2 Corintios 7

1A'ini Dioj pu ayan tya'ataujratziiri'i, muan ta'ihuaamua'a ɨ tej a'amuaxe'eve'e, tiche'e teyan me tiruuraini tɨj na'a tɨ ayan ti'itaxana'aviste'e, tɨ aɨjna jetze airaninyeica ɨ tatyevi jetze nusu ɨ ta tzajta'an, tej ti raanaijmi'ire'en aɨjna tɨ tita'aturaate'e tej ti urare'enya'acan cɨn huatyaturan ɨ Dioj jemi. Tata'aj teyan huarɨni tyaɨjna cɨme'e tɨ Dioj ayan huataura'ate itejmi jemi. 2Caxu ra'antanaamɨn ɨ a'amuaxaijnyu'uca itejmi jemi, a'ini catu a'ij pua'a amuaaruu. Catu tyajta a'atɨ ca'anijra'a huata'a tɨ ij a'ij pua'a ti'ityujcha'ɨ. Ee xaa nya'u, catu a'atɨ tyu'uhue'itze tej ti ti'itɨj cɨn huatyatavaɨre'en. 3Canu neyan tyaja'amue'ixaate'e nyej ni ti'itɨj cɨn ama'uxɨjte'en. Canu a'atzu, a'ini nu'uri neyan tyajamue'ixaa tej teyan á'ataca'anye muejmi jemi, tɨ pua'a teyan naimi'i huacui'ini nusu teyan naimi'i ruuri huatyaturan. 4Eecan nu nyaxaahua tyaja'amue'ixaate'e, canu a'ij ti'itzɨɨnya'a nyana'a. Eihua nu a'antzaahuate'e muejmi cɨme'e, nyajta eihua nu rɨ'ɨ tyanmua'ate. Nyajta huapɨ'ɨ nu nyetyamua'ave'e nain cɨme'e ɨ tyaj rajpueijtzi. 5Me tyajta ityan, tyatɨ'ɨj tyaun a'ará'a u Macedonia, capu a'atzu huatarɨ'ɨristaraca'a tej huatasa'upe'en, silu tyan tu rajpueijtzica'a nain cɨme'e, tɨj na'a tɨ ayan titaaruu. Eecan tu á'aviicue'ira'acaa hua'a jemi ɨ tyaɨte, tyajta ti'itzɨɨnya'acaa ɨ tatzajta'an. 6Ajta aɨn ɨ Dioj tɨ rɨ'ɨ hua'anrú'ura'a a'aye'i ɨ maj a'ij tya'ujmua'ate, aɨ pu ayan rɨ'ɨ taaruu aɨjna cɨme'e tɨ aɨn ya uve'enye ɨ Tito. 7Ayaa pu xaa aɨjna cɨn rɨ'ɨ taaruu, ajta aɨjna cɨme'e tɨ aɨn Tito ajta rɨ'ɨ taaruu ajta aɨjna cɨme'e saj anacai rɨ'ɨ raaruu aɨjna ɨ ta'ihuaara'a. Aɨ pu xaa titaata'ixaa muejmi cɨme'en, saj nu'u eihua huapɨ'ɨ seyan ti'ijxe'eve'e saj naaseij, saj nu'u tyamua'a sajta tyujxaamɨste'e, ajta nu'u tyamua'a muejmi jetze ruxe'eve'e a'ij tɨ ti'inyavaɨre'e inyeetzi. Aɨj nu cɨn eitze'e huatantyamua'ave. 8Me nyajta inyaa, capu che'e a'ij pua'a nya'ase nyaj neyan amuaatyaxaamɨste nyaɨjna cɨme'e a'ij nyaj tyajamuaataiti'iri'i. Anacai pu xaa, a'ij pua'a nya'asajca'a, aru capu che'e a'ini a'atzu pu'u a'atee saj ruxaamɨstya'acaa. 9Ma ajta, canu nyaɨjna cɨn nyetyamua'ave'e nyaɨjna cɨme'e saj huataujxaamɨste, silu aɨj nu cɨn nyana'a nyetyamua'ave'e saj seyan huataujxaamɨste sej si saɨque