2 San Juan 1

1Inyaa, i nyaj vasta'a pueen, aij nu jetze ya muataujte'e, muaa mɨ pej hua'anaana pueen aɨme ɨ mej maun e'etyujsa'ɨri, muaa tɨ Dioj mua'antíhuau. Yaa nu nyajta hua'ataujte'e ɨ a'ayaujmua'a ɨ mej ra'astijre'e ɨ nyuucari tɨ ayan ti'ayajna. Ayaa nu neyan tzaahuati'ira'a cɨn tyaja'amuaxe'eve'e, majta meyan che'eta mana'a tyaja'amuaxe'eve'e matɨj mana'a pua'amua ɨ mej meyan ti'ijmua'aree ɨ nyuucari tɨ ayan ti'ayajna. 2Ayaa tu tyaɨjna cɨn tyaja'amuaxe'eve'e tyaɨjna cɨme'e tɨ aɨn nyuucari tɨ ayan ti'ayajna. Ayaa pu tejmi jemi seijre'e, ajta ayan tejmi jemi seira'a a'ame tɨj na'a rusen cɨme'e. 3Che'e aɨn Dioj ɨ tyaj rajya'upua, aɨjna jamuan ɨ Jesús tɨ Cɨriistu'u pueen, aɨjna tɨ ajta yaujra'an pɨrɨcɨ ɨ Dioj, che'e aɨn ayan rɨ'ɨ tyajamuaata'acare'en, ajta amua'ancu'uvajxɨ'ɨn, ajta amuaatyápua'arite'en sej si seyan tzaahuati'ira'a cɨn rɨ'ɨ titetyújchaɨca, sej si sajta huaujxe'eve'en seij sajta seij. 4Eecan nu nyaɨjna cɨn nyetyamua'ave'e nyaɨjna cɨme'e nyej neyan tiraamua'areeri'i maj seica ɨ maj mueetzi jetze ajtyama'acan meyan che'eta mana'a tzaahuati'ira'a cɨn meyan rɨ'ɨ titetyújcha'ɨ a'ij tɨ titaataij aɨjna ɨ tyaj rajya'upua. 5Ajta ijii, mɨ paj hua'anaana pueen, ayaa nu ti'itɨj cɨn ti'imuahuavii. Canu jajcuacan cɨn ti'imuayu'use'e nyaɨjna cɨme'e tɨ Dioj ayan aɨjna cɨn titaataij silu aij nu cɨn ti'imuayu'use'e nyaɨjna cɨme'e tɨ jajcua ɨmɨ tejmi jemi raatyajtuaa tyaj nu'u teyan tityahuátaxe'eve'en seij tyajta seij. 6Ayaa pu aɨjna cɨn tye'emiteere'e seij tyajta sei tzaahuati'ira'a cɨn tira'ara'astijre'en a'ij tɨ aɨn ti'itaijte'e, tyej teyan tityahuátaxe'eve'en. Ajta, ai pu aɨn pueen ɨ tɨ cɨn titaataij. Aɨj pu cɨn, a'ini ayaa xu jajcua ɨmɨ tiraanamuajri'i tɨj na'a tɨ yu e'ire'enye, ayaa pu tyu'ujxe'eve'e saj nu'u seyan tityahuaujxe'eve'en. 7Ayaa pu aɨjna cɨn tyu'ujxe'eve'e sej seyan huarɨni, a'ini aɨme ɨ maj tyu'ucuanamuajca mu'uri mui'itɨ huataseijre huá'a tzajta'a aɨme ɨ maj yan huachaatɨme ɨ chaanaca japua. Aɨ mu meyan aviitzi cɨn ti'ixaxa'a tɨ nu'u aɨn Jesús tɨ ajta Cɨriistu'u pueen ayan nu'u cai ayan tyu'utaujtyevistaca'a. Ai mu aɨn pueen ɨ maj tyu'ucuanamuajca, ɨ maj majta rajchaɨre'e ɨ Cɨriistu'u. 8Rɨ'ɨ xu'u muan, tɨ ij cai ayan amuaaruuren mɨ a'amua tzajta'a sej si cai ya'uraini ɨ saj cɨn tyu'umuarej silu tɨ ij ayan naijmi'i tyajamuaacɨ'ɨti ɨ saj raamue'itɨ ɨ Dioj jemi. 9A'atɨ tɨ na'a tɨ ayan rɨcɨ rusaɨj a'ij tɨ tirajtyauve, ajta cai ayan tira'astijre'e aɨjna ɨ nyuucari tɨ cɨn Cɨriistu'u ayan tita'itiiri'i, capu seijre'e ɨ Dioj jemi aɨjna ɨ a'atɨ. Ma ajta, a'atɨ tɨ na'a tɨ ayan tira'astijre'e aɨjna tɨ cɨn ayan tita'itiiri'i, aɨ pu rajya'upua. Ayaa pu che'eta na'a seijre'e aɨjna jemi tɨ yaujra'an pueen ɨ Dioj. 10- 11Tɨ pua'a a'atɨ muejmi jemi mu a'uve'eme'en tɨ cai ayan tira'astijre'e aɨjna ɨ nyuucari tɨ tejmi jemi raatyajtuaa, caxu raatataujtya'a, caxu sajta ra'ancure'evi'itɨjcɨjcare'en a'u saj e'eche, a'ini a'atɨ tɨ na'a tɨ ayan ra'ancure'evi'itɨn, aɨ pu jamuan ajta ayan rɨcɨ tɨ a'ij pua'a een. 12A'ini capu ti'iseicaj na'a ɨ tɨ tyu'ujxe'eve'e ɨ nyaj cɨn tyajamuaata'ixaate'en, silu ti'imui'i, aɨj nu cɨn cai raxe'eve'e nyej neyan tyajamuaataiti'i aíjna i yu'uxari jetze silu ayaa nu ti'ijchu'eve'e nyaj nyasaɨj u á'ume'en muejmi jemi tyej ti naijmi'i taseira ta'ara'ani, tyej ti teyan ti'ihuáta'ixaate'en tyej ti nain cɨn huatatyamua'ave'en. 13Majta aɨme ɨ maj yaujmua'ame'en pueen, ɨ maj jamuan e'etyujsa'ɨri maɨjna a'ajuu ɨ tɨ Dioj ra'antihuau, aɨ mu ya á'amuataujte'e. Ayaa pu'u, che'e ayan tyaja'ure'enyen.

will be added

X\