2 San Pedro 1

1Inyaa Simón, i nyaj nyajta Pedro pueen, aij nu jetze tyaja'amuayu'use'e nyaɨjna cɨme'e nyaj ravaɨre'e nyaɨjna ɨ Jesús tɨ ajta Cɨriistu'u pueen. Aɨ pu na'antihuau nyej ni neyan tyu'utyaɨre'en ɨ jemin. Sajta muan, Dioj pu ayan amue'irajtua muejmi, aɨjna ɨ Dioj tɨ urare'enya'acan cɨn seijre'e sej si seyan che'eta sana'a tya'atzaahuate'e tyatɨj ityan. Ai pu aɨn pueen tɨ eihua huapɨ'ɨ tyajamuatyava'ɨri. 2Che'e ayan eitze'e tyajamuaacɨ'ɨti tɨ rɨ'ɨ tyajamuaata'acare'en, ajta tɨ rɨ'ɨ tyajamuaatyapua'arite'en aɨjna cɨme'e sej seri ramua'ate ɨ Dioj, sajta saɨjna ɨ Jesús, tɨ ajta tavastara'a pueen. 3Rumuare'eri'ira'a pu cɨn Dioj ayan titaatá'a nain tɨ ruxe'eve'e ɨ tyaj cɨn ruuri huatyaturan ɨ jemin, ɨ tyaj tyajta cɨn teyan rɨ'ɨ ti'ititacha'ɨ a'ij tɨ aɨn ayan ti'ijxe'eve'e. Ayaa pu een cɨn ayan rɨ'ɨ titaatá'a aɨjna cɨme'e tyej teyan raamuá'a tyaɨjna tɨ ayan taatajée tyej ti teyan huatyaturan ɨ jemin tɨj na'a rusen cɨme'e tɨ ij ayan taacɨ'ɨti aɨjna ɨ tyaj cɨn rɨ'ɨ tiyá'useijra, tyaɨjna cɨme'e tɨ aɨn ayan nain cɨn antyujmua'aree. 4A'ini ayan een ɨ jemin, aɨ pu ayan titaatá'a aɨjna ɨ nyuucari tɨ cɨn va'acan cɨn tya'ataujratziiri'i, tɨ ajta eihua huapɨ'ɨ tajetze ruxe'eve'e tyej ti tyaɨjna cɨn huatátauuna tɨ ij cai a'ij pua'a taaruuren aɨjna tɨ a'ij pua'a een tɨ hua'a tzajta'a seijre'e ɨ tyaɨte ɨ mej yan seijre'e chaanaca japua, tej ti tyajta teyan che'eta tyana'a urare'enya'acan cɨn seijra'a tɨj ajta ɨ Dioj. 5Aɨj xu cɨn, sata'aj seyan huatyaujca'anyen sej saɨjna cɨn rajtyanaijmi'ire'en ɨ saj cɨn tya'atzaahuate'e saɨjna cɨme'e saj sajta tzaahuati'ira'a cɨn rɨ'ɨ titetyújcha'ɨ. Sajta sata'aj seyan saɨjna cɨn rajtyanaijmi'ire'en ɨ saj cɨn rɨ'ɨ titetyújcha'ɨ saɨjna cɨme'e saj tyamua'a naa tiru'umua'aree. 6Sata'aj sajta saɨjna cɨn rajtyanaijmi'ire'en ɨ saj cɨn rɨ'ɨ tiru'umua'aree saɨjna cɨme'e saj sajta nain cɨn á'ujcu'uvaa. Sata'aj sajta saɨjna cɨn rajtyanaijmi'ire'en ɨ saj cɨn a'ujcu'uve saɨjna cɨme'e saj sajta tya'utaviicue'i. Sata'aj sajta saɨjna cɨn rajtyanaijmi'ire'en ɨ saj cɨn seyan te'eviicue'i saɨjna cɨme'e saj tzaahuati'ira'a cɨn rana'amiche ɨ Dioj. 