1 Timuteeyu 6

1Ayaa pu ruxe'eve'e muejmi jemi satɨj sana'a pua'amua mej ca'anyejri cɨn tyaja'amuamuariste'e tɨ i ayan tyajamuá'amityejtya'a tɨ ayan raavijte'e sej hua'ara'astijre'en aɨme ɨ mej tyaja'amue'ijte'e. Na'ari tɨ pua'a sacai seyan huarɨni, aɨ mu a'ij pua'a tyu'utaxajta maɨjna cɨme'e ɨ tyej teyan raatamua'amua tɨcɨn Dioj tɨ ta'ivastara'a, majta maɨjna cɨme'e a'ij tyej ti'imua'ata. 2Ajta, a'ini aɨ mu ɨ mej tyaja'amueijte'e, aɨ mu majta tya'atzaahuate'e, ayaa xu huarɨni. Caxu hua'axaahuari'ira saɨjna cɨme'e sej ru'ihuaamua'a ɨ tavastara'a jemi, silu ayaa xu eitze'e tihua'utyavaɨre'en. Ayaa xu huarɨni a'ini eitze'e pu tihua'acɨ'ɨti aɨme ɨ mej tyaja'amueijte'e aɨjna cɨme'e sej seyan tihua'utyavaɨre'en, majta meyan tya'atzaahuate'e, ajta Dioj pu hua'axe'eve'e. Ai pu aɨn pueen ɨ tɨ ruxe'eve'e pej peyan tihua'umuá'ate. Pajta, pata'aj ca'anijra'a hua'uta'an mej mi meyan huarɨni. 3- 4Seica mu meyan ti'imua'ataca maɨjna cɨme'e tɨ cai ayan ti'ayajna, tɨ saɨque een aɨjna cɨme'e ɨ nyuucari tɨ rɨ'ɨ taaruuren tɨ cɨme'en taamuá'ate ɨ tavastara'a ɨ Jesús tɨ ajta i'i Cɨriistu'u. Majta meyan ti'imua'ataca aɨjna cɨme'e tɨ saɨque een aɨjna cɨme'en ɨ nyuucari tɨ tzaahuati'ira'a cɨn ti'ixa ɨ Dioj jemi. Tɨ pua'a a'atɨ ayan eenye'en, capu ti'itɨ u'umua'aree silu á'ujtzaahuate'e pu'u. Eihua pu tyu'urihuauve'e nain cɨme'e, ajta nya'usa'amɨ'ɨ aɨjna cɨme'e a'ij tɨ huataujmua'a seij ɨ nyuucari. Ai pu aɨn pueen ɨ tɨ te'iraaye'i tɨ ayan rɨcɨ. Maujcheere rujɨɨmua'a na'ari maujtyesa'a. Majta a'ij pua'a tyu'ujxajtave'e ca'ɨn sei pu ayan tí'ijxajtzi'i ɨ ruxa'aj tevi tɨ ij a'ij pua'a raaruuren. 5A'anaj tɨ na'a maujtyese'e aɨme ɨ mej a'ij pua'a me tyaumuámua'aree. Aɨ pu tiyaaru'u tihua'ari'iri'i ɨ maj anacaican cɨn rú'umua'areeracaa tzaahuati'ira'a cɨme'e. Aɨj pu cɨn ayan tihua'amitejte'e mej meyan tiraamue'itɨn maɨjna cɨme'e mej huataujseijrata maj nu'u Cɨriistu'u jemi ti'ivaɨre'e. 6Ma ajta, tɨ pua'a a'atɨ rɨ'ɨ hua'uruuren aɨjna cɨme'e tɨ ra'astijre'e ɨ Dioj eihua pu aɨjna cɨn ramue'itɨn, tɨ pua'a ajta rutyamua'ave'e. 7A'ini tyatɨ'ɨj huataseijre iiyan chaanaca japua, catu ti'itɨ uve'eneijte. Ajta, tyatɨ'ɨj huiracɨɨnye teyanna chaanaca japua, catu ti'itɨj a'atɨni. 