2 Tesalonicenses 3

1Aj caahui, nye'ihuaamua'a, sata'aj seyan rahuaviira tyejmi cɨme'en tej ti ca'anacan tihua'uta'ixaate'en ɨ nyuucari cɨme'e ɨ tavastara'a tɨ raxa naijmi'ique'e mej meyanna huachaatɨme, mej mi majta raanamua aɨme ɨ mej a ɨmɨ a'uchaatɨme asta na'a cai nainjapua huanamuajre'en. Sata'aj seyan rahuaviira mej meyan che'eta mana'a ra'ara'astijre'en ɨ nyuucari satɨj muan tira'ara'astijre. 2Sata'aj sajta rahuaviira tɨ aɨn tavastara'a tu'irajtuaani mej mi cai a'ij taaruuren ɨ tyetyaca ɨ maj a'ij pua'a titetyujcha'ɨ, ɨ maj majta a'ij pua'a ti'ityetyaɨte. Ayaa xu rahuaviira a'ini camu naimi'i tya'atzaahuate'e. 3Ajta aɨn ɨ tavastara'a, capu a'anaj atya'ɨtza'ara. Aɨ pu xaa ca'anijra'a amuaata'asin sej si tya'utaviicue'i. Ajta, aɨ pu rɨ'ɨ tyaja'amuacháɨ a'ame tɨ'ij cai amuaatyamue'itɨn aɨjna tɨ a'ij pua'a een. 4Tyajta ityan, ayaa pu tita'amitejte'e aɨjna jemi ɨ tavastara'a sej seyan huarɨni a'ij tej teri tyajamuaataij. Ajta, ayaa pu che'eta na'a tita'amitejte'e sej sauj seyan huarɨni majca'ihua yee. 5Che'e aɨn tavastara'a ca'anijra'a amuaata'an ɨ a'amua tzajta'a sej si seyan che'eta sana'a tityahuaujxe'eve'en seij sajta seij tɨj ajta Dioj tyaja'amuaxe'eve'e muejmi. Che'e aɨn ajta amuaata'an ɨ ca'anijra'a sej si seyan che'eta sana'a tya'utaviicue'i tɨj ajta Cɨriistu'u tya'utaviicue'iri'i. 6Ayaa tu tyaja'amue'ijte'e, ta'ihuáamua'a, nyuucajtze'en ɨ tavastara'a, aɨjna ɨ Jesús tɨ ajta i'i Cɨriistu'u, sej si seyan cai tityajá'ujhua'ane'en jamuan seij a'amue'ihuaara'a tɨ ajta i'i hua'ɨna'ase'e, tɨ cai ti'imɨjhuaca, tɨ cai ayan che'eta na'a rɨ'ɨ ti'ityujcha'ɨ a'ij tej teri tyajamue'ixaa muejmi. 7Muan xu rujɨɨmua'a seri ramua'aree a'ij sej ye'i huarɨni, sej si seyan che'eta sana'a huarɨni tyatɨj ityan. Catu a'atzu hua'ɨna'asa'aca'a tyatɨ'ɨj tyauj muejmi jemi a'utyáuuca'a. 8Catu huaapua'a tyana'a tyu'ucuaa seij jemi, silu tetyu'unajchitaca'a ticu. Nain tujca'ari tzajta'a, tyajta nain tɨca'ari tzajta'a, tetyu'umuare ca'anin cɨme'e. Eihua tu tya'utaviicue'iri'i tej ti cai ti'itɨ cɨn amuaatamuáre'eriste'en. 9Ee xaa nya'u, ayaa pu tiraavijtya'acaa tej huaapua'a tyana'a tyu'ucua'ani. Capu amɨn a'ij. Saɨque tu huarɨj tej ti amuaamua'aten a'ij sej huarɨni, sej si seyan che'eta sana'a rɨ'ɨ titetyujcha'ɨ. 10Ayej xaa nya'u ti'ayajna. Tyatɨ'ɨj tyauj a'utyáuuca'a muejmi jemi, ayaa tu tyajámuaatáijte aɨjna tɨ cɨme'en yee: Tɨ pua'a a'atɨ cai ra'ujca'anye tɨ tyu'umuare'en, caxu raata'acare'en tɨ aɨn tyu'ucua'ani. 11Ajta ijii, ayaa tu ti'inamua tɨcɨn seica aɨme, aɨ mu nu'u hua'ɨna'ase'e. Camu ti'itɨj cɨn ti'imuare'e silu ayaa mu rucɨɨnive'en mej mi tyu'ɨtziite'e. 12Ayaa tu ca'anijra'a hua'uta'asin naijmi'ica ɨ mej meyan e'en, ayaa tu tihua'utaijte'esin aɨjna jemi ɨ tavastara'a, aɨjna ɨ Jesús tɨ ajta i'i Cɨriistu'u, mej mi tyu'umuare'en, maj cai che'e a'ij mana'a ti'ityáruurejnye'en, mej mi rujɨɨmua'a raamue'itɨn ɨ maj cɨn huataujvaɨre'en. 13Sajta muan, nye'ihuaamua'a, caxu raxaahuata sej seyan huarɨni a'ij tɨ tiraavijte'e. 14Tɨ pua'a a'atɨ cai á'ujca'anye tɨ ra'ara'astijre'en a'ij tej tyaja'amuayu'use'e tyeijna jetze i yu'uxari, ayaa xu huarɨni. Sata'aj raamua'ati saɨjna ɨ a'atɨ, sajta seyan tiyá'uhua'axɨn tɨ ij huataujtyévi'irata aɨjna ɨ a'atɨ. 15Ma sajta muan, caxu seyan a'ij pua'a raruure tɨj a'atɨ tɨ amuájchaɨɨre'e, silu ayaa xu rɨ'ɨ tiraatajeeve a'ini a'amue'ihuaara'a pu pueen. 16Ajta aɨn tavastara'a tɨ tyu'utyapua'ari, che'e aɨn rusaɨj amuaatyápua'arite'en a'amua tzajta'a, a'anaj tɨ na'a ajta nain cɨme'e. Che'e aɨn tavastara'a huatyaturan muejmi jemi. 17Inyaa Pablo, nyamuajca'a nu cɨn tyaja'amuayu'use'e aijna i yu'uxari jetze i nyaj cɨn amuaatataujte'e. Ayaa nu te'eyu'uxaca nainjapua ɨ ti'inyeyu'uxa. Aɨj xu cɨn raamua'aree tɨ ayan ti'ayajna nyaj ra'uyu'uxaca'a nyasaɨj. 18Ajta aɨn tavastara'a, aɨjna ɨ Jesús, tɨ ajta i'i Cɨriistu'u, che'e aɨn rɨ'ɨ tyajamuaachaɨn naijmi'ica muejmi.

will be added

X\