2 Corintios 3

1¿Ni qui ayan tyajamua'amitejte'e tyaj tyajtahua'a autyajhuii tej tyajɨɨmua'a teyan rɨ'ɨ ti'itata'aca muejmi jemi? Na'ari, ¿ni qui ayan ruxe'eve'e tɨ a'atɨ ayan yu'uxari autyéyu'uxan ɨ tɨ cɨn rɨ'ɨ tyajamuata'aca itejmi cɨme'e nusu ayan tyu'ujxe'eve'e saj ra'utéyu'uxan ɨ sej jetzen rɨ'ɨ ti'itata'aca itejmi? Seica jemi pu xaa ayan tyu'ujxe'eve'e, aru ityejmi jemi, capu. 2Muan xu rujɨɨmua'a sana'a saɨn pueen ɨ tɨ titaatyava'ɨri tɨj yu'uxari ɨ tyaj cɨn huatataseijrata hua'a jemi, matɨj mana'a pua'amua yen seijre'e mej mi ra'ujijve'en, maj yau'eitaa mua'ara'ani. 3Muan xu xaa seyan e'en tɨj yu'uxari tɨ Cɨriistu'u jetze a'uve'eme. Ma ajta, capu tetej jetze á'ayu'usi'ihuaca'a silu aɨn ɨ xaijnyu'ucara'ara'an ɨ Dioj, aɨ pu raatyajtuaa muejmi jemi tɨ'ij ayan a'amua tzajta'a tyu'useira'a a'ara'ani mɨ saj sauj ruuri. 4Ayaa tu tya'atzaahuate'e a'ini Cɨriistu'u pu ayan ti'iseijre'e ɨ Dioj jemi. 5Capu ayan tiraavijte'e tyaj tyajɨɨmua'a teyan tyu'utaxaj yee tejmi pu jetze seijre'e ɨ muare'eri'ira'a tej ti teyan raayɨ'ɨtɨhua'an silu aɨjna ɨ tyaj jetzen arataca'anye, aɨ pu aun a'uve'eye'i ɨ Dioj jemi. 6Ajta aɨn Dioj, aɨ pu ayan ta'antihuau tej ti teyan tyaɨjna cɨn tyu'utyavaɨre'en, aɨjna ɨ nyuucari tɨ jajcua tɨ Dioj ajta cɨn tya'ataujratziiri'i. Tyajta ityan, catu tyaɨjna cɨn ti'imuare'e tɨ a'ayu'usi'i tetej jetze, silu aij tu cɨme'en tɨ ayan seijre'e tɨ jetzen a'iráninyei ɨ xaijnyu'ucara'ara'an ɨ Dioj. Ajta aɨn ɨ nyuucari tɨ á'ayu'usi'ihuaca'a ɨ tetej jetze, aɨ pu ayan hua'ata'aca mej mi meyan a'atɨ a'uxɨ́jte'en tɨ ij aɨn huamɨ'ɨni. Ma ajta aɨn ɨ xaijnyu'ucara'ara'an ɨ Dioj, aɨ pu ruurican a'ihuatyajtuaani. 7Ma ajta aɨn ɨ nyuucari ɨ maj cɨn meyan a'atɨ a'uxɨ́jte'en tɨ'i aɨn huamɨ'ɨni, ayaa pu á'ayu'usi'ihuaca'a tetej jetze tɨ a'ura'atzatzeihuaca'a. Eecan pu huapɨ'ɨ naa seijra'acaa tɨ'ɨj Dioj ayan raatyajtuaa aɨjna jemi ɨ Moisés. Ajta aɨn Moisés, ayaa pu huapɨ'ɨ tyataatɨye'icaa ɨ nyeerima'ara'an jetze. Majta aɨme ɨ maj Israel jetze ajtyama'acan, capu rɨ'ɨristaca'a maj ra'araaseij ɨ Moisés aɨjna cɨme'e tɨ ayan huapɨ'ɨ tyataatɨye'icaa ɨ nyeerima'ara'an jetze. Ma ajta, aɨ pu tyapua'arijma'acaa. 8Ajta aɨn tɨ cɨn ti'ivaɨre'e aɨjna ɨ xaijnyu'ucara'ara'an ɨ Dioj, ¿ni cai ayan eihua huapɨ'ɨ eitze'e naa seiira'a a'ara'ani? 9Ee xaa nya'u, ayaa pu ti'ayajna. Tɨ pua'a ayan eihua huapɨ'ɨ naa seijra'acaa ajna'ɨmɨ tɨ'ɨj Dioj raatyajtuaa