1 San Pedro 3

1Sajta muan, mɨ sej víche'ejmee, sata'aj seyan che'eta sana'a hua'astijra'a saɨme ɨ a'amuacɨna'astyamua'a. Ayaa xu huarɨni sej si seyan eenye'eque'en hua'antimue'itɨn ɨ seica ɨ maj cai ra'aste ɨ nyuucari tɨ cɨme'en raxaj ɨ Cɨriistu'u. Tɨ pua'a seyan huarɨni, capu ruxe'eva'a ja'ame saj tihua'uta'ixaate'en sej si hua'utyamue'itɨn silu seyan sana'a huá'amue'itɨn saɨjna cɨme'e saj rɨ'ɨ ti'ityujcha'ɨ. 2Aɨ mu xaa meyan ra'ancura'asin ɨ nyuucari matɨ'ɨj raaseij sej seyan tzaahuati'ira'a cɨn rana'amiche ɨ Dioj, sajta saj cai ti'itɨ cɨn a'atura aɨme jemi ɨ rucɨna'astyamua'a. 3Majta aɨme ɨ mej víche'ejmee, capu ayan tiraavijte'e maj meyan mana'a rɨ'ɨ huaujruuren maɨjna cɨme'e tɨ jeijre'e seijre'e, tɨ pua'a aɨjna cɨme'e maj meyan rɨ'ɨ ti'ihuaujcɨsta, nusu maj meyan ti'itɨ cɨn ucaujrujti'iraxɨ'ɨn tɨ ooro cɨn taavijhua na'ari maj meyan re'enya'acan cɨn tyu'utyaujchejte'en cɨɨxuri cɨme'e tɨ tɨtɨ'ɨj. 4Capu aɨ na'a ayan tiraavijte'e silu miche'e meyan rɨ'ɨ tihua'aseijratya'a maɨjna tɨ ru'avaa ɨ hua'a tzajta'an, maɨjna tɨ cai a'anaj a'apua'ari. Miche'e cai meyan ti'itɨj cɨn hua'amuare'eriste'e ɨ rucɨna'astyamua'a. Ai pu aɨn pueen tɨ eihua huapɨ'ɨ ruxe'eve'e ɨ Dioj jemi. 5Ayaa mu eenye'eque'en rɨ'ɨ huaujruu ajca'ihua'ɨmɨ aɨme ɨ juuca ɨ maj urare'enya'acan cɨn huatyajturaa ɨ Dioj jemi, ɨ maj majta tya'antzaahua ɨ Dioj jemi. 6Ayaa mu che'eta mana'a hua'ara'astijre ɨ rucɨna'astyamua'a tɨj aɨjna ɨ Sara tyaacan ayan ra'ara'astijre aɨjna ɨ Abraham tyaacan. Ajta, pu ayan raatamuá'a tɨcɨn “nyavastara'a”. Sajta muan mɨ sej víche'ejmee, ayaa xu yaujmua'ame'en pueenya'a xa'aju'un aɨjna ɨ Sara tɨ pua'a seyan nain cɨn rɨ'ɨ huarɨni, sajta cai ti'itɨ cɨn ti'itzɨɨnya'a. 7Sajta muan, mɨ sej nyejnya'ɨche, sata'aj seyan rɨ'ɨ tihua'ajchaɨ ɨ ru'ɨstyamua'a. Sata'aj seyan rɨ'ɨ tihua'utyajtuaani a'ini camu meyan ruca'anye satɨj muan, mɨ sej tetyaca pueen. Naimi'i xu sajta seyan che'eta sana'a ra'ancura'asin saɨjna tɨ cɨn Dioj rɨ'ɨ tyajamuaata'asin sej si ruuri huatyaturan ɨ Dioj jemi. Ayaa xu rɨ'ɨ tihua'ajchaɨ ɨ a'amua'ɨstyamua'a tɨ ij cai ti'itɨ cɨn amuaatamuáre'eriste'en aɨjna cɨme'e ɨ saj cɨn raatahuaviira ɨ Dioj. 8Yaa pu'u xaa, ayaa xu huarɨni, naijmi'i