2 Corintios 11

1Ayaa nu ti'ijxe'eve'e sej si a'atzu tya'utaviicue'i saɨjna cɨme'e nyej ni neyan nyatɨmue'ira cɨn nyetyaja'amue'ixaate'e. Ee xaa, sata'aj a'atzu tya'utaviicue'i nyeetzi jemi. 2Tij cai tɨ aɨn Dioj ayan naata'a nyej ni neyan amua'anchueere'en muejmi, a'ini nyaa nu neyan raaxa'apɨ'ɨntare sej si seyan aɨj sana'a jemin huatyaturan ɨ Cɨriistu'u saj cai ti'itɨ cɨn atya'ɨtza'ara'an, yaa cumu saj huatyeviche'en ɨ jemin. 3Me nyajta inyaa, ayaa nu eenye'eque'e ti'itzɨɨnye'e tɨ pua'a ayan che'eta na'a a'atɨ amuaacuanamuan tɨj aɨn ɨ cu'ucu'u ayan tiraacuanamua ɨ rumua'atziira'a cɨme'e aɨjna ɨ Eva. Ayaa nu nyajta eenye'eque'e ti'itzɨɨnye'e, tɨ pua'a ayan a'ij pua'a amuaaruuren ɨ á'amuamua'atziira'a jetze sej si cai che'e tzaahuati'ira'a cɨn ra'astijra'a ɨ Cɨriistu'u, sej si cai che'e seyan nain cɨn rana'amiche'en. 4Ayaa pu ti'en, a'ini tɨ pua'a a'atɨ mu a'uve'eme'en tɨ ajta ayan ti'ixaxa'a seica cɨme'e ɨ nyuucari tɨ cɨme'en raxaj ɨ Jesús, tɨ cai ruxa'a een a'ij tej teri tyajamue'ixaa, muan xu xaa rɨ'ɨ tira'ancure'evi'itɨjcɨca. Na'ari cai, tɨ pua'a seij ayan huatyaturan muejmi jemi ɨ xaijnyu'ucari tɨ cai aɨn pueen tɨ Dioj anacai raatyajtuaa muejmi jemi, ma sajta muan, naa xu tyamua'a tira'ancure'evi'itɨjcɨca. Na'ari cai, tɨ pua'a seyan ra'ancura'an seij ɨ nyuucari tɨ ajta cai ruxa'a een a'ij tɨ een ɨ saj anacai ra'ancura'a, tyamua'a xu naa tira'astijre'e saɨjna. 5Ayaa pu tina'amitejte'e inyeetzi, nyaj cai neyan eitze'e cɨleenya'a cɨn ti'ivaɨre'e macai aɨme ɨ maj nu'u meyan tyu'utaijti'ire mej mi eihua huapɨ'ɨ va'acan cɨn tyu'utyavaɨre'en. 6Tɨ pua'a ayan ti'en nyaj nu'u cai neyan nyaɨjna cɨn tihua'amua'ate nyej ni tyamua'a naa tyu'utaxaj hua'a jemi ɨ tyaɨte, capu amɨn a'ij, a'ini tyamua'a nu naa inyaa rɨ'ɨ tiru'umua'aree nyaɨjna cɨme'e a'ij nyaj ti'ixaxa'a. Nain tu cɨn teyan tyamua'a naa tyajamuaataseijrate muejmi jemi, tyajta naijmi'ica jemi. 7¿Ni qui nyacai autyajturaa ɨ Dioj jemi nyaɨjna cɨme'e nyaj neyan huanruu nyej ni cɨleenya'a cɨn tyu'utyavaɨre'en muejmi jemi tɨ ij Dioj huapɨ'ɨ tyajamuaata'an muejmi aɨjna cɨme'e nyaj huaapua'a nyana'a tyajamuaata'ixaa ɨ nyuucari tɨ cɨme'en raxa ɨ Dioj? Canu xaa a'atzu aɨjna cɨn autyajturaa ɨ Dioj jemi. 8Nyaa nu huajá'uriiri'i aɨme ɨ mej pua'amuaque e'etyujsa'ɨri ɨ Dioj jemi nyej ni nyaɨjna cɨn huatyanvaɨre'en nyej ni nyajta amuaatyavaɨre'en muejmi. 