1 Timuteeyu 4

1Ajta aɨn xaijnyu'ucara'ara'an ɨ Dioj, aɨ pu ayan ti'ixa a'ahuaritaacan cɨme'e tɨ nu'u ayan te'eme majca'ihua yee tɨ'ɨj te'entipua'arijme'en. Seica mu nu'u yá'uhua'axɨ'ɨsin ɨ maj tya'atzaahuate'e. Aɨme mu nu'u namuaara mua'aju'un ɨ xaijnyu'ucari ɨ mej tihua'ahueitze'e, majta mu ranamuajran a'ij tɨ aɨn tiyaaru'u tihua'amua'aten. 2Aɨj pu cɨn ayan huataseijre'esin mej meyan hue'itzi cɨn tihua'amua'aten maɨjna cɨme'e aɨme ɨ mej ti'ihue'itaca, ɨ majta a'ij pua'a titetyújcha'ɨ. Capu rɨ'ɨri tɨ a'atɨ hua'utatyévi'imua'an. A'ini camu meyan rɨcɨ a'ij mej tiru'umua'aree ɨ rutzajta'a tɨ ayan tiraavijte'e, cu xuee tiyaaru'u pu huá'ataixɨ'ɨ ɨ hua'a mu'u jetze. 3Aɨ mu hua'uta'ijmɨjra ɨ tyaɨte maj cai huatyenyaɨchen, maj cai huatyeviche'en. Majta meyan tihua'utaijte'esin maj cai raacua'ani ti'itɨ tɨ ti'icue'iri'i. Aru aɨn Dioj, nain pu yan tyu'utyájtua mej mi ra'ancura'an ɨ tyaɨte ɨ maj tya'atzaahuate'e, majta ramua'aree ti'itɨ tɨ ayan ti'ayajna, mej mi maɨjna cɨn tiraatataujtzi'ire'en. 4- 5A'ini tyamua'a pu ti'ire'en naijmi'i tɨj na'a tɨ Dioj tyu'utaahuaca'a, capu ayan tiraavijte'e tɨ a'atɨ ti'itɨ ma uraini silu che'e aɨn ra'ancura'an. Che'e ajta aɨjna cɨn tiraatataujtzi'ire'en ɨ Dioj jemi, a'ini pu'uri aun a'aviitzi'ire'en ɨ Dioj jemi aɨjna cɨme'e tɨ aɨn Dioj ari ayan tyu'utatuire'esin tɨ'ɨj huatyejnyuuni ɨ Dioj jemi. 6Pata'aj peyan tihua'uta'an mej mi raamua'ati ɨ a'ihuaamua'a aíjna i nyej neri muaata'ixaa. Tɨ pua'a peyan huarɨni, tyamua'a pej tyu'utyavaɨre'esin ɨ Cɨriistu'u jemi tɨ ajta i'i Jesús. Petyu'utyavaɨre'esin paɨjna cɨme'e tɨj na'a paj pa'arɨ'ɨstaca'a muaa pa ranamuajracaa ɨ nyuucari pej jetzen tya'antzaahua, ɨ nyuucari ɨ mej tyamua'a naa timuaamuá'ate. 7Capej ra'atzaahuatya'a aɨjna ɨ nyuucari tɨ cai Dioj jemi e'ema'acan, ti'itɨ mej ti'imuarita tɨ cai ayan ti'ayajna, tɨ cai ti'itɨj vaɨre'e. Pata'aj peyan ámua'atya paɨjna cɨme'e pej peyan huarɨni a'ij tɨ ti'ijxe'eve'e ɨ Dioj. 8Cɨj pu caj ti'ivaɨre'e tɨ pua'a peyan hua'acua'ajtye'en paɨjna cɨme'e paj raata'an ɨ a'atzajta'a pej pi huatya'aca'anye ɨ mua'atévira'a jetze. Aru ti'ivaɨre'e para naijmi'ica tɨ pua'a peyan ámua'atya paɨjna cɨme'e pej peyan huarɨni a'ij tɨ ti'ijxe'eve'e ɨ Dioj. Ti'ivaɨre'e ijii pej yan huatyaturan iiyan chaanaca japua, ajta timuaatyava'ɨri pej pi ruuri pua'ara'ani para rusen cɨme'e. 9Ayaa nu ti'imue'ixaate'e tzaahuati'ira'a cɨme'e tɨ ayan ti'ayajna. Che'e cai a'atɨ ayan saɨque ti'ixajta. 10Ayaa tu een cɨn ti'imɨjhuaca, tyajta ti'ityesa'aca tyej teyan raachu'eve'en tyaɨjna jemi ɨ Dioj tɨ i'iruuri, tɨ ajta rɨ'ɨ tihua'ata'aca naijmi'ica ɨ tyaɨte eitze'e. Aɨ pu ajta hue'iratuaasin aɨme ɨ mej tya'atzaahuate'e. 11Pauche'e tihua'amua'atya, pajta pauj tihua'utaijte'en paɨjna cɨme'e nyej ye ti'imue'iyu'use'e. 12Capej ti'ita'acare'en tɨ a'atɨ muacáxaahuata aɨjna cɨme'e pej pauj tyamueij, silu ayaa papu'u rɨ'ɨ tyaja'ucha'acane'en tyamua'a naa mej mi aɨme ɨ mej tya'atzaahuate'e meyan che'eta mana'a á'ujhua'anye'en patɨj muaa aɨjna cɨme'e a'ij pej tihue'ixaate'e, a'ij pej rɨ'ɨ ti'itiá'acha'ɨ, ajta a'ij pej tihua'axe'eve'e. Miche'e majta meyan che'eta mana'a timuáɨjchu patɨj muaa aɨjna cɨme'e a'ij pej tira'astijre'e ɨ tavastara'a, ajta a'ij pej tya'urare'en ɨ a'atzajta'a. 13Ayaa paj rɨjca asta nyacai uvé'enyen, pata'aj peyan hua'utanamuajriste'en ɨ yu'uxari jetze ɨ tyaɨte tzajta'a, pajta tihua'uta'ixaate'en, pajta tihuá'umua'aten. 14Capej raxaahuata aɨjna tɨ Dioj muaatapueijve matɨ'ɨj maɨn vaujsi mamua'ajtamuarej, majta tyu'utaxajtaca'a mueetzi cɨme'en ɨ Dioj jetze ma'acan. 15Pata'aj peyan raaruure paɨjna cɨme'e, pata'aj nain cɨn ti'amua'atya mej mi naimi'i meyan tiraaseij pej ranaijmi'ire'en ɨ tɨ mueetzi jemi huatyajturaa. 16Rɨ'ɨ papu'u paɨjna cɨme'e a'ij pej ti'itɨj ruure, pajta a'ij pej ti'itɨ tihua'amua'ate. Pata'aj peyan ta'utaviicue'i paɨjna cɨme'e a'ini tɨ pua'a peyan huarɨni, muaa paj asaɨj huiirá'atuaasin, pajta hue'iratuaasin aɨme ɨ maj muanamuajran.

will be added

X\