1 San Pedro 2

1Aɨj pu cɨn, ayaa pu ruxe'eve'e saj raatapua'ajta saɨjna cɨme'e saj a'ij pua'a hua'aruure ɨ ruxa'aj tyaɨte nusu saj hua'acuanamua ca'ɨn saj hue'itzi cɨn ruseijrata. Sata'aj sajta cai ruchueera seij sajta seij. Sajta sata'aj cai a'ij pua'a tihua'axajta ɨ ruxa'aj tyaɨte. 2- 3Sata'aj seyan é'enye'en matɨj ɨ tɨ'ɨri ɨ maj eihua huapɨ'ɨ tza'acuj mej mi maɨjna cɨn huavaujse'en maɨjna cɨme'e ɨ hua'a tzi'ime ɨ hua'anaana. Sata'aj seyan che'eta sana'a raxe'eva'a tɨ ij aɨn xaijnyu'ucara'ara'an ɨ Dioj ayan aɨjna cɨn tyajamuaataiti'i aɨjna cɨme'e ɨ nyuucari tɨ re'enya'acan cɨn seijre'e tɨ ij aɨjna cɨn rɨ'ɨ amuaaruuren tɨ ij ayan tyajamuaacɨ'ɨti tɨ aɨn Dioj ayan amue'irajtuaani, a'ini xu'uri raamua'areeri'i tɨ aɨn tavastara'a ayan rɨ'ɨ tyaja'amuachaɨ a'aye'i. 4Ayaa xu seri ajtyáxɨɨraca'a saɨjna jemi tɨ ayan een tɨj tetej tɨ i'iruuri. Majta ɨ tyetyaca, maruuhua'axɨ maɨjna ɨ tetej. Ma ajta Dioj, aɨ pu ra'ava'ahuau aɨjna cɨme'e tɨ rɨ'ɨ huapɨ'ɨ tyu'utyavaɨre'en. 5Sajta muan, ayaa pu che'eta na'a Dioj rɨ'ɨ á'amuaruuren sej si seyan che'eta sana'a eenye'en tyu'utyavaɨre'en tɨj ɨ tetej tɨ i'iruuri ɨ tɨ cɨn chi'i ira'ajtaahua. Ayaa pu á'amuaruuren sej si seij sana'a seijra'a ɨ tyaɨte tɨ muejmi jamuan huatyajturaa aɨjna ɨ xaijnyu'ucara'ara'an ɨ Dioj, sej si seyan urare'enya'acan cɨn seijra'a ɨ Dioj jemi, sej si va'acan cɨn tyu'utyavaɨre'en ɨ jemin. Aɨj xu cɨn, sata'aj seyan rɨ'ɨ xa'aju'un saj saɨjna cɨn tyu'utamuaɨ'ɨvajta saɨjna cɨme'e tɨ aɨn xaijnyu'ucara'ara'an ɨ Dioj ayan amuaata'asin, sej si seyan ra'utamua'aree tɨ ij ajta Dioj ayan ra'ancura'an aɨjna ɨ muaɨ'ɨvejri aɨjna cɨme'e a'ij tɨ huarɨj aɨjna ɨ Jesús tɨ Cɨriistu'u pueen. 6Ayaa pu ti'een, a'ini ayaa pu te'eyu'usi'i ɨ yu'uxari jetze tɨcɨn: Casi'i, xaaseij. Nu'uri ra'atyájra aujna u Sión, seij ɨ tetej, ɨ nyaj ra'ava'ahuau tɨ i ayan tyu'utyavaɨre'en nyaj japuan ra'ajtaahua ɨ chi'i. Ajta aɨn ɨ tetej, eihua nu huapɨ'ɨ rɨ'ɨ tiraatyajtuaa. Ajta, capu a'atzu rɨ'ɨri mej meyan tyu'utatévi'ira'a a'atɨ tɨ na'a tɨ ayan ra'ara'astijre'en aɨjna ɨ tetej. 