2 Corintios 5

1Ajta aɨjna ɨ tyaj ratyáhue'ira'a, ayaa pu titaatyava'ɨri tɨj ɨnaamua tyaj jeten chajca. Tyajta teyan ramua'aree tɨ pua'a huatyauune aɨjna ɨ ɨnaamua, tyauche'e tu huatyeechi'i ɨ tɨ Dioj jemi e'eseijre'e, tɨ ajta cai muajca'a cɨn taavijhua. Ute'e pu e'eséira'a a'ame tɨj na'a rusen cɨme'e. 2Tyajta ityan, tej tyauj iiyan seijre'e chaanaca japua, tyan tu taxaijnyuuste'e yu tatzajta'a, tyajta teyan taxaamɨste'e tyaɨjna cɨme'e tej tij tyaun a'utyarute tyaujna chi'ita tɨ ute'e e'eseijre'e tɨ ajta Dioj cɨn ta'ancánajsin. 3Ayaa pu aɨjna cɨn rɨni tɨ ayan ta'ancanán, catu tij che'e muamua'avijma'a á'ujhua'anya'a ta'aju'un. 4Ayaa pu ti'en, a'ini ijii tej tyauj jeten huachaatɨme aɨjna ɨ ɨnaamua, eecan tu tayein yu tatzajta'a, tyaɨjna cɨme'e tɨ ayan tamuáre'eriste'e ti'itɨ cɨme'e. Capu aɨ na'a tej teyan ratzɨɨnye'e tɨ Dioj ayan ta'ari'i aɨjna tɨ cɨn ta'ancánajsin, silu tej huapɨ'ɨ teyan ti'ijxe'eve'e tɨ aɨn eitze'e ta'ancáanan, tɨ ij aɨn tɨ a'ateeri tɨj na'a rusen cɨme'e nain ti'icáanan aɨjna tɨ á'apuapua'are. 5Ajta aɨn tɨ ayan rɨ'ɨ taruure tej ti teyan tyaɨjna ancura'an, ai pu aɨn pueen ɨ tɨ Dioj rusaɨj raatyajtuaa itejmi jemi, ɨ ruxaijnyu'uca tej ti teyan raamua'aree tɨ Dioj aɨjna cɨn tya'ataujratziiri'i itejmi jemi. 6- 7Aɨj tu cɨn, a'anaj tɨ na'a, aɨ pu ca'anijra'a tata'aca a'ini ayaa tu ramua'aree tyatɨ'ɨj tyauj teyan ruuri seijra'a tyeijna jetze ɨ tej ratyáhue'ira'a, tyan tu cai xɨ tyaun a'utí ɨ tavastara'a jemi. Ayaa pu'u xaa nya'u ti'en, a'ini ayaa tu een cɨn ya á'ujhua'an tyaɨjna cɨme'e tyaj ra'atzaahuate'e. Catu tyaɨjna cɨme'e tyana'a ya á'ujhua'an tej ti tyaɨjna jetze arataca'anyen aɨjna tej ti'isise'i teyajna. 8Tyamua'a pu ca'anijra'a tata'aca, ajta eitze'e pu ta'araanajchi tyaj tihuiini tyaɨjna jetze ɨ tyaj ratyáhue'ira'a tej ti tyaun é'eseijra'a a'u tej a'utyeechi'i ɨ tavastara'a jemi. 9Aɨj tu cɨn, teyan ti'ityese'e tej teyan rɨ'ɨ ti'ititacha'ɨ tej teyan rɨ'ɨ tiraata'an ɨ tavastara'a, capu amɨn a'ij tɨ pua'a teyan a'ɨmɨ seijra'a nusu teyan jemin seijra'a. 10Ee xaa nya'u tɨ ayan ti'en, a'ini ayaa pu tyu'ujxe'eve'e tej naijmi'i teyan huatataseijrata aujna a'u tɨ a'utáca ɨ Cɨriistu'u tɨ ij aɨn ta'uxɨ́jte'en naijmi'ica itejmi. Aj pu xaa ayan ti'ijcɨ'ɨti a'ij tɨ tiraavijte'e seij ajta seij a'ij tɨ ti'itɨ tyu'umue'itɨ aɨjna cɨme'e a'ij tɨ huarɨj tɨ'ɨj auj ruuricaa, tɨ pua'a xa'apɨ'ɨn huarɨj nusu a'ij pua'a huarɨj. 11Aɨj tu cɨn, tu'uri ramua'aree tɨ ayan tyu'ujxe'eve'e tej eihua huapɨ'ɨ ra'atesa'a ɨ tavastara'a, ayaa tu een cɨn ti'ityesa'a ta'aye'i tej ti hua'utyamue'itɨn ɨ tyetyaca mej mi ra'ancura'an ɨ tɨ ayan ti'ayajna itejmi jetze. Ajta aɨn ɨ Dioj, aɨ pu ramua'aree a'ij tej e'en. Ajta, ayaa nu ti'ijxe'eve'e tɨ ayan che'eta na'a tyajamua'amityejtya'a ɨ a'amua xaijnyu'uca tzajta'a. 12Catu tyajtahua'a muejmi jemi ra'irá'aca ɨ tyaj cɨn huatátatzaahuate'en, silu tyan tu jamuata'aca ɨ saj cɨn huataujtyamua'ave'en