2 Corintios 12

1Nyauche'e nu a'antzaahuate'e. Capu a'ij rɨni tɨ cai ti'itɨ cɨn tinaatyava'ɨri. Nu'uri nyaɨjna cɨn tyajamuaata'ixaate'esin a'ij tɨ ti'itɨ tyu'utaseijre inyeetzi jemi, ajta aɨjna tɨ tavastara'a ayan naataseijra. 2A'atɨ nu neyan mua'ate tɨ Cɨriistu'u jetze ajtyama'acan tɨ a'anaj ayan tiraaruu. Pu'uri a'atee a'achu cumu tamuaamuata'a japuan muaacua ninye'ira'a tɨ Dioj utya'ɨmɨ ya'uvi'itɨ a'u mej e'eseijre'e ɨ mej Dioj jemi ti'ivaɨre'e. Canu ramua'aree tɨ pua'a aɨn a'atɨ auche'e ayan seijra'a ɨ rutevi cɨme'e nusu cai. Dioj pu xaa ramua'aree. 3Nyaa nu xaa ramua'aree tɨ Dioj ayan ya'uvi'itɨ u utya'ɨmɨ aujna a'u tɨ naa hue'en. Canu ramua'aree tɨ pua'a auj seijre'e ɨ rutevi cɨme'e nusu cai che'e, silu aɨ pu ɨ Dioj ramua'aree. 4Auu pu ayan eenye'eque'e tyaja'anamua aɨjna tɨ cai a'ij rɨ'ɨri tɨ a'atɨ raataxaj iiyan chaanaca japua, a'ini capu ayan a'achauutzijre'e tɨ a'atɨ ayan raataxaj iiyan chaanaca japua. 5Canu nyacɨme'en a'antzaahuate'en, silu aɨj nu xaa cɨn a'antzaahuate'en nyaɨjna ɨ a'atɨ. Ajta tɨ pua'a neyan nyacɨme'en a'antzaahuate'e, aij nu cɨn a'utantzaahuate'esin nyaɨjna cɨme'e ɨ tɨ cai nu'uca'anisti'i. 6Ma ajta, tɨ pua'a neyan ca'anijra'a ti'itanya'acare'en nyej ni a'utantzaahuate'en, canu nyaɨn pueenya'a na'ame saɨj tɨ cha'a na'a ti'ixaj, a'ini nyaa nu tzaahuati'ira'a cɨn tyu'utaxajta. Me nyajta inyaa, canu neyan rɨni tɨ ij cai a'atɨ ayan huapɨ'ɨ ti'inyeseijra inyeetzi a'ij tɨ cai tiraavijte'e, silu che'e aɨn ayan ti'inyeseijra a'ij nyej rɨcɨ, ajta a'ij nyaj ti'ixa. 7A'ini eecan pu huapɨ'ɨ tyu'ujxe'eva'acaa aɨjna tɨ huataseijre inyeetzi jemi, nyej ni cai huapɨ'ɨ ahuantzaahuate'en, Dioj pu ayan raatyajtuaa inyeetzi jemi ti'itɨ tɨ nya'ɨtziitya'acaa ɨ nyetevi jetze. Cu xuee tɨ cuj tzicare'e na'ajtejtze i nyejetze. Aɨ pu aɨn pueenya'a ɨ tɨ Satanás ya'utaityaca'a tɨ nya'ɨtziite'en nyej ni cai huapɨ'ɨ ahuantzaahuate'en. 8Hueica pua'amua nu neyan nyaɨjna cɨn tirajhuaviiri'i ɨ tavastara'a tɨ na'ari'i aɨjna tɨ nu'ucui'ica'a yu nyatzajta'a. 9Ajta aɨn ɨ tavastara'a, aɨ pu ayan tinaata'ixaa tɨcɨn: “Aɨjna ɨ nyaj cɨn nyexe'evi'ira'a cɨn rɨ'ɨ timuaata'aca, ayaa pu a'avejre mueetzi, a'ini ayaa pu ranaijmire'en ɨ nyamuare'eri'ira'a aɨjna cɨme'e ɨ tɨ cai mu'uca'anisti'i.” Aɨj nu cɨn, neyan nyexe'evi'ira'a cɨn ahuantzaahuate'en nyaɨjna cɨme'e tɨ cai nu'uca'anisti'i tɨ ij aɨn muáre'eri'ira'ara'an ɨ Cɨriistu'u ayan nyeetzi jemi huatyaturan. 