2 Corintios 10

1Nyajta inyaa, i nyaj i'i Pablo, ayaa nu ca'anijra'a amuata'aca nyaɨjna cɨme'e nyej neyan che'eta nyana'a rɨ'ɨ ti'itincha'ɨ tɨj ajta ɨ Cɨriistu'u tɨ ayan tya'utaviicue'iri'i matɨ'ɨj a'ij pua'a raaruu, tɨ ajta hua'ancu'uvajxɨ ɨ tyaɨte. Nyaa nu nyaɨn pueen ɨ mej meyan ti'ixaxa'a nyaj nu'u ti'itzɨɨnye'e tɨ pua'a muejmi jemi naatyavaaca, nyajta nu'u huatyanca'anye yu nyatzajta'a muejmi jemi nyatɨ'ɨj nu'u ya'ɨmɨ huatyavaaca. 2Me nyajta inyaa, ayaa nu amuaatahuaviira saj cai seyan rɨjca nyatɨ'ɨj nyaun a'utyavaaca muejmi jemi, sata'aj cai ca'anijra'a naata'acare'en nyej neyan huatanseijrata nyej neyan che'eta nyana'a nyaca'anye yu nyatzajta'a nyatɨj neyan ti'ihuanxa'apɨ'ɨntari'ira nyej neyan huatanseijrata hua'a jemi ɨ mej meyan ti'itaxajtzi'i tyaj nu'u teyan ti'ititacha'ɨ matɨj aɨme ɨ mej iiyan huachaatɨme chaanaca japua. 3Tyajta ityan, tyan tu á'ujhua'an iiyan chaanaca japua tatevij cɨme'e ɨ tyaj ratyáhue'ira'a. Me tyajta ityan, catu teyan tatevij cɨn nya'use'e. 4A'ini aɨjna ɨ tyaj cɨn nya'use'e, capu aun a'uve'eme ɨ hua'amua'atziira'a jetze ɨ maj rutevi cɨn á'ujhua'an, silu au pu a'uve'eme ɨ tej jetze arataca'anye tej ti muáre'eri'ira'ara'an cɨn raatyáuuna tyaɨjna ɨ maj cɨn tyaujnaamɨ. 5Tyan tu ra'urá'uunaca tɨj na'a ɨ hua'amua'atziira'a ɨ maj cɨn hua'acuanamua ɨ tyaɨte. Tyan tu ramue'itɨcɨ ɨ hua'amua'atziira'a, tɨj na'a ɨ maj cɨn a'ujtzaahuatya'a macai rata'aca ɨ ruxaijnyu'uca maj raamua'ati ɨ Dioj. Tɨj na'a hua'amua'atziira'a, ayaa tu che'eta tyana'a raruure tɨj ɨ xantaaru'u tɨ a'atɨ seij huateevi'i, ajta tyu'utatuiire'en aɨjna jemi tɨ ti'ijta. Aɨj tu cɨn tɨj na'a ɨ hua'amua'atziira'a tej teyan ramue'itɨcɨ, tyan tu Cɨriistu'u jemi ti'ituire'e tɨ ij ayan ra'ara'astijre'en. 6Tyajta ityan, tu'uri rɨ'ɨ huataruu tej ti teyan huarɨni satɨ'ɨj rɨ'ɨ raanaijmi'ire'en saj ra'astijre'en ɨ Dioj. Tɨ pua'a ajna seij ayan raatyaxaahuata tɨ cai che'e ayan ra'ara'astijre'en, pueijtzi tu raata'asin naijmi'ica a'atɨ tɨ na'a tɨ ayan rɨni. 7Ma'acui xaa, sata'aj seyan seijna jetze tyu'umua'ati ɨ tɨ ayan ti'ayajna. Tɨ pua'a a'atɨ ayan tira'amitejtya'a tɨ aɨn Cɨriistu'u jetze ajtyama'acan, che'e aɨn ajta ra'utamua'aree ɨ rutzajta'a tej tyajta teyan che'eta tyana'a ityan ɨ Cɨriistu'u jetze ajtyama'acan tɨj ajta aɨjna. 