1 San Pedro 5

1Ayaa nu ca'anijra'a hua'ata'aca, nyaɨme ɨ mej vaujsi pueen, ɨ maj muejmi jetze ajtyama'acan. Nyaa nu nyajta vasta'a pueen. Nyajta nu neyan tyu'useij aɨjna tɨ cɨn rajpueijtzica'a aɨjna ɨ Cɨriistu'u. Ayaa pu che'eta na'a ti'inyacɨ'ɨti inyeetzi tɨj ajta tihua'acɨ'ɨti aɨme ɨ maj majta Jesús jamuan á'ujhua'anya'a ajna xɨcajra'an jetze tɨ jetzen huataseijre'esin aɨjna tɨ huapɨ'ɨ naa ti'iseira'a a'ame ɨ Dioj jemi. 2Ayaa nu tyaja'amueijcate'e sej rɨ'ɨ tihua'uchaɨn aɨme ɨ maj tyaɨtestyamua'ame'en pueen ɨ Dioj a'ij tɨ aɨn ari aɨjna cɨn tyajamueijca. Caxu ca'anyejri cɨn seyan rɨjca silu ruxé'evi'ira'a cɨme'e xu'u, a'ij tɨ Dioj ti'ijxe'eve'e. Caxu sajta saɨjna cɨn seyan rɨjca sej si ti'itɨ cɨn huamué'itɨn, silu ayaa xu'u a'ujca'anyaacan cɨn tyu'utyavaɨre'en. Na'ari cai, ayaa xu tyu'utatévi'ira'ata saɨjna cɨme'e saj ti'itɨ huamue'itɨ. 3Sata'aj cai a'ujtzaahuatya'a saj va'acan cɨn antyujmua'aree sej seyan tihua'utaijte'en mej mi ca'anyejri cɨn meyan ti'itɨ cɨn huarɨni aɨme ɨ saj hua'acha'ɨ. Ma sajta muan, sata'aj seyan rɨ'ɨ titetyújchaɨca hua'a jemi a'ij tɨ tiraavijte'e. 4Tɨ pua'a seyan huarɨni, ayaa pu tyaja'amuacɨ'ɨti ajna xɨcajra'an jetze tɨ jetzen huataseijre'esin aɨjna tɨ nain cɨn antyujmua'aree tɨ ayan che'eta na'a rɨ'ɨ ti'itachaɨca tɨj ajta ayan rɨcɨ aɨjna tɨ rɨ'ɨ tihua'acha'ɨ ɨ rucanya'axɨjstyamua'a. Aɨ pu ayan amuaatátɨstejsin aɨjna ɨ curun tɨ cai a'anaj a'upua'arixɨ'ɨsin, tɨ ajta rɨ'ɨ ti'iseira'a a'ame ɨ Dioj jemi tɨj na'a rusen cɨme'e. 5Sajta muan, mɨ sej sauj tyaamua, sata'aj seyan hua'astijra'a saɨme ɨ vaujsi. Sata'aj naijmi'i seyan huarɨni, sej si seyan huarɨni sacai a'ujtzaahuatya'a seij sajta seij a'ini ayaa pu te'eyu'usi'i tɨcɨn: Dioj pu muare'eri hua'ata'aca aɨme ɨ mej á'ujtzaahuate'e. Ma ajta, aɨ pu ayan rɨ'ɨ tihua'ata'aca aɨme ɨ maj cai meyan á'ujtzaahuate'e. 6Sata'aj seyan huataura'an saj cɨleenya'acan cɨn tyu'utyavaɨre'en ɨ Dioj jemi, aɨjna tɨ nain cɨn antyujmua'aree, tɨ ij aɨn ayan va'acan cɨn tyajamuéijcate'en a'anaj tɨ ayan tyajamuaaxa'apɨ'ɨntari'iri'i. 7Sata'aj seyan saɨjna jemi ɨ Dioj raatyajtuaani tɨj na'a ɨ saj cɨn a'ij tya'ujmua'ate a'ini eihua pu ti'imua'atze muejmi cɨme'e a'ij tɨ tyaja'amuaruure. 