1 Timuteeyu 3

1Ayej xaa nya'u ti'ayajna aijna i nyuucari. Tɨ pua'a a'atɨ ayan raxe'eva'a tɨ aɨn antyujmua'aréera aɨjna cɨme'e tɨ hua'achaɨ ɨ mej e'etyujsa'ɨri u teyujta'a, aɨ pu xaa raxe'eve'e tɨ tyu'umuári'ihua tɨ i'i xa'apɨ'ɨn. 2Aɨj pu cɨn, ayan ruxe'eve'e tɨ ayan éenye'en aɨjna tɨ ayan antyujmua'aree aɨjna cɨme'e tɨ hua'achaɨ. Ruxe'eve'e tɨ cai ti'itɨj cɨn a'aturaa mej mi cai a'ij pua'a ti'ixajta ɨ tyaɨte. Ajta tɨ saɨj na'a nyaɨcha. Ajta ayan ruxe'eve'e tɨ rɨ'ɨ ti'ityujcha'ɨ, tɨ cɨj na'a ti'iya'aca ɨ ti'itɨ nahuaj, ajta tɨ cai tyú'uxajtave'e, mej mi rɨ'ɨ tiraata'an ɨ tyaɨte. Ajta ayan ruxe'eve'e tɨ hua'ancure'evi'itɨn tyamua'a naa aɨme ɨ maj ramuaarin ajna tɨ e'eche, ajta tɨ raayɨ'ɨtɨhua'an tɨ tihua'umua'aten tyamua'a naa. 3Ajta ayan ruxe'eve'e tɨ cai rutyahueive'e, ajta tɨ cai nya'usa'amɨ'ɨ, silu tɨ rɨ'ɨ tyaja'ucati aɨme jemi ɨ tyaɨte, ajta tɨ cai ti'itɨ cɨn ti'ijaaxaijta. Ayaa pu ajta ruxe'eve'e tɨ cai ramuájchya'a ɨ tumin tɨ ramue'itɨcɨ. 4Ayaa pu ruxe'eve'e tɨ raayɨ'ɨtɨhua'an tɨ tihua'utaijte'en tyamua'a naa aɨme ɨ maj jemin e'eche, ajta ɨ yaujmua'ame'en. Ayaa pu che'eta na'a ruxe'eve'e mej ra'ara'asten a'ij tɨ tiraavijte'e. 5Ayaa pu tí'en, a'ini tɨ pua'a cai raayɨ'ɨtɨ tɨ tihua'utaijte'en aɨme ɨ maj jemin e'eche, capu a'ij ti'irɨ'ɨri tɨ hua'uchaɨn aɨme ɨ maj aun e'etyujsa'ɨri ɨ teyujta'a mej mi tiraatataujtzi'ire'en ɨ Dioj. 6Ruxe'eve'e tɨ ari a'atee tɨ tya'antzaahua. Na'ari cai, aɨ pu a'ujtzaahuate'en aɨjna cɨme'e tɨ va'acan cɨn ti'ityejvee. Tɨ pua'a ayan tya'ujtzaahuatya'a, Dioj pu ayan che'eta ti'ijxa'apɨ'ɨntare'en a'ij tɨ ari tiraaxa'apɨ'ɨntare ɨ tiyaaru'u jemi. 7Ajta ayan ruxe'eve'e mej jemin ramua'areera tɨ rɨ'ɨ ti'itevi aɨme ɨ maj cai tya'atzaahuate'e. Na'ari cai, seica mu ra'utaxaahuari'ira, ajta aɨn tiyaaru'u, aɨ pu cɨme'en ayan tiraatyamue'itɨ. 8Cɨme'en aɨme ɨ mej ti'ivaɨre'e u teyujta, ayaa pu ruxe'eve'e mej meyan rɨ'ɨ me tityá'ujhua'ane'en maj cai ti'ihue'ita, mej mi rá'antzaahuate'en ɨ tyaɨte. Ajta ayan ruxe'eve'e maj cai eihua raya'aca ti'itɨ nahuaj, majta maj cai ramuájchya'a ɨ tumin maj ramue'itɨcɨ aɨjna cɨme'e maj hua'ucuanamua ɨ seica. 9Ayaa pu ajta ruxe'eve'e maj nain cɨn tya'atzaahuate'en aɨjna tɨ ru'avaataca'a ɨ Dioj jemi, a'ij tɨ tyu'uruu ɨ tavastara'a. Eecan pu ruxe'eve'e mej meyan tiru'umua'areera ɨ rutzajta'a tɨ ayan ti'ayajna. 