1 Timuteeyu 5

1Capaj a'ij pua'a ti'ijtyá'axɨ'ɨ seij tɨ ari vastacɨra'i, silu rɨ'ɨ pej tiraatajeeva cumu a'ataata papu'u. Ajta aɨme ɨ tyetyaca ɨ maj cai xɨ vaujsicɨra'i, pata'aj rɨ'ɨ tihua'utajeeva cumu a'ihuaamua'a papu'u. 2Pata'aj rɨ'ɨ tihua'utajeeva ɨ juuca ɨ mej meri ucarijse cumu a'anaana papu'u, majta aɨme ɨ maj cai xɨ ucarijse cumu a'acu'utzimua'a papu'u na'ari ajuutzimua'a. Pata'aj rɨ'ɨ tihua'utajeeva a'ij tɨ tiraavijte'e nain cɨme'e. 3Ajta aɨme ɨ juuca ɨ maj meri huaujsaɨjtaraca'a, tɨ pua'a ayan ti'ayajna maj huaujsaɨjtaraca'a, majta ɨ maj cai a'ij ti'ijviicue'ira, pata'aj hua'utavaɨre'en. 4Na'ari cai, tɨ pua'a auj tiyaujmua'a ca'ɨn auj tiya'acuajmua'a, ayaa paj huarɨni. Miche'e aɨme mi'i rɨ'ɨ raaruuren mej maɨjna cɨn tya'ara'asten mej hua'utavaɨre'en ɨ ruxa'aj tyaɨtestyamua'a. Matɨ'ɨj meyan huarɨn, mu'uri xaa tyu'unajchitaca'a maɨjna cɨme'e ɨ mej té'echaɨca'a ruvaujsi jemi na'ari ruya'acuajmua'a jemi. Ajta ai pu aɨn pueen ɨ tɨ rɨ'ɨ tirata'aca ɨ Dioj. 5Pata'aj peyan huarɨni, tɨ pua'a a'atɨ xaa huaujsaɨjtaraca'a, tɨ ajta cai a'ij ti'ijviicue'ira, aɨ pu xaa tya'antza'ahuatya ɨ Dioj jemi, ajta tyenyuuve'en nain xɨcaj tzajta'a, ajta nain tɨca'ari tzajta'a tɨ ij ayan ti'ijhuaviira tɨ Dioj raatavaɨre'en. 6Ajta aɨn ɨ jɨita'a tɨ huaujsaɨjtaraca'a, tɨ pua'a ayan rɨ'ɨ tira'araanajchi aɨjna cɨme'e tɨ naa seijre'e jemin, cu xuee tɨ huamɨ'ɨ ɨ Dioj jemi. Ma ajta auche'e pu ruuri. 7Pata'aj pajta hua'utanamuajriste'en ɨ tyaɨte paɨjna ɨ nyuucari mej mi cai ti'itɨj cɨn a'aturaá mua'ara'ani, tɨ'ij ajta cai a'atɨ ti'itɨj cɨn hua'a jetze tí'ipua'ajtya'a. 8Tɨ pua'a a'atɨ cai tihua'utavaɨre'en aɨme ɨ rutyaɨtestyamua'a, aɨme ɨ maj eitze'e vejli'i jemin e'eche, aɨ pu aɨjna cɨn ma ruurai tɨ ra'atzaahuatya'acaa ɨ Dioj jemi. Eitze'e pu a'ij pua'a rɨcɨ cai saɨj tɨ a'ij pua'a ti'ityujcha'ɨ, tɨ ajta cai a'anaj ra'atzaahuate'e. 9Cɨme'en aɨme ɨ maj huaujsaɨjtaraca'a, aɨme papu'u auyu'uxan ɨ mej meyan rajcha'ɨ a'achu cumu hueicate ninye'ira'a o eitze'e ninye'ira'a. Ajta, ayaa pu ruxe'eve'e tɨ cai a'anaj ti'ixana'acɨra'a jemin ɨ rucɨn tyaacan. 