8Sata'aj tyamua'a naa titya'ujcu'uvaa, sajta rɨ'ɨ tí'itye'ixe'era'a muan saɨjna cɨme'e tɨ aɨn tiyaaru'u, ɨ tɨ amuajchaɨre'e, ayan eenye'eque'en a'ucha'acan tɨj muajye tɨ á'ujijhuan aɨjna cɨme'e tɨ ayan rahuauhuau aɨjna tɨ raatyacɨ'ɨme. 9Sata'aj seyan huatyaujca'anyen saɨjna cɨme'e saj tya'atzaahuate'e sej si cai rata'acare'en tɨ aɨjna ɨ tiyaaru'u amua'antimue'itɨn. Ayaa xu sajta ramua'aree tɨ ayan hua'aruure aɨme ɨ a'amue'ihuaamua'a ɨ maj meyan a'ucaitɨme a'u tɨ na'a ɨ chaanaca japua. Ayaa pu eenye'eque'e seijre'e tɨ ayan hua'anaijmi'ire'en mej mi meyan che'eta mana'a aɨjna cɨn á'aviicue'ira'a ɨ maj cɨn rajpueijtzi satɨj sajta muan. 10Ajta aɨn ɨ Dioj tɨ nain cɨn rɨ'ɨ ti'ita'aca, aɨjna tɨ ayan amuaatajée tɨ ij ayan tyajamuaacɨ'ɨti aɨjna ɨ saj cɨn naa rɨ'ɨ tiyá'useijra ɨ Cɨriistu'u jemi tɨj na'a rusen cɨme'e, ayaa pu á'amuaruuren. Satɨ'ɨj a'atzu a'ateevi'in saj ti'itɨ cɨn á'aviicue'ira'a ɨ saj cɨn rajpueijtzi, aɨ pu rusaɨj ayan a'amuanaijmi'ire'en, ajta ayan ca'anijra'a amuaata'asin sej si tya'utaviicue'i. Aɨ pu ajta ayan amuaata'asin sej seyan huatyaujca'anyen tyamua'a naa. 11Che'e aɨn ayan aɨjna cɨn ti'ityávaaca tɨ ayan nain cɨn antyujmua'aréera tɨj na'a tɨ yu auca'itɨ a'ame, tɨj na'a rusen cɨme'e. 12Ayaa nu cɨj caj tyaja'amuayu'use'e nyaɨjna jamuan ɨ Silvano tɨ ayan tina'amitejte'e tɨ aɨn pueen seij ɨ nye'ihuaara'a tɨ cai ti'itɨ cɨn atya'ɨtza'ara. Ayaa nu nyeijna jetze tyaja'amue'ixaate'e tɨ ai pu aɨn pueen ɨ tɨ tzaahuati'ira'a cɨn Dioj ayan rɨ'ɨ titata'aca. Nyajta nyeijna jetze neyan ca'anijra'a amuata'aca sej si cai a'anaj yá'uhua'anan a'ij nyej tyaja'amue'ixaate'e. 13Aɨme ɨ mej ya huatyáuu iiya Babilonia, ɨ tɨ Dioj ajta hua'antihuau, ya mu á'amuataujte'e. Aɨ pu ajta ya á'amuataujte'e ɨ niyauj, aɨjna ɨ Marcos. 14Sata'aj seyan huáujtaujte'en xu'ityaujvisi'itɨmua'acara'a saɨjna cɨme'e saj huaujxe'eve'e, seij sajta seij. Che'e aɨn Dioj rɨ'ɨ amuaatyápua'arite'en naijmi'ica muejmi mɨ sej Cɨriistu'u jetze ajtyama'acan. Ayaa pu'u xaa. Antipua'araca'a.

will be added

X\