Los Hechos 1

1Ninyauusi Teófilo, seij jetze ɨ yu'uxari ɨ tɨ anajca, aɨj nu jetze nyeri ra'uyu'uxaca'a nain a'ij tɨ huarɨj aɨjna ɨ Jesús, nyajta nain cɨme'e a'ij tɨ tihua'uta'ixaa ɨ tyaɨte. 2Ajta, aɨn ɨ Jesús, hua'ajtavi'itɨ aɨme ɨ maj tamuaamuata'a japuan saɨj maj ara'ase. Tɨ'ɨj tihua'utáijte'esima'a nain cɨme'e, aɨjna ɨ xaijnyu'ucara'ara'an ɨ Dioj, aɨ pu raata'a tɨ Jesús tihua'utaijte'en a'ij mej ti'itɨ huáruuren tɨj na'a tɨ yu auca'itɨ a'ame. Tɨ'ɨqui xaa á'uvi'itɨchi'ihuaca'a aɨjna ɨ Jesús u tajapua. 3Anacaican, tɨ'ɨj huamɨ'ɨ ɨ Jesús ajta e'eyan huatarú hua'a tzajta'a ɨ mɨ'ɨchite, tɨ'ɨqui aɨme jemi huataseijre ɨ maj jamuan a'uhua'anya'a. Hua'apuate xɨcaj pu a'atee tɨ ayan ti'itásiseirihua'a aɨme jemi. Eihua pu tihua'utaseijrate ti'itɨ cɨme'e ɨ maj cɨn raamua'aree tɨcɨn ayan ti'ayajna tɨ ari ajtahua'a huatarú hua'a tzajta'a ɨ mɨ'ɨchite. Ajta ayan tihua'utá'ixaatya'acaa aɨjna cɨme'e ɨ Dioj tɨ nain japua tie'ijta. 4Ajna tɨ aun a'utyavaaca'a hua'a jamuan, ajta auj ti'icua'acara'a hua'a jamuan. Ayaa pu tihua'uta'ijmɨjri'i maj nu'u cai huirácɨ'ɨca'an maujna u Jerusalén. Ayaa pu tihua'uta'ixaa maj raachu'eve'en tɨ mi'i aráurasten ɨ tɨ cɨn ari anacaican tya'ataujratziiri'i ɨ hua'aya'upua ɨ tɨ tajapua e'eseijre'e. Ayan tɨcɨn: ―Ai pu aɨn pueen ɨ nyej neri amue'ixaa. 5Aɨjna ɨ Juan, aɨ pu hui hua'amuaɨ'ɨhuacara'a jaj cɨme'e. Ma ajta'i ruijmua'a, aaruijmua'a, aɨ pu yava'acányejsin ɨ xaijnyu'ucara'ara'an ɨ Dioj. Aɨ pu hui huatyaturaasin mueetzi jemi. ―Ayaa pu tihua'uta'ixaa aɨjna ɨ Jesús. 6Matɨ'ɨj mi tyujsaɨj. Matɨ'ɨj mi meyan tiraataihua'uri'i tɨcɨn: ―Tavastara'a, ¿ni qui ari tyaja'ure'enye aɨjna xɨcajra'a jetze paj taata'asin tyej títyataté'en iiyan Israel? Aɨ pu aɨn pueen ɨ tɨ anacaican cɨn ari tya'ataujratziiri'i ɨ tyaj rajya'upua tɨ tajapua e'eseijre'e. 7Aj pu i ayan tihua'uta'ixaa tɨcɨn: ―Capu a'amua jetze ruxe'eve'e saj raamua'aree a'anaj tɨ ayan tiraaxa'apɨ'ɨntarej ɨ tyaj rajya'upua. Capu ajta a'amua jetze ruxe'eve'e a'anaj tɨ tyaja'ure'enyejsin. 8Ma sajta muan, tɨ'ɨj ya va'acáanyen aɨjna ɨ xaijnyu'ucara'ara'an ɨ Dioj, aɨ pu hui amuaata'asin ɨ tɨ cɨn amu'uca'anísti'iraj a'ame. Aj xu sij nye jetze ma'acan tihua'utá'ixaate'esin aɨmej ɨ maj yan huachaatɨme iiyan Jerusalén, sajta aɨmej ɨ maj maun huachaatɨme u Samaariya. Aj xu sijta aɨme ɨ maj a'ɨmɨ antachaatɨme seij chuejra'a japua, tɨj na'a va'atɨ yen seijre'e iiyan ɨ chaanaca. 