7Sata'aj sajta saɨjna cɨn rajtyanaijmi'ire'en ɨ saj cɨn tzaahuati'ira'a cɨn rana'amiche ɨ Dioj saɨjna cɨme'e saj tyamua'a naa huataurihuaamua'ata. Sata'aj sajta saɨjna cɨn rajtyanaijmi'ire'en ɨ saj seyan rɨ'ɨ tyu'utaurihuaamua'ataca'a saɨjna cɨme'e sej seyan titeehuaujxe'eve'e. 8Sata'aj seyan nain cɨn rajtyanaijmi'ire'en a'ini tɨ pua'a seyan rɨ'ɨ titetyújchaɨca tyamua'a naa, ayaa pu a'amuaruuráj a'ame saj eihua huapɨ'ɨ tyu'utyavaɨre'en sej si tyamua'a naa ti'itɨ cɨn tyu'utatuiire'en ɨ Dioj jemi saɨjna cɨme'e saj tzaahuati'ira'a cɨn ramua'ate saɨjna ɨ tavastara'a, aɨjna ɨ Jesús tɨ ajta Cɨriistu'u pueen. 9Na'ari cai, a'atɨ tɨ na'a tɨ ayan tira'aturaate'e tɨ ayan nain cɨn rajtyanaijmi'ire'en ɨ tɨ cɨn tya'atzaahuate'e, ayaa pu che'eta na'a een tɨj a'atɨ tɨ aracun, tɨ cai a'ɨmɨ ti'iseijrave. Aɨ pu ari ya'uhua'axɨ tɨ Dioj ayan tiraatauuni'iri'i aɨjna tɨ ajmi'i cɨn autyajturaa ɨ jemin. 10Aɨj xu cɨn, nye'ihuaamua'a, sata'aj seyan eitze'e huatyaujca'anyen sej si seyan huarɨni tɨ ij ayan amiteera'a tɨ Dioj ayan amuaatajée, ajta amua'antihuau. Tɨ pua'a seyan huarɨni, capu a'anaj ayan á'amuaruuren tɨ Dioj ayan ma amuuhua'axɨn tɨj na'a rusen cɨme'e. 11Ma ajta, ayaa pu tyaja'amuacɨ'ɨti sej si tyamua'a naa saun a'utyarute a'u tɨ rusen cɨn tyaja'utaijta aɨjna ɨ tavastara'a tɨ tu'irajtuaa, aɨjna ɨ Jesús tɨ ajta Cɨriistu'u pueen. 12Aɨj nu cɨn neyan rɨni nyaj a'anaj tɨ na'a neyan tyaja'amue'ixaatya'a sej seyan tira'utamua'aree saɨjna. Capu amɨn a'ij sej seri ramua'aree, sajta seri tya'utaviicue'iri'i saɨjna cɨme'e sej seyan tya'atzaahuate'e. 13- 14Ayaa pu tina'amitejte'e tɨ ayan tiraavijte'e nyej neyan huarɨni tɨj na'a nyaj nyauj yan seijre'e, nyej ni ca'anijra'a amuaata'acare'en sej si seyan tira'utamua'aree a'ij sej huarɨni, a'ini nu'uri neyan ramua'aree tɨ ari vejli'i pɨti'irɨcɨ ajna xɨcajra'an jetze nyej jetzen huamɨ'ɨni. Ayaa nu nyaɨjna cɨn ramua'aree a'ini aɨ pu tavastara'a, aɨjna ɨ Jesús, tɨ ajta Cɨriistu'u pueen, ayaa pu tinaata'ixaa. 15Nyajta nu neyan huatyanca'anyejsin nyej ni neyan tyajamue'itii tɨ ij ayan huatarɨ'ɨristare sej seyan a'anaj tɨ na'a tira'utamua'aree