2 Corintios 2

1Me nyajta inyaa, ayaa nu tihuanxa'apɨ'ɨntari'iri'i nyaj cai nyajtahua'a amuaamuaare nyej ni cai nyajtahua'a amuaatyaxaamɨste'en. 2Ee xaa nya'u, tɨ pua'a neyan amuaatyaxaamɨste'en, ¿a'atyaɨnni mana'aqui maɨn pueenya'a mua'aju'un ɨ mej naatátyamua'aviste'esin inyeetzi? Capu che'e sein a'atɨ, a'ini muan xu saɨn pueen ɨ nyaj amuaatyaxaamɨste. 3Ayaa nu een cɨn neyan tyaja'amuatayu'use nyej ni ramua'areera saj cai naatyaxaamɨste'esin nyatɨ'ɨj nyaun a'ara'asti a'ini ayaa pu tiraavijte'e saj naatátyamua'aviste'en. Ma ajta, ayaa pu tina'amitejtya'acaa sej seyan e'en naijmi'i muan sej saɨjna cɨn huataujtyamua'ave'en saɨjna cɨme'e ɨ nyaj nyajta cɨn nyetyamua'avi. 4Nyatɨ'ɨj tyajamuaatayu'use, eihua pu a'ij pua'a nya'asajca'a, nyajta nyeyeinya tyamua'a. Ee xaa, huapɨ'ɨ pu nu'ucui'icaa yu nyatzajta'a, a'ini canu raxe'eva'acaa nyaj amuaatyaxaamɨste'en, silu ayaa nu ti'ijxe'eva'acaa saj ramua'aree nyaj eihua huapɨ'ɨ a'amuaxe'eve'e. 5Ma ajta, tɨ pua'a a'atɨ ayan ti'itɨ cɨn a'ij tyu'uruu tɨ i a'atɨ huataujxaamɨste'en, capu ayan nyeetzi na'a huáruu silu e'icaj pu ajta muejmi ayan huáruu. Ayaa nu een cɨn tyaja'amue'ixaate'e nyej ni cai eihua amuaatamuáre'eriste'en naijmi'ica muejmi. 6Pu'uri aɨ pu'u ɨ maj mui'itɨ meri meyan pueijtzi raata'a aɨjna ɨ a'atɨ tɨ ayan huarɨj. 7Aɨj pu cɨn, ayaa pu ari tyu'ujxe'eve'e saj tiraatauuni'i, sajta rɨ'ɨ ra'anrú'ure'en. Na'ari cai, aɨ pu mue'itɨche'en nain cɨme'e aɨjna cɨme'e tɨ eihua huapɨ'ɨ ruxaamɨste'e. 8Aɨj nu cɨn neyan ca'anijra'a a'amuata'asin saj sajtahua'a seyan tiraataseijrate'en saj sauj raxe'eve'e. 9Ayaa nu een cɨn tyajamuaatayu'use nyej ni amuaatyeeseij a'ij sej titetyújcha'ɨ muan, ajta nyej ni ramua'aree tɨ pua'a seyan nain cɨn tya'aste. 10- 11A'atɨ tɨ na'a saj tiraatauuni'i, nyaa nu nyajta neyan che'eta nyana'a tiraatauuni'ira. Tɨ pua'a neyan ti'itɨ cɨn tiraatauuni'iri'i, ti'itɨ tɨ na'a, ayaa nu een cɨn tiraatauuni'iri'i nyej ni a'amua japua huanyuuni ɨ Cɨriistu'u jemi tɨ ij cai aɨn Satanás ti'itɨ cɨn ta'antimue'itɨn, a'ini tyan tu xaa ramua'aree a'ij tɨ aɨn eenye'eque'e ti'imuare'e. 12Nyatɨ'ɨj nyaun a'ará'a nyaujna u chajta'ana tɨ ayan tyaja'arajtyahuaa tɨcɨn Troas, nyej ni nyaun tihua'uta'ixaate'en ɨ nyuucari tɨ cɨme'en raxa ɨ Cɨriistu'u, nyavastara'a pu ayan naata'a nyej ni nyaxaahua tyamua'a naa tihua'uta'ixaate'en ɨ tyaɨte. 13Me nyajta, eihua nu huapɨ'ɨ ti'imuajcaa nyaɨjna cɨme'e nyaj cai ráatyau ɨ nye'ihuaara'a, nyaɨjna ɨ Tito, tɨ cai aun autyavaaca'a. Aɨj nu cɨn hua'utatautya'a, nyaun á'umej u Macedonia. 14Ajta, tyamua'a tu rɨ'ɨ tiraata'asin tyaɨjna ɨ Dioj tɨ ayan taata'aca tyamua'a naa tyaj tyu'utyamue'itɨn jamuan ɨ Cɨriistu'u. Cu xuee tyaj cuj ityan e'ita'a huaju'un, ajta aɨ pu Cɨriistu'u anacai huame'en, majta tacujta'a huaju'un ɨ tyej teri hua'utyaamue'itɨ. Ajta a'u tɨ na'a tyaj e'ita'a huaju'un Dioj pu ayan raruure tɨ tyejmi jetze a'iráninyei aɨjna tɨ naa tya'aaca ɨ maj cɨn ráamua'ati. 15Tyajta ityan, ayaa tu seijre'e ɨ Dioj jemi. Cu xuee tyaj cuj ityan raatɨsin ɨ tɨ naa tya'aaca aɨjna cɨme'e tyej teyan Cɨriistu'u jetze ajtyama'acan. Ayaa tu che'eta tyana'a seijre'e hua'a jemi ɨ tɨ Dioj hue'irajtuaasin, ajta hua'a jemi ɨ mej á'apua'aren. 16Ayaa pu een aɨme jemi ɨ seica ɨ mej á'apua'aren, ayaa pu hua'a jemi tya'aaca tɨj ti'itɨ tɨ huamɨ'ɨ ɨ maj cɨn majta a'apua'are. Ajta aɨme ɨ seica ɨ tɨ Dioj hue'iratuaasin, ayaa pu hua'a jemi tya'aaca tɨj ti'itɨ tɨ ruuri tɨ naa tyáará'i ɨ maj cɨn huaujrujte'en. ¿A'atani ayan a'avejre tɨ'i ayan tyu'utyavaɨre'en ɨ Dioj jemi? Capu xaa nya'u ma a'a a'atɨ tɨ ayan a'avejre. 17Me tyajta ityan, catu teyan e'en matɨj ɨ seica, ɨ maj mui'itɨ, ɨ mej meyan huataujvaɨre'en ɨ maj cɨn ramue'itɨcɨ maɨjna cɨme'e maj ramuare'e ɨ nyuucari tɨ cɨme'en raxa ɨ Dioj. Me tyajta ityan, ayaa tu tzaahuati'ira'a cɨn ti'ititacha'ɨ a'ini Dioj pu ta'antihuau. Tyajta ityan, ayaa tu ɨ Dioj jemi ti'ixaxa'a tɨj saɨj tɨ Cɨriistu'u jetze ma'acan ti'ivaɨre'e.

will be added

X\