2 San Pedro 2

1Aj mu mi hua'a tzajta'a ɨ tyaɨte meyan huataseijre seica ɨ maj hue'itzi cɨn tihue'itiiri'i. Ayaa mu che'eta mana'a huataseijre'esin muejmi jemi aɨme ɨ maj majta hue'itzi cɨn tyajamuaata'itiira. Aviitzi mu cɨn meyan raatyatuasin muejmi jemi maɨjna ɨ nyuucari tɨ amá'ujɨsin, ɨ maj cɨn ma ruuraini maɨjna ɨ tavastara'a tɨ ajta hua'a jetze ma'acan tyu'utanajchitaca'a ɨ mej té'echaɨca'a ɨ Dioj jemi. Aɨj pu cɨn ayaa tihua'acɨ'ɨti tɨ aɨn Dioj ayan ca'anacan hua'antipua'arite'en. 2Majta mui'itɨ mu meyan hua'ara'astijre'esein mej mi meyan che'eta mana'a huataujxana'acɨre'en matɨj aɨme. Ayaa mu een cɨn seica meyan a'ij pua'a ti'ijxaata mua'aju'un maɨjna ɨ nyuucari ɨ tyaj cɨme'en huaju'un maɨjna cɨme'e a'ij maj rɨcɨ aɨme ɨ maj hue'itzi cɨn tyajamuaatáiitiira. 3Ayaa mu een cɨn meyan muejmi cɨme'en ti'imue'itɨn maɨjna cɨme'e mej huapɨ'ɨ raxe'eve'e mej eihua tí'ijchaɨca. Aɨj mu cɨn meyan hue'itzi cɨn amuaatyamue'itɨ. Tɨj na'a ajca'ihua'ɨmɨ tɨ'ɨj Dioj ayan hua'uxɨjte, tɨj na'a ijii auche'e pu araurastejsin aɨjna ɨ nyuucari tɨ hua'a cɨme'en tyu'utaxajtaca'a. Ajta ayan ti'ayajna tɨ Dioj auj ayan hua'antipua'arite'esin. 4Ee xaa nya'u, Dioj pu cai ayan tihua'utauuni'iri'i aɨme ɨ maj mejmi'i tajapua ti'ivaɨra'acaa, aɨmej ɨ maj majta meyan ti'itɨ cɨn autyajturaa ɨ jemin, silu au pu ayan huaje'etyaahua'axɨ u tajete a'u tɨ pueijtzi hua'ata'acara'a a'ame. Au pu hua'utyajtuaa a'u tɨ e'etyacun mej mi maun a'anami'ihua a'u tɨ a'utɨca'a. Au mu e'evíitzi'ihua mua'aju'un asta na'a cai Dioj ayan hua'uxɨjte'en ajna xɨcajra'an jetze tɨ jetzen nain te'entipua'arite'esin. 5Capu ajta tihua'utauuni'iri'i aɨme ɨ maj jajcua ɨmɨ yan seijra'acaa, silu ayaa pu tyu'uta'a tɨ aɨn jaj ayan tijɨste nainjapua ɨ chaanaca tɨ ij aɨjna cɨn pueijtzi hua'uta'an aɨme ɨ maj cai a'atzu ra'astijra'acaa ɨ Dioj. Ma ajta, aɨ pu xaa raatavaɨ aɨjna ɨ Noé tɨ ayan tihua'uta'ixaa a'ij mej ye'i huarɨni mej mi xa'apɨ'ɨn cɨn seijra'a ɨ Dioj jemi. Ajta Dioj ayan hua'utavaɨ aɨme ɨ seica ɨ maj meyan arahua'apua ara'asicaa. 6Aɨ pu ajta hua'uxɨjte aɨme ɨ maj maun a'uchaatɨma'acaa ɨ chajta'ana jetze tɨ hua'apua, aujna u Sodoma ajta u Gomorra. Nain pu cɨn hua'utyaatai. Ayaa pu een cɨn hua'uruu tɨ ij ayan titaata'itii a'ij tɨ hua'aruuren aɨme ɨ maj cai a'atzu ra'astijre'e ɨ Dioj. 7Ma ajta, aɨ pu raatavaɨj aɨjna ɨ Lot, aɨjna tɨ rɨ'ɨ ti'ityújchaɨca'a ɨ jemin, aɨjna tɨ ajta a'ij pua'a ra'asajcaa a'ij maj rɨjcaa ɨ mej meyan huataujxana'acɨre aɨme ɨ maj cai a'atzu ti'itɨ a'astyajca'a. 8Ajta aɨn ɨ tevi tɨ rɨ'ɨ ti'ityújchaɨca'a ɨ Dioj jemi, a'ini aɨ pu nain tujca'ari tzajta'a ayan hua'a tzajta'a e'echajca'a, eihua pu rajpueijtzica'a ɨ rutzajta'a tɨ urare'enya'acan cɨn seijra'acaa. Ayaa pu een cɨn tirajpueijtzica'a aɨjna cɨme'e tɨ ayan raaseij, ajta raanamuajri'i ɨ maj a'ij pua'a rɨjcaa aɨme ɨ maj cai ti'itɨ a'astyajcaa. 