaa. Aɨj pu cɨn eihua hua'utyaamue'itɨ ɨ tyaɨte mej mi rá'antzaahuate'en maɨjna ɨ tavastara'a. 25Tɨ'ɨjta'i á'uraa aɨjna ɨ Bernabé aujna u Tarso tɨ i raahuauni aɨjna ɨ Saulo. 26Tɨ'ɨqui ráatyau. Aj pui'i aun ya'araavi'itɨ aujna Antioquía. Au mu a'atee hua'a jamuan ɨ mej tya'atzaahuate'e a'achu cumu sei ninye'ira'a. Majta tihua'umuá'ate eihua ɨ tyaɨte aɨjna ɨ Bernabé, ajta aɨjna ɨ Saulo. Aujna u Antioquía, majta maɨn ɨ tyaɨte anacaican mu meyan hua'utamuájtyacaa tɨcɨn cristianos mu pueen. 27Aɨjna xɨcajra'a jetze, seica mu u a'ará'a aujna Antioquía Jerusalén maj a'araacɨ. Aɨ mu maɨn pueenya'a ɨ maj Dioj jetze ma'acan ti'ixaxa'a. 28Ayaa pu antyahuaaca'a saɨj tɨcɨn Agabo. Aɨ pu a a'utyeechaxɨ a e'ita'a hua'a tzajta'a. Aɨj pu jetze araujca'anyajca'a ɨ xaijnyu'ucara'ara'an ɨ Dioj, tɨ'i ayan tihua'uta'ixaate'en tɨ nu'u huatuuri'ihua a'ame nainjapua iiyan chaanaca japua. (Ayaj xaa nya'u tyuju'urɨj tɨ'ɨj aɨn tie'ijtacaa aɨjna ɨ rey tɨ ayan antyahuaa tɨcɨn Claudio.) 29Aj mu mi maɨn ɨ mej tya'atzaahuate'e ɨ maj maun a'uchaatɨme aujna Antioquía, aɨ mu raaxa'apɨ'ɨntare maj tihua'utaiti'i aɨme ɨ ru'ihuaamua'a aujna Judea ɨ maj cɨn huataujvaɨre'en, seij majta seij mej meyan tihua'utapueijve'en a'achu maj caj ti'ijviicue'i. 30Ayaa mu huarɨj. U mu tihuaja'utaiti'iri'i nain ɨ mej tihua'utapueijve. Ajta aɨn ɨ Bernabé, aɨjna jamuan ɨ Saulo, aɨ mɨ hua'utatui ɨ hua'avaujsimua'a aɨme ɨ maj maun a'utyáuuca'a anna Jerusalén.

will be added

X\