2 Corintios 6

1A'ini tyan tu naijmi'i ti'imuare'e, ayaa tu tyajtahua'a tyaja'amuajee sej seyan ra'ancura'an ɨ tɨ cɨn Dioj rɨ'ɨ tyajamuaata'asin sej si seyan eihua huapɨ'ɨ raatatu'ire'en ɨ jemin aɨjna ɨ saj cɨn tyu'umuarej. 2Aɨj pu cɨn ayan te'eyu'usi'i tɨcɨn: Ayaa nu muaanamuajri'i ajna xɨcajra'an tɨ jetzen ari huaxa'apɨ'ɨn, nyajta, neyan muaatavaɨ ajna xɨcajra'an nyej hui jetzen mue'irajtuaa. Casi'i, muan, pu'uri ayan tyaja'ure'enye ajna xɨcajra'a tɨ jetzen ari huaxa'apɨ'ɨn saj ra'ancura'an. Ee xaa nya'u, pu'uri ajna pɨti'irɨcɨ ajna xɨcajra'a tɨ jetzen Dioj amue'irajtuaani. 3Tyajta ityan, catu teyan hua'utamuare'eriste'e ti'itɨ cɨme'e tɨ tihua'antyu'uuni'i, silu ayaa tu rɨ'ɨ ti'itítacháɨ ta'aye'i tɨ ij cai a'atɨ a'ij ti'itaxajta. 4Me tyajta ityan, ayaa tu muejmi jemi taseijrata matɨj aɨme ɨ mej ti'ivaɨre'e ɨ Dioj jemi nain cɨme'e. Capu amɨn a'ij tɨ pua'a teyan eihua huapɨ'ɨ ti'itɨj cɨn á'aviicue'ire'e nusu teyan tirajpueiitzi na'ari ti'itɨ tamuare'eriste'e ca'ɨn ti'itɨ a'ij pua'a taruure. 5Tyauche'e tu teyan che'eta tyana'a ti'ivaɨre'e, tij majta meyan taatyavajxɨ'ɨn nusu ta'ityaanan na'ari taatamuarite'en a'u tɨ na'a tyaj á'ujhua'an ca'ɨn tyaj muare'eri cɨn ti'imuare'e, nusu tyaj huatáxaire'en tyaj atanyeenye'eri na'ari tyaj huatatájcuca'a. 6Ayaa pu ajta seijre'e tej teyan ti'ivaɨre'e ɨ Dioj jemi aɨjna cɨme'e tyaj cai ti'itɨ cɨn a'ij pua'a rɨcɨ, tyajta tyamua'a naa tiru'umua'aree a'ij tɨ een ɨ Dioj, tyajta tyamua'a tu te'eviicue'i hua'a jemi ɨ seica. Tyan tu tyajta rɨ'ɨ tihua'ajcha'ɨ ɨ taxa'a tyaɨte, tyajta tyaɨjna jetze arataca'anye ɨ xaijnyu'ucara'ara'an ɨ Dioj. Tyajta tu tzaahuati'ira'a cɨn hua'axe'eve'e. 7Ayaa tu tyajta huataujnyátacan cɨn ti'ixaxa'a. Catu ti'ihue'i tyana'a. Tyajta tyaɨjna cɨn ti'imuare'e ɨ muáre'eri'ira'ara'an cɨme'e ɨ Dioj. Tyajta tu teyan seijre'e tyaɨjna jamuan ɨ tyaj cɨn tyu'utese'en nain cɨme'e tɨ ta jetze seijre'e tej ti teyan huarɨni tɨ naa een ɨ Dioj jemi. 8Tɨ pua'a meyan rɨ'ɨ titaata'an na'ari meyan taatyaxaahua, nusu meyan a'ij pua'a ti'itaxajta ca'ɨn rɨ'ɨ metihue'ixaatya'a itejmi cɨme'en, tyauche'e tu teyan ti'ivaɨre'e. Ayaa mu majta ti'itaxaata mua'aju'un tyaj nu'u ti'ihue'itaca. Me tyajta ityan, tzaahuati'ira'a tu cɨn teyan rɨcɨ. 9Capu ajta tajetze ruxe'eve'e tɨ pua'a macai tamua'ate nusu matamua'ate. Ayaa