2 Corintios 1

1Inyaa, i nyaj i'i Pablo, nyaa nu seij nyaɨn pueen tɨ Dioj ayan tinyeijca ruxé'evi'ira'a cɨme'e nyej ni neyan tihua'uta'ixaate'en a'ij tɨ ti'itɨ ti'iseijre'e ɨ Cɨriistu'u jemi, ɨ tɨ ajta i'i Jesús. Jamuan aɨjna ɨ ta'ihuaara'a aɨjna ɨ Timuteeyu, ayaa tu tyaja'amuayu'use'e mɨ sej e'etyujsa'ɨri sej si ratyaanajche ɨ Dioj, mɨ sej Corinto a'uchaatɨme, tyajta teyan tihua'ayu'use'e naijmi'ica ɨ mej Dioj jemi seijre'e, matɨj mana'a ɨ maj maun a'uchaatɨme tɨj na'a tɨ aun huatacá'a u Acaya. 2Che'e aɨjna ɨ Dioj, ɨ tyaj rajya'upua, ajta aɨjna ɨ tavastara'a, aɨjna ɨ Jesús tɨ ajta Cɨriistu'u pueen, miche'e rɨ'ɨ tyajamuaata'acare'en, majta rɨ'ɨ tyajamuaatyapua'arite'en sej si tyamua'a naa, ru'ihuáamua'ataa xa'ara'ani. 3Tiche'e rɨ'ɨ tiraata'acare'en tyaɨjna ɨ Dioj tɨ ajta ya'upuaara'an pueen ɨ tavastara'a, aɨjna ɨ Jesús tɨ ajta Cɨriistu'u pueen. Aɨjna ɨ Dioj, ai pu aɨn pueen ɨ tyaj rajya'upua tɨ ajta nain cɨn ta'acu'uvaa a'aye'i, ai pu aɨn pueen ɨ Dioj tɨ ajta nain cɨn rɨ'ɨ taarú'u. 4Aɨ pu ajta rɨ'ɨ taarú'u aɨjna cɨme'e ɨ tyaj cɨn á'aviicue'ira'a ta'aye'i tej ti teyan che'eta tyana'a rɨ'ɨ hua'anrú'ure'en aɨme ɨ mej ti'itɨj cɨn á'aviicue'ire'e. Aɨj tu cɨn tiche'e teyan rɨ'ɨ hua'anrú'ure'en tyaɨjna cɨme'e ɨ tɨ cɨn Dioj ajta rɨ'ɨ taarú'u. 5Ayej xaa nya'u ti'ayajna tɨ tyamua'a naa ayan ti'itacɨ'ɨpuaca aɨjna tɨ cɨn ajta rajpueijtzica'a aɨjna ɨ Cɨriistu'u. Ayan che'eta na'a Cɨriistu'u ajta tyamua'a naa rɨ'ɨ taarú'u tej ti tya'utaviicue'i. 6Tɨ pua'a teyan ti'itɨj cɨn á'aviicue'ira'a, ayaa pu ajta ti'ivaɨre'e tɨ ij Dioj rɨ'ɨ amua'anrú'ure'en, ajta amue'irajtuaani. Ajta, tɨ pua'a Dioj ayan rɨ'ɨ ta'anrú'ure'e, ayaa pu ajta ti'ivaɨre'e tɨ ij ajta aɨn rɨ'ɨ amua'anrú'ure'en. Ayaa pu xaa tyaja'amuaruure muejmi tɨ pua'a seyan che'eta sana'a tyamua'a naa tya'utaviicue'i ɨ saj cɨn rajpueijtzi tyatɨj ityan tirajpueiitzi. 7Ayaa pu tita'amitejte'e sej seyan xaa nya'u te'eviicue'i, a'ini ayaa tu ti'ijmua'aree tɨ ayan che'eta sana'a tyaja'amuacɨ'ɨpuaca sej seyan rajpueijtzi tyatɨj ityan, ajta Dioj pu ayan che'eta na'a rɨ'ɨ amua'anrú'ura'a a'ame muejmi tɨj ajta rɨ'ɨ tita'anrú'ura'a a'ame itejmi. 