1 Timuteeyu 1

1Inyaa, i nyaj i'i Pablo, nyaa nu nyaɨn pueen seij tɨ ravaɨre'e aɨjna ɨ Cɨriistu'u tɨ ajta Jesús pueen. Ayaa pu eenye'eque'e na'antihuau a'ini ayaa pu tinaataij ɨ Dioj tɨ tu'irajtuaa, ajta ɨ Cɨriistu'u tɨ ajta i'i Jesús, ɨ tyaj rachu'eve'e. 2Ayaa nu ye ti'imuayu'use'e muaa, Timuteeyu, pej peyan nyamuari yee niyauj a'ini muaa paj pajta peyan che'eta pana'a tzaahuati'ira'a ra'astijre'e ɨ tavastara'a nyatɨj inyaa. Ayaa nu ti'ijhuauhuau mueetzi cɨme'e tɨ aɨn ɨ Dioj ɨ tɨ ta'iya'upua, ajta aɨn ɨ Cɨriistu'u tɨ ajta Jesús ɨ tavastara'a, miche'e maɨn rɨ'ɨ timuaacháɨj mua'ara'ani, miche'e majta muá'ancu'uvajxɨ'ɨn, miche'e majta rɨ'ɨ mu'uhuáruuren ɨ a'a tzajta'a. 3Nyatɨ'ɨj nyaun auma'aca u Macedonia, ayaa nu timuaatahuaviiri'i pej paun a'utyaturan aujna Efeso. Nyajtahua'a nu neyen ti'imuahuavii pej paun a'utyaturan pej pi peyan tihua'uta'ijmɨ ɨ seica ɨ tyetyaca mej mi cai che'e meyan tihua'amua'ate maɨjna cɨme'e ɨ nyuucari tɨ hue'itzi cɨn namuajre'e. 4Mata'aj cai che'e maɨjna namuajra a'ij mej ti'itɨj tihue'ixaate'e maɨjna cɨme'e a'ij mej tityeenyéj ɨ huaacɨxa'astyamua'ame'en. Cu xuee macai a'anaj ra'antipua'arite'esin mej meyan raataxaj yee ai pu aɨn pueen tɨ ayan huanyej ɨ seij jetze, ajta ɨ seij, saɨj pu ajta jetzen huanyej asta mana'a cai a'ara'asti ɨ Dioj jemi. Naijmi'i tɨj na'a, ayaa pu'u ti'ivaɨre'e mej mi huataujnya'usi'ite'en ɨ tyaɨte maɨjna cɨme'e ɨ maj cai a'ij tiru'umua'aree. Capu ti'itɨ vaɨre'e mej mi raanaijmi'ire'en a'ij tɨ ti'ijxe'eve'e ɨ Dioj. Tɨ'ij a'atɨ ayan raanaijmi'ire'en, ayaa pu tyu'ujxe'eve'e tɨ aɨn a'atɨ ayan tira'antzaahuate'en ɨ Dioj. 5Ayaa tu een cɨn ti'imueijcate'e mej mi huaujxe'eve'en seij majta seij maɨjna cɨme'e ɨ mej uraré'en ɨ rutzajta'a, majta ɨ maj rɨ'ɨ mé titaumuámua'arejmee, majta ɨ maj tzaahuati'ira'a cɨn ra'astijre'e ɨ tavastara'a. 6Seica mu meri ya'uhua'axɨ mej meyan e'enya'a. Aɨj mu cɨn autyajhuii mej meyan tyu'utaxaj maɨjna cɨme'e ɨ nyuucari tɨ cai ti'itɨ vaɨre'e. 7Ayaa mu ti'ijxe'eve'e mej te'entyarute maɨjna cɨme'e mej tihua'umua'aten a'ij tɨ huataujmua'a ɨ nyuucari ɨ maj cɨn ti'ijta tɨ Moises ra'uyu'uxaca'a. Ma majta aɨme, camu a'atzu yau'eite a'ij mej ti'ixa. Camu majta ramua'aree a'ij tɨ een maɨjna cɨme'e ɨ maj cɨn meyan raataxaj yee ayaa pu ti'ayajna. 