tu tyajta hua'a jemi seijre'e cu xuee tyaj cui'icu. Me tyajta ityan, tyauche'e tu ruuri. Pueijtzi mu ta'ate'e aru camu ta'apua'arite'en. 10Ayaa tu seijre'e cumu tyaj taxaamɨste'e. Me tyajta ityan, a'anaj tɨ na'a tu tatyamua'ave'e. Catu a'ij ti'ijviicue'i. Me tyajta, ayaa tu hua'aruuren mui'itɨ mej mi huataujchijtyaanita. Catu nu'u ti'itɨ ticha'ɨ. Me tyajta, nain tu xaa tí'ijcha'ɨ. 11Ayaa nu a'ahuauritaacan cɨn tyajamue'ixaa nain cɨme'e, muan, mɨ sej Corinto a'uchaatɨme. Eihua nu a'anca'anye muejmi jemi. 12Catu ti'itɨ a'amuamueire'e muejmi, silu muan xu rujɨɨmua'a sana'a rumueire'e saɨjna cɨme'e a'ij tɨ tyajamua'amitejte'e ɨ a'amuatzajta'a. 13Aɨj nu cɨn neyan tyaja'amuahuavii sej si sajtahua'a ahuaujca'anyen itejmi jemi. Ayaa nu xaa tyaja'amue'ixaate'e cumu saj tɨ'ɨri púeenye'en. 14Caxu hua'ajtyaja'ahuatyahua'an aɨme ɨ maj cai tya'atzaahuate'e. Xu'uhuaujmua'atzɨ aɨjna cɨme'e, ¿a'ini ti'irɨ'ɨri mej seij mana'a tyaɨtejra'a pueenye'en aɨjna tɨ uraré'en ɨ Dioj jemi, ajta aɨjna tɨ a'ij pua'a ti'ityujcha'ɨ? Capu xaa nya'u a'ij ti'irɨ'ɨri. Ari aɨjna, ¿ni qui ruxa'aj na'a seijre'e ɨ nyeeriste'e, ajta ɨ tɨca'ari tzajta'a? Capu xaa nya'u. 15¿Ti'itajni a'ij meti'ixa'apɨ'ɨntare'en aɨjna ɨ Cɨriistu'u, jamuan aɨjna ɨ Satanás? Capu xaa nya'u ti'itɨ. Ajta aɨn tɨ tya'atzaahuate'e, ¿ni qui ayan ruxa'aj na'a ra'ancura'asin tɨj ajta ra'ancura'asin aɨjna tɨ cai tya'atzaahuate'e? Capu xaa nya'u ti'itɨ. 16¿Ti'itajni a'ij meti'ixa'apɨ'ɨntare'en aɨme ɨ mej ti'ivaɨre'e teyujta'a aɨme jamuan ɨ ti'ityaɨn ɨ maj hua'ana'amiche ɨ maj cai Dioj pueen? Capu xaa nya'u ti'itɨ. Tyajta ityan, ayaa tu ti'ivaɨre'e ɨ Dioj jemi tɨj teyuu tɨ tzajta'an huirajca ɨ Dioj tɨ i'iruuri. Aɨj pu cɨn ayan tyu'utaxajtaca'a tɨcɨn: Nyaa nu u'uchaa na'ame hua'a tzajta'a. Nyajta nu neyan hua'a Dioj pueenya'a na'ame. Majta aɨme, aɨ mu nyetyaɨtestyamua'a pueenya'a mua'aju'un. 17Ayaa pu ti'ixa ɨ tavastara'a tɨcɨn: Aɨj xu cɨn ajtacɨɨnye hua'a jemi sej si rujɨme'en á'ujhua'anye'en. Caxu ti'itɨ muara'a tɨ xana'avi'ire'e. Nyajta nu neyan rɨ'ɨ amua'ancure'evi'itɨ. 18Ajta ayan ti'ixa ɨ tavastara'a tɨ nain cɨn antyujmua'aree tɨcɨn: Nyaa nu a'amuaya'upua pueenya'a na'ame. Sajta muan, ayaa xu niyaujmua'a pueenya'a xa'aju'un, satɨj sana'a sej tyetyaca pueen, ajta mɨ saj juuca. Yaa pu'u.

will be added

X\