ɨ nyuucari ɨ maj cɨn a'atɨ a'uxɨ́jte'en, ayaa pu tyu'ujxe'eve'e tɨ eitze'e huapɨ'ɨ naa seira'a a'ara'ani aɨjna nyuucari tɨ rata'aca ɨ a'atɨ tɨ aɨn urare'enya'acan cɨn huatyaturan ɨ Dioj jemi. 10Ee tzɨte'e, ayaa pu ti'ayajna, aɨ pu ajmi'i huapɨ'ɨ naa seijra'acaa aɨjna ɨ nyuucari tɨ raatyajtuaa ɨ Moisés jemi. Ajta ijii, capu che'e naa seijre'e aɨjna cɨme'e tɨ ari seij huataseijre tɨ eitze'e huapɨ'ɨ naa seijre'e. 11Ajta, tɨ pua'a ayan náa eenye'en huataseijre aɨjna tɨ ajta tyápua'ari, eitze'e pu huapɨ'ɨ naa seira'a a'ame aɨjna ɨ tɨ ayan huatyaturaasin tɨj na'a rusen cɨme'e. 12A'ini tu'uri teyan rachu'eve'e ɨ Dioj jemi tɨ ayan te'irajra'ani, aɨj tu cɨn teyan taxaahua tihue'ixaate'e, tyajta cai ti'itzɨɨnya'a. 13Catu teyan rɨcɨ a'ij tɨj aɨn Moisés huarɨj tɨ cɨɨxuri cɨn araujna ɨ runyeerima'a jetze mej mi cai ra'araaseij aɨme ɨ maj Israel jetze ajtyama'acantacaa, mej mi cai raaseijra tɨ'ɨj tyápua'arijme'en aɨjna tɨ tyataatɨye'icaa. 14Majta maɨn, aɨ mu cai huataura'a maj yau'eitaa mua'ara'ani. Ayaa mu huarɨj. Cu xuee maj cuj araujna cɨɨxuri cɨme'e. Tɨj na'a ajna'ɨmɨ tɨ yu e'ire'enye, ayaa pu een seijre'e. Matɨ'ɨj ra'ajijva'a maɨjna ɨ nyuucari tɨ mi'ima'acan ɨ tɨ cɨn Dioj ayan anacai tya'ataujratziiri'i, auche'e pu ayan seijre'e ɨ maj cɨn aranami'i, ajta capu xɨ a'atɨ hua'utáxɨɨxɨ, a'ini aɨ pu'u raayɨ'ɨtɨ ɨ Cɨriistu'u. 15Ee xaa nya'u, ayaa pu ti'en ijii a'anaj tɨ na'a raxe'eve'e maj ra'ujijve'en aɨjna ɨ tɨ Moisés ra'uyu'uxaca'a, mauche'e mu meyan aranami'ihuajmee mej mi cai yau'eitaa mua'ara'ani. 16Ma ajta, tɨ pua'a a'atɨ ayan huataujtu'ire'en ɨ tavastara'a jemi, Dioj pu ra'utáxɨjta aɨjna tɨ cɨn aránami'ihuaca'a. 17Ajta aɨn ɨ tɨ i'i tavastara'a, ajta aɨn ɨ tɨ i'i xaijnyu'ucara'ara'an, aɨ mu ruxa'aj een, ajta a'u tɨ aɨn e'eseijre'e ɨ xaijnyu'ucara'ara'an ɨ tavastara'a, au pu a'arɨ'ɨri tɨ a'atɨ ruxaahua á'ucha'acanye'en ɨ Dioj jemi. 18Me tyajta ityan, ayaa tu eenye'eque'e seijre'e. Ayaa tu seijre'e. Cu xuee tyaj cai aranami'ihuajmee, tyajta teyan che'eta tyana'a tyamua'a naa ti'itaseijrata tɨj ajta aɨn tavastara'a tyamua'a naa tyu'ujseijrata. Tyan tu saɨque huatyátaruurejsin tej ti teyan seira'a ta'ara'ani tɨj tevijra'an ɨ tavastara'a tej ti eitze'e tyamua'a naa rɨ'ɨ ti'itaseijratáa ta'aju'un tɨj na'a tɨ yu auca'itɨ a'ame. Ajta, aɨ pu jetzen a'iráninyei ɨ tavastara'a jetze, ajta aɨjna jamuan ɨ ruxaijnyu'uca.

will be added

X\