1 Tesalonicenses 5

1Ta'ihuaamua'a, capu a'atzu ruxe'eve'e tej tyaɨjna cɨn tyaja'amuayu'use'e a'atzaj tɨ pua'a ya uve'enyejsin ɨ tavastara'a, ti'itɨ tɨ xɨcajra'an jetze ajtahua'a huataseijre'esin. 2Xu'uri ramua'aree tyamua'a naa tɨ ca'anacan tyaja'ure'enyejsin. Ayaa pu huataseijre'esin tɨj nahua'ari tɨ utyaruti tɨca'ari tzajta'a a'u tɨ tyaja'anahua'an. 3Majta maɨn ɨ tyaɨte, ayaa mu ti'ixaata mua'aju'un tɨcɨn: “Capu che'e ti'itɨ a'ij rɨcɨ. Pu'uri tyu'upuá'arajraa.” Tɨ pua'a meri meyan ti'ixajta, aj pu i ajna tyaja'ure'enyejsin ɨ xɨcajra'an tɨ jetzen hua'antipua'arite'esin. Ayaa pu seira'a a'ame tɨj jɨita'a tɨ ra'utacui'ine. Capu huatarɨ'ɨristari maj huatyaujnan mej mi cai tirajpueiitzi mua'ara'ani. 4Ma sajta muan, ta'ihuaamua'a, caxu che'e tɨca'amiste'e seijre'e. Aɨj pu cɨn, cai che'e muejmi japua cájveti ajna xɨcajra'an jetze. Capu ayan tyaja'ure'enyejsin muejmi jemi tɨj ɨ nahua'ari tɨ aun a'utyaruti tɨca'ari tzajta'a. 5Capu a'atzu xaa nya'u, a'ini muan xu hua'a jetze ajtyama'acan aɨme jemi ɨ maj ajna e'eseijre'e a'u tɨ á'unyeeri'i ɨ Dioj jemi. Muan xu hua'a jetze ajtyama'acan aɨme jemi ɨ maj á'ujhua'an tujca'ari tzajta'a. Aɨj pu cɨn, ayan tiraavijte'e tej teyan huarɨni. 6Aɨj tu cɨn cai che'e teyan rɨjcaa ta'aju'un matɨj ɨ seica ɨ mej meyan seijre'e. Cu xuee maj cújcu'utzu. Tiche'e teyan eenya'a ta'ara'ani tej atanyéjnye'eri, tej rɨ'ɨ me tityaumuámua'aree. 7Majta maɨn ɨ maj cu'utzu, ayaa mu tí'ityacu'utzu tɨca'amiste'e, majta maɨn ɨ maj ruta'arujve'e, aɨ mu ruta'arujve'e tɨ'ɨj auj huatɨca'a. 8Me tyajta ityan, a'ini tyan tu hua'a jetze ajtyama'acan aɨme jemi ɨ mej nyeeriste'e á'ujhua'an ɨ Dioj jemi, tiche'e teyan rɨ'ɨ tityajá'ujhua'ane'en. Tiche'e tyajta rá'antzaahuate'en ɨ tavastara'a. Tɨ pua'a teyan huarɨni, aɨ pu tavastara'a tajapua nyuuni. Tiche'e tyajta huátaxe'eve'en seij tyajta seij. Tɨ pua'a teyan huarɨni, ayaa pu xaa huatarɨ'ɨristari tej teyan ti'ijjchu'eve'e tɨ Dioj tu'irajtuaani. 9Ayaa pu een a'ini capu Dioj ayan tiraaxa'apɨ'ɨntarej ityejmi jemi tej ti teyan tirajpueiitzi ta'ara'ani tyaɨjna cɨme'e tɨ Dioj ti'itɨj cɨn tita'uxɨjte'en. Capu xaa nya'u, silu ayaa pu Dioj ayan titaaxa'apɨ'ɨntari'iri'i tɨ aɨn tavastara'a tɨ ajta i'i Jesús tɨ i'i Cɨriistu'u, aɨ pu tu'irajtuaasin. 