ti'ityújchaɨca. Ayaa pu xaa nya'u a'ij pua'a amuaata'a sej si seyan huataujxaamɨste'en jemin ɨ Dioj. Aɨj pu cɨn, catu tajɨ́ɨmua'a tyana'a pueijtzi amuaata'a. 10Ee xaa nya'u. Tɨ pua'a a'atɨ ayan huataujxaamɨste'en ɨ Dioj jemi tɨ ij saɨque ti'ityújchaɨca, capu xaa a'ij pua'a tiraata'asin, silu Dioj pu ru'iratuaasin. Na'ari tɨ pua'a a'atɨ ayaa na'a ruxaamɨste'e matɨj aɨme ɨ mej yan japuan seijre'e ɨ chaanaca, ayaa pu tyaja'ure'enyejsin tɨ aupua'are. 11Aru casi'i muan, a'ij tɨ tyajamuaaruu aɨjna cɨme'e sej seyan huataujxaamɨste'en ɨ Dioj jemi. Huapɨ'ɨ pu ca'anijra'a amuaata'a saj raahuauni ɨ tɨ cɨn Dioj tyajamuaatauuni'i. Eecan xu huatanínyu'ucacuca'a saɨjna cɨme'e tɨ a'ij pua'a eenya'a. Eecan xu sajta ti'itzɨɨnya'acaa saɨjna cɨme'e tɨ a'amuacɨ'ɨtiiche'e ɨ pueijtzi. Sajta eecan huapɨ'ɨ á'ujca'anyajca'a inyeetzi cɨme'e, sajta huapɨ'ɨ xu a'ij tya'ujmua'ate. Muan xu sajta tyamua'a naa pueijtzi raata'a aɨjna tɨ a'ij pua'a rɨjcaa. Ijii tu xaa teyan ramua'aree saj cai ti'itɨ cɨn autyajturaa aɨjna cɨme'e tɨ a'ij pua'a eenya'a. 12Aɨj pu cɨn tyamua'a tyu'utyavaɨ ɨ nyaj amuaatáiti'iri'i. Me nyajta inyaa, canu nyaɨjna cɨn amuaatáiti'iri'i nyaɨjna cɨme'e ɨ a'atɨ tɨ ayan autyajturaa, canu nyajta amuaatáiti'iri'i nyaɨjna cɨme'e tɨ a'atɨ seij jemi a'utyajturaa, silu ayaa nu een cɨn amuaatáiti'iri'i tɨ ij ayan amuaatamitejte'en muejmi ɨ Dioj jemi a'achu saj caj á'ujca'anye tejmi jemi. 13Aɨj tu cɨn teri rɨ'ɨ huarɨj ɨ tatzajta'a. Capu ajta aɨ na'a tej teri rɨ'ɨ huarɨj, silu tyajta teyan tyaɨjna cɨn huatátatyamua'ave'e tyaɨjna cɨme'e tɨ aɨn Tito ayen che'eta na'a rutyamua'ave'e, a'ini muan naimi'i xu rɨ'ɨ tiraata'a ɨ tzajta'an. 14Ee xaa, nu'uri nejmi'i ahuantzaahua ɨ Tito jemi muejmi cɨme'e. Sajta muan, caxu a'atzu naatatyevi'iraste. A'ini nain ɨ tej teri tyajamue'ixaa, ayaa pu ti'ayajna, ayaa pu che'eta na'a ayan ti'ayajna ɨ tyaj cɨme'en ahuatatzaahuate jemin ɨ Tito. 15Ajta eitze'e pu aɨn ayan ahuaujca'anye muejmi jemi, a'ini aɨ pu ayan ra'utamua'areeri'i a'ij saj muan naimi'i titá'astijre'e. Aɨ pu ajta aɨjna autamua'areera a'aye'i sej seyan tyamua'a naa ra'ancure'evi'itɨ, sej seyan eihua huapɨ'ɨ ti'itzɨɨnya'acaa. 16Nyajta inyaa, nyaa nu nyetyamua'ave'e, a'ini nain nu cɨn a'anca'anye muejmi jemi, a'ini muan xu xaa araurastejsin.

will be added

X\