2 Tesalonicenses 1

1Inyaa i nyaj i'i Pablo, jamuan ɨ Silvano, ajta aɨjna ɨ Timuteeyu, ayaa tu tyaja'amuayu'use'e mɨ sej Tesalónica e'eche, sajta mɨ sej e'etyujsa'ɨri jemin aɨjna ɨ Dioj ɨ tej rajya'upua, sajta jemin ɨ tavastara'a aɨjna ɨ Jesús tɨ ajta i'i Cɨriistu'u. 2Ajta aɨn ɨ Dioj ɨ tej rajya'upua, ajta aɨn ɨ tavastara'a, aɨjna ɨ Jesús tɨ ajta Cɨriistu'u pueen, miche'e maɨn rɨ'ɨ tyajamuaachaɨn, majta amuaatyápua'arite'en tyamua'a naa a'amua tzajta'a. 3Ayaa pu xaa nya'u tijí'ixa'apɨ'ɨn tej teyan tí'ijtaujtzi'ire'e ɨ Dioj a'anaj tɨ na'a muejmi cɨme'en. Ayaa pu tiraavijte'e a'ini tɨ'ɨj pɨ na'a tɨ yu auucá'a, eitze'e xu muan tya'atzaahuate'e, ajta eitze'e xu muan huaujxe'eve'e seij sajta seij. 4Aɨj tu cɨn rɨ'ɨ tyaja'amuaxa ɨ seica jemi ɨ mej e'etyujsa'ɨri mej mi tí'ijtaujtzi'ire'e ɨ Dioj. Ayaa tu een cɨn rɨ'ɨ tyaja'amuaxa a'ini muan xu ra'aviicue'i tyamua'a naa ɨ saj cɨn rajpueijtzi. Sajta muan, sauche'e xu ra'astijre'e ɨ tavastara'a. 5Aɨj tu cɨn ramua'aree tɨ Dioj ayan ti'ixa'apɨ'ɨntare'e a'ij tɨ tiraavijte'e. Ajta ayaa pu tira'amitejte'e ɨ Dioj tɨ ayan tiraavijte'e sej saun u a'utyarute a'u tɨ tyeje'ijta. Aɨj xu cɨn rajpueiitzi xa'aye'i ijii. 6Dioj pu ajta ayan che'eta na'a een naijmi'ica jemi. Aɨ pu seij huata'asin a'ij tɨ tiraavijte'e. Majta aɨme ɨ mej tyájámua'antyú'uuni'iri'i, aɨ pu pueijtzi hua'uta'asin a'ij mej meri pueijtzi tyajamuaata'a muejmi. 7Ajta Dioj pu aamuaata'asin sej huaujsa'upe'en tajamuan ajna xɨcajra'an tɨ jetzen ajtahua'a huataseijre'esin u ute'e ɨ tavastara'a, aɨjna ɨ Jesús. Aɨ pu hua'a jamuan huataseijre'esin aɨme ɨ mej tajapua ti'ivaɨre'e, ɨ maj majta va'acan cɨn títyatatí. Ayaa pu seira'a a'ame, cu xuee tɨ ti'ityéchajca aɨjna cɨme'e tɨ tyataasin. 8Aɨ pu pueijtzi hua'uta'asin aɨme ɨ maj cai ramua'ate ɨ Dioj, majta ɨ maj cai ra'ara'astijre ɨ nyuucari tɨ cɨme'en raxa a'ij tɨ huarɨj ɨ tavastara'a aɨjna ɨ Jesús. 9Aɨ pu pueijtzi cɨn hua'uta'asin tɨ cai a'anaj antipua'ari. Aɨ pu ajta hua'ure'iti mej mi aun a'utyarute a'u tɨ cai e'eseijre'e ɨ maj cɨn raamua'aree tɨ Dioj nainjapua tie'ijta rumuare'eri'ira'a cɨme'e. 10Ayaa pu hua'aruuren ajna xɨcajra'an tɨ jetzen ajtahua'a ya uve'enyejsin mej mi rɨ'ɨ tiraata'an aɨme ɨ tyaɨtyestyamua'ame'en ɨ maj jemin huatyáuu. Majta naimi'i ɨ maj meri ra'ara'astijre, aɨ mu rɨ'ɨ tya'utaseijra maɨjna jemi. Ayaa pu ajta che'eta na'a tyajamuaacɨ'ɨti saj raaseij aɨjna cɨme'e saj ra'antzaahuate a'ij tej tyajamue'ixaa. 11Aɨj tu cɨn tɨ'ɨj pɨ na'a tu rahuavii ɨ Dioj jemi muejmi cɨme'en. Ayaa tu rahuavii tɨ ayan tiraatámitejte'e ɨ Dioj tɨ ayan tiraaviitya'a a'aye'i tɨ amua'antihuau. Che'e aɨn raanaijmi'ire'en naijmi'i tɨj na'a saj seri cɨn tya'ataujratziiri'i tɨ xa'apɨ'ɨn een. Che'e aɨn raanaijmi'ire'en aɨjna cɨme'e ɨ rumuare'eri'ira'a, ajta naijmi'i tɨj na'a saj cɨn tyu'umuare'en aɨjna cɨme'e sej tya'atzaahuate'e. 12Ayaa tu een cɨn rahuavii sej si rɨ'ɨ tiraata'an saɨjna ɨ tavastara'a a'amua tzajta'a. Che'e aɨn tavastara'a ajta rɨ'ɨ tyajamuaata'an muejmi. Ayaa tu ti'ijxe'eve'e a'ini aɨjna ɨ Dioj, ajta ɨ tavastara'a, aɨjna ɨ Jesús tɨ ajta i'i Cɨriistu'u, aɨ mu rɨ'ɨ tyaja'amuachaɨ mua'aju'un para rusen cɨme'e.

will be added

X\