2 Tesalonicenses 2

1Cɨme'en ajna xɨcajra'an tɨ jetzen ya uve'enyejsin ɨ tavastara'a, aɨjna ɨ Jesús tɨ ajta i'i Cɨriistu'u, tɨ'ɨj aɨn tajsaɨre'esin ɨ rujemi, ayaa tu tyaja'amuahuavii, ta'ihuaamua'a, saj cai ti'itzɨɨnya'a. 2Caxu ti'ita'acare'en tɨ a'atɨ tyajamua'antyú'uuni'iran, tɨ ayan ti'ixajta yee pu'uri tyaja'ure'enye ajna xɨcajra'an tɨ jetzen ya uve'enyejsin ɨ tavastara'a. Caxu ra'atzaahuate'e tɨ pua'a ayan tyaja'amue'ixaatya'a yee nyaa nu ti'ixa Dioj jetze ma'acan nyaɨjna cɨme'e, na'ari tɨ pua'a a'atɨ ayan yee ayaa nu tya'ancura'anamuajri'i tɨcɨn yee pu'uri tyaja'ure'enye. Caxu sajta ra'atzaahuate'e tɨ a'atɨ muejmi jemin a'uré'enyen, ayan tyaja'amue'ixaatya'a yee yu'uxari nu a'araapi tɨ aɨn Pablo ra'uteyu'uxaca'a tɨ jetzen te'eyu'usi'i tɨ yee ari tyaja'ure'enye ajna xɨcajra'an tɨ jetzen ya uve'enyejsin. 3Caxu a'atɨ ta'acare'en tɨ amuaacuanamua ti'itɨ cɨme'e, a'ini ayaa pu ruxe'eve'e tɨ anacai ayan tyaja'ure'enyen maj ma ruuraini ɨ Dioj, majta autyahuijsin maj rajchaɨ́ɨra'a mua'aju'un. Aj pu i huataseijre'esin aɨjna ɨ a'atɨ tɨ cai ti'itɨ a'astijre'e. Aɨ pu hua'a jetze ajtyama'acan aɨme ɨ tɨ Dioj hua'antipua'arite'esin. 4Aɨ pu ajta rajchaɨre'e matɨj mana'a pua'amua ɨ mej meyan huataujmua'a tɨcɨn dioosi maj pɨrɨcɨ. Aɨ pu ayan á'ujtzaahuate'e tɨ nu'u eitze'e ruxe'eve'e cai maaj ti'itɨ ɨ mej meyan ratyaanajche. Aɨ pu cɨn ayan huarɨn, aj pu i aun a'utyarute teyujta'a a'u mej ya'utyanajche ɨ Dioj. Aj pu i aɨjna japua a'ujyeijxa ɨ ɨpuari japua, ajta aun huataujseijrata tɨ nu'u aɨn pueen ɨ Dioj. 5¿Ni qui sacai che'e ramua'aree nyej neyan nyaɨjna cɨn tyajamuaata'ixaa nyatɨ'ɨj nyaun a'utyavaaca'a muejmi jemi? Ee xaa nya'u, sauche'e xu ramua'aree. 6Sajta seyan ramua'aree ti'itɨ tɨ pɨrɨcɨ tɨ ra'ijmɨ tɨ ij cai ca'anacan huataseijre'en aɨjna ɨ a'atɨ asta na'a cai ari tyaja'ure'enyen a'anaj tɨ pua'a huaujxa'apɨ'ɨntari'iri'i. 7Ayej xaa nya'u ti'ayajna. Pu'uri ti'imuare'e aɨjna tɨ ru'avaa tɨ cai ti'itɨ a'astijre'e. Ma ajta aɨn tɨ ra'ijmɨ, auche'e pu ayan raatyanajsin asta na'a cai yá'uvi'itɨn. 8Aj pu xaa huataseijre'esin me eijre'e aɨjna tɨ cai ti'itɨ a'astijre'e. Ajta aɨn tavastara'a, aɨjna ɨ Jesús, aɨ pu raje'icatan. Aɨ pu ra'apua'arite'esin aɨjna ɨ runyuuca cɨme'e, ajta aɨjna cɨme'e tɨ naa seira'a a'ame tɨ'ɨj ajtahua'a