9Cɨme'en pu'u ayan tihua'uta'ixaa, aj pu'i á'uvi'itɨchi'ihuaca'a u tajapua, mej seiiraca ɨ tyaɨte. Aj pu i aitɨri raatya'avaataca'a. 10Mauche'e mu ute'e á'unyejnye'ericaa matɨ'ɨj mi iye'itzi cɨn hua'apua huataseijre ɨ tyetyaca aɨme jemi. Naa mu cueinavi'in tya'ucavɨ́ɨtɨma'a. 11Ayaa mu tihua'uta'ixaa tɨcɨn: ―Mɨ saj Galileeya e'eche, ¿a'ini een cɨn ute'e sá'unyejnye'e? Aɨjna ɨ Jesús, ɨ tɨ á'uvi'itɨchi'ihuaca'a u tajapua, aɨ pu hui mijmu ayan yava'acányejsin ayajna satɨj sana'a seri tiraaseij a'ij tɨ ye'i tyaja'uvi'itɨchi'ihuaca'a. ―Ayaa mu tihua'uta'ixaa. 12Au mu a'utyauca'a aujna Aceituunajremi, jɨri jete tɨ a vejli'i a'utacá'a u Jerusalén. Yaa pu huatatee a'achu maj caj tihua'ata'acara'a tɨ a'atɨ matanyen aujna xɨcajra'a mej jetzen rusa'upi. Aj mu mi u a'araacɨ maujna Aceituunajremi. 13Aj mu mi manna a'ujnyéj u Jerusalén. Matɨ'ɨj mi a'utyajrupi u chi'ita tɨ rujapua tivaatɨme. An mu anticɨj ta'antityájtɨ japua ɨ chi'i. Aun mu a'utyajrupi cuaartu tzajta'a, a'u maj e'iráatyá'a mua'aye'i. Aɨ mu maun e'irátya'acaa aɨjna ɨ Pedro, ajta ɨ Juan, ajta aɨjna ɨ Santiago, ajta aɨjna ɨ Andrés. Aɨ pu ajta aɨn a'utyavaaca'a aɨjna ɨ Felipe, ajta ɨ Tomás, ajtahua'a aɨjna ɨ Bartolomé, ajta ɨ Mateo, ajta saɨj tɨ ayan antyahuaa tɨcɨn Santiago, yaujra'an aɨjna ɨ Alfeo. Aɨ pu ajta aun a'utyavaaca'a aɨjna ɨ Simón mej meyan raatamua'amua tɨcɨn tɨ a'ujca'anyaacan cɨn ayan rɨni. Ajta aɨjna ɨ Judás tɨ yaujra'an pueen aɨjna ɨ Santiago. 14Seica mu majta maun a'utyáuuca'a ɨ ihuaamua'ame'en ɨ Jesús. Majta seica ma juuca pueen. Ajta aɨjna ɨ Mariiya, naanajra'an aɨjna ɨ Jesús. Naijmi'i mu tyujsaɨj mej mi raatyajhuauni ɨ Dioj jemi. Naijmi'i mu ramua'areeraca'a maj rá'uviicue'i maɨjna cɨme'e maj ra'ara'astijre'en ɨ tavastara'a. 15Yaa pu a'anaj tyuju'urɨj matɨ'ɨj naijmi'i tyujsaɨra'acaa a'achu cumu anxɨte japuan seite ɨ maj ru'ihuaamua'a maj huaujmuajtyaca'a majna. Aj pu i aɨn Pedro, a ja'utyeechaxɨ tɨ i tihua'uta'ixaate'en. Ayan tɨcɨn: 16―Ne'ihuaamua'a, ruxe'eva'aca'a tɨ aɨn aráurasten a'ij tɨ ye'i te'eyu'usi'i ɨ yu'uxari jetze aɨjna cɨme'e ɨ Judás. Aɨ pu ayan tyu'utaura'a tɨ hua'utatu'iire'en aviitzi cɨme'e aɨme ɨ tyaɨte ɨ Jesús mej mi ratyeevi'i. Aɨjna jetze ɨ yu'uxari, ajta aɨn xaijnyu'ucara'ara'an ɨ Dioj, aɨ pu raatavaɨ aɨjna ɨ David tyaacan tɨ'ij aɨn anacaican raataxaj a'ij tɨ ye'i ti'itɨ raruuren aɨjna ɨ Judás. 