8Capu amɨn a'ij tɨ pua'a inyaa eitze'e na'ahuantzaahuate'en nyaɨjna cɨme'e ɨ tɨ cɨn nyavastara'a tinyeijca. Capu aɨjna cɨn ayan tinyeijca nyej ni amua'antipua'arite'en silu nyej ni rɨ'ɨ amuaruuren. Me nyajta inyaa, canu a'atɨ huata'asin tɨ aɨn ayan naatatevi'ira'aste'en. 9Ayaa nu een cɨn tyaja'amue'ixaate'e sej si cai ayan tinyaja'useijra nyaj nu'u a'amuamuarite'e nyaɨjna cɨme'e a'ij nyej tyaja'amuayu'use'e. 10A'ini ayaa mu ti'ixaxa'a tɨcɨn tɨj na'a tɨ rá'ayu'uxaca, ca'anijra'a pu tata'aca, ajta ca'anyejri pu cɨn ti'itaijte'e aɨjna ɨ yu'uxari jetze. Ma ajta aɨn, tɨ pua'a nu'u ya huatyavaaca itejmi jemi, capu á'ujca'anye tɨ ayan titaata'ixaate'en. Ajta, capu nu'u a'atzu ruxe'eve'e a'ij tɨ ti'ixaata a'ame. 11Majta aɨme ɨ mej meyan ti'ixaxa'a, miche'e meyan raamua'aree tɨcɨn ayaa tu che'eta tyana'a ti'ixaxa'a ɨ yu'uxari jetze tɨ pua'a ya'ɨmɨ taatyáuuca tyatɨj tyajta ti'ixaxa'a tɨ pua'a tyaun muejmi jemi a'utyáuuca. 12Me tyajta ityan, catu á'ataca'anye tej teyan raataxaj yee tyan tu hua'a jetze ajtyama'acan ɨ seica. Catu tyajta teyan yee ayaa tu che'eta tyana'a e'en matɨj ɨ seica ɨ mej meyan rɨ'ɨ ruruure muejmi jemi. Majta aɨme, tɨ pua'a meyan tyu'ujseijra seij ajta seij, majta meyan a'ujtzaahuatya'a rujɨɨmua'a, tɨ pua'a meyan rɨjca, camu xaa nya'u meyan rɨ'ɨ metityaumuámua'aree. 13Me tyajta ityan, ayaa tu tyana'a a'atatzaahuate'e a'ij tɨ ayan tiraavijte'e. Ayaa tu rɨcɨ a'achu tɨ caj Dioj ayan taate'itiitze tej ti teyan ahuatatzaahuate'en muejmi cɨme'e. 14Catu teyan huapɨ'ɨ mu a'ucɨ'ɨca ɨ tɨ cɨn Dioj taate'itiitze tɨ pua'a teyan tyaun a'atanyén muejmi jemi silu tyan tu tyaɨn pueen ɨ tej anacai tyajamuaata'ixaa ɨ nyuucari tɨ cɨme'en raxa ɨ Cɨriistu'u. 15Catu huapɨ'ɨ a'atatzaahuate'e tyaɨjna cɨme'e ɨ maj cɨn tyu'umuarej ɨ seica, silu ayaa tu ti'ijxe'eve'e ityan, saj eitze'e tya'antzaahuate'en, tej ti eitze'e tyu'utyavaɨre'en muejmi jemi. 16Tyan tu teyan raxe'eve'e tej tyaun tihua'uta'ixaate'en ɨ nyuucari tɨ cɨme'en raxaj ɨ Cɨriistu'u, hua'a jemi ɨ mej a'ɨmɨ a'uchaatɨme seij chuejra'a japua, tɨ ij cai ayan ruxe'eva'a tej teyan á'atatzaahuatya'a tyaɨjna cɨme'e a'ij tɨ tyu'umuarej ɨ saɨj, ajna a'u tɨ ayan tira'itiitze. 17Ayan tɨcɨn: “Aɨjna tɨ ayan á'ujtzaahuate'e, che'e aɨn aɨjna cɨn a'ujtzaahuatya'a a'ij tɨ Dioj ayan rɨ'ɨ tiraata'a.” 18Ayaa pu'u xaa ti'en, a'ini aɨjna tɨ rusaɨj rɨ'ɨ tyu'ujseijrata, capu aɨn pueen aɨjna tɨ Dioj ayan ra'ancure'evi'itɨ silu aɨjna ɨ a'atɨ tɨ aɨn tavastara'a ayan rɨ'ɨ ti'ijseijra.

will be added

X\