8Ayaa tu ti'ijxe'eve'e, ta'ihuaamua'a, sej raamua'aree a'ij tyaj tirajpueijtzica'a tyatɨ'ɨj tyaun a'utyá'acaa aujna u Asia. Eecan tu huapɨ'ɨ á'aviicue'ira'acaa, asta na'a cai utyaavatzɨ ɨ tatzajta'a. Ayaa pu tita'amityejtya'acaa tyaj cai che'e a'ij huarɨni. 9Ee tzɨte'e, ayaa pu tita'amityejtya'acaa ɨ tatzajta'a tyaj huacui'ini. Ma ajta, ayaa pu aɨjna cɨn taaruu tej ti cai tajɨɨmua'a á'atatzaahuatya'a silu tej ti tyaɨjna jetze arataca'anyen ɨ Dioj tɨ hua'ajjá'ajpuana ɨ mej meri huacuii. 10Aɨ pu ayan tu'irajtuaa tɨ ij cai ayan titáacɨ'ɨti tej tyaɨjna cɨn huacui'ini tɨ huapɨ'ɨ a'ij pua'a seijre'e. Aɨ pu ajta auche'e tu'irajtuaasin. Ee xaa nya'u, ayaa tu ti'ijchu'eve'e tɨ aɨn ajtahua'a tu'irajtuaani. 11Ma ajta, ayaa pu tyu'ujxe'eve'e saj saɨjna cɨn taatavaɨre'en saj rahuaviira ɨ Dioj itejmi cɨme'e, mej mi majta mui'itɨ meyan rɨ'ɨ tiraata'acare'en ɨ Dioj itejmi cɨme'en maɨjna cɨme'e tɨ aɨn Dioj ayan che'eta na'a rɨ'ɨ titaatá'a itejmi a'ij sej seri mui'itɨ tiraahuaviiri'i. 12Aɨj tu xaa cɨn á'atatzaahuate'en. Ajta aɨn ɨ taxaijnyu'uca ayan ti'ita'ixaate'e tɨ ayan ti'ayajna tyej teyan rɨ'ɨ ti'ititacha'ɨ hua'a jemi ɨ mej iiyan seijre'e chaanaca japua, tyajta eitze'e rɨ'ɨ ti'ititacha'ɨ muejmi jemi. Tɨj na'a tej teyan huarɨj, ayaa tu tzaahuati'ira'a cɨn teyan rɨjcaa ɨ Dioj jemi, nain cɨme'e a'ij tɨ tiraavijte'e. Catu teyan ti'ijrɨ'ɨrajcaa a'ij mej ti'ijrɨ'ɨre ɨ tyetyaca mej iiyan seijre'e ɨ chaanaca japua silu Dioj pu ayan rɨ'ɨ titaatá'a. 13- 14Ajta, ɨ nyaj tyaja'amuayu'use'e, ayaa pu'u na'a aɨn pueen a'ij saj sana'a tiraayɨ'ɨtɨ saj ra'ujijve'en, a'ij saj sana'a sajta tiyau'eite. Ayaa nu nyajta ti'ijxe'eve'e saj raamua'aree nain cɨme'e tyaj tyaɨn pueen ɨ saj cɨn rɨ'ɨ tiraata'asin ɨ Dioj. Ee xaa, xu'uri seyan raamua'areeri'i. Sajta muan, muan xu saɨn pueen ɨ tyaj cɨn rɨ'ɨ tiraata'asin ajna xɨcajra'an tɨ jetzen ajtahua'a huataseijre'esin aɨjna ɨ tavastara'a, aɨjna ɨ Jesús. 