2 San Pedro 3

1- 2Muan, nyaj a'amuaxe'eve'e, aɨ pu aɨn pueen ɨ nyaj hua'apuacajretze cɨn tyaja'amuayu'use'e. Ayaa nu che'eta nyana'a nyaɨjna cɨme'e ɨ tɨ hua'apua, ca'anijra'a nu cɨn amuata'aca sej si seyan tzaahuati'ira'a cɨn tyu'umua'ati saɨjna jetze ɨ nyaj cɨn neyan amuata'aca saj ra'utamua'aree a'ij mej tyu'utaxajtaca'a aɨme ɨ maj Dioj jetze ma'acan ti'ixaxa'ata'a, sata'aj seyan che'eta sana'a ra'utamua'aree ɨ nyuucari ɨ tɨ cɨn tyajamuaataij aɨjna ɨ tavastara'a tɨ ajta aɨn pueen aɨjna tɨ amue'iratuaasin. Ai pu aɨn pueen ɨ nyuucari tɨ aɨn ayan tiraatyajtuaa itejmi jemi tyej ti teyan tyajamuaata'ixaate'en muejmi. 3Ayaa xu ramua'aree tɨ ayan te'eme ajna xɨcajra'an jetze tɨ jetzen nain te'entipua'ari. Aɨ mu huataseijre'esin aɨme ɨ mej amua'axaahuari'i mej mi ra'axaahuari'ira ɨ nyuucari tɨ tejmi jemi raatyajtuaa. Ayaa mu maɨjna cɨn á'ujhua'anya'a mua'aju'un maj meyan ra'astijra'a aɨjna tɨ ayan tihua'amitejte'e tɨj na'a a'ij tɨ tihua'araanajchi tɨ a'ij pua'a een. 4Ayaa mu ti'ixaata mua'aju'un tɨcɨn: “Ai ta'uj huarɨj aɨjna ɨ tɨ cɨn Dioj ayan tya'ataujratziiri'i tɨ nu'u ya huataseijre'esin. Tij cai capu ayan tyaja'ure'enyejsin a'ini auche'e pu ayan che'eta na'a seijre'e tɨj ajta ayan seijra'a a'aye'i tɨj na'a aɨjna xɨcajra'an mej jetzen huacuii ɨ tavaujsimua'acɨ'ɨ tɨj na'a ajta ijii. Ayaa pu che'eta na'a auche'e seijre'e tɨj ajta seijra'acaa ajna tɨ'ɨj Dioj ayan raatyataahuaca'a ɨ chaanaca.” 5Ayaa mu een cɨn meyan ti'ixa maɨjna cɨme'e maj meyan ruxé'evi'ira'a cɨn taura'aca meyan yá'uhua'axɨn tɨ jajcua ɨmɨ Dioj ayan runyuuca cɨn tyu'utaijtaca'a tɨ ayan huataseijre'en aɨjna ɨ tajapua. Ajta aɨn ɨ chaanaca, ayaa pu tyu'utyataavijhuaca'a tɨ'ij ayan ajnyen a aata'a. Ajta aɨn tɨ japuan seijre'e, ayaa pu ajta aɨjna cɨn ruuri a'aye'i aɨjna cɨme'e ɨ jaj. 6Ajta aɨme ɨ maj jajcua ɨmɨ japuan huachaatɨma'acaa ɨ chaanaca japua, aɨ mu hua'ujpua'arixɨ maɨjna cɨme'e tɨ aɨn jaj ayan huatamɨ'ɨyaca'a, ajta hua'ujamɨste. 7Ma ajta ijii, ayaa pu ti'ijcɨ'ɨti aɨjna ɨ tajapua tɨ ijii seijre'e, ajta aɨjna ɨ chaanaca ɨ tyaj yan japuan seijre'e i tyaj ijii huatyaɨte, Dioj pu ayan racha'ɨ tɨ ij ayan raatyataira. Ayaa pu ari raaxa'apɨ'ɨntare tɨ ayan huarɨni ajna xɨcajra'an jetze tɨ jetzen hua'axɨjte'en ɨ runyuuca cɨme'e, ajta huá'apua'arite'en aɨme ɨ tyaɨte ɨ maj cai a'atzu ra'astijre'e. 8Sata'aj cai seyan tiyá'uhua'axɨn, tɨ seij xɨcaj ayan che'eta na'a ti'itej ɨ Dioj jemi tɨj ajta ti'itej a'achu cumu sei vi'ira'a ninye'ira'a. Ajta, sei vi'ira'a ninye'ira'a ayan che'eta na'a ti'itej ɨ Dioj jemi tɨj sei xɨcajra'a. 9Tɨ pua'a Dioj ayan cai ca'anacan aráurasten aɨjna cɨme'e ɨ tɨ cɨn tya'ataujratziiri'i, capu ayan huataujmua'a tɨ cai a'anaj aɨjna cɨn aráurasten a'ij mej ti'imua'atze ɨ seica silu tyamua'a pu ayan te'eviicue'i muejmi jemi aɨjna cɨme'e tɨ cai raxe'eve'e tɨ a'atɨ ayan a'uveti. Capu xaa nya'u ayan raxe'eve'e silu ayaa pu raxe'eve'e maj naimi'i meyan huataujtuiire'en ɨ jemin maɨjna cɨme'e maj saɨque tyu'umua'ati mej mi cai che'e a'ij pua'a rɨjca. 