muan. Sata'aj seyan che'eta sana'a rahuauca ɨ Dioj jemi sej sij seyan ru'ihuaamua'aca tyamua'a naa. Sata'aj ahuaujcu'uven seij sajta seij, sata'aj seyan sajta huaujxe'eve'en. Sata'aj sajta seyan ahuaujca'anyen aɨme jemi ɨ mej rajpueijtzi sej si rɨ'ɨ tihua'uta'an. Sajta muan, sata'aj cai ti'itɨ cɨn a'ujtzaahuatya'a. 9Tɨ pua'a a'atɨ ayan a'ij pua'a amuaaruuren, caxu seyan che'eta sana'a a'ij pua'a raruuraa. Na'ari, tɨ pua'a a'atɨ ayan a'ij pua'a tyaja'amuaxajta, caxu seyan che'eta sana'a a'ij pua'a ti'ijxajta, silu sata'aj seyan rɨ'ɨ tiraata'an, a'ini ayaa pu aɨjna cɨn Dioj tyajamuaatajée sej si seyan huarɨni tɨ ij ajta aɨn Dioj ayan ti'itɨ cɨn rɨ'ɨ tyajamuaata'an. 10Ayaa pu aɨjna cɨn te'eyu'usi'i tɨcɨn: Tɨ pua'a a'atɨ ayan raxe'eva'a tɨ a'ateevi'in ruuri, tɨ ajta rɨ'ɨ tiraatyavaɨre'en nain xɨcaj tzajta'a, che'e aɨn ayan huarɨni tɨ cai a'ij pua'a tyú'ujxajtava'a, tɨ cai ajta ayan tí'ihue'itacare'en. 11Che'e aɨn raatapua'ajta tɨ a'ij pua'a ti'ityujcha'ɨ, ajta che'e aɨn ayan huarɨni tɨ xa'apɨ'ɨn cɨn seijra'a. Che'e ajta aɨn ayan rahuauca tɨ rɨ'ɨ ti'iseijra'a hua'a jemi ɨ tyaɨte. Che'e ahuaujca'anyen tɨ ayan huarɨni. 12Ee xaa, rɨ'ɨ pu tihua'aseij ɨ Dioj aɨme ɨ maj rɨ'ɨ titetyújcha'ɨ. Aɨ pu hua'anamua matɨ'ɨj meyan ti'ijhuaviira ɨ jemin. Ajta ayaa pu tavastara'a a'ij pua'a tihua'aseij aɨme ɨ maj a'ij pua'a titetyújcha'ɨ. 13Tɨ pua'a ayan ti'en, ¿ni cai a'atɨ ayan me'eseijre'e tɨ ayan a'ij pua'a amuaaruuren aɨjna cɨme'e saj a'ujca'anyaacan cɨn ti'itese'e sej seyan huarɨni ti'itɨ cɨme'e tɨ í'ixa'apɨ'ɨn? Capu xaa nya'u. Capu ma'a a'atɨ xaa nya'u. 14Ma ajta, tɨ pua'a seyan saɨjna cɨn rajpueijtzi saɨjna cɨme'e saj xa'apɨ'ɨn cɨn huarɨj, capu amɨn a'ij. Dioj pu rɨ'ɨ tyajamuaata'asin. Aɨj xu cɨn, caxu hua'atzɨɨnya'a, caxu sajta a'ij pua'a titya'ujmuajca. 15Ma sajta muan, sata'aj seyan rɨ'ɨ tiraatyajtuaani ɨ rutzajta'a saɨjna ɨ Cɨriistu'u, a'ini aɨ pu tavastara'a pueen. A'anaj tɨ na'a xu seyan rɨ'ɨ huaujruuren sej si seyan huatyaujnan hua'a jemi ɨ maj meyan maɨjna cɨn tyaja'amue'ihua'ura ɨ saj cɨn ti'ichu'eve'e ɨ rujemi. 