1 Tesalonicenses 2

1Sajta muan, nye'ihuaamua'a, tyamua'a xu ramua'aree tɨ naa titaavaɨ tyatɨ'ɨj amuaamuaaraca'a. 2Anacai mu xaa a'ij pua'a taaruu aɨme ɨ mej Filipos e'eche. Eihua tu rajpueijtzica'a taujna. Xu'uri ramua'aree tɨ ayan ti'ayajna. Capu amɨn a'ij. A'ini Dioj pu ca'anijra'a taata'a, aɨj tu cɨn tyauj á'ataca'anyajca'a tej teyan tyajamuaata'ixaate'en ɨ nyuucari tɨ cɨn Dioj amue'iratuaasin. Eihua mu taatamuáre'eriste xaa nya'u. 3Catu taɨjna cɨn autyajhuii tej teyan tyajamuaata'ixaate'en hue'itzi cɨme'e, silu tyan tu teyan ámuaatá'ixaate tyaɨjna cɨme'e tyaj huataujnyátacan cɨn ti'ixaxa'a. Catu tyajta ti'ityese'e tyaj amuaacuanamuan. 4Me tyajta ityan, ayaa tu tyaja'amue'ixaate'e a'ini ayaa pu tira'aranajchaca'a ɨ Dioj tɨ aɨjna cɨn ta'antihuau tej ti amue'ixaate'en ɨ nyuucari tɨ Dioj cɨn amue'iratuaasin. Catu teyan ti'ityese'e tej rɨ'ɨ tihua'uta'an ɨ tyaɨte, silu tej rɨ'ɨ tiraata'an ɨ Dioj tɨ ru'umua'aree a'ij tej tyá'uhuátamua'atzɨ ɨ tatzajta'a. 5Xu'uri ramua'aree tyaj cai a'anaj teyan tyajamuaata'ixa tyana'a tyaɨjna cɨme'e ɨ nyuucari tɨ naa a'amuanamuajriste'e. Catu tyajta teyan taseijrataca'a tyaj ti'itɨj ancura'an. Dioj pu ru'umua'aree tej teyan rɨcɨ tzaahuati'ira'a cɨme'e. 6Catu a'anaj teyan raahuau muejmi jemi sej rɨ'ɨ titaata'an. Catu tyajta teyan raahuau seica jemi. Rɨ'ɨríistaca pu tej teyan tyajamuaata'ijte'enche'e ca'anyejri cɨme'e aɨjna cɨme'e tɨ Cɨriistu'u ta'antihuau. 7Me tyajta ityan, catu teyan huarɨj, silu rɨ'ɨ tu ti'itítachaɨca'a muejmi jemi. Ayaa tu che'eta tyana'a rɨ'ɨ tyajamuajchaɨca'a tɨj aɨn ɨ hua'anaana ɨ tɨ'ɨrii rɨ'ɨ tihua'ajchaɨ. 8Eecan tu a'amuaxe'eva'aca'a. Aɨj pu cɨn, ayan ta'aranajchaca'a tej teyan tyajamuaata'ixaate'en ɨ nyuucari tɨ Dioj cɨn amue'iratuaasin. Tyajta teyan á'ataca'anyajca'a tej tyajamuaata'an nain tɨj tyana'a tej tí'ijchaɨca'a, ayaa tu tyajta á'ataca'anyajca'a tej huacui'ini muejmi jetze ma'acan. Ayaa tu ti'imua'atzɨjca'a a'ini eecan tu á'ataca'anye muejmi jemi. 9Tij sacai sauj ramua'aree, ta'ihuaamua'a, tej eihua tyu'umuarej, tyajta tej rajpueijtzica'a. Ee xaa, tetyu'umuare tujca'ari tzajta'a, tyajta tɨca'ari tzajta'a tej ti cai a'atɨ huatamuáre'eriste'en tej amuaata'ixaate'en ɨ nyuucari cɨme'e tɨ cɨn Dioj amue'iratuaasin. 10Muan xu taaseij a'ij tej ti'itítachaɨca'a muejmi jemi, mɨ sej tya'atzaahuate'e. Nain tu cɨn teyan huarɨj a'ij tɨ tiraavijte'e ɨ Dioj jemi. Catu a'anaj a'atɨ a'ij pua'a huáruu. Catu tyajta ti'itɨj cɨn autyajturaa. Dioj pu ajta ramua'aree tɨ ayan ti'ayajna. 