2 Corintios 9

1Cɨme'en aɨjna ɨ tyaj cɨn hua'avaɨre'e aɨme ɨ tɨ Dioj rɨ'ɨ tihua'ajcha'ɨ, capu a'atzu ruxe'eve'e tej teyan tyajamuaatayu'use'en. 2A'ini nu'uri ramua'aree sej seri á'ujca'anye sej si seyan huarɨni ruxé'evi'ira'a cɨme'e. Aɨj nu cɨn neyan a'antzaahuate'e hua'a jemi ɨ mej maun a'uchaatɨme tɨj na'a aun tɨ huatacá'a u Macedonia. Ayaa nu tihue'ixaate'e yee pu'uri ayan a'atee sei ninye'ira'a ɨ saj seri rɨ'ɨ huaujruu. Ajta, xu'uri ca'anijra'a hua'ata'aca aɨjna cɨme'e sej seyan a'ujca'anyaacan cɨn tyu'utyavaɨre'en. 3Me nyajta inyaa, ayaa nu een cɨn ta'ihuaamua'a huataíti muejmi jemi tɨ ij cai ayan te'irajra'ani tyaj huaapua'a tyana'a ahuatatzaahuate'en aɨjna cɨme'e saj cai xɨ rɨ'ɨ huaujruu, a'ij nyej neri tihua'uta'ixaa muejmi cɨme'en. 4Na'ari cai, tɨ pua'a seica ɨ mej maun Macedonia e'ema'acan meyan maun nya jamuan a'uju'un, teyan amuaatyauuni sacai xɨ rɨ'ɨ huaujruuren, aj pu xaa taatatyevi'iraste'esin itejmi. Capu amuaatatyevi'iraste'esin muejmi, silu itejmi pu xaa aɨjna cɨme'e tyaj muejmi cɨme'en ahuatatzaahuate. 5Aɨj pu cɨn ayaa pu tinaatámitejte tɨ ayan tyu'ujxe'eve'e nyej neyan ca'anijra'a hua'uta'an ɨ nye'ihuaamua'a mej mi maun á'uju'un muejmi jemi, mej mi anacai rɨ'ɨ amuaaruuren maɨjna cɨme'e ɨ saj cɨn tya'ataujratziiri'i sej tyu'utapueijve'en. Ayaa pu'u, a'ini canu raxe'eva'acaa nyaj ca'anyejri cɨn amuaataijte'en sej si tyu'utapueijve'en silu sej si ruxé'evi'ira'a cɨn tyu'uta'an. 6Caxu yá'uhua'anan. Tɨ pua'a cɨj sana'a tyu'uta'an, cɨj xu'u sajta tya'ancura'asin. Ajta, tɨ pua'a eihua setyu'uta'an, eihua xu sajta tya'ancura'asin. 7Ayaa pu tyu'ujxe'eve'e sej seyan huarɨni, seij sajta seij, che'e a'atɨ tɨ na'a ayan tyu'uta'an a'ij tɨ ari tiraaxa'apɨ'ɨntare ɨ rutzajta'a. Che'e cai ayan ramuájchya'a, a'ini eecan pu ra'araanajchi ɨ Dioj tɨ a'atɨ rutyamua'ava'a tyu'utapueijve'en. 8Ajta aɨn ɨ Dioj, aɨ pu raayɨ'ɨtɨ tɨ ayan raatamui'iren nain cɨme'e ɨ tɨ cɨn rɨ'ɨ tyajamuaata'an sej si seyan a'anaj tɨ na'a tya'ancura'ave'en tɨj na'a tɨ tyu'ujxe'eve'e. Aɨ pu ajta ayan raatamui'irejsin tɨ ij ayan ti'icɨ'ɨpáa aɨjna jetze satɨj sana'a saj cɨn tyu'umuare'en tɨ xa'apɨ'ɨn een. 9Ayaa pu te'eyu'usi'i tɨcɨn: Aɨ pu a'ɨmɨ tihua'urá'ate, aɨ pu ajta tihua'apueijve'e aɨme ɨ maj cai a'ij ti'ijviicue'i, ajta, tɨj na'a tɨ ayan rɨcɨ tɨ xa'apɨ'ɨn een, aɨ pu ayan huatyaturaasin ɨ Dioj jemi tɨj na'a rusen cɨme'e. 10Ajta aɨn tɨ ti'itá'aca ɨ imue'eri tɨ cɨn a'atɨ ayan tyu'uhuaste'en, aɨ pu ajta ayan tyu'uta'asin, ajta raatamui'iren ɨ saj cɨn huataujvaɨre'en sej si eitze'e seyan tyu'umuare'en aɨjna cɨme'e tɨ xa'apɨ'ɨn een. 11Eihua pu huapɨ'ɨ raatamui'irejsin nain cɨme'e tɨ tyajamua'aturaate'e sej si ruxé'evi'ira'a cɨn tihua'uta'an tyamua'a naa. Aɨj tu cɨn ityan, tyamua'a tu rɨ'ɨ tiraata'asin ɨ Dioj. 12A'ini tɨj na'a sej seyan saɨjna cɨn ti'ivaɨre'e, muan xu seyan hua'atyava'ɨri aɨme ɨ mej Dioj jemi seijre'e, saɨjna cɨme'e ɨ tɨ tihua'aturaate'e. Ajta, caxu aɨ sana'a cɨn ti'ivaɨre'e, silu ajta mu eihua rɨ'ɨ tirata'aca ɨ Dioj jemi maɨjna cɨme'e a'ij sej huarɨj. 13Ayaa pu'u, a'ini ayaa xu saɨjna cɨn tihua'avaɨre'e, aɨ mu maɨjna cɨn ramua'areeran a'ij sej tira'aste ɨ tavastara'a. Sajta muan, ayaa xu saɨjna cɨn rɨ'ɨ tiraata'asin ɨ Dioj saj ra'astijre'e, sajta ra'ancura'aca ɨ nyuucari tɨ cɨn Dioj amue'iratuaasin. Ayaa xu sajta rɨ'ɨ tiraata'asin ɨ Dioj saɨjna cɨme'e ɨ saj tyamua'a naa tihua'utapueijve aɨme ɨ mej Jerusalén a'uchaatɨme, sajta naijmi'ica. 14Majta aɨme, ayaa mu á'ujca'anye muejmi jemi, majta meyan rahuauhuau ɨ Dioj jemi muejmi cɨme'en, maɨjna cɨme'e tɨ Dioj eihua huapɨ'ɨ rɨ'ɨ tihua'uta'a a'ij sej ti'itɨ cɨn huarɨj. 15Tiche'e teyan rɨ'ɨ tiraata'an ɨ Dioj tyamua'a naa tyaɨjna cɨme'e tɨ aɨn ayan taatapueijve aɨjna tɨ ayan huapɨ'ɨ tyu'ujxe'eve'e ɨ tɨ cɨme'en cai rɨ'ɨri tej teyan rɨ'ɨ tiraata'an a'ij tɨ tiraavijte'e.

will be added

X\