10Aɨj nu cɨn, neyan nyexe'evi'ira'a cɨn a'anca'anye ɨ Cɨriistu'u jetze ma'acan nyej ni nyaɨjna cɨn tya'utaviicue'i aɨjna tɨ cai nu'uca'anisti'i nusu ɨ maj a'ij pua'a ti'inyejee na'ari aɨjna tɨ nyamuare'eriste'e ca'ɨn maj a'ij pua'a nyaruure na'ari maj pueijtzi naata'aca. Ayaa nu á'anca'anye a'ini tɨj na'a tɨ cai nu'uca'anisti'i, aɨj nu jetze aranca'anye ɨ tɨ tavastara'a rɨ'ɨ tinata'aca inyeetzi. 11Ee xaa nya'u, nyaa nu xaa nyatɨmue'i. Muan xu ca'anyejri naata'a nyej ni neyan huarɨni. Ma ajta, eitze'e pu ayan tiraavijtya'acache'e sej seyan rɨ'ɨ na'anrú'ure'en, a'ini canu xaa nya'u eitze'e cɨleenya'a cɨn ti'ivaɨre'e macai aɨme ɨ maj nu'u huapɨ'ɨ va'acan cɨn ti'ivaɨre'e tɨ eeri'i Dioj nu'u hua'antihuau. Capu amɨn a'ij nyaj cai ti'itɨ cɨn antinmua'aree. 12Xu'uri tyu'useij muejmi jemi tɨ ayan huarɨj tɨj na'a tɨ ayan rɨjca ɨ a'atɨ tɨ Dioj raataityaca'a. Aɨjna ɨ maj cɨn naa rɨ'ɨ tira'utaseij, ajta aɨjna tɨ cɨn Dioj tihue'itiiri'i, ajta aɨjna tɨ ayan huarɨj aɨjna cɨme'e ɨ muáre'eri'ira'ara'an ɨ Dioj, naijmi'i pu ayan tyu'utaseijre muejmi jemi nyatɨ'ɨj nyauj té'eviicue'iracaa aɨme jemi ɨ mej nyejchaɨre'e. 13¿Ti'itajni ayan cai tyajamuaacɨ́'ɨ tɨ ajta cai ayan tihua'ucɨ'ɨ aɨme ɨ mej pua'amuaque e'etyujsa'ɨri? Capu ti'itɨ xaa nya'u, silu aɨjna ɨ nyaj cai a'anaj ti'itɨj cɨn muare'eri amuaata'a. Sata'aj tinaatauuni'i nyaj cai nyaɨjna cɨn xa'apɨ'ɨn pɨ amuaaruu. 14Casi'i, muan, nu'uri nyajtahua'a rɨ'ɨ huanruu nyej ni nyajtahua'a amuaja'uva'amuaare. Pu'uri hueica tyaja'ure'enyejsin. Nyajta, canu a'atzu ti'itɨj cɨn muare'eri amuaata'asin, a'ini canu rúuhuaumen tɨ muejmi a'amua'a, silu nyaj muejmi a'uva'ahuauni. Ayaa nu rɨcɨ a'ini capu ayan tiraavijte'e maj maɨn tɨ'ɨrii meyan ruvaujsimua'a ti'itɨ ta'acare'en, silu aɨme ɨ vaujsimua'ame'en, aɨ mu meyan ti'itɨ hua'uata'aca ɨ ruyaujmua'a. 15Nyaa nu xaa nyexe'evi'ira'a cɨn ti'itɨ á'ujɨsin nyeetzi tɨ nya'a na'ari neyan raaxɨjte'en tɨj na'a tɨ nyeetzi nya'a nyej ni jamuaatyavaɨre'en muejmi. Ajta, tɨ pua'a neyan eitze'e a'amuaxe'eva'a, ¿ni qui ayan huataujmua'a saj cai che'e seyan nyexe'eve'e inyeetzi? 