2 Timuteeyu 1

1Inyaa, nyaa nu i'i Pablo, tɨ Dioj na'antihuau ruxé'evi'ira'a cɨme'e nyej ni ratyavaɨre'en ɨ Cɨriistu'u tɨ ajta i'i Jesús aɨjna cɨme'e tɨ Dioj ayan tya'ataujratziiri'i tɨ taata'asin tyaj ruuri ta'ara'ani rusen cɨme'e jamuan tyaɨjna ɨ Cɨriistu'u tɨ ajta i'i Jesús. 2Ayaa nu ye ti'imuayu'use'e muaa pej i'i Timuteeyu, mɨ pej ni'iyauj. Che'e aɨn Dioj tɨ ta'iya'upua, ajta aɨn ɨ tavastara'a, ɨ Cɨriistu'u, tɨ ajta i'i Jesús, miche'e maɨn rɨ'ɨ timuaata'an, miche'e muá'ancu'uvajxɨ'ɨn, majta rɨ'ɨ timuaatyapua'ariten ɨ a'atzajta'a. 3Tɨj na'a tyatɨ'ɨjta mua'utamua'aree, nain xɨcaj tzajta'a na'ari nain tɨca'ari tzajta'a, nyatɨ'ɨjta tyenyuusime'en, nyaa nu tí'ijtaujtzi'ire'e mueetzi cɨme'e ɨ Dioj jemi ɨ nyaj jemin cai ti'itɨj cɨn autyajturaa nyej ravaɨre'e. Ayaa nu che'e nyana'a jemin ravaɨre'e matɨj maɨn ti'ivaɨra'acaa ɨ nyahuaacɨxa'astyamua'a tyaaca. 4Nyaa nu mua'utamua'aree ɨ paj cɨn ayein. Aɨj nu cɨn eihua raxe'eve'e nyaj nyajtahua'a muaaseij nyej ni nyaɨjna cɨn huatantyamua'ave'en. 5Nyaa nu ra'utamua'areeri'i pej tya'atzaahuate'e tzaahuati'ira'a cɨme'e. Aɨ pu anacaican tya'antzaahua ɨ a'aya'acua aɨjna ɨ Loida tyaacan, ajta e'eyan a'anaana Eunice ayan che'eta na'a tya'antzaahua. Ajta ijii ayaa pu tina'amitejte'e inyeetzi pej peyan che'eta pana'a tya'atzaahuate'e ɨ tavastara'a jemi. 6Aɨj nu cɨn neyan ti'imue'ijte'e paj pajtahua'a ahua'aca'anyen pej tyu'utyavaɨre'en nain cɨme'e a'ij tɨ Dioj timuaata'a nyatɨ'ɨj mua'avá'amuarej ɨ nyamuajca'a cɨme'e. 7Pata'aj ahua'aca'anyen tyamua'a naa a'ini capu ayan tiraata'a ɨ Dioj tyej teyan ti'itzɨɨne'e. Capu a'atzu, silu aɨ pu titaatá'a tyej taɨjna jetze arataca'anye, tyajta tyej ti taxe'eve'e, tyajta tej ti rɨ'ɨ metityaumuámua'aree. 8Aɨj paj cɨn cai ti'ityevi'ira'a pej tihua'uta'ixaate'en ɨ tyaɨte a'ij tɨ tyu'uruu ɨ tavastara'a. Capej pajta ti'ityevi'ira'a paɨjna cɨme'e nyaj ra'astijre'e. Ma pajta muaa, pata'aj nya jamuan huata'an tyej ti naimi'i rajpueiitzi ta'ara'ani, tyej ti Dioj jetze arataca'anye tyej teyan huarɨni mej mi eitze'e raanamua ɨ nyuucari tɨ cɨn Dioj hue'iratuaasin. 