2 Timuteeyu 3

1Ayej xaa nya'u ti'ayajna tɨ ayan te'eme majca'ihua yee tɨ'ɨj te'entipua'arijme'en nain. Eihua mu rajpueiitzi mua'aju'un. 2Ayaa mu eenya'a mua'aju'un ɨ tyaɨte. Ayaa mu raxe'eva'a a'ame seij ɨ tyaɨte a'ij tɨ aɨme tihua'amitejte'e seij ajta seij. Majta eihua huapɨ'ɨ raxe'eve'e maj tumin tisaɨre'en. Eihua mu a'ujtzaahuatya'a mua'aju'un, majta eihua hua'axaahuata mua'aju'un ɨ ruxa'aj tyaɨte. Eihua mu a'ij pua'a tyú'uxajtava'a mua'aju'un. Camu hua'atzaahuatya'a mua'aju'un ɨ ruvaujsimua'a. Camu majta rɨ'ɨ tihua'uta'asin aɨme ɨ maj ti'itɨj cɨn hua'utyavaɨ. Eihua mu a'ij pua'a titetyujcháɨ mua'aju'un. 3Camu hua'axe'eva'a mua'aju'un ɨ tyaɨte. Camu majta tihua'uta'uuni'ira silu eihua mu a'ij pua'a tyu'ujxaatava'a mua'aju'un. Aɨ mu majta simuaruuni mua'aju'un. Marajchaɨra'a mu mua'aju'un nain cɨme'e tɨ i'i xa'apɨ'ɨn. 4Aviitzi mu cɨn tyu'utatu'ire'esin ɨ ruxa'a tevi. Camu a'atzu á'ujcu'uvaa mua'aju'un. Eihua mu a'ujtzaahuatya'a mua'aju'un maɨjna cɨme'e tɨ ayan tihua'amitejte'e mej eihua ruxe'eve'e. Eihua mu raxe'eva'a mua'aju'un mej meyan huarɨni a'ij tɨ tihua'araanajchi. Majta camu raxe'eva'a mua'aju'un ɨ Dioj. 5Aru aɨ mu majta meyan huataujseijrata ɨ tyaɨte jemi maj nu'u ra'astijre'e ɨ Dioj, aru camu aɨjna jetze araujca'anyaa mua'aju'un. Capaj hua'ajaahuatya'a muaa. 6Ayaa mu e'en matɨj aɨme ɨ maj hue'itzi cɨn utyaru'ipi u hua'achi'ita ɨ tyaɨte mej mi hua'utyamue'itɨn aɨme ɨ juuca ɨ maj cai te'eviicue'i ɨ rutzajta'a, ɨ maj ruxaamɨste'e maɨjna cɨme'e ɨ maj cɨn autyajturaa ɨ Dioj jemi. Majta meyan huataura'aca tɨ ti'itɨ ca'anijra'a hua'uta'an mej mi meyan huarɨni ti'itɨ tɨ a'ij pua'a een, tɨ ajta hua'araanajchi. 7A'anaj tɨ na'a meyan tihua'anamuajran ɨ mej tihua'amua'ate mej mi eitze'e yau'eitaa mua'ara'ani ti'itɨ tɨ jajcua. Camu a'anaj huataura'asin mej raamua'ati ɨ nyuucari tɨ ayan ti'ayajna. 8Ajta aɨme ɨ tyetyaca ɨ mej tihua'amua'ate, ayaa mu che'eta mana'a tirajchaɨre'e ɨ tɨ ayan ti'ayajna matɨj aɨme ɨ maj Moisés tyaacan mej tichaɨra'acaa, aɨme ɨ maj hua'apua. Ai mu aɨn pueenya'a aɨjna ɨ Janes tyaacan, ajta aɨjna ɨ Jambres tyaacan. Ajta aɨme ɨ mej meyan e'en, ayaa mu a'ij pua'a me tityaumuámua'aree. Camu a'atzu tya'atzaahuate'e tzaahuati'ira'a cɨme'e. 9Camu che'e a'ateere mej meyan rɨcɨ a'ini ayaa che'eta na'a tihua'aruuren a'ij tɨ tihua'uruu ɨ seica ɨ maj hua'apua. Naimi'i mu ramua'areeran tɨ cai ti'itɨj vaɨre'e a'ij mej ti'ixaxa'a. 10Ma pajta muaa ramua'aree nain cɨme'e a'ij nyej eenye'eque'e a'ucha'acan, ɨ nyaj cɨn ti'imɨjhuaca. Muaa paj pajta ramua'aree nyaj tzaahuati'ira'a cɨn tya'atzaahuate'e, nyajta tye'eviicue'i tyamua'a naa ɨ nyaj cɨn rajpueijtzi. 