huataseijre'esin ɨ tavastara'a. 9Ajta aɨn tɨ cai ti'itɨj a'astijre'e, aɨ pu anacai huataseijre'esin cɨme'en ɨ muare'eri'ira'ara'an aɨjna ɨ Satanás. Eihua pu ayan raruuren mej mi naa rɨ'ɨ tira'utaseij ɨ tyaɨte. Eihua pu hua'acuanamuan aɨjna cɨme'e ɨ tɨ cɨn hua'utaseijrate'esin, ɨ maj cɨn ramua'areeran a'ij tɨ te'eme. 10Ayaa pu een cɨn hua'acuanamuan nain cɨme'e a'ij tɨ tiru'umua'aree mej mi a'upua'arixɨ'ɨn ɨ tyaɨte a'ini camu huataura'a mej raataxe'eve'en ɨ tɨ ayan ti'ayajna tɨ ij Dioj hue'irajtuaani. 11- 12Aɨj pu cɨn Dioj tyu'utaijta tɨ aun a'utyaturan hua'a jemi aɨjna tɨ hua'acuanamua mej mi ca'anyejri cɨn rá'antzaahuate'en ɨ tɨ hue'itzi na'a, tɨ ij Dioj hua'uxa'apɨ'ɨntari'ire'en ayan tihua'axɨjte'en mej meyan a'ij pua'a huarɨj aɨjna cɨme'e maj ra'atzaahuate'e ɨ tɨ cai ayan ti'ayajna, silu ayaa pu hua'aranajchaca'a mej meyan huarɨni ɨ tɨ a'ij pua'a een ɨ Dioj jemi. 13Sajta muan, mɨ saj ta'ihuaamua'a, eihua pu a'amuaxe'eve'e ɨ tavastara'a. Ajta, ayaa pu tiraavijte'e tej teyan tí'ijtaujtzi'ire'e ɨ Dioj tɨ'ɨj pɨ na'a muejmi cɨme'e a'ini jajcua ɨmɨ Dioj pu amua'antihuau tɨ ij aɨn amue'irajtuaani aɨjna cɨme'e tɨ aɨn xaijnyu'ucara'ara'an ayée amuaatyahuii, ajta aɨjna cɨme'e saj ra'atzaahuate'e ɨ tɨ ayan ti'ayajna ɨ Dioj jemi. 14Ayaa pu een cɨn Dioj ayan amuaatajée aɨjna cɨme'e ɨ tej tyajamue'ixaa ɨ Cɨriistu'u jetze ma'acan tɨ ij ayan tyajamuaacɨ'ɨti sej seyan che'eta sana'a naa seira'a xa'ara'ani tɨ ajta ayan naa seijre'e u tajapua ɨ tavastara'a, aɨjna ɨ Jesús tɨ ajta i'i Cɨriistu'u. 15Aɨj xu cɨn, mɨ sej ta'ihuaamua'a, sata'aj huatyaujca'anyen ɨ rutzajta'a. Sajta muan ayaa xu huarɨni saɨjna cɨme'e, ti'itɨ tyaj a'ij tyajamuaamuá'ate, nain tɨj tyana'a tyajámuaatá'itiiri'i nusu tyaj amue'ixaa, caxu yá'uhua'anan. 16- 17Yaa pu'icu, ta'ihuaamua'a, che'e ayen tya'ara'ani, mej meyan amuaatyápua'arite'en ɨ a'amua tzajta'a, majta ca'anijra'a amuaata'an sej si seyan tyu'umuare'en saɨjna cɨme'e nain cɨme'e ti'imuari'ira'a tɨ i'i xa'apɨ'ɨn, sej si sajta seyan tihua'uta'ixaate'en. Che'e ayan rɨ'ɨ amuaaruuren aɨjna ɨ tavastara'a, aɨjna rusaɨj ɨ Jesús tɨ ajta i'i Cɨriistu'u, ajta ɨ Dioj ɨ tyaj rajya'upua, ɨ tɨ taxe'eve'e para rusen cɨme'e, ajta ayan taata'a a'ij tej tiraachu'eve'en aɨjna cɨme'e tɨ rɨ'ɨ titáachaɨn.

will be added

X\