9Aɨj pu cɨn, Dioj ayan raayɨ'ɨtɨ tɨ ayan ru'ijrajtuaani aɨjna jetze tɨ cɨn rajpueijtzi aɨjna ɨ a'atɨ tɨ rɨ'ɨ ti'ityujcha'ɨ. Aɨ pu ajta ayan raayɨ'ɨtɨ tɨ hue'ityaanan aɨme ɨ maj a'ij pua'a titetyújcha'ɨ tɨ ij ayan pueijtzi hua'uta'an ajna xɨcajra'an jetze tɨ jetzen hua'axɨjte'en naijmi'ica. 10Ee xaa nya'u, ayaa pu ti'ayajna, tɨ ayan tihua'acɨ'ɨti aɨme ɨ mej jetzen á'ujca'anye maɨjna jetze tɨ eihua a'ij pua'a ti'iseijre'e, mej mi meyan huataujxana'acɨre'en maɨme jamuan ɨ ruxa'a tyetyaca. Ayaa pu che'eta na'a a'ij pua'a ti'iseijre'e maj cai a'atzu ti'itɨ cɨn tya'aste. Ayaa mu á'ujca'anye maj meyan huarɨni a'ij tɨ tihua'amitejte'e. Eihua mu á'ujtzaahuate'e. Aɨ mu majta cai ratzɨɨnya'a meyan á'ujca'anye mej a'ij pua'a tihua'axajta aɨme ɨ maj tajapua e'eseijre'e. 11Ma majta aɨme ɨ maj tajapua ti'ivaɨre'e, camu meyan á'ujca'anye mej meyan a'ij pua'a tihua'axajta aɨme ɨ tyetyaca maɨjna jemi ɨ tavastara'a. Ma majta aɨme, eitze'e mu rucaca'anye, majta eitze'e va'acan cɨn antyujmua'aree macai aɨme ɨ tyetyaca. 12Majta aɨme ɨ tyetyaca, ayaa mu a'ij pua'a ti'ixaata mua'aye'i maɨjna cɨme'e ɨ maj cai a'atzu yau'ite. Aɨj mu cɨn meyan che'eta mana'a seijre'e matɨj aɨme ɨ ya'amuaate ɨ maj cai tihuájáu'eite, ɨ maj cha'a mana'a á'ujhua'an. Ayaa mu een cɨn huanunu'eihuaca'a mej mi tyaɨte hua'uvivi'in, majta hua'ucui'ini. Majta aɨme ɨ tyetyaca, ayaa pu che'eta na'a meyan antipua'ari maɨjna cɨme'e ɨ maj cɨn a'ij pua'a hua'uruu aɨme ɨ maj anacai rɨ'ɨ titetyújchaɨca'a. 13Ayaa pu che'eta na'a tihua'uta'asin tɨ a'atɨ ayan tihua'ari'ira ɨ maj tí'ijcha'ɨ matɨj majta aɨme rujɨɨmua'a mana'a meyan tihua'ari'iri'i ɨ seica ɨ mej tí'ijchaɨca'a. Ajta aɨjna ɨ maj ti'itɨ cɨn huataujtyamua'ave'en, ayaa mu tujca'ari tzajta'a ruxaahua ti'iteseijre'e maɨjna cɨme'e tɨ ru jetze huiraninyei. Ayaa mu che'eta mana'a seijre'e hua'a tzajta'a ɨ tyaɨte tɨj ti'itɨ tɨ e'ihuaméijra, tɨj ajta aɨjna tɨ cɨn capita'inaca'a. Ruxaahua mu rutyamua'ave'e maɨjna cɨme'e maj amuaacuanamua mua'aju'un meenti majta meyan ti'iyeste muejmi jamuan. 14Ayaa mu jetzen á'ujca'anye maɨjna jetze ɨ jɨita'a matɨj mana'a mej meyan raseijra mej mi meyan jamuan tyu'uxana'acɨre'en. Camu majta a'anaj raatapua'ajta maj meyan a'atura ɨ Dioj jemi. Majta, ayaa mu ca'anijra'a hua'ata'aca aɨme ɨ maj cai xɨ te'eviicue'i, mej mi majta meyan cha'ata mana'a autyaturan ɨ Dioj jemi. Tyamua'a mu tiraarɨ'ɨre a'ij mej ti'itɨj cɨn huarɨni mej mi meyan tiraatyeevi'i ti'itɨ tɨ na'a mej meyan ti'ijxe'eve'e maɨjna cɨme'e mej chueere. Ai mu aɨn pueen ɨ tyaɨtejra'a tɨ Dioj pueijtzi hua'uta'asin. 15Mu'uri ajtacɨ́j ɨ juye jetze ɨ maj japuan huaju'un aɨme ɨ tɨ rɨ'ɨ tihua'amityejte'e. Majta meri maɨjna jetze ucajrupi tɨj ajta ayan ucajrupi aɨjna ɨ Balaam tyaacan tɨ yaujra'an pueenya'a aɨjna ɨ Beor tyaacan. Ajta aɨjna ɨ Balaam, ayaa pu ra'aranajchaca'a tɨ ti'itɨ huamué'itɨn aɨjna cɨme'e tɨ a'ij pua'a huarɨni. 