2 Timuteeyu 4

1Ayaa nu een cɨn tí'imue'ijcate'e jemin ɨ Dioj, ajta jemin ɨ Cɨriistu'u tɨ ajta i'i Jesús. A'ini Cɨriistu'u pu raxa'apɨ'ɨntare aɨme jemi ɨ maj mauj yan huachaatɨme iiyan chaanaca japua, ajta aɨme jemi ɨ maj meri huacuii. Aɨ pu ajtahua'a huataseijre'esin tɨ'ij tyu'utaijta nainjapua. 2Pata'aj muaa tihua'uta'ixaate'en ɨ nyuucari cɨme'e. Pajta pata'aj hua'utahuavii ca'anin cɨme'e mej mi raanamua tɨ pua'a meyan titya'ujca'ane maj raanamua na'ari macai ranamuajracu. Pata'aj rɨ'ɨ hua'uruuren aɨme ɨ maj cai xa'apɨ'ɨn metityaúmua'aree. Pata'aj hua'uta'ijmɨ mej mi cai a'ij pua'a rɨjca. Pata'aj pajta hua'uta'an ɨ ca'anijra'a mej mi meyan huarɨni a'ij tɨ tyu'ujxe'eve'e. Rɨ'ɨ papu'u paɨjna cɨme'e pej pi ta'utaviicue'i hua'a jemi ɨ tyaɨte, pajta paɨjna cɨme'e pej tihua'amua'aten tyamua'a naa. 3Ayaa paj huarɨni a'ini ajna pu tyaja'ure'enyejsin ajna xɨcajra'an jetze mej jetzen cai che'e te'eviicue'ira mua'aju'un mej raanamua ɨ tɨ i'i xa'apɨ'ɨn a'ij pej ti'ihua'amua'atyaca. Ma majta aɨme, seica mu huatájeevi aɨme maj raanamua maɨjna cɨme'e a'ij mej rujɨɨmua'a mana'a tirajtyau. 4Aɨ mu yá'uhua'axɨjsin ɨ tɨ ayan ti'ayajna mej mi rá'antzaahuate'en ɨ nyuucari tɨ cha'a na'a pu'u ti'ixa. 5Ma pajta muaa, pata'aj pauj nain cɨn rɨ'ɨ me tyáumua'araa pata'aj pajta tya'utaviicue'i tɨ pua'a ti'itɨ muaatamuáre'eristen. Nyajta nu neyan tí'imue'ijcate'e pej peyan á'ucha'acanye'en pej pi tihua'uta'ixaate'en ɨ tyaɨte ɨ nyuucari cɨme'e tɨ cɨn Dioj hue'irajtuaani. Pata'aj nain cɨn tya'ara'asten ɨ paj cɨn anti'amua'aree paɨjna cɨme'e ɨ paj cɨn ti'ivaɨre'e ɨ Dioj jemi. 6Ayaa pu'u ti'en a'ini ayaa pu tina'amitejte'e tɨj nyana'a nyaj rajpueijtzica'a tɨ ayan ti'ivaɨre'e ɨ Dioj jemi cumu mua'ɨvejri ɨ maj an yajxɨre'esin japuan ɨ mej jetzen ti'imuaɨ'ɨvajta. Pu'uri tyaja'ure'enye ajna ɨ nyaj jetzen huamɨ'ɨni. 7Eihua nu rá'uviicue'iri'i nyej neyan huarɨni a'ij tɨ tiraavijte'e ɨ Dioj jemi. Nu'uri ra'anticɨ'ɨ ɨ nyaj cɨn ava'anmua'areeraca'a. Canu raatyaxaahuataca'a silu nyara'astijraca'a ɨ nyavastara'a. 8Aɨj pu cɨn Dioj ratya'avaataca'a inyeetzi jemi ti'itɨ tɨ tinaacɨ'ɨti aɨjna cɨme'e nyaj urare'enye'e ɨ nyatzajta'a. Nyavastara'a pu raaxa'apɨ'ɨntare a'ij tɨ tiraavijte'e, aɨ pu aɨjna naatátɨstejsin ajna xɨcajra'an tɨ jetzen ayan tiraaxá'apɨ'ɨntari'iran inyeetzi cɨme'e. Ajta, capu nyeetzi na'a huatátɨstejsin, silu naijmi'ica a'achu pua'amuaca ɨ mej maɨjna cɨn rachu'eva'acaa tɨ aɨn ajtahua'a huataseijre'en hua'a jemi. 9- 10Pata'aj huata'aca'anyen tɨj na'a tɨ ti'irɨ'ɨri paj yatanyen nyeetzi jemi, a'ini Demas pu ma nuurai aɨjna cɨme'e tɨ eitze'e ra'aranajchaca'a ɨ tɨ ayan ti'iseijre'e iiyan chaanaca japua. Crescente pu aun á'umej aujna a'ahua'a tɨ huatacá'a u Galacia. 