10Ayaa pu ajta ruxe'eve'e, maj naimi'i ramua'areera ɨ tyaɨte tɨ pua'a xa'apɨ'ɨn huarɨj ti'itɨj cɨme'e, tɨ rɨ'ɨ tihua'uxa'apueiri'i ɨ tɨ'ɨrii ca'ɨn tɨ hua'ancure'evi'itɨ aɨme ɨ maj ramuaaracara'a nusu tɨ hua'anaja'usixɨ ɨ huáɨɨca jetze aɨme ɨ maj huatyáuu ɨ Dioj jemi na'ari tɨ hua'utavaɨ aɨme ɨ maj tihua'amuare'eriste'e o tɨ ayan huataura'a tɨ ayan huarɨni ti'itɨ tɨ a'ij ti'ixa'apɨ'ɨn. 11Ajta aɨme ɨ maj huataujsaɨjtaraca'a, ɨ maj mauj tyaamuastaca, capaj peyan hua'ayu'uxa jetzen ɨ papee, a'ini tɨ'ɨj ari eitze'e hua'uta'asi maj huaviche'en, majta cai che'e raxe'eva'a mua'aju'un mej tyu'utyavaɨre'en ɨ Cɨriistu'u jemi, aɨ mu xaa huatyeviche'esin. 12Tɨ pua'a peyan hua'uyu'uxan ɨ papee jetze, ajta tɨ pua'a meyan huatyeviche'en, aɨ mu rajpueitzi mua'aju'un ɨ Dioj jemi a'ini mu'uri ra'utaxaahuari'iri'i ɨ maj anacaican cɨn tya'ataujratziiri'i ɨ Dioj jemi. 13Ajta aɨjna cɨme'e, ayaa mu ti'ijrɨ'ɨre mej á'ujhua'anye'en ɨ hua'achi'i tzajta'a meyee, majta meyee. Ayaa mu cɨn ma'ujhua'anye'en a'ini ayaa mu rɨcɨ a'ij tɨ ti'itɨ tihua'araanajchi. Ayaa mu á'ujhua'anye'en meyee, majta meyee mej eihua tyu'ujxajtave'e, majta eihua tyu'urihua'uve'e maɨjna cɨme'e a'ij tɨ rɨcɨ ɨ ruxa'aj tevi. Ajta ayaa te'irajra'ani mej eihua tyú'uxajtave'e tɨ ayan tiraavijte'e. 14Ayaa pu ti'irɨnyaca aɨme jemi ɨ maj mauj tyaamuastaca ɨ maj huataujsaɨjtaraca'a. Aɨj nu cɨn neyan ti'imue'ixaate'e tɨcɨn miche'e huatyeviche'en mej mi tiyauumua'a mua'ara'ani. Miche'e majta rɨ'ɨ tyu'umuare'en a'u me e'eche mej mi cai raata'an maɨjna tɨ tajchaɨre'e tɨ ti'itɨ cɨn hua'ajetze tya'ujpuá'ajte'en. 15Ayaa pu ti'ayajna maj seica meri ma ruurai ɨ maj anacaican tya'ataujratziiri'i ɨ Dioj jemi mej mi ra'ara'asten maɨjna ɨ Satanás. 16Ajta aɨn jɨita'a tɨ ajta tya'atzaahuate'e, tɨ pua'a a me e'eche jemin seica ɨ maj huaujsaɨjtaraca'a, che'e aɨn hua'utavaɨre'en tɨ ij cai huá'amuare'eristya'a aɨme ɨ mej ti'ivaɨre'e u teyujta'a. Tɨ pua'a ayan huarɨni, aj pu xaa huatarɨ'ɨristari aɨme jemi ɨ maj teyujta'a ti'ivaɨre'e mej mi hua'utavaɨre'en ɨ maj cai a'ij te'eviicue'i ɨ maj huaujsaɨjtaraca'a. 17Pata'aj peyan hua'uruuren aɨme ɨ mej antyujmua'aree u teyujta'a. Tɨ pua'a xa'apɨ'ɨn marɨcɨ, ayaa pu tiraavijte'e pej tyamua'a rɨ'ɨ tihua'ata'acare'en ti'itɨj cɨme'e tɨ tihua'aturaate'e. Pata'aj