nyatɨ'ɨj cai che'e ma'ahua'atan. 16Tyatɨ'ɨj tyaɨjna jamue'ixaa a'ij tɨ eenye'eque'en huataseijre'esin ajna xɨcajra'an jetze tɨ jetzen ajtahua'a ya va'acányejsin aɨjna ɨ tavastara'a, aɨjna ɨ Jesús tɨ ajta Cɨriistu'u pueen, tɨ ij ayan nain cɨn antyujmua'aréera, catu ra'astijra'acaa tyaɨjna ɨ nyuucari ɨ maj rujɨɨmua'a mana'a rajtyau, ɨ maj meyan ti'imua'atzajcaa. Catu xaa nya'u tajɨɨmua'a tyana'a rajtyau silu tyajɨ'ɨsi tu cɨn naa rɨ'ɨ tiya'useiira ta'araa tɨ aɨ pu nain cɨn antyujmua'aree. 17Ajta, Dioj ayan rɨ'ɨ tiraatyajtuaa, ajta rɨ'ɨ tiraata'a aɨjna cɨme'e tɨ huapɨ'ɨ ti'iseijre'e u tajapua tɨ'ɨj Dioj ayan cɨme'en tyu'utaxajtaca'a tɨcɨn: “Ai pu aɨn pueen ɨ niyauj, ɨ nyaj eihua huapɨ'ɨ raxe'eve'e. Aɨ pu ajta rɨ'ɨ tinata'aca inyeetzi.” 18Tyajta ityan, ayaa tu raanamuajri'i tyaɨjna ɨ nyuucari tɨ ute'e je'icanamuajre tyatɨ'ɨj tyanna ja'utyáuuca'a tyaɨjna jamuan anna ɨ jɨri jetze tɨ Dioj huataura'ate. 19Ajta aɨjna ɨ tyaj ya'useij, aɨ pu ayan arauraste aɨjna tɨ ajmi'i ayan te'eyu'usi'ihuaca'a aɨjna ɨ yu'uxari jetze ɨ maj cɨme'en tyu'utaxajtaca'a ɨ Dioj jetze ma'acan. Aɨj tu cɨn teri eitze'e tyamua'a naa tiru'umua'aree tɨ ayan ti'ayajna aɨjna tɨ ajmi'i ayan te'eyu'usi'ihuaca'a. Rɨ'ɨ pu tyajamuaatyavaɨre'esin tɨ pua'a seyan che'eta sana'a ra'ara'astijre'en tɨj ajta a'atɨ ayan tyamua'a naa tya'atanyee tatzari cɨme'e a'u tɨ a'utɨca'a. Sata'aj seyan che'eta sana'a ra'ara'astijre'en tɨj ajta a'atɨ tɨ ayan atanyee asta na'ajcai huataseijre'en aɨjna ɨ xu'ura'ave tɨ tapua'arijma'aca uje'ijninyei. Sata'aj seyan ra'ara'astijre'en asta na'ajcai aɨn xaijnyu'ucara'ara'an ɨ Dioj ayan huatyaturan ɨ a'amua tzajta'a. 20Anacai, ayaa pu ruxe'eve'e sej seyan raamua'aree tɨ cai a'atɨ a'anaj rusaɨj a'ij tirajtyau a'ij tɨ huataujmua'a aɨjna ɨ nyuucari ɨ maj meyan tyu'utaxajtaca'a ɨ Dioj jetze ma'acan tɨ ayan raatyajtuaa itejmi jemi. 21Capu a'atɨ a'anaj rusaɨj a'ij tirajtyau tɨ ayan tyu'utaxaj ɨ Dioj jetze ma'acan silu aɨjna xaijnyu'ucara'ara'an ɨ Dioj, ayaa pu ca'anijra'a hua'uta'a maj meyan tyu'utaxaj, aɨme ɨ maj maɨjna cɨn tyu'utaxajtaca'a ɨ Dioj jetze ma'acan.

will be added

X\