17’Judás pu hui ajta ta jetze ajtyama'acan. Ayaa pu che'eta na'a ti'itɨj cɨn ti'ityavaaca'a tyatɨj ityan. 18Ayaa pu xaa nya'u tiraaruu. Aɨjna ɨ Judás, aɨ pu hui chuej huananai aɨjna cɨme'e ɨ tumin maj raata'a maɨjna cɨme'e tɨ hua'utatui aɨjna ɨ Jesús. Ajta e'eyan caujcue'imi'in. Tɨ'ɨqui nu'u acaatza ɨ caujnari. Aj pu i a chuaata'a e'ejve. Tyamua'a pu'i tya'utasujtza'an, ayaa pu eenya'aca'a te'iraacua ɨ ti'ixayaara'an. 19Majta maɨn ɨ ma maun huachaatɨme anna u Jerusalén, naijmi'i mu tyu'unamuajri'i a'ij tɨ ti'itɨ raaruu aɨjna ɨ Judás. Aɨj mu cɨn meyan raatamuá'a maɨjna ɨ chuej tɨcɨn Acéldama. Ayaa pu huataujmua'a aijna i nyuucari tɨcɨn Chuej tɨ nu'u Xuure'eme'e. 20’Ayaa pu'u xaa nya'u ti'ayajna. Ma'acui xaa pu'uri ayan tyaja'ure'enye a'ij tɨj te'eyu'usi'i aɨjna jetze ɨ yu'uxari tɨ ayan huataujmua'a tɨcɨn ɨ Ti'ichuiicara'ara'an tɨ cɨme'en yee: Che'e nu'u huatyaturan ɨ chi'ira'an. Che'e nu'u cai a'atɨ utyeeme'en. Ajta ayan tɨcɨn: Che'e saɨj tye'entyarute aɨjna cɨme'e ɨ tɨ cɨn ti'ityavaaca'a aɨjna ɨ a'atɨ. 21’Aɨj pu cɨn ruxe'eve'e tyej seij ave'evi'itɨn, ɨ tɨ ta jamuan á'ucha'acanya'a saɨj tɨ nain xɨcaj tzajta'a ya huatyavaaca'a tɨ'ɨj auj Jesús tajamuan seijra'acaa. 22’A'atɨ tɨ tajamuan á'ucha'acanya'a tɨj na'a tɨ Juan raamuaɨ'ɨhuaca'a ɨ Jesús, ajta tɨj na'a tɨ aɨn Jesús á'uvi'itɨchi'ihuaca'a u tajapua. Ruxe'eve'e tɨ saɨj tɨ ta jamuan á'ucha'acanya'a tɨ i ajta ayan tihua'uta'ixaate'en ɨ tyaɨte tɨ ari huatarú aɨjna ɨ Jesús. ―Ayaa pu tihua'uta'ixaa aɨjna ɨ Pedro. 23Aj mu mi hua'apuaca avé'evi'itɨ: aɨjna ɨ José Justo, maj majta meyan ratamua'amua tɨcɨn Barsabás, majta maɨjna ɨ Matiiya. 24- 25Aj mu mi raatahuaviiri'i ɨ Dioj. Aj mu mi meyan tɨcɨn: ―Tavastara'a, muaa paj ru'umua'aree a'ij tɨ ye'i ti'imua'atze ɨ rutzajta'a saɨj ajta ɨ saɨj. Taataseijrate'e aijna ɨ maj hua'apua'a muaa pa seij ave'evi'itɨn tɨ'ij aɨn te'entyarute aɨjna cɨme'e ɨ tɨ cɨn ti'ityavaaca'a aɨjna ɨ Judás tyaacan. Aɨ pu hui airajraa tɨ'ij a'ura'ani a'u tɨ ayan tiya'uvijte'e. 26Aj mu mi raataruurajxɨ maɨjna ɨ xa'ari ɨ maj tzajta'an ru'utyaahua'axɨ ɨ tetej. Aj pu i seij huiityejve aɨjna cɨme'e tɨ huatanyúu aɨjna ɨ Matiiya. Aj mu mi raata'a tɨ tyu'utyavaɨre'en hua'a jamuan ɨ maj tamuaamuata'a japuan saɨj ara'ase.

will be added

X\