1 Tesalonicenses 1

1Inyaa Pablo, ajta aɨjna ɨ Silvano, ajta aɨjna ɨ Timuteeyu, ayaa tu tyaja'amuayu'use'e muejmi mɨ sej Tesalónica e'eche, saj sajta tyujsa'ɨri ɨ Dioj jemi, sajta jemin ɨ tavastara'a, aɨjna ɨ Jesús tɨ ajta i'i Cɨriistu'u. Ayaa tu ti'ijxe'eve'e tɨ Dioj rɨ'ɨ tyajamuaachaɨn, tɨ ajta rɨ'ɨ amuaaruuren a'amua tzajta'a sej si rɨ'ɨ ru'ihuaamua'a xa'ara'ani. 2- 3A'anaj tɨ na'a tu rɨ'ɨ tirata'aca ɨ Dioj jemi muejmi cɨme'e. A'anaj tɨ na'a tyaj huavii ɨ Dioj, tyajta tu ra'ixaate'e muejmi cɨme'en, a'ini muan xu eihua ti'imuare'e saɨjna cɨme'e saj ra'astijre'e saɨjna ɨ tavastara'a. Sajta seyan che'eta sana'a eihua ti'imuare'e saɨjna cɨme'e saj raxe'eve'e saj hua'utyavaɨre'en ɨ seica ɨ maj e'eseijre'e ɨ Dioj jemi. Sajta muan, caxu a'anaj raatyaxaahuataca'a ɨ saj rachu'eve'e ɨ tavastara'a aɨjna ɨ Jesús tɨ ajta i'i Cɨriistu'u tɨ'ij aɨn amue'irajtuaani, a'u saj yá'ajpueijtzica'a. 4Ayaa nu tyaja'amue'ixaate'e mɨ sej ta'ihuaamua'a. Tu'uri ramua'aree tɨ Dioj a'amuaxe'eve'e, ajta aɨ pu amua'avá'ahuauxɨ. 5Ayaa tu een cɨn ramua'aree a'ini tyatɨ'ɨj teyan tyajamue'ixaa ɨ nyuucari cɨme'e tɨ cɨme'en raxa ɨ Dioj, caxu cha'a sana'a raanamuajri'i silu aɨj xu cɨn muáre'eri'ira'ara'an ɨ xaijnyu'ucara'ara'an ɨ Dioj. Aɨj xu cɨn tyamua'a naa yau'eitaa xa'araa ɨ rutzajta'a. Aɨj xu sajta cɨn rú'umua'areeracaa tɨ ayan ti'ayajna aɨjna ɨ nyuucari. Muan xu sajta seyan taseijraca'a ti'ityaɨn tyaj tyaɨtejra'an pueenya'a, tyajta teyan ti'ivaɨra'acaa muejmi cɨme'e. Ayaa tu huarɨj muejmi jemi sej si raamua'aree a'ij tɨ tiraavijte'e ɨ tavastara'a jemi. 6Sajta muan e'eyan xu seyan che'eta sana'a huarɨj tyatɨj ityan, ajta tɨj aɨn huarɨj ɨ tavastara'a, a'ini eihua xu rajpueijtzica'a. Capu amɨn a'ij. Sauche'e xu huataujtyamua'ave, a'ini aɨn xaijnyu'ucara'ara'an ɨ Dioj, aɨ pu ca'anijra'a amuaata'a ɨ a'amua tzajta'a. 7Aɨj mu cɨn, naimi'i aɨme ɨ maj e'etyujsa'ɨri, a'achu maj mana'a pua'amua ɨ maj maun e'ema'acan u Macedonia, majta ɨ maj maun e'ema'acan u Acaya, aɨ mu rɨ'ɨ tyaja'amuaseij muejmi a'ij sej rɨcɨ. 8Capu au na'a a'anamuajre'e muejmi jemi ɨ nyuucari tɨ cɨme'en raxa ɨ tavastara'a, silu nainjapua pu namuajre'e aɨjna cɨme'en sej seri ra'astijre'e ɨ Dioj. Aɨj pu cɨn cai che'e ruxe'eve'e tej ti'itɨ huataxaj taɨjna cɨme'e. 9Ee xaa nya'u, seica mu ti'ita'ixaate'e a'ij tyaj titya'utyajhuii tej tyu'umuare'en a'amua tzajta'a. Sajta nu'u, satɨ'ɨj rá'antzaahua ɨ Dioj, sajta nu'u huaja'uhua'axɨ saɨme ɨ maj cai Dioosi pueen. Xu'uri nu'u ravaɨre'e saɨjna tɨ i'i Dioj tzaahuati'ira'a cɨme'e, tɨ ajta ruuri rusen cɨme'e. 10Xu'uri nu'u ijii rachu'eve'e saɨjna tɨ yaujra'an pueen ɨ Dioj tɨ aɨn ajtahua'a u e'icaanyen u tajapua, aɨjna Dioj tɨ raatarujte hua'a tzajta'a ɨ mɨ'ɨchite. Ai pu aɨn pueen ɨ Jesús. Aɨ pu tu'irajtuaasin tɨ'ij cai pueijtzi taacɨ'ɨti tɨ Dioj hua'uta'asin aɨme ɨ maj yan chaanaca japua huachaatɨme.

will be added

X\