9Ajta, nyatɨ'ɨj nyaun a'utyavaaca'a muejmi jemi, ajta eihua pu tina'aturaatya'aca'a, canu ti'itɨj cɨn amuaatamuáre'eriste a'ini aɨme ɨ nye'ihuaamua'a ɨ mej maun a'uva'aju'un, aɨ mu meyan naata'a ɨ tɨ tina'aturaatya'aca'a. Ayaa nu nain cɨn huarɨj nyej ni cai amuaatajaaxaijte'en. Nyajta nyauche'e nu neyan nyaɨjna cɨn rɨcɨ. 10Tɨj na'a tɨ ayan ti'ayajna Cɨriistu'u jemi, aɨ pu ajta nyeetzi jemi seijre'e. Aɨj nu cɨn cai raata'asin tɨ a'atɨ ayan naata'ijmɨn nyej ni cai che'e tihua'uta'ixaate'en tɨj na'a a'u tɨ huatacá'a u Acaya aɨjna ɨ nyaj cɨn a'utantzaahuate'en. 11¿A'ini een cɨme'e? ¿Ni qui aɨjna cɨme'e nyaj cai a'amuaxe'eve'e? Capu xaa nya'u. Dioj pu xaa ramua'aree tɨcɨn nyaja'amuaxe'eve'e. 12Nyajta, a'ij nyaj rɨcɨ, nyauche'e nu eitze'e neyan rɨni nyej ni ra'antipua'arite'en nyaɨjna cɨme'e ɨ maj cɨn á'ujtzaahuate'e maj nu'u meyan che'eta mana'a ti'imuare'e tyatɨj ityan. 13Matɨj mana'a mej meyan e'en matɨj aɨme, aɨ mu cai tzaahuati'ira'a cɨn huataiti'ihuaca'a. Aɨ mu hue'itzi cɨn ti'imuare'e, majta meyan tyu'ujseijrata tɨ nu'u Cɨriistu'u hua'utaityaca'a. 14Tyajta ityan, catu rɨ'ɨ tira'utaseij tyaɨjna cɨme'e. Tyan tu teri teyan ramua'aree tɨ aɨn Satanás ajta ayan ruseijrata tɨ aɨn pueen saɨj tɨ ti'ivaɨre'e u tajapua a'u tɨ á'unyeeri'i rusen cɨme'e. 15Aɨj pu cɨn, capu a'ij taatyéjtyauuve tɨ pua'a aɨme ɨ mej meyan ti'ijvaɨre'e ɨ Satanás jemi meyan che'eta mana'a tyu'ujseijrata maj nu'u maɨjna cɨn ti'ivaɨre'e ɨ tɨ xa'apɨ'ɨn een cɨme'e. Majta, ayaa mu te'entipua'arite'esin a'ij mej meri tiraamue'itɨ maɨjna cɨme'e a'ij mej ti'itɨj huáruu. 16Nyajtahua'a nu neyan tyaja'amue'ixaate'e: caxu seyan ti'inyeseijra nyaj nu'u nyatɨme'i. Na'ari cai, tɨ pua'a seyan ti'inyeseijra, sata'aj seyan na'ancure'evi'itɨn tɨj saɨj tɨ rutɨmue'i nyej ni nyajta a'atzu ahuantzaahuate'en. 17Canu nyaɨjna cɨn neyan tyaja'amue'ixaate'e nyaɨjna cɨme'e tɨ ayan tineijca ɨ tavastara'a, silu nyej neyan nyatɨmue'iracan cɨn ti'ixa nyej ni tzaahuati'ira'a cɨn ahuantzaahuate'en. 18A'ini mui'itɨ mu meyan á'ujtzaahuate'e maɨjna cɨme'e a'ij mej ti'ityujcha'ɨ ɨ rujetze, ayaa nu che'eta nyana'a a'antzaahuate'en a'ij nyej ti'itincha'ɨ ɨ nyejetze. 19Ma sajta muan, eihua xu rɨ'ɨ me titya'umuámua'aree. Aɨj xu cɨn tyamua'a naa tya'ataví'icue'i aɨme jemi ɨ mej rutɨmue'i. 20Tɨ pua'a a'atɨ ayan tyajamuaataijte'en sej si ca'anyejri cɨn tyu'umuare'en, muan xu seyan tya'ataví'icue'i. Na'ari, tɨ pua'a a'atɨ ayan amua'ari'i ɨ saj cɨn huataujvaɨre'en, muan xu sajta tya'ataví'icue'i saɨjna cɨme'e. Sajta seyan che'eta sana'a rɨcɨ tɨ pua'a a'atɨ amuaacuanamuan nusu tɨ pua'a a'atɨ á'ujtzaahuate'e muejmi jemi na'ari tɨ pua'a ayan amue'ityejveeni. 21Ee xaa nya'u, eecan nu huapɨ'ɨ ti'ityevi'ira'a tyaj cai teyan che'eta tyana'a á'ataca'anye matɨj aɨme. Ma ajta, ti'itɨ tɨ na'a tɨ cɨn a'atɨ ayan á'ujtzaahuate'e, ayaa nu che'eta inyaa nyaɨjna cɨn a'antzaahuate'e. 22¿Ni qui meyan nu'u aɨme jetze ajtyama'acan ɨ mej meyan hua'atamua'amua tɨcɨn Hebreos? Nyaa nu nyajta aɨme jetze ajtyama'acan. ¿Ni qui meyan nu'u maɨjna jetze a'iráanye aɨjna ɨ Israel? Ayaa nu che'eta inyaa nyaɨjna jetze a'iráanye. Na'ari, tɨ pua'a meyan nu'u Abraham jetze a'iraujneijte. Nyajta nu inyaa aɨjna jetze a'iranneijte. 