9Aɨj tu jetze arataca'anye ɨ Dioj tɨ tu'irajtuaa ityejmi, ajta titaijca tyej ti teyan uraré'enye'en ta'ara'ani ɨ tatzajta'a. Capu aɨjna cɨn tu'irajtuaa aɨjna cɨme'e tyej ti'itɨj cɨn tyu'utyavaɨ. Capu xaa nya'u. Ayaa pu'u na'a tu'irajtuaa aɨjna cɨme'e a'ij tɨ anacaican tiraaxa'apɨ'ɨntarej, ajta aɨjna cɨme'e tɨ rɨ'ɨ titaatá'a. Aɨ pu ajmi'i rɨ'ɨ titaatá'a jamuan ɨ Cɨriistu'u tɨ ajta i'i Jesús. Tɨ'ɨj cai xɨ séira'aca ɨ chaanaca tyej yan japuan puasaaruve'e, aɨ pu ayan rɨ'ɨ titaatá'a. 10Aru ijii, pu'uri a eijre'e seijre'e a'ij tɨ rɨ'ɨ titaatá'a aɨjna cɨme'e tɨ huataseijre aɨjna tɨ tu'irajtuaa, aɨjna ɨ Cɨriistu'u tɨ ajta i'i Jesús. Aɨ pu ra'antipua'arite aɨjna ɨ maj cɨn cui'ini. Ajta, aɨ pu taata'a tyej raaseij ɨ tyaj ruuri ta'ara'ani rusen cɨme'e tej ra'ara'astijre'en ɨ nyuucari tɨ cɨn Dioj tu'irajtuaasin. 11Ajta ineetzi, Dioj pu na'antihuau nyej ni tihua'uta'ixaate'en ɨ tyaɨte nyaɨjna ɨ nyuucari, nyajta nyaɨjna cɨn tyu'utyavaɨre'en, nyajta nyej tihuá'umua'aten. 12Aɨj nu cɨn neyan nyana'a rajpueijtzi. Me nyajta, canu ti'ityevi'ira'a a'ini nyaa nu ramua'ate nyaɨjna ɨ nyaj ra'astijre'e. Ajta ayan tina'amitejte'e tɨ aɨn raayɨ'ɨtɨ tɨ ratya'avaa ɨ nyaj cɨme'en tiraijca tɨ'ij ajna huataseijre'en ajna xɨcajra'a tɨ jetzen Dioj ayan na'uxɨjte'en a'ij tɨ tiraavijte'e. 13Ayaa papu'u pauj tihua'amua'atya paɨjna cɨme'e a'ij pej tinaanamuajri'i ɨ nyenyuuca cɨme'e tɨ a'ij huatarujte'en. Pata'aj pauj peyan ra'astijre'e ɨ tavastara'a, pata'aj pajta pauj peyan hua'axe'eve'e ɨ tyaɨte. 14Pata'aj rɨ'ɨ tiratyá'avaa tɨ cɨn Dioj timuéijca. Pata'aj rɨ'ɨ tya'uhuatya'aca'anyen paɨjna cɨme'e xaijnyu'ucara'ara'an ɨ Dioj pej jetze ara'aca'anye pej pi rɨ'ɨ tiratyá'avaa, a'ini aɨn xaijnyu'ucara'ara'an ye huatyaturaasin tyejmi jemi. 15Papu'uri ramua'aree ɨ maj ma nuurai naimi'i aɨme ɨ mej aun e'ema'acan tɨj na'a tɨ huatacá'a u Asia. Aɨ mu hua'a jetze ajtyama'acan aɨjna ɨ Figelo, ajta aɨjna ɨ Hermógenes. 16Ayaa nu ti'ijxe'eve'e tɨ aɨn tavastara'a rɨ'ɨ hua'ancu'uvajxɨ'ɨn ɨ tyaɨtestyamua'ame'en aɨjna ɨ Onesíforo a'ini eihua pu ye nyava'atui ɨ nyaj cɨn huarún. Capu ajta raatatyévi'iraste nyej aiityanami'ihuaca'a. 17Ma ajta aɨn Onesíforo, tɨ'ɨj aun a'utyavaaca'a u Roma, aɨ pu naahuau muare'eri cɨme'e. Aj pu i xaa naatyau. 18Che'e tavastara'a ayan tiraata'an tɨ Dioj rɨ'ɨ ra'ancu'uvajxɨ'ɨn ajna xɨcajra'a tɨ jetzen tavastara'a ajtahua'a huataseijre'en. Muaa pa ramua'aree tyamua'a naa naijmi'i tɨj na'a ɨ tɨ cɨn tinaatyavaɨ nyatɨ'ɨj nyaun a'ucatii u Efeso.

will be added

X\