1 Tesalonicenses 3

1Tyatɨ'ɨj cai che'e te'eviicue'i tyaj cai ramua'aree a'ij tɨ tyaja'amuavaɨra'acaa, ayaa pu tita'amityejtya'acaa ityejmi tɨ ayan eitze'e tiraavijte'e tej teyan tyajɨɨmua'a huatyaturan teyujna Atena. 2- 3Aɨj tu cɨn, tyaɨn Timuteeyu tyu'utaiti'iri'i tɨ u a'atanyén muejmi jemi. Aɨjna ɨ Timuteeyu, ai pu aɨn pueen ɨ ta'ihuaara'a, ajta Dioj pu ra'ava'ahuau tɨ ij tajamuan á'ucha'acanye'en tej tihua'uta'ixaate'en ɨ nyuucari tɨ cɨme'en raxa a'ij tɨ huarɨj ɨ Cɨriistu'u. Ayaa tu een cɨn tiraataiti'iri'i tɨ ij aɨn Timuteeyu ca'anijra'a amuaata'an sej si huatyaujca'anyen ɨ rutzajta'a, tɨ ij cai seij raataxaahuata aɨjna cɨme'e tɨ eihua tirajpueiitzi ijii. Xu'uri tyamua'a ramua'aree tɨ ari tiraaxa'apɨ'ɨntari'iri'i tej teyan tirajpueiitzi ta'ara'ani. 4Ee xaa nya'u, tyatɨ'ɨj taun a'utyá'acaa muejmi jemi, ayaa tu anacaican tyajamue'ixaa tej teyan tirajpueiitzi ta'ara'aníche'e tyaɨjna cɨme'e mej a'ij pua'a taruurénche'e. Ajta ayan tyaja'ure'enye. Aɨj xu seri mua'aree. 5Nyajta nu tiraatányuuche nyej ni raamua'aree a'ij tɨ tyaja'amuavaɨra'acaa, tɨ pua'a sauj tya'atzaahuatya'acaa. Canu che'e té'eviicue'iracaa, a'ini nu'uri ti'itzɨɨnya'acaa nyaɨjna cɨme'e tɨ aɨn tiyaaru'u amuaatamuáre'eriste'en muejmi jemi sej si cai che'e tya'antzaahuate'en, tɨ'ij cai che'e ti'itɨ vaɨra'a a'ara'ani naijmi'i ɨ tyaj cɨn tyu'umuarej muejmi jemi. 6Aru aɨn ɨ Timuteeyu, pu'uri muejmi jemi u a'arajraa. Ti'ita'ixaate'e aɨjna ɨ tyaj cɨn tatyamua'ave'e sej sauj tya'atzaahuate'e, sajta huaujxe'eve'e seij sajta seij. Sajta nu'u sauj rutyamua'ave'e satɨ'ɨjta ta'utamua'aree ityejmi. Muan xu nu'u raxe'eve'e saj taaseij. Tyajta ityan, ayaa tu che'eta tyana'a huapɨ'ɨ ti'ijxe'eve'e tej amuaaseij. 7Ayaa nu tyaja'amue'ixaate'e, muan ta'ihuaamua'a. Eecan pu rɨ'ɨ taata'a tyatɨ'ɨj raamua'areeri'i saj sauj seyan tya'atzaahuate'e. Pu'uri xaa rɨ'ɨri tej tya'utaviicue'i nain cɨme'e ɨ tyaj cɨn rajpueijtzi, ajta ɨ tyaj cɨn taxaamɨste'e. 8A'ini muan xu sauj te'eviicue'i sej sauj ra'atzaahuate'e ɨ tavastara'a, pu'uri ajtahua'a í'irɨni nyaj rɨ'ɨ me tyu'utyavaaca. 9Aɨj tu cɨn eecan huapɨ'ɨ tí'ijtaujtzi'ire'e ɨ Dioj muejmi cɨme'e tyaɨjna cɨme'e tej eihua huapɨ'ɨ tatyamua'ave'e ɨ muejmi jemi a'ini muan xu rɨ'ɨ titata'aca. 10Nain tujca'ari tzajta'a, ajta nain tɨca'ari tzajta'a ca'anin tu cɨn rahuavii tɨ Dioj ayan tata'acare'en tej ti tyajtahua'a amuaaseij, tyajta tyajamuaatavaɨre'en tyaj raanaijmi'ire'en ti'itɨ tɨ na'a tɨ tyajamua'aturaate'e aɨjna cɨme'e saj ra'atzaahuate'e ɨ tavastara'a. 11Ajta aɨn ɨ Dioj ɨ tyaj rajya'upua, ajta aɨn ɨ tavastara'a tɨ ajta i'i Jesús, miche'e maɨn taata'acare'en tej ti taun a'atenyen muejmi jemi. 12Che'e aɨn tavastara'a ruxé'evi'ira'a cɨn amuaata'an sej si eihua huapɨ'ɨ huaujxe'eve'en seij sajta seij, sej si sajta seyan che'eta sana'a tihua'uxe'eve'en naijmi'ica ɨ tyaɨte a'achu pua'amua ɨ a'amuaxá'a tyaɨte tyatɨj ityan tyaja'amuaxe'eve'e. 13Che'e ajta aɨn amuaata'an ɨ ca'anijra'a ɨ a'amuatzajta'a sej si cai ti'itɨj cɨn autyaturan ɨ Dioj jemi ɨ tej rajya'upua, sej si sajta seyan urare'enyejme'eni ɨ a'amua tzajta'a ajna xɨcajra'an jetze tɨ ajtahua'a huataseijre'en aɨjna ɨ tavastara'a tɨ ajta i'i Jesús, jamuan naijmi'i ɨ mej ti'ivaɨre'e u tajapua.

will be added

X\