2 Corintios 8

1Ta'ihuaamua'a, ayaa tu ti'ijxe'eve'e saj raamua'aree a'ij tɨ Dioj rɨ'ɨ tihua'uta'a aɨme ɨ mej u e'etyujsa'ɨri a'u tɨ na'a aun tɨ huatacá'a u Macedonia. 2Matɨ'ɨj mauj eihua huapɨ'ɨ á'aviicue'ira'acaa, ajta eihua tihua'aturaatya'acaa ɨ maj cɨn ruvaɨra'acaa, ma majta, eihua mu huapɨ'ɨ rutyamua'ava'acaa. Aɨj pu cɨn ayan te'irajraa mej meyan ruxé'evi'ira'a cɨn tyu'utyavaɨ maɨjna cɨme'e tɨ eihua huapɨ'ɨ ara'asicaa ɨ Dioj jemi. 3Ayaa nu tihua'utyaxajta ɨ mej meyan tyu'utapueijve a'achu maj caj ti'ijviicue'iracaa. Ee xaa, aɨ mu ruxé'evi'ira'a cɨn eitze'e meyan huarɨj. 4Ca'anin mu cɨn tajhuaviiri'i tej teyan hua'uta'an maj tyu'utyavaɨre'en maɨjna cɨme'e maj hua'utyavaɨre'en aɨme ɨ maj e'etyujsa'ɨri ɨ maj ajtyama'acan ɨ tavastara'a jetze. 5Ma majta aɨme, camu meyan mana'a tyu'utapueijve a'ij tej ti'ijchu'eva'acaa. Anacai mu huataseijre ɨ tavastara'a jemi, majta e'eyan itejmi jemi maɨjna cɨme'e tɨ ayan ti'ijxe'eva'acaa ɨ Dioj. 6Aɨj tu cɨn teri ca'anijra'a raata'a tyaɨjna ɨ Tito tɨ aɨn ayan raanaijmi'ire'en muejmi jemi aɨjna tɨ cɨn anacai autyejche muejmi tzajta'a sej si seyan che'eta sana'a tyu'utapueijve'en ruxé'evi'ira'a cɨme'e. 7Ajta ijii, a'ini eitze'e pu ayan tyajamuaacɨ́'ɨ muejmi cai ɨ seica, nain cɨme'e, tɨ pua'a saj rá'atzaahuate'en ɨ tavastara'a na'ari saj tihua'uta'ixaate'en ɨ nyuucari cɨme'e tɨ ayan ti'ayajna nusu saj ru'umua'areera a'ij tɨ een ɨ Dioj jemi, ca'ɨn sajta nain cɨn á'ujca'anye itejmi jemi, sajta taxe'eve'e, aɨj pu cɨn, ayaa tu ti'ijxe'eve'e. Ayaa xu huarɨni sej si sajta hua'utyamue'itɨn saɨjna cɨme'e ɨ saj cɨn rɨ'ɨ tihua'uta'asin. 8Canu nyaɨjna cɨn tyajamuaataijte'esin, silu ayaa nu een cɨn tyaja'amue'ixaate'e sej si huataujseijrata sej seyan che'eta sana'a tzaahuati'ira'a cɨn hua'axe'eve'e saɨme ɨ maj Jerusalén e'etyujsa'ɨri matɨj ɨ seica ɨ maj a'ujca'anyaacan cɨn hua'utyavaɨ ɨ ru'ihuaamua'a. 9Ee xaa, xu'uri ramua'aree ɨ tɨ cɨn rɨ'ɨ titaatá'a ruxé'evi'ira'a cɨme'e ɨ tavastara'a, aɨjna ɨ Jesús, tɨ ajta Cɨriistu'u pueen. Aɨ pu ayan nain tí'ijchaɨca'a, ma ajta aɨ pu u ute'e ayan eenye'eque'e huataujseijrataca'a tɨj seij tɨ cai a'ij ti'ijviicue'i tɨ ij muejmi japua huanyuuni, sej si seyan saɨjna cɨn seira'a xa'ara'ani saj saɨn pueenya'a xa'ara'ani ɨ saj ra'ancura'asin ɨ jemin saɨjna cɨme'e tɨ aɨn Cɨriistu'u cai a'ij ti'ijviicue'iracaa. 10Ayaa pu tina'amitejte'e aɨjna cɨme'e ɨ saj hua'utyavaɨre'en. Ayaa pu i'i xa'apɨ'ɨn saj ijii raanaijmi'ire'en ɨ saj cɨn autyajhuii ɨ ru'usi, ɨ saj anacai saɨjna cɨn tya'ataujratziiri'i, sajta anacai seyan rɨjcaa. 