10Aɨ pu huamɨ'ɨ tajetze ma'acan tej ti teyan ruuri ta'ara'ani jamuan ɨ tavastara'a, tyatɨj tyana'a a'achu tyaj pua'amua. Capu amɨn a'ij tej tyauj ruuri na'ari teri huacuii, naimi'i tu huatyaturaasin jemin para rusen cɨme'e. 11Aɨj xu cɨn ca'anijra'a tyu'uta'an seij sajta seij. Sata'aj sauj tyu'utavaɨre'en. Ee xaa, xu'uri seyan rɨcɨ seij sajta seij. 12Mɨ saj ta'ihuaamua'a, ayaa tu tyaja'amuahuavii sej si rɨ'ɨ tihua'ajchaɨ aɨme ɨ a'amuavaujsimua'a, ɨ mej rɨ'ɨ ti'imɨjhuaca muejmi jemi, ɨ maj majta maɨjna cɨn antyujmua'aree mej tyajamuáamua'aten a'ij tɨ ti'ijxe'eve'e ɨ tavastara'a. Aɨ mu majta ca'anijra'a amuaata'aca. 13Che'e ayan tyajamua'amityejtya'a mej eihua huapɨ'ɨ rɨ'ɨ ti'itetyaɨte aɨjna cɨme'e mej meyan ti'imɨjhuaca muejmi jemi, sej si seyan rɨ'ɨ ti'ityeseijre'e ɨ rutzajta'a. 14Ayaa tu tyajta tyaja'amuahuavii sej si rɨ'ɨ tihua'uta'ixaate'en aɨme ɨ maj cai ti'imuara'acu mej mi majtahua'a tyu'umuare'en. Sej si ca'anijra'a hua'uta'an aɨme ɨ maj cai rucaca'anye ɨ ruxaijnyu'uca jetze. Sata'aj sajta hua'utavaɨre'en aɨme ɨ maj cai a'ij ti'ijviicue'i. Sata'aj naijmi'ica á'acu'uvaa. 15Rɨ'ɨ xu'u muan tɨ ij cai a'atɨ ayan che'eta na'a a'ij pua'a raaruuren ɨ ruxa'a tevi tɨj ajta a'ij pua'a raaruu aɨjna. Ayaa xu ti'ityesa'a sej si a'anaj tɨna'a rɨ'ɨ tihua'ajchaɨ seij sajta seij, sajta naijmi'ica. 16- 17Sata'aj rutyamua'ave'e a'anaj tɨ na'a. Caxu a'anaj ratápuaapua'ajta'an saj huatejnyuuni ɨ Dioj jemi. 18Sata'aj nain cɨn tí'ijtaujtzi'ire'e ɨ Dioj a'ini ayaa pu ti'ijxe'eve'e sej seyan huarɨni a'ini Jesús, ɨ tɨ i'i Cɨriistu'u, aɨ pu a'amua japua nyuuni. 19Caxu ra'antanaamɨn saɨjna ɨ xaijnyu'ucara'ara'an ɨ Dioj. 20Caxu sajta a'ij pua'a tihua'aseijra aɨme ɨ mej ti'ixaxa'a ɨ Dioj jetze ma'acan, silu rɨ'ɨ xu tihua'unamua tyamua'a naa a'ij mej ti'ixa. 21Naa xu tyamua'a tyu'utaihuau ti'itɨ tɨ na'a i'i xa'apɨ'ɨn na'ari cai. Caxu a'anaj yá'uhua'anan ɨ tɨ i'i xa'apɨ'ɨn. 22Tɨ pua'a ti'itɨ ayan tyajamua'amitejtya'a tɨ a'ij pua'a een, caxu a'anaj seyan rɨjca ti'itɨ tɨ na'a tɨ ayan a'ij pua'a éenye'en. 23Ajta aɨn Dioj, aɨjna tɨ amuaatyápua'arite'en, che'e aɨn amuaatyá'avaa tɨ ij nain cɨn amuaanáijmi'ire'en. Che'e Dioj amuaatyá'avaa muejmi sej si cai ti'itɨ cɨn a'aturaa u a'amuaxaijnyu'uca tzajta'a nusu á'amuamua'atziira'a jetze na'ari ɨ rutevi jetze ajna xɨcajra'an tɨ jetzen ajtahua'a ya uve'enyejsin ɨ tavastara'a, aɨjna ɨ Jesús tɨ ajta i'i Cɨriistu'u. 24Capu a'atzu atya'ɨtza'ara aɨjna tɨ ayan tyajamuaatajée. Aɨ pu ajta araurastejsin aɨjna cɨme'e ɨ tɨ cɨn ataujratziiri'i. 25Ta'ihuáamua'a, sata'aj rahuauca ɨ Dioj jemi tyejmi cɨme'en. 26Sata'aj sajta hua'utataujte'en tyamua'a naa naijmi'ica ɨ ta'ihuaamua'a. 27Ayaa nu tyaja'amueijcate'e jemin ɨ tavastara'a sej raataijta maj hua'utanamuajriste'en eijna i yu'uxari naijmi'ica ɨ ta'ihuaamua'a. 28Ajta aɨn tavastara'a, ɨ Jesús tɨ ajta i'i Cɨriistu'u, che'e aɨn rɨ'ɨ tyajamuaachaɨn muejmi. Che'e ayan tya'ara'ani.

will be added

X\