10Ma ajta, ayaa pu che'eta na'a tyaja'ure'enyejsin ajna xɨcajra'an jetze tɨ jetzen huataseijre'esin ɨ tavastara'a tɨj ajta nahua'ari ayan aviitzi cɨn huataseijre'en ɨ tɨca'ari tzajta'a. Ajta aɨn ɨ tajapua, ayaa pu huatanamuajre'esin tɨ'ɨj antipua'are. Ca'anin pu cɨn tyu'utátzi'iti. Ajta tɨj na'a tɨ ayan tyu'utaavijhuaca'a, aɨ pu ayan huataujtu'isin aɨjna cɨme'e tɨ rɨ'ɨ huatyataasin. Ajta aɨjna ɨ chaanaca, ajta nain tɨj na'a japuan ti'iseijre'e u tɨ tyu'utaavijhuaca'a, naijmi'i tɨj na'a ayan raatyataira. 11A'ini nain pu ayan huataujtu'isin, ayaa pu tyu'ujxe'eve'e sej seyan rɨ'ɨ titetyújchaɨca, sej si rɨ'ɨ ti'iteseijra'a ɨ Dioj jemi nain cɨme'e a'ij saj rɨcɨ, sej si sajta nain cɨn ra'ara'astijre'en ɨ Dioj. 12Sata'aj seyan rahuauca, sajta seyan a'ujca'anyaacan cɨn ti'ijchue'eva'a tɨ ayan tyaja'ure'enyen ajna xɨcajra'an jetze tɨ jetzen Dioj te'entipua'arite'esin. Ayaa pu aɨjna cɨn huataujtu'isin aɨjna ɨ tajapua aɨjna cɨme'e tɨ taij raatyataira. Ajta aɨjna tɨ cɨn nain tyu'utaavijhuaca'a tɨj na'a tɨ ti'iseijre'e, aɨ pu ajta huataujtu'isin aɨjna cɨme'e tɨ rɨ'ɨ tiraatyátaira. 13Me tyajta ityan, a'ini aɨ pu aɨjna cɨn tya'ataujratziiri'i tɨ ayan huarɨni, aɨj tu cɨn teyan rachu'eve'e seij ɨ tajapua tɨ jajcua, ajta seij ɨ chaanaca tɨ ajta jajcua a'u tɨ e'eséira'a a'ame aɨjna tɨ urare'enya'acan cɨn seijre'e matɨj mana'a maun seira'a mua'aju'un. 14Aɨj xu cɨn seyan huarɨni, mɨ nyaj a'amuaxe'eve'e, a'ini ayaa xu seri rachu'eve'e tɨ ayan tyaja'ure'enyejsin. Sata'aj seyan tityaatyaujca'anyen sej seyan eenye'eque'en seijra'a ɨ jemin saj tyamua'a naa ru'ihuaamua'atan, sej si cai ti'itɨ cɨn a'aturaaca, tɨ ij aɨn Dioj cai ti'itɨ cɨn a'amua jetze tya'ujpua'arite'en. 15Sata'aj saɨjna jetze tyu'umua'ati tɨ Dioj ayan amue'iratuaasin aɨjna cɨme'e tɨ raayɨ'ɨtɨ tɨ tya'uteviicue'i muejmi jemi. Ajta aɨn ɨ ta'ihuaara'a ɨ tyaj raxe'eve'e, aɨjna ɨ Pablo, Dioj pu ayan raata'a tɨ yau'eitaa a'ara'ani tyamua'a naa. Aɨ pu ayan che'eta na'a tyajamuaatayu'use nain cɨme'e tyatɨj ityan. 16Ajta aɨjna jetze tɨ aɨn ra'uteyu'uxaca'a, aɨjna jetze ayan namuajre'e seica ɨ nyuucari tɨ ayan muare'eri tɨ a'atɨ ayan yau'eitaa a'ara'ani. Ajta seica ɨ tyaɨte ɨ maj cai ti'itɨ u'umua'aree, ɨ maj majta cai xɨ te'eviicue'i ɨ maj cɨn tya'atzaahuate'e, ayaa mu ti'itese'e mej mi meyan saɨque tiyau'eitaa mua'ara'ani, mej mi majta tihué'itiira a'ij tɨ cai ayan tiraavijte'e aɨjna tɨ Pablo ra'uteyu'uxaca'a, ajta aɨjna tɨ te'eyu'usi'i aɨjna jetze ɨ yu'uxari tɨ Dioj ayan raatyajtuaa itejmi jemi. Tɨ pua'a meyan maɨjna cɨn huarɨni, ayaa pu tihua'acɨ'ɨti maj antyujpua'arite'en. 17A'ini xu'uri ca'anijra'a ramua'aree, muan mɨ nyaj a'amuaxe'eve'e, rɨ'ɨ xu'u muan tɨ ij cai a'atɨ ayan amuaata'an sej si seyan che'eta sana'a caujxaahuatan ɨ Dioj jemi matɨj aɨme ɨ maj cai ti'itɨ a'astijre'e. Rɨ'ɨ xu'u sej si cai saɨjna cɨn tiyá'uhua'axɨn ɨ sej seyan te'eviicue'i saɨjna cɨme'e saj hua'astijre'e saɨme. 18Ma sajta muan, sata'aj seyan huaujnaijmi'ire'en ɨ rutzajta'a saɨjna cɨme'e tɨ aɨn tavastara'a rɨ'ɨ tyajamuata'aca, aɨjna tɨ ajta amue'irajtuaa, aɨjna ɨ Jesús tɨ ajta Cɨriistu'u pueen. Sata'aj seyan che'eta sana'a huaujnaijmi'ire'en saɨjna cɨme'e saj ramua'ate. Tiche'e rɨ'ɨ tiraatyajtuaani ijii, tyajta tɨj na'a rusen cɨme'e. Che'e ayan tyaja'ure'enyen. Yaa pu'u. Pu'uri antipua'araca'a.

will be added

X\