16Ma sajta, sata'aj seyan sana'a rɨjca, sata'aj cai a'ujtzaahuatya'a seyan tihue'ixaatya'a, sata'aj sajta ra'atesa'a saɨjna ɨ saj jamuan ti'ixa. Sata'aj seyan rɨ'ɨ tya'utaujmua'ati ɨ rumua'atziira'a cɨme'e sej si cai ti'itɨ cɨn a'aturaaca, tɨ ij ayan tihua'utatevi'iraste'en aɨme ɨ maj a'ij pua'a a'amuaruure maɨjna cɨme'e maj meyan a'ij pua'a tyaja'amuaxa a'ij saj rɨcɨ saɨjna cɨme'e saj rɨ'ɨ titetyújcha'ɨ ɨ Cɨriistu'u jemi. 17Ayaa na'a, a'ini tɨ pua'a Dioj ayan ti'ijxe'eve'e saj ti'itɨj cɨn rajpueijtzi, eitze'e pu rɨ'ɨ tyajamuatyava'ɨri saj seyan saɨjna cɨn rajpueijtzi saj xa'apɨ'ɨn rɨcɨ cai tɨ pua'a seyan saɨjna cɨn rajpueijtzi saɨjna cɨme'e saj a'ij pua'a rɨcɨ. 18Ajta aɨn Cɨriistu'u, ayan seij na'a huamɨ'ɨ aɨjna cɨme'e ɨ maj cɨn naijmi'i meyan autyajturaa ɨ Dioj jemi. Aɨjna tɨ cai ti'itɨ cɨn autyajturaa ayan hua'a jetze ma'acan huamɨ'ɨ aɨme ɨ maj a'ij pua'a titetyújchaɨca'a tɨ ij ayan hua'anvi'itɨn ɨ Dioj jemi. Aɨjna ɨ maj meyan raaje'ica ɨ Cɨriistu'u tɨ ratyáhue'ira'acaa, Dioj pu ajta ayan ruxaijnyu'uca cɨn ra'ajjáj hua'a tzajta'a ɨ mɨ'ɨchite. 19Ajta aɨn xaijnyu'ucara'ara'an ɨ Dioj ayan raata'a tɨ tihua'uta'ixaate'en aɨme ɨ xaijnyu'ucari ɨ mej maun tajete aityanami'ihuaca'a. 20Majta aɨme ɨ xaijnyu'ucari, ajna'ɨmɨ mu meyan cai ra'ara'astijre, ajna xɨcajra'a jetze tɨ jetzen Dioj auj ayan té'eviicue'iracaa, ajta ayan rachu'eva'acaa tɨ'ɨj auj aɨn Noé ratyataahuajma'a aɨjna ɨ baarcu tɨ ve'e. Ajta aɨ pu seica huatyavaɨ mej mi maun utyajrupi ɨ baarcu tzajta'a mej mi cai aujamɨn ɨ jaj cɨme'e. Ayaa mu ara'asicaa arahueica. 21Ajta aɨn ɨ jaj ayan huataujmua'a ɨ saj cɨn huamuaɨ'ɨvijhuaca'a, aɨjna tɨ ajta cɨn Dioj ayan amue'irajtuaa. Capu ayan huataujmua'a tɨ Dioj ayan amuá'ari'iri'i ɨ chuej tɨ ca'ame'e ɨ a'amua jetze, silu ayaa pu huataujmua'a sej seyan rájhuaviiri'i ɨ Dioj tɨ ayan amuaata'an sej urare'enya'acan cɨn huatyaturan ɨ rumua'atziira'a jetze ɨ Dioj jemi, aɨjna cɨme'e tɨ ayan ra'ajjáj hua'a tzajta'a ɨ mɨ'ɨchite aɨjna ɨ Jesús tɨ Cɨriistu'u pueen. 22Ajta ijii, an pu a'ujnyéj u tajapua tɨ ari aun a'acajca ɨrɨɨta'an pujme'en ɨ Dioj. Aɨ pu ajta ari aɨjna cɨn antyujmua'aree tɨ tihua'utaijte'en aɨme ɨ maj tajapua ti'ivaɨre'e, ajta aɨme ɨ maj ti'itɨj cɨn antyujmua'aree, ajta aɨme ɨ maj va'acan cɨn tityatatya'upu'u, matɨj mana'a pua'amua ɨ maj xaijnyu'ucari pueen.

will be added

X\