8Tyan tu ramua'aree tɨ ti'ivaɨre'e aɨjna ɨ nyuucari ɨ maj cɨn ti'ijta, Moises tɨ ra'uyu'uxaca'a. Tɨ ij ayan ti'ityava'ɨrihua'an, ayaa pu ruxe'eve'e maj nain cɨn ra'ara'astijre'en a'ij tɨ tyu'ujxe'eve'e. 9Tyajta, teyan ti'ijmua'aree tɨcɨn ayaa mu een cɨn tira'uyu'uxaca'a aɨjna ɨ nyuucari ɨ maj cɨn ti'ijta mej mi hua'uta'ijmɨjra aɨme ɨ maj a'ij pua'a titetyújcha'ɨ. Camu maɨjna cɨn hua'uta'ijmɨjra aɨme ɨ maj rɨ'ɨ mé tityaumuámua'aree ɨ rutzajta'a. Aɨme mu xaa maɨjna cɨn hua'uta'ijmɨjra ɨ maj cai ranamuajracu a'ij tɨ tira'axa ɨ nyuucari ɨ maj cɨn ti'ijta, majta aɨme ɨ maj cai ra'astijre'e a'ij tɨ ti'ijxe'eve'e ɨ Dioj. Majta seica, ai mu aɨn pueen ɨ maj rá'axaahuari'i ɨ hua'aye'ira, majta aɨme ɨ maj a'ij pua'a titetyújcha'ɨ, majta aɨme ɨ maj rutaata cui'ica, na'ari runaana, a'atɨ tɨ na'a tɨ ti'ityacui'ica. 10Ayaa mu majta ɨ nyuucari cɨn hua'uta'ijmɨjra aɨme ɨ maj xana'acɨre'e juucate jemi, majta aɨme ɨ maj che'eta mana'a xana'acɨre'e hua'a jamuan ɨ tɨ'ɨrii caɨn hua'a jamuan seica ɨ tyetyaca. Ayaa mu che'eta seica maɨjna cɨn ɨ nyuucari hua'uta'ijmɨjra aɨme ɨ maj seica vivi'i mej mi tihua'umuáriste'en ca'anyejri cɨme'e, majta aɨme ɨ mej ti'ihue'itaca, majta aɨn ɨ maj ti'ityacuanamuajca. Ti'itɨ tɨ na'a maj tɨ cai naa e'en, tɨ saɨque e'en, aɨ mu huata'ijmɨjra maɨjna cɨme'e ɨ nyuucari ɨ maj cɨn ti'ijta, ti'itɨ tɨ na'a maj cai ranamuajracu ɨ nyuucari tɨ rɨ'ɨ tyu'uruure ɨ tyú'utzajta'a. 11Aijna ɨ nyuucari tɨ rɨ'ɨ tyu'uruure, aɨ pu aɨjna cɨn ayan tira'axa a'ij tɨ tira'axa ɨ nyuucari tɨ naa namuajre'e, tɨ ajta cɨn Dioj tu'irajtuaani. Ajta aɨn Dioj, aɨ pu aɨjna cɨn tinyeijca inyeetzi nyej ni tihua'uta'ixaate'en nyaɨjna cɨme'e ɨ nyuucari. Aɨj nu cɨn rɨ'ɨ tiraata'asin ɨ Dioj. 12Eecan nu tí'ijtaujtzi'ire'e nyaɨjna ɨ Cɨriistu'u tɨ ajta i'i Jesús ɨ tavastara'a ɨ nyaj jetzen aranca'anye. Ayaa nu een cɨn tí'ijtaujtzi'ire'e a'ini ayaa pu tira'amitejtya'acaa nyaj cai ti'itɨj cɨn auta'ɨtze. Aɨ pu na'antihuau inyeetzi nyej ni raatyavaɨre'en. 13Jajcua ɨmɨ nu a'ij pua'a ti'ixaxa'ata'a ɨ Dioj jemi, nyajta a'ij pua'a hua'uruurajca'a aɨme ɨ maj ra'astijre'e ɨ tavastara'a. Eihua nu huá'unya'usi'itya'aca'a. Aru capu amɨn a'ij, Dioj pu ná'ancu'uvajxɨ aɨjna cɨme'e nyaj cai ramua'areeraca'a a'ij nyaj rɨjca, nyajta cai tya'atzaahuatya'acaa. 14Eihua pu huapɨ'ɨ rɨ'ɨ tinajcháɨ a'araa ɨ tavastara'a. Aɨ pu ajta ayan naata'a nyej ni rá'antzaahua nyaɨjna ɨ Cɨriistu'u tɨ ajta ayan antyahuaa tɨcɨn Jesús. Ayaa pu ajta naata'a nyej ni raxe'eva'a na'ara'ani. 15Ayaa nu ti'imue'ixaate'e tzaahuati'ira'a cɨme'e tɨ ayan ti'ayajna tɨ aɨjna cɨn mu a'uve'eme iiyan chaanaca japua aɨjna ɨ Cɨriistu'u tɨ ajta i'i Jesús tɨ'ij aɨn hue'irajtuaani aɨme ɨ mej a'ij pua'a titetyujcha'ɨ. Che'e cai a'atɨ ayan ti'ixajta yee capu ayan ti'ayajna. Nyaa nu ramua'aree a'ini nyaa nu nyaɨn pueen i nyaj eitze'e a'ij pua'a ti'itinchaɨca'a cai maa a'atɨ. 16Aɨj pu cɨn Dioj ná'ancu'uvajxɨ inyeetzi i nyaj aɨn pueen ɨ nyaj eitze'e a'ij pua'a ti'itinchaɨca'a tɨ'ij aɨn Cɨriistu'u tɨ ajta i'i Jesús tihua'utaseijrate'en ɨ tyaɨte a'ij tɨ een cɨme'e ɨ Cɨriistu'u raayɨ'ɨtɨ tɨ a'atɨ tyu'utauuni'i nain cɨme'e tɨj na'a tɨ a'ij pua'a een. Aɨ pu ayan ti'ijxe'eva'acaa mej mi meyan raaseij aɨme ɨ maj ra'antzaahuate'enche'e mej mi maun a'utyaturan jemin ruurican para rusen cɨme'e. 17Aɨj pu cɨn, ayan ruxe'eve'e tyej rɨ'ɨ tiraata'an para rusen cɨme'e, tyajta tiratataujtzi'ire'en tyaɨjna tɨ Tajtuhuan cɨn ti'ityejvee, tɨ cai a'anaj rupuata'atan, tɨ ajta cai a'anaj mɨ'ɨni, ɨ tyaj cai a'anaj raseij tajɨ'ɨ cɨme'e. Ai pu aɨn pueen ɨ tɨ aɨ na'ajcaj ti'iDioj. 18Niyauj, mɨ paj i'i Timuteeyu, ayaa nu ti'imue'ixaate'e aɨjna cɨme'e ɨ maj anacaican a jemi tyu'utaxajtaca'a aɨme ɨ mej ti'ixaxa'ata'a ɨ Dioj jetze ma'acan. Pata'aj peyan tyu'utatese'en tyamua'a naa paɨjna cɨme'e ɨ paj cɨn ti'ivaɨre'e ɨ tavastara'a jemi. 19Pata'aj pauj tya'atzaahuatya'a pajta muaa rɨ'ɨ ti'ití'acháɨɨ pua'ara'ani ɨ a'atzajta'a tɨ'ij cai aun huataseijre'en ti'itɨ tɨ tyu'utyevi'iraste'e. Seica mu meri ma ruuhua'axɨ mej tya'atzaahuatya'acaa, majta, aɨ mu raataxaahuataca'a maj rɨ'ɨ tyá'useijra'acaa ɨ rutzajta'a. Ayaa mu cɨn huarɨn, nain pu á'upua'arixɨ ɨ maj tya'atzaahuatya'acaa. 20Aɨme cɨme'en nu ti'ixa ɨ maj hua'apua, aɨjna ɨ Himeneo, ajta aɨjna ɨ Alejandro. Aɨme nu neri tyu'utatuii ɨ Satanás jemi mej mi raamua'aree maj cai che'e a'ij pua'a tiraata'an ɨ tavastara'a aɨjna cɨme'e a'ij mej rɨcɨ.

will be added

X\