2 Corintios 4

1Tyajta ityan, tyan tu tyaɨjna cɨn ti'ivaɨre'e ɨ Dioj jemi aɨjna cɨme'e tɨ aɨn Dioj ayan tá'ancu'uvajxɨ'ɨ. Aɨj tu cɨn cai mue'itɨche'e. 2Me tyajta ityan, tu'uri raataxaahuataca'a tej tij teyan a'ij pua'a rɨjcaa aviitzi cɨme'e, tej tij tyajta cai teyan rɨjcaa aɨjna tɨ tyu'utevi'iraste'e, tej tij cai ti'itɨj cɨn tacuanamua. Catu á'ataca'anye tej teyan ti'itɨj cɨn tyu'uhué'ita. Catu tyajta á'ataca'anye tej saɨque tyu'utaxaj tyaɨjna cɨme'e ɨ nyuucari tɨ cɨme'en raxaj ɨ Dioj, silu ayaa tu ruunyátacan cɨn ti'ixaxa'a tzaahuati'ira'a cɨme'e. Ayaa tu tyaɨjna cɨn rɨcɨ tej ti teyan tyu'utáseijrata hua'a jemi matɨj mana'a pua'amua ɨ tyaɨte tej ti ca'anijra'a hua'uta'an mej mi raamua'aree a'ij tɨ ayan ti'ayajna ɨ Dioj jemi. 3Ajta, tɨ pua'a ayan a'utanámi'i ɨ nyuucari ɨ tyaj cɨn tihue'ixaate'e, ayaa pu'u na'a a'utanámi'i hua'a jemi ɨ mej a'apua'are. 4Ai mu aɨn pueen ɨ tɨ hua'utanaamɨ ɨ hua'amua'atziira'a tzajta'a aɨjna ɨ dioj tɨ naijmi'ica ti'ijte'e ɨ mej ijii huatyaɨte. Ayaa pu een cɨn hua'uruu mej mi cai yau'eitaa mua'ara'ani ɨ nyuucari tɨ ayan ti'ivaɨre'e tɨj tatzari tɨ hua'atatzavi'i ɨ hua'a tzajta'a mej mi meyan raamua'ati maɨjna ɨ tavastara'a tɨ ayan huapɨ'ɨ naa seijre'e. Aɨ pu ajta aɨn pueen ɨ tɨ nain cɨn ruxa'a een tɨj ɨ Dioj. 5Ayaa pu xaa ti'ayajna, a'ini catu tajɨɨmua'a tyana'a tihue'ixaate'e, silu aɨjna ɨ tyaj cɨme'en tihue'ixaate'e, aɨ pu aɨn pueen ɨ Jesús tɨ ajta i'i Cɨriistu'u. Ai pu ajta aɨn pueen ɨ tavastara'a. Tyajta ityan, ayaa tu tyaja'amuavaɨre'e muejmi Jesús jetze ma'acan. 6Ajta aɨn ɨ Dioj, ayaa pu jajcua ɨmɨ ayan tyu'utaxajtaca'a tɨcɨn: “Che'e a'ataaca ɨ taij ajna a'utɨ a'utɨca'a.” Aɨ pu ajta utyátatzaraca'a yu tatzajta'a, tɨ ij aɨn ayan taata'an tej yau'eitaa ta'ara'ani, a'ij tɨ een cɨn huapɨ'ɨ naa seijre'e ɨ Dioj aɨjna cɨme'e tɨ Cɨriistu'u aɨjna jemi seijre'e. 7Tyajta ityan, ayaa tu seijre'e ɨ Dioj jemi tɨj xa'ari tɨ xarij cɨn taavijhua, ɨ tyaj tzajta'an teri ruuhuásaɨj ɨ tɨ cɨn Dioj rɨ'ɨ titaatá'a, ɨ tɨ ajta huapɨ'ɨ ti'ijnajchi. Ayaa pu een ɨ tɨ seijre'e tɨ aɨn muáre'eri'ira'ara'an tɨ nain cɨn tyu'utyamue'itɨn, capu tejmi jetze a'iráninyei, silu aij pu'u jetze ɨ Dioj. 8Nain tu cɨn rajpueijtzi ityan. Me tyajta, catu a'atzu mue'itɨche'en. Capu ajta a'ij ta'amitejte'e a'ij tɨ te'eme. Me tyajta ityan, tyan tu a'ij tirajtyauve a'ij tyaj huarɨni. 