1 San Pedro 4

1A'ini aɨn Cɨriistu'u pu ayan rujetze rajpueiitzi a'araa, sata'aj seyan saɨjna jetze tyu'umua'ati sej si seyan che'eta sana'a huarɨni, a'ini a'atɨ tɨ na'a tɨ ayan rujetze rajpueiitzi a'araa, ayaa pu ari raatapua'ajtaca'a tɨ ti'itɨ cɨn atya'ɨtza'ara ɨ Dioj jemi. 2Ayaa pu aɨjna cɨn a'ateevi'i tɨ ruuri aɨjna ɨ a'atɨ aɨjna cɨme'e tɨ aɨjna jetze araujca'anye a'ij tɨ ti'ijxe'eve'e ɨ Dioj tɨj na'a tɨ auj a'ateevi'i a'ame. Capu che'e aɨjna jetze a'ujca'anyaa a'ame aɨjna tɨ a'ij pua'a een tɨ ajta rujetze huiraninyei. 3Che'e ayaa na'a eenye'en a'ij tɨ ari tyu'urɨj tɨj na'a maj anacai huataseijre ɨ tyetyaca tɨj na'a tɨ yu je'ire'enye a'ij tɨ tihua'araanajchi aɨme ɨ maj seij chuejra'a japua e'ema'acan. Tej ti cai che'e teyan tyana'a ti'ijrɨ'ɨraa matɨj aɨme. Ayaa mu ruxana'acɨra'acaa, majta á'ujca'anye maɨjna jetze tɨ a'ij pua'a een. Majta ruta'arujve'e, majta maj huapɨ'ɨ ti'iye'estyahua'a. Aɨ mu majta e'etyujsa'ɨri mej mi naimi'i meyan rana'amiche'en aɨjna tɨ cai Dioj pueen. 4Ajta ijii, ayaa mu a'ij pua'a tyajá'useij saj cai che'e hua'ajaahuate'e sej seyan cai ti'itɨ a'astijre'e saj hua'a jamuan á'ujhua'anye'en. Aɨj mu cɨn meyan a'ij pua'a a'amuaruure. 5Ma ajta, ayaa pu tihua'acɨ'ɨti mej meyan tyu'utaxaj a'ij maj titetyújchaɨca'a maɨjna jemi tɨ ari rɨ'ɨ huaujruu tɨ ij ayan hua'uxɨjte'en aɨme ɨ maj ruuri, ajta aɨme ɨ maj meri huacuii. 6A'ini aɨ pu ajta ayan che'eta na'a hua'axɨjte'en aɨme ɨ mej meri huacuii tɨj ajta tita'axɨjte'en itejmi i tyaj tyauj ruuri. Aɨj pu cɨn ajta ayan tihua'uta'ixaa aɨme ɨ mej huacuii aɨjna ɨ nyuucari tɨ cɨn Dioj hue'irajtuaani tɨ ij aɨn xaijnyu'ucara'ara'an ɨ Dioj ayan tihua'uta'an mej meyan ruuri huatyaturan tɨj na'a rusen cɨme'e tɨj ajta ɨ Dioj. 7Pu'uri tɨn nain te'entipua'ari. Aɨj xu cɨn seyan rɨ'ɨ tyajamua'amitejte'e, sajta seyan nain cɨn á'ujcu'uvaa sej si seyan ti'ijhuauca ɨ Dioj jemi a'ij tɨ tiraavijte'e. 8Ajta, ai pu aɨn pueen tɨ eitze'e ruxe'eve'e saj cai ti'itɨ cɨn a'aturaa, sata'aj seyan huaujxe'eve'en tyamua'a naa a'ini tɨ pua'a seyan huaujxe'eve'en, ayaa xu sajta tyu'utauruuni'ira mui'icaca cɨme'e tɨ saɨj ayan ti'itɨ cɨn autyajturaa muejmi jemi. 9Sata'aj cai a'ij pua'a ti'ixaata silu seyan ancura'ujvi'itɨn seij sajta seij. 10Ayaa xu sajta huarɨni a'ij tɨ tiraavijte'e aɨme jemi ɨ mej ravaɨre'e aɨjna ɨ Dioj, a'ini capu tí'iseicaj na'a ɨ tɨ cɨn rɨ'ɨ tyajamuaata'a sej si saɨjna cɨn tyu'utyavaɨre'en. Sata'aj seyan huataujvaɨre'en seij sajta seij saɨjna cɨme'e a'ij tɨ Dioj seij tyu'utapueijve. 