16Ma ajta, puuru'u, tɨ cai tyá'anrɨ'ɨre, ayaa pu tyu'utanyu tɨj tyaata'a. Aj pu'i ra'ajtya'axɨ aɨjna ɨ Balaam aɨjna cɨme'e tɨ a'ij pua'a rɨjcaa. Ayaa pu aɨjna cɨn huarɨj, aɨ pu ayan raata'ijmɨjri'i aɨjna tɨ ayan ruseijrataca'a tɨ nu'u Dioj jetze ma'acan ti'ixaxa'ata'a, tɨ cai ti'itɨ cɨn ayan huarɨni aɨjna cɨme'e tɨ rutɨmue'i. 17Ayaa mu che'eta mana'a ti'ivaɨre'e aɨme ɨ tyetyaca tɨj a'u tɨ a'ajaijxa a'u tɨ cai jaj jetze airáninyei na'ari ɨ jaitɨri tɨ aaca ráatajchi, ajta tɨ jetzen cai vijvi'iye. Ayaa pu tihua'acɨ'ɨti mej maun a'utyaturan u tajete a'u tɨ huapɨ'ɨ a'utɨca'a tɨj na'a rusen cɨme'e. 18Ayaa pu aɨjna cɨn ayan ti'irɨnyaca aɨjna cɨme'e mej meyan ca'anin cɨn á'ujtzaahuate'e maɨjna cɨme'e ɨ nyuucari tɨ cai a'ij huataujmua'a. Majta meyan ca'anijra'a hua'ata'aca ɨ seica mej mi meyan tyu'umua'ati maɨjna jetze tɨ hua'ajetze huiiraninyei tɨ ayan rusaɨj a'ij tirajtyau. Ayaa mu aɨjna cɨn huarɨj, aɨ mu meyan majta ca'anijra'a hua'ata'aca aɨme ɨ maj mauche'e tihuijsin hua'a jemi mej mi majtahua'a ti'itɨ cɨn autyaturan ɨ Dioj jemi maɨjna cɨme'e mej hue'itzi cɨn tihue'ijte'e aɨme ɨ tyetyaca. 19Ayaa mu ti'itɨ cɨn tya'ataujratziiraca maj nu'u tihua'uta'an mej mi ruxaahua á'ujhua'anye'en. Ma ajta, capu rɨ'ɨri a'ini aɨ mu rujɨɨmua'a mana'a meyan ca'anyejri cɨn ti'ivaɨre'e maɨjna cɨme'e maj a'ij pua'a titetyújcha'ɨ, a'ini a'atɨ tɨ na'a tɨ ayan ca'anyejri cɨn ti'ivaɨre'e, aɨ pu ayan ravaɨre'e aɨjna ɨ a'atɨ tɨ ari ra'antimue'itɨ. 20Ajta tɨ pua'a meri meyan raatapua'ajtaca'a maj meyan che'eta mana'a a'ij pua'a titetyújcha'ɨ matɨj ɨ seica ɨ maj yan japuan seijre'e ɨ chaanaca, tɨ pua'a meyan raatapua'ajtaca'a maɨjna cɨme'e maj ra'ancura'a maɨjna ɨ tavastara'a tɨ ajta ayan tu'irajtuaani, aɨjna ɨ Jesús tɨ ajta Cɨriistu'u pueen, tɨ pua'a meyan maɨjna cɨn huarɨj, majtahua'a mu meyan a'ij pua'a huatyaarɨj tɨ ij ajtahua'a hua'utyamue'itɨn aɨjna tɨ a'ij pua'a een, ayaa mu eitze'e a'ij pua'a ti'ityeseira'a mua'aju'un tɨ'ɨj nain te'entipua'are cai tɨ jajcua maj ɨmɨ seijra'acaa. 21Mana'ajtzɨ cai a'anaj raamua'atijche'en maɨjna ɨ ye'ira tɨ naa ti'iseijre'e ɨ Dioj jemi macai meyan ramua'areera, majta yá'uhua'axɨn aɨjna ɨ nyuucari tɨ cɨn Dioj ayan huataura'ate, tɨ ajta ayan raatyajtuaa aɨme jemi tɨ ij aɨjna cɨn tihua'utaijte'en. 22Ayaa pu xaa tihua'uruu a'ij tɨ te'eyu'usi'i ɨ yu'uxari jetze tɨcɨn: “Aɨjna ɨ tzɨ'ɨ ajtahua'a pu mu a'uve'eme a'utɨ ajjáraj tɨ'ij raacua'ani ɨ rujara'ari.” Ajta tɨ ayan tɨcɨn: “Aɨjna ɨ tuiixu tɨ huaɨ'ɨhuaca'a, ajtahua'a pu mu a'uve'eme a'u tɨ huaɨ'ɨhuaca'a ɨ xarij cɨme'e tɨ ij ajtahua'a ayan huaɨ'ɨhua.”

will be added

X\