9Aɨme ɨ tyaɨte, a'ij mu pua'a xaa taruuraa mua'aye'i. Ma ajta Dioj, capu ma tuuhua'ana. Aɨ mu xaa ta'ajɨpua. Ma ajta, camu ta'antipua'arite'esin. 10A'u tɨ na'a tej a'acɨɨnye, ayaa tu che'eta tyana'a ti'ipueijti'ihua ta'aju'un, a'ij tɨ eenye'eque'e huamɨ'ɨ ɨ Jesús. Ayaa tu tyaɨjna cɨn rɨni, a'ini tyan tu ra'aviicue'i, ajta ayan che'eta na'a seijre'e jemin ɨ tyaj ratyáhue'ira'a aɨjna tɨ cɨn Jesús ajta tata'aca tej tyauj ruuri. 11A'ini ityan, i tej tyauj ruuri, ayaa pu ti'itaruure, a'anaj tɨ na'a tu á'ataca'anye tyaj huacui'ini nyuucajtze'en ɨ Jesús. Ajta aɨjna jemi ɨ tyaj ratyáhue'ira'a tɨ ajta á'apuapua'are, aɨjna jemi pu ajta seira'a a'ame ɨ muare'eri'ira'a tɨ cɨn ajtahua'a ruuri aɨjna ɨ Jesús. 12Aɨj pu cɨn, tyan tu teyan rajpueijtzi tyaɨjna cɨme'e tej teyan á'ataca'anye tej huacui'ini. Ma sajta muan, ruxaahua xu rɨ'ɨ titeecháatɨmee saɨjna cɨme'e tyaj ityan rajpueijtzi. 13- 14Ayaa pu te'eyu'usi'i tɨcɨn: “Nyaa nu tya'antzaahua. Aɨj nu hui cɨn neyan tyu'utaxajtaca'a.” Ayaa pu che'eta na'a een itejmi jemi. Tyan tu tyajta tya'atzaahuate'e, tyajta teyan ti'ixaxa'a tyaɨjna cɨme'e tej teri ramua'aree tɨ aɨjna ɨ tɨ ra'ajjáj ɨ tavastara'a, aɨjna ɨ Jesús, hua'a tzajta'a ɨ mɨ'ɨchite, aɨ pu ajta ta'ajjájpuaxɨ'ɨsin jamuan ɨ Jesús. Aɨ pu ajta taataseijrata muejmi jamuan tej ti naimi'i huatyaturan ɨ jemin. 15Ajta nain tɨ ayan tyu'urɨj, aɨ pu tyajamuatyava'ɨri muejmi, a'ini satɨ'ɨj eitze'e huatámui'ire saɨjna cɨme'e tɨ Dioj rɨ'ɨ tyajamuata'aca, eitze'e xu huataujtyamua'ave'esin sej si huapɨ'ɨ rɨ'ɨ tiraata'an ɨ Dioj. 16Ayaa tu cɨn cai cataxáahuajye'i. Ee xaa, aɨjna ɨ tyaj ratyáhue'ira'a tɨ me eijre'e seijre'e, aɨ pu á'apuapua'are. Ma ajta ɨ tɨ yu tatzajta'a seijre'e, aɨ pu rujajcuare'en a'anaj tɨ na'a nain xɨcaj tzajta'a. 17Ajta aɨjna ɨ tyaj cɨn cɨj caj rajpueijtzi, tɨ ajta cai eihua ruxe'eve'e, aɨ pu ayan rɨ'ɨ taruure tej ti teyan ra'ancura'an tyaɨjna tɨ huapɨ'ɨ naa seira'a a'ame tɨj na'a rusen cɨme'e. Capu a'atzu ráti'asi aɨjna tɨ ijii seijre'e. Ajta eihua pu eitze'e ruxe'eve'e cai ɨ tyaj cɨn rajpueijtzica'a. 18Aɨj tu cɨn, catu á'ataca'ane aɨjna jemi ɨ tɨ ti'itaavijhua, tɨ ajta me eijre'e seijre'e, silu aij tu jemi á'ataca'ane tyaɨjna tɨ cai taavijhua, ɨ tɨ ajta cai me eijre'e seijre'e, a'ini aɨjna tɨ ayan taavijhua, capu a'ateeri. Ma ajta, aɨjna tɨ cai taavijhua, tɨ ajta cai me eijre'e seijre'e, aɨ pu xaa a'ateeri tɨj na'a rusen cɨme'e.

will be added

X\