1 Timuteeyu 2

1Ayaa pu tina'amitejte'e tɨ ayan ruxe'eve'e sej si seyan huarɨni. Sata'aj naijmi'ica cɨn huatyejnyuuni. 2Aɨj xu cɨn seyan tiraatahuavii, sajta seyan hua'a jemi huatyejnyuuni, sajta tihua'atyaujtzi'ira naijmi'ica jemi, aɨme ɨ maj tajtuhuan cɨn ti'ityatatyá'upu'u, majta aɨme ɨ mej ti'ijta. Ayaa xu huarɨni tyej ti rɨ'ɨ yee tí'itechajca, tyajta ra'ara'asten ɨ taye'irá cɨme'e, tyajta rɨ'ɨ tirajchaɨ́ ta'ara'ani ɨ tavastara'a tɨ'ɨj cai a'atɨ tajaaxaijta'a. 3- 4Ayaa pu tiraavijte'e sej si seyan huarɨni. Ayaa pu tira'araanajchi a'ame ɨ Dioj tɨ tu'irajtuaa, a'ini aɨ pu ayan ti'ijxe'eve'e tɨ naijmi'ica huirajtuaani, mej mi raamua'aree nain tɨj na'a tɨ ayan ti'ayajna aɨjná jemi. 5Ayaa pu'u ti'en, a'ini seij pu'u ɨ Dioj, ajta seij pu'u aɨ pueen tɨ hua'a japua huanyuuni ɨ tyaɨte ɨ maj cɨn autyajturaa ɨ Dioj jemi. Ajta pu tyaata'a pɨrɨcɨ. Ai pu aɨn pueen ɨ Cɨriistu'u tɨ ajta i'i Jesús. 6Aɨ pu huataujmuaɨ'ɨvejritaca'a tɨ'ij aɨn tyu'utanajchita nain cɨme'e ɨ maj cɨn autyajturaa ɨ tyaɨte ɨ Dioj jemi. Ai pu aɨn pueen aɨjna tɨ Dioj tihua'uta'ixaa a eijre'e, a'atzaa tɨ pua'a raaxa'apɨ'ɨntare. 7Me nyajta inyaa, aɨj pu cɨn na'antihuau nyej ni tihua'uta'ixaate'en ɨ tyaɨte nyaɨjna cɨme'e nyej ni tyu'utyavaɨre'en ɨ Dioj jemi. Ayaa nu ti'imue'ixaate'e tzaahuati'ira'a cɨme'e. Canu ti'ihue'i. Nyaa nu xaa tihua'amua'ate aɨme ɨ mej tya'atzaahuate'e ɨ tavastara'a jemi, nyajta tihua'uta'ixaate'esin tzaahuati'ira'a cɨme'e aɨme ɨ maj majta Israel jetze ajtyama'acan. 8Aɨj nu cɨn neyan ti'ijxe'eve'e matɨj mana'a a'u tɨ maj a'ucaitɨme, miche'e huatyejnyuuni ɨ Dioj jemi, meyan rɨ'ɨ titya'urare'enye'e ɨ rutzajta'a majta cai nínyu'ucacu, majta cai rújaaxáivi'ira. 9Ajta aɨme ɨ juuca, ayaa nu che'eta ti'ijxe'eve'e mej mi meyan ti'ityéchajca a'ij tɨ tiraavijte'e, miche'e meyan cai ti'itéchajca maɨjna cɨme'e tɨ tyu'utyevi'iraste'e silu maɨjna cɨme'e tɨ cai a'ij pua'a tihua'aseijrate'e. Miche'e cai ayaa mana'a tyava'ujhua'atyahua'an ɨ rucɨpua jetze aɨjna cɨme'e tɨ huapɨ'ɨ ti'inajchi, miche'e majta cai ayaa mana'a tya'ucárúutye'ejme'en ooro cɨme'e, miche'e majta cai huapɨ'ɨ ayaa mana'a tya'acamuátzɨ'ɨjme'e maɨjna cɨme'e ti'itɨj peerla, nusu macai ayaa mana'a tyu'utaujche'etyahua'an maɨjna cɨme'e ɨ cɨɨxuri tɨ huapɨ'ɨ ti'ijnajchi. 10Miche'e meyan huarɨni ɨ juuca mej mi seica meyan raamua'areera mej rɨ'ɨ ti'ityetyaɨte. Miche'e meyan tyu'uruuren a'ij tɨ ti'ixa'apɨ'ɨn, a'ini ayaa pu tihua'uvijte'e aɨme ɨ juuca ɨ maj meyan tyu'ujseijrata mej meyan ra'astijre'e ɨ Dioj jemi. 11Ayaa pu ruxe'eve'e aɨme jemi ɨ maj juuca mej mi raarɨ'ɨren meyan ti'inamuaara, majta meyan tihua'ará'astijre'en ɨ tyetyaca. 12Canu hua'ata'aca aɨme ɨ juuca mej mi tihua'umua'aten u teyujta'a ɨ tyetyaca, ni maj majta tihua'utaijte'en. Ruxe'eve'e tɨ aɨn jɨita'a aun teyujta cai ave'enyuuca'an. 13Ayaa pu'u ti'en, a'ini Dioj pu anacaican Adán huatyataahuaca'a. Ajta e'eyan aɨn Eva huatyataahuaca'a. 14Ajta, aɨn Adán, aɨ pu ramua'areeraca'a a'ij tɨ rɨjcaa tɨ'ɨj autyajturaa ɨ Dioj jemi. Capu a'atɨ raacuanamua. Ma ajta aɨn Eva, Satanás pu xaa raacuanamua. Aɨj pu cɨn a'aturaá a'araa ɨ Dioj jemi. 15Aru Dioj pu hue'irajtuaasin aɨme ɨ juuca matɨ'ɨj aɨme tiyaujmua'a mua'ara'ani tɨ pua'a meyan a'ateeren mej tya'atzaahuate'e majta maj rɨ'ɨ tihua'ajchaɨ ɨ seica. Majta mej urare'enyejme'eni ɨ rutzajta'a maɨjna cɨme'e mej meyan huarɨni a'ij tɨ tiraavijte'e.

will be added

X\