8Ayaa pu éenya'a, tiche'e huatatyamua'ave'en tyaɨjna cɨme'e tyej tí'ijcha'ɨ ɨ tyej ti'icua'a, ajta ɨ tyaj cɨn tí'ityatache'ete. 9Majta aɨme ɨ mej meyan raxe'eve'e mej huataujchijtyaanita, ayaa mu e'en matɨj aɨme ɨ ti'ityaɨn a'atɨ tɨ caujnari cɨn hua'utyaajɨ'ɨque. Aɨ pu hua'atyanaamɨ ɨ hua'a tzajta'a mej mi eihua ti'ijxe'eve'e, maj cai cɨn rɨ'ɨ me tauúmua'araa, tɨ eihua a'ij pua'a tyu'uruure. Ai pu aɨn pueen ɨ tɨ nain tihua'ari'ira, tɨ hua'antipua'arite'esin rusen cɨme'e. 10A'ini aij pu jetze airáninyei naijmi'i tɨj na'a tɨ a'ij pua'a seijre'e aɨjna cɨme'e maj huapɨ'ɨ tumin ranyacua'atze'e. Majta seica, aɨ mu meri ra'atyaxaahuataca'a ɨ mej tya'atzaahuate'e maɨjna cɨme'e mej eihua huapɨ'ɨ ranyacua'atze'e ɨ tumin. Matɨ'ɨj meyan huarɨni, eihua mu rajpueitzi mua'ara'ani. 11Pajta muaa, mɨ pej ra'astijre'e ɨ Dioj, pata'aj cai a'atzu tya'aste paɨjna cɨme'e silu ayaa papu'u huarɨni. Pata'aj peyan tiraahuauni pej uraré'enye'en ɨ a'atzajta'a, pajta pata'aj rɨ'ɨ tí'ichajca ɨ Dioj jemi. Pajta pata'aj tya'atzaahuatya'a tzaahuati'ira'a cɨme'e. Ayaa papu'u pajta tiraahuauni paj hua'axe'eve'en tyamua'a naa ɨ tyaɨte, paj tya'utaviicue'i, pajta ayan huatya'apua'arite'e ɨ a'atzajta'a. 12Pata'aj ti'ityese'e tyamua'a naa pej pi ratyamue'itɨn paɨjna tɨ xa'apɨ'ɨn een aɨjna cɨme'e pej tya'atzaahuate'e. Pata'aj ti'ityese'e paɨjna huatyamue'itɨn paj ruuri pua'ara'ani rusen cɨme'e ɨ Dioj jemi, a'ini aɨj pu cɨn Dioj muaatajée ajna xɨcajra'an pej jetzen raata'a a'anyuuca meti'iseiraca ɨ tyaɨte. Xa'apɨ'ɨn paj raataxajtaca'a paj nu'u ra'ara'astijre'en ɨ tavastara'a jemi. 13Ayaa nu ti'imueijcate'e ti'itɨj cɨme'e jemin ɨ Dioj tɨ naijmi'ica hua'ata'aca maj ruuri mua'ara'ani, ajta jemin ɨ Cɨriistu'u tɨ ajta i'i Jesús tɨ ajta xa'apɨ'ɨn tyu'utaxajtaca'a tɨ'ɨj aɨn ti'ixaatya'acaa jemin aɨjna ɨ tajtuhuan tɨ ayan antyahuaaca'a tɨcɨn Póncio Pilaatu. 14Ayaa nu ti'imueijcate'e pej peyan ra'ara'astijre'en nain cɨn a'ij nyej neri timuaataíj, pej pi cai ti'itɨj cɨn autyaturan, tɨ ij cai a'atɨ ti'itɨj cɨn mueetzi jetze tya'upuá'ajte'en. Pata'aj pauj peyan rɨjca tɨj na'a tɨ yu auca'itɨ a'ame asta cai ajtahua'a ye huataseijre'en ɨ tavastara'a, aɨjna ɨ Jesús, tɨ ajta i'i Cɨriistu'u. 15Ajta ayen te'eme tɨ'ɨj Dioj ayan raaxa'apɨ'ɨntare'en yee pu'uri raavijte'e tɨ ajtahua'a huataseijre'en. Ajta aɨn Dioj, ai pu aɨn pueen ɨ tyaj rɨ'ɨ tirata'aca, ɨ tɨ rusaɨj nain japua tie'ijta. Aɨ pu tihue'ijte'e aɨme ɨ maj tajtuhuan cɨn ti'itátyatyá'upu'u. Ai pu ajta aɨn pueen ɨ hua'avastara'a aɨme ɨ tyej teyan hua'atamua'amua tɨcɨn yee tavastara'a, ɨ maj meyanna seijre'e iiyan chaanaca japua. 