11A'atɨ tɨ na'a tɨ ayan tyu'utaxaj, che'e aɨn ayan huarɨni tɨ ayan Dioj jetze ma'acan ti'ixajta. Ajta a'atɨ tɨ na'a tɨ ayan ti'itɨ cɨn ti'ivaɨra'a, che'e aɨn ayan huarɨni tɨ aɨjna jetze araujca'anyaa ɨ Dioj. Ayaa xu een cɨn seyan huarɨni mej mi nain cɨn rɨ'ɨ tiraatyajtuaani maɨjna ɨ Dioj maɨjna cɨme'e tɨ aɨn Jesús, tɨ Cɨriistu'u pueen, ayan hua'uta'a ɨ ca'anijra'a mej mi meyan huarɨni. Ayaa mu rɨ'ɨ tiraata'asin maɨjna ɨ Cɨriistu'u, a'ini aɨ pu ajta ayan nain cɨn antyujmua'aréera a'ame tɨj na'a rusen cɨme'e. Che'e ayan tyaja'ure'enyen. 12Muan, mɨ nyaj a'amuaxe'eve'e, tɨ pua'a seyan ti'itɨ cɨn á'aviicue'ira'a saɨjna ɨ saj cɨn huapɨ'ɨ rajpueijtzi, tɨ ajta ca'anin cɨn a'amua japua rajve, caxu seyan a'ij tyá'ujmuajca, setye'entixaata yee tɨ cai xɨ a'anaj ayan ti'iseijre'e ɨ chaanaca japua, a'ini ayaa pu een cɨn ayan tyajamuaaruu tɨ ij Dioj ayan amuaateeseij, aisɨ tɨ pua'a sacai urare'enya'acan cɨn seijre'e nusu sacai. 13Caxu a'ij tyá'ujmuajca silu ayaa xu huataujtyamua'ave'en a'ini xu'uri rajpueijtzi ɨ Cɨriistu'u jamuan sej si sajta seyan huataujtyamua'ave'en saɨjna cɨme'e tɨ rɨ'ɨ tyajamuaata'asin ajna xɨcajra'an jetze tɨ jetzen huataseijre'esin aɨjna ɨ maj cɨn naa rɨ'ɨ tira'utaseijra ɨ tavastara'a. 14Ee xaa nya'u ayaa pu ti'ayajna. Tɨ pua'a meyan a'ij pua'a tyaja'amuaxajta maɨjna cɨme'e sej seyan Cɨriistu'u jetze ajtyama'acan, Dioj pu aɨjna cɨn rɨ'ɨ tyajamuaata'aca, ajta aɨn xaijnyu'ucara'ara'an ɨ Dioj, ɨ tɨ ajta ayan ca'anijra'a tata'aca tej ti teyan rɨ'ɨ tiraatyajtuaani ɨ Cɨriistu'u, aɨ pu xaijnyu'ucara'ara'an ajta muejmi jemi seijre'e. 15Ma ajta, cɨme'en a'atɨ tɨ na'a tɨ muejmi jetze ajtyama'acan, che'e amɨn cai ayan aɨjna cɨn tirajpueiitzi aɨjna cɨme'e tɨ seij huaje'ica, na'ari ti'itɨ huanahua nusu tɨ a'ij pua'a ti'ityujcha'ɨ, ca'ɨn ayan rɨjcaa tɨ cai jetzen ruxe'eve'e. 16Ma ajta, tɨ pua'a seij ayan aɨjna cɨn á'aviicue'ire'e aɨjna tɨ cɨn rajpueijtzi aɨjna cɨme'e tɨ Cɨriistu'u jetze ajtyama'acan, che'e aɨn cai ti'itevi'ira'atan, silu che'e rɨ'ɨ tiraata'an ɨ Dioj aɨjna cɨme'e tɨ Cɨriistu'u jetze ajtyama'acan. 17Ayaa pu'u xaa nya'u, a'ini pu'uri ajna tyaja'ure'enye tɨ ij Dioj ayan hua'uxɨjte'en ɨ tyaɨte. Ajta, ayan autechesin tɨ hua'axɨjte'en ɨ rutyaɨtestyamua'a. Ajta, tɨ pua'a ayan autejcheni itejmi jemi, ¿a'iqui te'eme ɨ tɨ hua'acɨ'ɨti aɨme ɨ maj cai ra'astijre'e maɨjna ɨ nyuucari tɨ Dioj rɨ'ɨ titaatyajtuaani itejmi jemi? 18Aɨj pu cɨn ayan te'eyu'usi'i tɨcɨn: “Tɨ pua'a muare'eri cɨn Dioj ayan ru'irajtuaa aɨjna ɨ a'atɨ tɨ rɨ'ɨ ti'ityújchaɨca'a, ¿a'iqui eenya'a a'ame hua'a jemi ɨ mej a'ij pua'a ti'ijxa ɨ Dioj, majta aɨme jemi ɨ maj a'ij pua'a titetyújcha'ɨ? Capu a'atzu a'ij xaa nya'u tihua'utyavaɨre'esin.” 19Aɨj pu cɨn, miche'e meyan huarɨni ti'itɨ cɨme'e tɨ xa'apɨ'ɨn een, a'ij tɨ tiraavijte'e aɨme ɨ mej ti'itɨj cɨn á'aviicue'ire'e maɨjna ɨ maj cɨn rajpueijtzi maɨjna cɨme'e tɨ Dioj ayan tihua'uta'a. Miche'e meyan raatatuiire'en ɨ ruxaijnyu'uca aɨjna jemi tɨ hua'utyataahuaca'a tɨ ajta cai a'anaj ti'itɨ cɨn atya'ɨtza'ara.

will be added

X\