16Che'e ayan eenye'en nyaj cai ti'itɨ cɨn muare'eri ámuaata'a. Ayaa xu ti'ixa nyaj nu'u huapɨ'ɨ ru'umua'aree nyaj hue'itzi cɨn ti'itinchaɨca, nyajta nu'u hue'itzi cɨn ama'urai. 17¿Ni neyan ti'itɨ cɨn amuaja'urai nyaɨjna cɨme'e nyej seica huataityaca'a muejmi jemi? Canu xaa nya'u. 18Nyaa nu ca'anijra'a raata'a nyaɨjna ɨ Tito tɨ ij aɨn á'ume'en muejmi jemi. Nyajta jamuan raataityaca'a nyaɨjna ɨ ta'ihuaara'a. ¿Ni qui ti'itɨ cɨn amuaaja'urai aɨjna ɨ Tito? Capu xaa nya'u. ¿Ni tyacai ityan teyan che'eta tyana'a ti'ititacha'ɨ tɨj ajta aɨjna? ¿Ni tyacai teyan che'eta tyana'a á'ataca'anye muejmi jemi tɨj ajta aɨjna? A'ini tijta xaa nya'u. 19Tɨj na'a nyej neyan tyaja'amue'ixaate'e, ayan tyajamua'amitejte'e tej teyan tajapua huatyátanan muejmi jemi. Me tyajta ityan, catu, silu ɨ Dioj jemi tu teyan tyaja'amue'ixaate'e tyaɨjna cɨme'e tej Cɨriistu'u jetze ajtyama'acan, tej ti nain cɨn rɨ'ɨ amuaaruuren muejmi, ɨ tej a'amuaxe'eve'e. 20Ayaa nu een cɨn ti'itzɨɨnye'e tɨ pua'a neri nyaun ara'asti, nyajta neyan eenye'eque'e amuaatauuni saj cai seyan ti'ityujcha'ɨ a'ij nyej ti'ijxe'eve'e, sajta seyan eenye'eque'e naatyauni muan nyaj cai neyan een a'ij sej sajta ti'ijxe'eve'e. ¿Ni qui seyan muan xu tyujtya'axɨ'ɨsin nusu seyan ahuaujchueere'en na'ari seyan tininyu'ucacu? ¿Ni qui seyan a'ita'a a'utaju'un na'ari sajta seyan a'ij pua'a ti'ihuaujxajtzi'i nusu a'ij pua'a setyu'ujxajta? ¿Ni qui majta seica meyan a'ujtzaahuatya'a mua'aju'un, majta a'ij pua'a rɨɨ mua'aju'un? 21Ayaa nu nyajta eenye'eque'e ti'itzɨɨnye'e tɨ ayan Dioj naatatevi'ira'aste'en muejmi jemi nyatɨ'ɨj nyajtahua'a nyaun a'ara'asti. Tij cai ayan tyu'ujxe'eva'a a'ame nyaj nyaɨjna cɨn huatyanxaamɨste'en nyaɨjna cɨme'e ɨ maj mui'itɨ, aɨme ɨ maj a'amua jetze ajtyama'acan, ɨ maj majta anacai autyajturaa ɨ Dioj jemi. Aɨ mu aɨn pueen ɨ maj majta cai xɨ saɨque tyu'umuá'a mej mi raatapua'ajta ɨ maj cɨn auta'ɨtza'ara, tɨj na'a tɨ a'ij pua'a seijre'e ɨ Dioj jemi, maj ruxana'acɨra'acaa, maj majta rutevi cɨn raamue'itɨjcɨ ɨ tumin, maj cai ti'itɨ a'astijre'e, aɨjna ɨ maj cɨn meyan a'ij pua'a ti'ityujcha'ɨ.

will be added

X\