16Aɨ pu'u na'a aɨn pueen ɨ tɨ cai a'anaj mɨ'ɨni, ajta aɨn á'uca a'u tɨ ayan eihua a'utáca a'u tyaj cai a'arajvee ɨ jemin. Capu a'atɨ a'anaj raaseij, ajta capu rɨ'ɨri tɨ a'atɨ rujɨ'ɨ cɨn raaseij. Tiche'e rɨ'ɨ tiraata'an, ajta che'e aɨn nain cɨn antyujmua'aréera a'ara'ani rusen cɨme'e. 17Ayaa paj tihua'utaijte'en aɨme ɨ maj chijtyaani pueen, ɨ maj yan huachaatɨme iiyan chaanaca japua mej mi cai hua'axaahuata ɨ seica ɨ maj cai a'ij ti'ijviicue'i. Miche'e majta cai maɨjna cɨn a'ujtzaahuatya'a maɨjna cɨme'e mej eihua tí'ijcha'ɨ tɨ huapɨ'ɨ ti'ijnajchi, a'ini capu rɨ'ɨri mej raamua'aree tɨ tyahua'ava'ɨrihua'an majca'i huayee. Aɨj pu cɨn, miche'e ra'atzaahuatya'a ɨ Dioj tɨ ruxé'evi'ira'a cɨn taatapueijve'esin naijmi'i tɨj na'a tyej ti tyaɨjna cɨn huatatyamua'ave'en. 18Pata'aj tihua'utaijte'en mej mi meyan huarɨni ɨ tɨ i'i xa'apɨ'ɨn cɨme'e, mej mi eihua huapɨ'ɨ meyan tyu'umuare'en maɨjna cɨme'e tɨ xa'apɨ'ɨn, mej mi ruxé'evi'ira'a cɨn tihua'uta'an ɨ maj cai a'ij ti'ijviicue'i, mej mi ra'ujca'anye mej tyu'ura'an tyamua'a naa aɨjna mej tí'ijcha'ɨ. 19Tɨ pua'a meyan huarɨni, eihua mu huapɨ'ɨ ratya'avaata ɨ Dioj jemi tɨ tihua'atyava'ɨrihua'an majca'i huayee rusen cɨme'e. Ayaa mu meyan huarɨn, aɨ mu xaa ramua'areeran mej maun te'entyaruti ɨ Dioj jemi mej mi ruuri mua'ara'ani rusen cɨme'e. Ai pu aɨn pueen ɨ tɨ tihua'atyava'ɨrihua'an tzɨte'e. 20Muaa, pej i'i Timuteeyu, pata'aj rɨ'ɨ pana'a pej pi nain cɨn tya'ara'asten Dioj tɨ cɨme'en timuéijca. Capaj a'atzu ra'aste ɨ mej eihua tyú'uxajtave'e maɨjna cɨme'e ɨ nyuucari tɨ cai ti'itɨj vaɨre'e, ajta tɨ saɨque een. Ayaa mu tya'ujtzaahuate'e mej ru'umua'aree, aru capu ayan ti'ayajna. Camu a'atzu ru'umua'aree. 21Majta seica meri hua'unamuajri'i. Ayaa mu cɨn huarɨn, matɨ'ɨj mi maɨn ca'anacan yá'uhua'axɨ ɨ mej tya'atzaahuate'e. Aj mu mi ajtacɨ́j ɨ tavastara'a jemi, micu. Yaa pu i cu. Che'e a'ij ti'imuavaɨra'a.

will be added

X\