11Muan xu ramua'aree a'ij tej rɨ'ɨ ti'itítachaɨca'a muejmi jemi naijmi'ica a'achu pua'amua. Ayaa tu che'eta tyana'a tyajamue'itiiri'i seij tyajta seij tɨj tihué'itii ɨ hua'ataata aɨme ɨ tɨ'ɨrii. 12Aɨj tu cɨn, ca'anijra'a amuaata'a sej si seyan rɨ'ɨ titetyújcha'ɨ a'ij tɨ tiraavijte'e ɨ Dioj jemi. Tyajta teyan huarɨj sej si huatyaujca'anyen ɨ rutzajta'a. Eecan tu á'amuajee sej si seyan huarɨni a'ij tɨ tiraavijte'e ɨ Dioj jemi, a'ini ai pu aɨn pueen ɨ tɨ á'amuajee sej si saun a'ara'asti a'u tɨ aɨn tyeje'ijta ɨ Dioj, sej si sajta saun yancura'an ɨ saj cɨn naa seira'a xa'aju'un para rusen cɨme'e. 13Tyan tu xaa tyajamue'ixaa ɨ nyuucari tɨ cɨme'en raxa ɨ Dioj. Sajta muan, satɨ'ɨj raanamuajri'i, caxu saɨjna jetze ra'ancura'a ɨ mej cha'a mana'a ti'ixaxa'a ɨ tyetyaca silu ayaa xu tiyaúchueere'e tɨ Dioj jetze ma'acan ɨ nyuucari. Ee xaa nya'u, aɨj pu jetze ma'acan, ajta aɨ pu rɨ'ɨ á'amuaruuren ɨ a'amua tzajta'a, mɨ sej tya'atzaahuate'e. Aɨj tu cɨn a'anaj tɨ na'a tu tí'ijtaujtzi'ire'e ɨ Dioj jemi taɨjna cɨme'e sej seyan ra'ancura'a ɨ nyuucari. 14Sajta muan, ta'ihuaamua'a, ayaa xu huarɨj, cu xuee saj huáɨjchuca'a aɨme ɨ maj Judeeya a'uchaatɨme, ɨ maj majta e'etyujsa'ɨri teyujta'a mej mi raatyaanajche ɨ Dioj, a'ini aɨ mu majta ajtyama'acan ɨ Cɨriistu'u jetze. Ayaa xu che'eta sana'a tirajpueíjtzica'a aɨme jemi ɨ ruxa'a tyaɨte a'ij mej tirajpueíjtzica'a aɨme ɨ maj Judeeya e'ema'acan. 15Majta aɨme ɨ seica, ɨ maj Israel jetze ajtyama'acan, aɨ mu raaje'ica ɨ tavastara'a tɨ ajta i'i Jesús. Majta hua'ucuii aɨme ɨ maj Dioj jetze ma'acan ti'ixaxa'ata'a. Majta taatamuári ityejmi. E'ij mu pua'a tirata'aca ɨ Dioj jemi. Majta mu hua'ajchaɨre'e naijmi'ica ɨ tyaɨte ɨ maj yan chaanaca japua huachaatɨme. 16Ayaa mu een cɨn meyan rɨcɨ mej mi ta'ijmɨjra tej ti cai che'e hua'uta'ixaate'en ɨ nyuucari tɨ Dioj jetze ma'acan aɨme ɨ maj Israel jetze ajtyama'acan. Camu a'atzu raxe'eve'e tɨ Dioj hue'irajtuaani ɨ hua'axa'a tyaɨte. Ayaa mu maɨjna cɨn huarɨn, aɨ mu ramue'itɨn tɨ Dioj pueijtzi hua'uta'an para rusen cɨme'e aɨjna cɨme'e mej eihua huapɨ'ɨ autyajturaa jemin ɨ Dioj. Pu'uri xaa ajna tyaja'ure'enyejsin tɨ Dioj pueijtzi hua'uta'asin. 17Ayaa nu tyaja'amue'ixaate'e. Tyatɨ'ɨj ca'anejri cɨn ajtacɨ́j, catu má amuuhuá'axɨ, silu eihua tu ti'imua'atzɨjca'a muejmi cɨme'en. Capu a'atzu a'atyeevi'ica tyatɨ'ɨj cai che'e huaapua'a tej teyan ya'ɨmɨ huate'en. Aɨj tu cɨn eihua huapɨ'ɨ tyu'utése tej ti a'atanyén muejmi jemi. 18Eihua tu teyan ti'ijxe'eva'aca'a tej taun a'atanyén a'u sej e'eche. Ee xaa nya'u, ayaa nu ti'ijxe'eva'aca'a inyaa, i nyaj i'i Pablo. Canu a'anaj cai ti'ijxe'eva'aca'a. Ma ajta aɨn ɨ Satanás, aɨ pu na'antánaamɨɨ. 19Nyajta nu neyan tyaja'amue'ixaate'e ti'itɨ ɨ nyaj cɨme'en ti'ijchu'eve'e, ɨ nyaj cɨme'en nyetyamua'ave'e, ɨ nyaj cɨme'en ahuantzaahuate'en nyaɨjna cɨme'e nyej ti'imue'itɨn nyajna xɨcajra'an jetze tɨ'ɨj ajtahua'a huataseijre'en ɨ tavastara'a tɨ ajta i'i Jesús. ¿Ni sacai muan saɨn pueen? 20Ee xaa nya'u, muan xu saɨn pueen, ɨ nyaj cɨme'en ahuantzaahuate'esin, ɨ nyaj cɨme'en huatantyamua'ave'esin.

will be added

X\