eitze'e rɨ'ɨ tihua'uta'an aɨme mej mi'i huatyaujca'anyen maɨjna cɨme'e mej tihua'uta'ixaate'en, majta mej tihuá'umua'aten. 18Ayaa paj huarɨni, a'ini ayaa pu te'eyu'usi'i ɨ yu'uxari jetze tɨcɨn: “Caxu ra'anajɨ'ɨquihua'an mɨ puuye tɨ raayun ɨ triigu ruɨɨca cɨme'e silu che'e rɨ'ɨristan tɨ cɨj caj tiraacua'ani.” Ajta pu ayan te'eyu'usi'i tɨcɨn: “Ayaa pu tiraavijte'e mej mi tiraanajchite'e a'atɨ tɨ ti'imɨjhuaca a'achu tɨ caj raamue'itɨ.” 19Tɨ pua'a a'atɨ ti'itɨj cɨn jetzen ti'ijpuá'ajtya'a seij tɨ hua'achaɨ u teyujta'a, tɨ pua'a aɨ na'a ti'ijpuá'ajtya'a, capej ranamuajra. Aru tɨ pua'a ma hua'apua na'ari mahueica meyan jetzen ti'ijpuá'ajtya'a, aj paj xaa raanamua. 20Majta aɨme ɨ maj hua'achaɨ ɨ tyaɨte teyujta'a, tɨ pua'a a'ij pua'a me titetyújchaɨ ɨ Dioj jemi, pata'aj hua'ajtya'axɨ'ɨn, meti'inamuáaraca ɨ tyaɨte, mej mi raamua'aree ɨ seica mej mi cai meyan titya'ɨtzaa. 21Jemin ɨ Dioj, nyajta jemin ɨ Cɨriistu'u tɨ ajta i'i Jesús, nyajta hua'a jemi ɨ mej ti'ivaɨre'e ɨ tajapua, Dioj tɨ hua'antihuau, ayaa nu tí'imue'ijcate'e pata'aj nain cɨn na'ara'astijre'en a'ij nyej neri timue'ixaa. Capej ti'itɨ cɨn a'ij rɨjca paɨjna cɨme'e pej seij eitze'e xe'eve'e, pajta seij cai peyan ti'ixe'eva'a silu pata'aj peyan che'eta pana'a hua'aruure naijmi'ica. 22Capej á'iyi'itze'e paj ra'ava'amɨjhua'an seij ɨ a'atɨ ti'itɨ tɨ a'ij cɨme'en pej pi cai jamuan autyaturan ɨ Dioj jemi. Pata'aj asaɨj rɨ'ɨ tihua'achaɨn pata'aj cai ti'itɨj cɨn autyaturan ɨ Dioj jemi, seij jamuan ɨ tevi. 23Pata'aj raatapua'ajta paj cai aɨ pana'a jaj ya'aca. Pata'aj cɨj caj ti'itɨ nahuaj tyu'uye'en a'ini eihua pej tí'icucui'i. 24Aɨjna cɨme'en ɨ seica ɨ tyetyaca, a eijre'e pu seijre'e ɨ maj cɨn autyajturaa ɨ Dioj jemi tɨ ij anacaican pueijtzi hua'uta'an. Ajta seica cɨme'en, capu a'ij amiteere anacaican ɨ maj cɨn autyajturaa ɨ Dioj jemi, silu majca'i huayee xaa tyaja'ure'enyejsin ajna xɨcajra'an tɨ jetzen huataseijre'esin. 25Ayaa pu che'eta na'a een aɨjna cɨme'e ɨ tɨ xa'apɨ'ɨn ɨ maj cɨn meri tyu'utavaɨ, aɨ pu a eijre'e seijre'e. Na'ari tɨ pua'a cai anacai amiteere, majca'i huayee pu huataseijre'esin. Capu rɨ'ɨri tɨ huatáuravaa para rusen cɨme'e.

will be added

X\