1 Tesalonicenses 4

1Ajta ijii, ta'ihuaamua'a, tu'uri teyan tyajamuaata'ixaa a'ij sej ye'i titetyújcha'ɨ sej si rɨ'ɨ tiraata'an ɨ Dioj. Ee xaa, xu'uri seyan rɨ'ɨ titetyújcha'ɨ. Me tyajta ityan, ayaa tu tyaja'amuahuavii Jesús jetze ma'acan sej si seyan eitze'e rɨ'ɨ titetyújcha'ɨ. Tyan tu ca'anijra'a amuaata'asin sej si eitze'e rɨ'ɨ titetyújcha'ɨ tɨj na'a tɨ yu auca'itɨ a'ame. 2Xu'uri xaa ramua'aree ti'itɨ nyuucarira'an pueen ɨ tyaj cɨn teri amue'ixaa Jesús jetze ma'acan. 3Ayaa pu ti'ijxe'eve'e ɨ Dioj sej si uraré'enye'en xa'ara'ani, ajta nu'u saj raatapua'ajta saj a'atɨ jamuan ti'ixana'acɨra'a. 4Ayaa pu ti'ijxe'eve'e sej seyan ti'ijmua'areera sej seyan raaruuren ɨ rutevi sej si seyan huarɨni a'ij tɨ tiraavijte'e tɨ pua'a a'atɨ huatyényaɨche. Che'e aɨn ayan ratyevi'itɨnye'en mej mi raaseij ɨ seica tɨ xa'apɨ'ɨn huarɨj nain cɨme'e. 5Che'e aɨn cai cha'a na'a ratyevi'itɨnye'en a'ij mej rɨcɨ aɨme ɨ tyaɨtejra'a ɨ maj cai ra'astijre'e ɨ Dioj, matɨj mana'a pua'amua yan huachaatɨme iyan chaanaca japua, ɨ mej cha'a mana'a nyejnya'ɨche a'ij tɨ tihua'amitejte'e rumua'atziira'a cɨme'e tɨ a'ij pua'a een. 6Ajta nu'u ayan tyu'ujxe'eve'e tɨ a'atɨ cai a'anaj autyaturan aɨjna cɨme'e tɨ a'ij pua'a raaruuren ɨ ruxa'a tevi aɨjna cɨme'e tɨ raxana'acɨre'en jamuan ɨra'ara'an ɨ ru'ihuaara'a. Ayaa pu'u, a'ini Dioj pu pueijtzi raata'asin aɨjna tɨ ayan rɨni. Tu'uri tyejmi'i teyan tyajamuaata'ixaa. 7Capu ayan titaatajée ɨ Dioj tej ti teyan tyu'uxana'acɨre'en silu aɨ pu ayan ta'antihuau tej ti urare'enyejme'eni ɨ tatzajta'a. 8Aɨj pu cɨn, tɨ pua'a a'atɨ cai ra'atzaahuate'e a'ij tej tyaja'amue'ixaate'e tyaɨjna cɨme'e, aɨ pu cai má rúuhua'axɨjsin ɨ nyuucari tɨ tyetyaca jemi e'ema'acan. Capu a'atzu, silu aɨ pu xaa má rúuhua'axɨjsin ɨ Dioj tɨ ruxaijnyu'uca huataityaca'a tɨ muejmi jemi huatyaturan. 9Capu a'atzu ruxe'eve'e nyej neyan tyaja'amuayu'use'e aɨjna cɨme'e sej huaujxe'eve'en sej si tyamua'a naa tyu'urihuaamua'atan. Dioj pu ari ramua'aree sej seyan huaujxe'eve'en. 10Ee xaa, ayej ti'ayajna sej hua'axe'eve'e ɨ ru'ihuaamua'a naijmi'ica a'achu maj pua'amua a'u maj a'uchaatɨme tɨj na'a au tɨ huatacá'a u Macedonia. Me tyajta ityan, ayaa tu'u ca'anijra'a amuaata'asin sej si sauj eitze'e huaujxe'eve'en. 11- 12Tyan tu tyajta teyan tyaja'amueijcate'e sej si rɨ'ɨ titetyujcha'ɨ tɨ ij cai ti'itɨ á'amuajaaxaijte'e, sej si antyujmua'aréera saɨjna cɨme'e a'ij tɨ tiraacɨ́'ɨ seij ajta seij. Ajta i'i, che'e a'atɨ tyu'umuare'en ɨ rumuare'eri'ira'a cɨme'e seij ajta seij a'ij tɨ tiru'umua'aree. Ayaa tu anacaican tyajamueijca mej mi rɨ'ɨ tyajamuaaseij aɨme ɨ maj tya'astijre'e ɨ tavastara'a jemi, ajta tɨ ij cai ti'itɨ tyajamuá'aturaatya'a. 13Cɨme'en aɨme ɨ mej meri huacuii, ayaa mu seijre'e cu xuee maj cújcu'utzu. Ayaa tu ti'ijxe'eve'e sej raamua'aree tzaahuati'ira'a cɨme'e sej si cai che'e ruxaamɨstya'a matɨj aɨme ɨ seica ɨ maj cai rachu'eve'e ɨ tavastara'a. 14Ayaa tu tya'atzaahuate'e ityan: tɨ'ɨjta Jesús huamɨ'ɨ, aɨ pu tɨ ajtahua'a huatarú. Aɨj tu cɨn teyan tyajta tya'atzaahuate'e tɨ aɨn Dioj ajtahua'a hua'aravi'itɨn jamuan ɨ Cɨriistu'u aɨme ɨ mej meri huacuii aɨjna cɨme'e ɨ maj majta meri ra'ara'astijre maɨjna ɨ Jesús. 15Ayaa tu tyaja'amue'ixaate'e ɨ tavastara'a jetze ma'acan tɨ ayan eenya'a a'ara'ani. Catu anáatyá'a ta'aju'un ityan i tej teyan ruuri seijre'e yan chaanaca japua tɨ'ɨj amɨn ajtahua'a huataseijre'en ɨ tavastara'a silu aɨme ɨ mej meri huacuii, aɨ mu xaa anáatyá'a mua'aju'un. 16Tɨ'ɨj Dioj raataxajta ɨ nyuucari tɨ cɨn tihua'utaijte'en, au pu e'icanamuaara'a a'ame tɨ a'atɨ ucajijhua ɨ trompeeta jetze aujna Dioj tɨ e'eseijre'e. Ajta u e'icájijhua aɨjna tɨ jemin ti'ivaɨre'e. Aj pu xaa i tavastara'a u e'icanyejsin u ute'e. Majta maɨn ɨ maj huacuii, ɨ maj anáatyá'a ra'ara'astijre, aɨ mu a'itaju'un a'u maj a'ava'anami'ihuajma'acaa. 17Tyajta e'eyan ityan i tej tauj ruuri, ɨ tej yan seijre'e ɨ chaanaca japua, aɨ pu ajta ta'avi'itɨn ɨ jaitɨri jetze hua'a jamuan ɨ maj mauchan huatarú. Ayaa tu seira'a ta'aju'un jamuan ɨ tavastara'a para rusen cɨme'e. 18Aɨj xu cɨn, rɨ'ɨ xu tyu'utaura'an muan rujɨɨmua'a saɨjna cɨme'e i nyuucari i nyaj á'amue'ixaate'e.

will be added

X\