10Tɨ pua'a meyan ti'ijxe'eva'a mej mi tyu'utyavaɨre'en u teyujta'a, aɨ pu ruxe'eve'e maj maɨn tyaɨte anacaican meyan tiraaxa'apɨ'ɨntare'en aɨme jemi ɨ mej ti'ivaɨra'acu. Tɨ pua'a cai ti'itɨ a'ij tihua'aturaate'e, aj pu rɨ'ɨrista a'ame mej meyan tyu'utyavaɨre'en. 11Ayaa pu che'eta na'a ti'en aɨme jemi ɨ juuca ɨ maj huaja'uvi'itɨn. Eecan pu ruxe'eve'e mej meyan rɨ'ɨ mé tityá'ujhua'ane'en. Ruxe'eve'e maj cai a'ij pua'a tyú'uxajtave'e, majta cai rúta'arujva'a, maj cai ti'itɨ cɨn atá'ɨtza'ara'an. 12Majta aɨme ɨ mej ti'ivaɨre'e u teyujta'a, ayaa pu ruxe'eve'e tɨ saɨj na'a nyaɨche, ajta tɨ raayɨ'ɨtɨhua'an tɨ tyamua'a naa tihua'utaijte'en ɨ ruyaujmua'a, ajta aɨme ɨ seica ɨ rutyaɨtestyamua'a. 13Tɨ pua'a saɨj rɨ'ɨ tyu'utyavaɨre'en u teyujta'a, ayaa pu ramue'itɨn mej rɨ'ɨ tiraata'an ɨ tyaɨte maɨjna cɨme'e tɨ rɨ'ɨ tyu'utyavaɨ. Ajta pu Dioj raatáca'anyesti'ire'esin tɨ ij auj ti'ivaɨra'a, ajta cai ti'itzɨɨnya'a a'ini aɨ pu tya'aste aɨjna ɨ Cɨriistu'u jemi tɨ ajta i'i Jesús. 14- 15Ijii, nyej ti'imuayu'use'e, ayaa nu ti'ijxe'eve'e nyej ca'anacan nyaun a'utyaváa na'ara'ani mueetzi jemi. Aru tɨ pua'a na'ateevi'in neyajna, ayaa nu ti'ijxe'eve'e pej raamua'aree a'ij mej ti'itɨj cɨn huarɨni aɨme ɨ tyaɨtestyamua'ame'en ɨ Dioj, aɨme ɨ mej e'etyujsa'ɨri u teyujta'a mej mi tiraatataujtzi'ire'en maɨjna ɨ Dioj tɨ i'iruuri. Ai mu aɨn pueen ɨ maj tihue'ixaate'e ɨ nyuucari tɨ ayan ti'ayajna ɨ Dioj jemi. Majta aɨme, camu taura'aca maj saɨque tihua'utyamue'itɨn. 16Ee xaa nya'u, ayaa pu ti'ayajna, capu hue'itzi na'a. Huapɨ'ɨ pu muare'eri tɨ a'atɨ raamua'ati aɨjna tɨ ru'avaa ɨ Dioj jemi, ɨ tyaj cɨn teyan ti'iye'ira, a'ini ayaa pu tyuju'urɨj: Aɨ pu ayan huataseijre tyahué'ira'acán cɨme'e. Ajta aɨn xaijnyu'ucara'ara'an ɨ Dioj, aɨ pu ayan tihua'uta'ixaa yee tɨ ayan ti'ayajna ɨ Cɨriistu'u jemi. Majta aɨme ɨ maj tajapua ti'ivaɨre'e, aɨ mu raaseij. Majta aɨme ɨ tyaɨtejra'a maj yan huachaatɨme iiyan chaanaca japua, seica mu meyan tihua'uta'ixaa a'ij tɨ aɨn huarɨj. Majta aɨme ɨ maj yan huachaatɨme iiyan chaanaca japua, mui'itɨ mu tya'antzaahua aɨjna jemi. Ajta Dioj pu ya'uvi'itɨ ɨ tajapua tɨ ij aun nain cɨn antyujmua'aréera a'ara'ani.

will be added

X\