23¿Ni qui meyan nu'u ti'ivaɨre'e Cɨriistu'u jetze ma'acan? Eitze'e nu inyaa neyan ti'ivaɨre'e. Ijii nu xaa nyatɨmue'iracan cɨn tyaja'amue'ixaate'e. Eitze'e nu eihua ti'imuare'e macai aɨme. Eitze'e nu eihua aityanami'ihuaca'a macai aɨme. Mui'itɨ mu naatyáavajxɨ. Canu che'e ramua'aree a'achu maj pua'amua meyan naaruu. Nyajta nu mui'itɨ tɨn huamɨ'ɨ. 24Anxɨvi pua'amua mu meyan naaruu aɨme ɨ mej Israel jetze ajtyama'acan, mej meyan na'ityaavajxɨ navij puaasajra'ara'an cɨme'e ayan pua'amua seite japuan tamuaamuata'a japuan aramuaacua. 25Hueica pua'amua mu na'ityaavajxɨ cɨye cɨme'e. Majta seij naatyatua'asixɨ tetej cɨme'e. Hueica pua'amua pu atyajrupi ɨ baarcu ɨ nyaj tzajta'an yé'icacare'e. Ayaa nu nyajta a'atee sei tɨca'ari, nyajta sei tujca'ari nyaj nyaun jaj japua huajaujsima'a. 26Eihua nu a'ɨmɨ huaye'ive ɨ juye jetze, nyajta eihua nu tyu'utatzɨn nyaɨjna cɨme'e nyaj antáye'icáa ɨ atya'ana japua, nyajta nyaɨme cɨme'e ɨ nahua'ari, ajta aɨme jemi ɨ nyej hua'axa'a Israel jetze ajtyama'acan na'ari aɨme jemi ɨ mej seij chuejra'a japua e'ema'acan. Nyajta neyan che'eta nyana'a tyu'utatzɨn a'u nyej a'uye'icaa tɨ pua'a chajta'a na'ari a'u tɨ cai ma'a a'a a'atɨ nusu atya'ana jetze tɨ ve'e, nyajta aɨme jemi mej meyan ti'ihue'itaca maɨjna cɨme'e maj nu'u ta'ihuaamua'a pueen. 27Eihua nu rá'uviicue'iri'i, nyajta eihua rajpueijtzica'a. Mui'itɨ nu pua'amua huatáxai nyaj atanyee nyaɨjna cɨme'e ɨ nyaj tyu'utatzɨn. Nyajta nu rajpueijtzica'a nyaɨjna cɨme'e nyaj huata'icuataca'a, nyajta nyaj huata'imɨ. Mui'itɨ nu pua'amua nyacai tyu'ucuaa, nyajta huatyaxaamɨ, nyajta cai tí'ityechajca. 28Ajta i'i, tɨj na'a nain tujca'ari tzajta'a, ayaa pu ti'inyamuare'eriste'e aɨjna cɨme'e nyaj eecan a'ij tya'anmua'ate aɨme jemi ɨ mej nain japua e'etyujsa'ɨri ɨ Dioj jemi. 29Ayaa nu tyaja'amue'ixaate'e, tɨ pua'a seij cai ru'uca'anisti'ira tɨ hua'a jetze ajtyama'acan ɨ mej e'etyujsa'ɨri ɨ Dioj jemi, ayaa pu ajta cai nyeetzi tinu'uca'anisti'i ɨ jemin. Ajta, tɨ pua'a a'atɨ ayan ca'anijra'a raata'an seij tɨ ajta hua'a jetze ajtyama'acan tɨ ij aɨn ayan autya'ɨtzen ɨ Dioj jemi, eecan pu naatajaaxaijte'esin. 30Tɨ pua'a ayan tyu'ujxe'eve'e nyaj ti'itɨ cɨn ahuantzaahuate'en, ayaa nu huarɨni nyej neyan nyaɨjna cɨn a'antzaahuate'en nyaɨjna cɨme'e ɨ tɨ cai nu'uca'anisti'i. 31Ajta aɨn ɨ Dioj tɨ ajta ya'upuaara'an pueen ɨ tavastara'a, aɨjna ɨ Jesús, aɨ pu ramua'aree nyaj cai ti'ihue'i. Tiche'e rɨ'ɨ tiraata'an aɨjna ɨ Dioj tɨj na'a rusen cɨme'e. 32Nyatɨ'ɨj nyaun a'utyavaaca'a u Damasco, aɨjna ɨ tajtuhuan tɨ aɨn rey ra'antihuau, aɨ pu rachaɨca'a ɨ chajta'ana, aujna u Damasco, tɨ ij aɨn ayan naateevi'i. 33Me nyajta inyaa, ayaa nu eenye'eque'e huiirajraa maj na'acajtuaa sicɨri jetze aujna a'u tɨ anacun ɨ jaxu'u jetze.

will be added

X\