11Muaa pa ramua'aree tyamua'a naa mej a'ij pua'a naaruu, nyaj eihua rajpueijtzi na'araa. Muaa pa ramua'aree ti'itɨ tɨ a'ij naaruu aujna a'ahua'a u Antioquía, ajta aujna u Iconio, ajta aujna u Listra. Eihua nu tya'utaviicue'iri'i ɨ nyaj cɨn rajpueijtzica'a. Ajta nyavastara'a pu nu'irajtuaa nain cɨme'e ɨ nyaj rajpueijtzica'a. 12Ayej xaa nya'u, ayan che'eta na'a ti'iruuren a'atɨ tɨ na'a tɨ ti'ityese'e tɨ ra'ara'astijre'en ɨ Cɨriistu'u tɨ ajta i'i Jesús. A'ij mu pua'a raruuren maɨjna ɨ a'atɨ. 13Ajta aɨme ɨ mej a'ij pua'a titetyujcha'ɨ, majta aɨme ɨ maj cai tzaahuati'ira'a cɨn meyan rɨcɨ, mauche'e mu eitze'e a'ij pua'a e'enya'a mua'aju'un ɨ rutzajta'a. Mauche'e mu eitze'e hua'acuanamua mua'aju'un seica ɨ tyaɨte. Majta eitze'e mu tya'utyaúhue'itze'esin rujɨɨmua'a. 14Ma pajta muaa, pata'aj pauj peyan tya'atzaahuatya'a a'ij pej tiraarɨ'ɨre, peijna jetze tɨ ayan timua'amitejtya'acaa. Pata'aj peyan pauj tya'atzaahuatya'a a'ini muaa pa hua'amuajte a'ij mej timuaamuá'ate. 15Pajta, tɨj na'a patɨ'ɨj pa'arɨ'ɨsta, muaa pa ramua'areeraca'a a'ij tɨ te'eyu'usi'i aɨjna jetze ɨ yu'uxari tɨ Dioj rujemi ratya'avaataca'a. Ai pu aɨn pueen ɨ nyuucari tɨ muaata'asin pej rɨ'ɨ me tyáumua'araa tɨ ij Dioj mue'irajtuaani aɨjna cɨme'e pej rá'antzaahua ɨ Cɨriistu'u tɨ ajta i'i Jesús. 16Naijmi'i tɨj na'a tɨ te'eyu'usi'i ɨ yu'uxari jetze tɨ Dioj rujemi ratya'avaataca'a, au pu e'ema'acan ɨ Dioj jemi a'ini xaijnyu'ucara'ara'an ɨ Dioj, aɨ pu rumuare'eri'ira'a cɨn hua'uta'a mej mi meyan tira'uyu'uxa. Ajta ti'ivaɨre'e mej mi cɨn tihua'umua'aten ɨ tyaɨte na'ari mej mi cɨn hua'uta'ixaate'en ɨ maj cɨn raamua'aree ɨ maj cɨn autyajturaa ɨ Dioj jemi, mej mi rɨ'ɨ hua'uruuren. Ajta pu ti'ivaɨre'e mej mi tihua'umua'aten a'ij tɨ ti'ixa'apɨ'ɨn ɨ Dioj jemi, ajta a'ij tɨ cai ti'ixa'apɨ'ɨn mej mi uraré'enya'a mua'ara'ani ɨ rutzajta'a. 17Ajta ayan tiraatyava'ɨrihua'an aɨjna ɨ a'atɨ tɨ ra'astijre'e ɨ Dioj tɨ aɨn ɨ yu'uxari cɨn huaujnaijmi'ire'en naimi'i tɨj na'a tɨ ruxe'eve'e tɨ ij ayan huarɨni ti'itɨ tɨ a'ij ti'ixa'apɨ'ɨn.

will be added

X\