11Ajta aɨjna ɨ Lucas, aɨ pu ye huatyajturaa nyeetzi jemi. Pata'aj raata'inen paɨjna ɨ Marcos tɨ pua'a me'e peya'useij tɨ ajamuan ya tanyen. Pata'aj ya'arávi'itɨn, a'ini aɨ pu tinaatyava'ɨri ɨ nyaj cɨn ti'ivaɨre'e ɨ Dioj jemi. 12Nyaraataityaca'a nyaɨjna ɨ Tíquico tɨ aun á'ume'en u Efeso. 13Patɨ'ɨj mu a'arajra'ani, pata'aj mu nyaja'arápijre'en ɨ nyaj ra'ityavaara na'aye'i ɨ nyaj nyaun ya'utyajtua aɨjna jemi ɨ Carpo, aujna Troas tɨ e'eche. Pajta, pata'aj mu tinyaja'arapijre'en ɨ yu'uxari, ajta ɨ seica ɨ papee, nyeetzi tɨ ti'inya'a. 14Ajta aɨn ɨ Alejandro tɨ tyapuusti'i tí'ita'ahuaca, eihua pu a'ij pua'a naaruu. Aru tavastara'a pu ayan raaruuren a'ij tɨ tiraavijte'e aɨjna jemi aɨjna cɨme'e a'ij tɨ naaruu. 15Pajta muaa, rɨ'ɨ papu'u paɨjna jemi tɨ'ij aɨn cai muaatyamue'itɨn, a'ini eihua pu rájchaɨra'acaa a'ij tej tihua'utá'ixaatya'acaa ɨ tyaɨte. 16Nyatɨ'ɨj anacaican huatyanna, capu a'atɨ nyeetzi cɨme'e huatyeechaxɨ tɨ nyajapua huanyuuni. Naimi'i mu ma nuurai. Che'e Dioj cai pueijtzi hua'ata'acare'en aɨjna cɨme'e a'ij maj huarɨj. 17Me nyajta inyaa, aɨj nu jetze ará'anca'anye ɨ tavastara'a. Aɨ pu naata'a ɨ ruca'anijra'a nyej ni nain cɨn tihua'uta'ixaate'en ɨ tyaɨte, mej mi naimi'i raanamua aɨme ɨ maj cai Israel jetze ajtyama'acan. Ajta aɨ pu nu'irajtuaa nyej ni cai ca'anacan huamɨ'ɨni. 18Tavastara'a pu naatavaɨre'esin nain cɨme'e tɨ'ij cai aɨn tɨ a'ij pua'a een naatyamue'itɨn ti'itɨj cɨme'e. Aɨ pu nu'irajtuaasin tɨ ij na'avi'itɨn u ute'e a'u tɨ aɨn tyeje'ijta nyej ni aun a'utyaváa na'ara'ani. Tiche'e teyan rɨ'ɨ tiraata'an tɨj na'a tɨ yu auumé para rusen cɨme'e. Che'e ayan tya'ara'ani. 19Pata'aj naatataujti'itze'en aɨjna ɨ Prisca, ajta aɨjna ɨ Aquila, ajta aɨme ɨ tyaɨtestyamua'ame'en aɨjna ɨ Onesíforo. 20Ajta aɨn ɨ Erasto, au pu a'utyajturaa aujna chajta'ana jetze u Corinto. Nyajta Trófimo nu aun a'utyajtuaa ti'icui'ican aujna chajta'ana jetze u Mileto. 21Pata'aj huata'aca'anyen pej yatanyen anacaican meenti cai xɨ ajna pɨtyaja'arɨcɨ tɨ huaseevi'i a'aye'i. Aɨ mu ya muatataujte'esin aɨjna ɨ Eubulo, ajta aɨjna ɨ Pudente, ajta aɨjna ɨ Lino, ajta aɨjna ɨ Claudia, majta naimi'i ɨ ta'ihuaamua'a ɨ mej tya'atzaahuate'e. 22Che'e aɨn tavastara'a huatyaturan mueetzi jemi. Che'e aɨn rɨ'ɨ timuaata'an. Yaa pu'u. Pu'uri antipua'araca'a.

will be added

X\