itejmi cɨme'e sej si seyan raayɨ'ɨtɨhua'an saj huatanyuuni aɨme jemi ɨ mej meyan maɨjna cɨn ahuaujtzaahuate'e maɨjna cɨme'e a'ij tɨ a'atɨ rusise'irata me seiraca ɨ tyaɨte, ɨ maj majta cai hua'a jetze ruxe'eve'e a'ij tɨ een aɨjna ɨ a'atɨ ɨ rutzajta'a. 13Tɨ pua'a ayan ti'ayajna a'ij maj ti'ixaxa'a tyaj nu'u tatɨmue'i, ayaa tu een cɨn tatɨmue'i tej ti teyan raatyavaɨre'en ɨ Dioj. Na'ari cai, tɨ pua'a teyan rɨ'ɨ me tityaumuámua'aree, ayaa tu een cɨn rɨcɨ tej ti rɨ'ɨ jamuaatyavaɨre'en muejmi. 14Ai pu xaa aɨn pueen ɨ tɨ ti'itaijte'e tɨ aɨn Cɨriistu'u taxe'eve'e. Ayaa pu tita'amitejte'e itejmi tɨ saɨj na'a huamɨ'ɨ hua'a jetze ma'acan, naijmi'ica, a'achu pua'amua ɨ tyaɨte. Ajta, tɨ pua'a ayan tyu'urɨj, aɨj mu cɨn naijmi'i jamuan huacuii. 15Ayaa pu ajta een cɨn hua'a jetze ma'acan huamɨ'ɨ mej mi aɨme ɨ maj mauj ruuri maj cai che'e rujɨɨmua'a mana'a a'ij tirájtyauve'en a'ij mej ye'i ti'ityujcha'ɨ, silu mej mi rɨ'ɨ ti'ityújchaɨca maɨjna jemi ɨ tɨ hua'a jetze ma'acan huamɨ'ɨ, tɨ ajta huatarú hua'a tzajta'a ɨ mɨ'ɨchite. 16Aɨj pu cɨn, ijii tɨ yu auca'itɨ a'ame, catu che'e teyan a'atɨ ma'usíse'ij a'ij tɨ tita'amitejte'e ɨ tatzajta'a aɨjna cɨme'e ɨ tyaj cɨn raaseij me jeijre'e. Ee xaa, ayaa tu tejmí'i raatasíse'ira'a ɨ Cɨriistu'u tɨ'ɨj aɨn auj tevi na'a pueenya'a. Ajta ijii, catu che'e teyan rasise'ij. 17Aɨj pu cɨn, tɨ pua'a a'atɨ ayan Cɨriistu'u jetze ajtyama'acan, aɨ pu aɨn pueen seij tɨ Dioj ari raajajcuare. Pu'uri me tyauvatzɨ a'ij tɨ ti'ityújchaɨca'a tɨ mi'ima'acan cɨme'e. Nain pu jajcuacan cɨn seijre'e ɨ jemin. 18Naijmi'i tɨj na'a eijna ɨ tyaj cɨme'en ti'ixa, aɨ pu jemi e'ema'acan ɨ Dioj tɨ ayan taaruu tej ti tyajtahua'a re'enye'en huatyaturan ɨ jemin aɨjna cɨme'e tɨ Cɨriistu'u ayan tajapua huanyúu. Aɨ pu Dioj ajta ayan aɨjna cɨn titaijca tej ti tyajta teyan hua'uruuren ɨ tyaɨte mej mi majtahua'a re'enye'en huatyaturan ɨ jemin. 19Ayaa pu huataujmua'a tɨ aɨn Dioj ayan hua'uruu aɨme ɨ mej yan huachaatɨme ɨ chaanaca japua mej mi majtahua'a re'enye'en huatyaturan ɨ jemin aɨjna cɨme'e tɨ Cɨriistu'u hua'ajapua huanyúu. Aɨj pu cɨn cai ayan Dioj hua'uxɨjte aɨjna cɨme'e ɨ maj cɨn autyajturaa ɨ jemin, silu aɨ pu aɨjna cɨn titaijca aɨjna cɨme'e ɨ nyuucari ɨ tyaj cɨn rɨ'ɨ hua'uruuren mej mi majtahua'a re'enye'en huatyaturan ɨ jemin. 20Aɨj tu cɨn, tyan tu tyaɨn pueen ɨ tɨ Dioj taataityaca'a tej ti tihua'uta'ixaate'en ɨ Cɨriistu'u jetze ma'acan. Dioj pu ayan tihua'ajee aɨjna cɨme'e ɨ nyuucari ɨ tyaj cɨn tihue'ixaate'e. Aɨj tu cɨn teyan tyaja'amuajee sata'aj seyan sajtahua'a re'enye'en huatyaturan ɨ Dioj jemi. 21Ajta aɨn ɨ Dioj, ayaa pu raaruu ɨ Cɨriistu'u tejmi jetze ma'acan. Eijna tɨ cai a'anaj ti'itɨ cɨn autyajturaa ɨ jemin, aɨ pu Dioj ayan raaruu tɨ japuan rajveti nain ɨ pueijtzi tɨ tacɨ'ɨtíiche'en itejmi aɨjna cɨme'e ɨ tyaj cɨn autyajturaa ɨ Dioj jemi, tej ti jamuan ɨ Cɨriistu'u teyan urare'enya'acan cɨn huatyaturan ɨ jemin.

will be added

X\