15A'ini ayaa pu tina'amitejtya'acaa, ayaa nu tiraaxa'apɨ'ɨntare nyaj anacai nyaun a'atanyén muejmi jemi nyej ni hua'apua rɨ'ɨ tyajamuaata'an. 16Ayaa nu ti'ijxe'eva'acaa nyaj amuaamuaare nyatɨ'ɨj nyaun a'ume'en u Macedonia, nyajta nyatɨ'ɨj nyaun pɨ e'ejveti nyajtahua'a amuaamuaare. Nyajta neyan raxe'eva'acaa saj seyan tiraaxa'apɨ'ɨntare'en ɨ saj cɨn naatyavaɨre'en nyej ni nyaun á'ume'en u Judea. 17¿A'ini tyajamua'amitejte'e muejmi? ¿Ni qui seyan tina'aseijrate'e tɨ cai rɨ'ɨri saj na'antzaahuate'en saɨjna cɨme'e nyaj nu'u cai tzaahuati'ira'a cɨn ti'ixa'apɨ'ɨntare'e? Me nyajta inyaa, canu xaa nya'u neyan een, a'ini canu neyan ti'ijrɨ'ɨre matɨj aɨme ɨ tyetyaca ɨ maj rujɨɨmua'a ti'imua'atze tɨcɨn “jee.” Ma ajta, capu ayan te'iraame. 18Ma ajta Dioj, aɨ pu cai a'anaj atya'ɨtza'ara. Aɨj pu cɨn, aɨjna ɨ tyej teri amuaata'ixaa, capu ayan een tɨ hua'apuaca cɨn huataujmua'a. Aɨjna tɨ cɨme'en raxaj yee “jee”, capu ajta ayan huataujmua'a yee “capu”. 19Ajta aɨjna tɨ yaujra'an pueen ɨ Dioj, aɨjna ɨ Jesús tɨ ajta Cɨriistu'u pueen, tyan tu teyan cɨme'en amue'ixaa inyaa, jamuan aɨjna ɨ Silvano, ajta aɨjna ɨ Timuteeyu. Aɨjna ɨ Cɨriistu'u, nain pu cɨn tihuaujmua'atziitya'a, ajta raxa'apɨ'ɨntare'e. Aɨjna jemi tɨj na'a ɨ nyuucari tɨ cɨme'en raxaj yee “jee”, a'anaj tɨ na'a pu ayan te'iraame tɨcɨn “jee”. 20Ajta nain ɨ tɨ cɨn Dioj tya'ataujratziiri'i, aɨ pu araurastejsin ɨ Cɨriistu'u jetze. Aɨj tu cɨn teyan ti'ixaxa'a yee “jee”. Yaa pu ti'ayajna ɨ jemin. Ayaa tu cɨn rɨ'ɨ tirata'aca ɨ Dioj. 21Ma ajta Dioj, ai pu aɨn pueen ɨ tɨ rɨ'ɨ titájcha'ɨ itejmi. Aɨ pu tyajamuájcha'ɨ muejmi jemin ɨ Cɨriistu'u. 22Aɨ pu itejmi huataura'ate, ajta raatyajtuaa ɨ ruxaijnyu'uca itejmi jemi tej ti raamua'aree tɨ aɨn ranaijmire'en ɨ tɨ ari taata'a. 23Dioj pu ru'umua'aree a'ij nyej ti'imua'atze. Canu ti'ihue'i nyana'a. Canu cha'a nyana'a ti'ixa'apɨ'ɨntare'e silu rɨ'ɨ nu ti'ixa'apɨ'ɨntare'e. Ayaa nu een cɨn cai nyaun a'atanye muejmi jemi nyej ni cai amuaatamuáre'eriste'en. 24Catu xaa nya'u teyan tyaja'amueijte'e sej si ca'anyejri cɨn ra'ara'astijre'en ɨ tavastara'a, silu a'amua jamuan tu ti'imuare'e sej si saɨjna cɨn huataujtyamua'ave'en, a'ini muan xu ra'astijra'a xa'aye'i tyamua'a naa.

will be added

X\