11Ma sajta muan, ijii sata'aj raanaijmi'ire'en ɨ saj cɨn seyan rɨjcaa. A'ini muan xu a'ujca'anyaacan cɨn huataura'a sej seyan huarɨni, sata'aj seyan che'eta sana'a saɨjna cɨn raanaijmi'ire'en sej seyan tyu'uta'an a'achu saj caj tí'ijcha'ɨ. 12A'ini, tɨ pua'a a'atɨ á'ujca'anye tɨ ti'itɨ tyu'uta'an, ayaa pu xa'apɨ'ɨn tira'aseijrate'e ɨ Dioj tɨ aɨn a'atɨ ayan tyu'uta a'achu tɨ caj tí'ijcha'ɨ. Capu a'atzu jetzen ruxe'eve'e ɨ Dioj ti'itɨ tɨ a'ij cai ticha'ɨ aɨjna ɨ a'atɨ tɨ xaa ti'itɨ tyu'uta'a. 13- 14Canu nyaɨjna cɨn neyan tyaja'amue'ixaate'e tɨ ij cai hua'utamuare'eriste'en ɨ seica. Canu nyajta nyaɨjna cɨn amueijcate'e tɨ huapɨ'ɨ muare'eri een muejmi jemi. Ayaa nu'u ni neyan ti'ijxe'eve'e sej si ruxa'a sana'a tya'utaviicue'i. Aɨj pu cɨn, ayan ti'ivaɨre'e ɨ sej eihua tí'ijcha'ɨ ijii sej si saɨjna cɨn hua'utyavaɨre'en ɨ tɨ tihua'aturaate'e. Ajta, majca'ihua yee, aɨ mu meyan che'eta mana'a amuaatyavaɨre'esin maɨjna cɨme'e ɨ mej eihua tí'ijcha'ɨ tɨ ij cai ti'itɨ tyajamuá'aturaatya'a muejmi. 15Ayaa pu xaa nya'u, a'ini ayaa pu te'eyu'usi'i tɨcɨn: “Capu nu'u ti'itɨ turaavaca aɨjna jemi tɨ eihua rajsaɨj. Ajta, capu nu'u tira'aturaatya'acaa aɨjna tɨ cɨj na'a rajsaɨj.” 16Ma'acui xaa, eihua tu huapɨ'ɨ rɨ'ɨ ti'ira'ate'e ɨ Dioj tɨ ayan ca'anijra'a raata'a aɨjna ɨ Tito tɨ ayan a'ujca'anyaacan cɨn amuaatamua'areera nyatɨj inyaa. 17Aɨ pu xaa ayan ra'ancura'a aɨjna ɨ tyaj cɨn ca'anijra'a raata'a, ajta aɨjna cɨme'e, tɨ eihua á'ujca'anyajca'a. Aɨ pu rusaɨj huataura'a tɨ ij aun u a'ume'en muejmi jemi. 18Tyajta ityan, ta'ihuaara'a tu huataityaca'a tɨ ij ajta jamuan u á'ume'en. Aɨjna ɨ ta'ihuaara'a, naijmi'ique'e mu rɨ'ɨ ti'ijseij maɨjna cɨme'e a'ij tɨ aɨn tihue'ixaatya'a a'aye'i ɨ nyuucari tɨ cɨn Dioj hue'irajtuaani. 19Ajta, aɨme ɨ mej maun e'etyujsa'ɨri ɨ Dioj jemi, aɨ mu ra'antihuau tɨ ij aɨn tajamuan á'ucha'acanye'en tej ti naimi'i teyan arátara'asten tyaɨjna cɨme'e ɨ tyaj hua'uta'asin, tej ti tyaɨjna cɨn rɨ'ɨ tiraatyajtuaani ɨ tavastara'a. Tyajta teyan een cɨn raataijtaca'a tɨ aun a'umé'en muejmi jemi sej si raamua'aree tej tyauj á'ataca'anye tej teyan hua'utyavaɨre'en ɨ maj cai a'ij ti'ijviicue'i. 20Ayaa tu ti'ityese'e tɨ ij cai a'atɨ ayan ti'itaxajtzi'ira aɨjna cɨme'e tyaj nu'u a'ij pua'a rɨcɨ tyaɨjna cɨme'e tyaj ramuare'e aɨjna ɨ mej meyan a'ujca'anyaacan cɨn tyu'uta'a, tɨ ti'imui'i. 21Ayaa pu'u xaa nya'u, a'ini catu teyan tyana'a ti'itese'e tej ti teyan rɨjca a'ij tɨ tiraavijte'e ɨ tavastara'a jemi, silu tej ti teyan che'eta tyana'a rɨjca a'ij tɨ tiraavijte'e hua'a jemi ɨ tyetyaca. 22Tyajta aɨme jamuan ɨ maj hua'apua, tyajtahua'a tu seij huataíti ɨ ta'ihuaara'a, ɨ tɨ ari mui'itɨ huataujseijrataca'a tɨ aɨn tyamua'a naa á'ujca'anyajca'a mui'itɨ cɨme'e. Ajta ijii, eitze'e pu á'ujca'anye aɨjna cɨme'e tɨ eihua huapɨ'ɨ tya'atzaahuate'e muejmi jemi. 23Ajta, aɨjna ɨ Tito, ai pu aɨn pueen tɨ nyeetzi jamuan ti'ivaɨre'e muejmi cɨme'e. Naijmi'i tu ti'imuare'e. Majta aɨme ɨ maj hua'apua ɨ ta'ihuaamua'a, ai mu aɨn pueen ɨ maj hua'utaityaca'a aɨme ɨ maj maun e'etyujsa'ɨri. Ai mu aɨn pueen ɨ maj hua'a jetze ma'acan ti'ivaɨre'e ɨ tyaɨte majta maɨjna cɨn rɨ'ɨ tiraata'aca ɨ Cɨriistu'u. 24Aɨj xu cɨn, sata'aj seyan hua'utaseijrate'en saɨme ɨ tyetyaca saj tzaahuati'ira'a cɨn hua'axe'eve'e, mej mi naijmi'i meyan raamua'aree nainjapua a'u maj e'etyujsa'ɨri mej mi ta'utatzaahuate'en a'ij tɨ tiraavijte'e tej teyan á'atatzaahuate'e muejmi cɨme'e.

will be added

X\