7Ajta, muejmi jemi ɨ sej tya'atzaahuate'e, eecan pu naa tyajamua'aseijrate'e aɨjna ɨ tetej. Ma majta aɨme jemi ɨ maj cai á'ujca'anye mej tya'antzaahuate'en, ayaa pu te'eme a'ij tɨ te'eyu'usi'i tɨcɨn: Aɨjna ɨ tetej ɨ maj ma ruuhua'axɨ aɨme ɨ maj ra'ajtaahua ɨ chi'i, Dioj pu ayan ra'ava'ahuau tɨ ayan tyu'utyavaɨre'en tɨ japuan ra'ajtaahua ɨ chi'i. 8Ajta, ayan tɨcɨn: Aɨj pɨrɨcɨ ɨ tetej ɨ maj jetzen á'ijcaacata ɨ tyaɨte, ajta ɨ mej jetzen a'itávitzej. Ayaa mu een cɨn jetzen á'ijcaacata maɨjna cɨme'e maj cai ra'astijre'e maɨjna ɨ nyuucari ɨ maj raanamuajri'i. Ayaa pu een cɨn ayan tihua'uxa'apɨ'ɨntari'iri'i tɨ'i Dioj ayan hua'uruuren. 9Ma sajta muan, ayaa xu e'en tɨj seica ɨ tyaɨte tɨ Dioj hua'antihuau, sej si seyan jamuan huatyaturan. Muan xu sajta saɨn pueen aɨme ɨ saj seij chuejra'an japua e'ema'acan tɨ Dioj ayan huataura'ate. Muan xu sajta tyaɨtestyamua'ame'en pueen ɨ Dioj sej si seyan tihua'uta'ixaate'en ɨ saj cɨn rɨ'ɨ tirata'aca saɨjna tɨ ayan amuaatajée. Sata'aj cai che'e seyan á'ujhua'anye'en a'u tɨ a'utɨca'a, silu sej si saun a'utyaturan ɨ jemin a'u tɨ á'unyeeri'i sej si saun rɨ'ɨ tiyá'useijra. 10Ajna'ɨmɨ, caxu tyaɨtestyamua'ame'en pueenya'acaa ɨ Dioj. Ma sajta ijii, xu'uri muan tyaɨtestyamua'ame'en pueen aɨjna. Ajna'ɨmɨ, capuuxɨ amua'acu'uvajca'a aɨjna ɨ Dioj. Ma ajta ijii, aɨ pu ari amua'acu'uve. 11Ayaa nu tyaja'amuahuavii mɨ nyej a'amuaxe'eve'e sej seyan seijra'a matɨj aɨme ɨ maj seij chuejra'a japua e'epuasaaruve'e, na'ari matɨj aɨme ɨ maj hua'utamuari. Caxu seyan taura'acare'en sej seyan ra'astijra'a saɨjna tɨ a'amua tzajta'a huiraninyei tɨ a'ij pua'a een, tɨ ajta ti'itese'e aɨjna jetze ɨ a'amuaxaijnyu'uca. 12Sata'aj seyan rɨ'ɨ titetyújchaɨca hua'a jemi ɨ mej seij chuejra'a japua e'ema'acan tɨ ij xa'apɨ'ɨn te'irajra'ani tɨ pua'a meyan ti'itɨ cɨn a'ij pua'a tyaja'amuaxajta. Tɨ pua'a seyan rɨjca, ayaa mu raseira mua'aju'un saj xa'apɨ'ɨn huarɨj saɨjna cɨme'e ɨ maj cɨn a'ij pua'a tyaja'amuaxajtaca'a, majta meyan rɨ'ɨ tiraata'asin maɨjna ɨ Dioj ajna xɨcajra'an tɨ jetzen ajtahua'a huataseijre'esin itejmi jemi ɨ tavastara'a. 13Sata'aj seyan hua'astijra'a matɨj mana'a pua'amua ɨ tyaɨte ɨ maj ti'itɨ cɨn antyujmua'aree a'ini ayaa pu titaata'itiiri'i ɨ tavastara'a. Tiche'e ra'astijra'a tyaɨjna tɨ aɨjna cɨn ti'itejvee tɨ nain cɨn tyu'utaijta, a'ini aɨ pu aɨn pueen tɨ eitze'e va'acan cɨn ti'ivaɨre'e. 14Tiche'e tyajta hua'astijra'a aɨme ɨ tajtuhuaani, a'ini aɨjna tɨ nain cɨn ti'ijta aɨ pu ayan hua'utaityaca'a mej mi pueijtzi hua'uta'an aɨme ɨ maj a'ij pua'a ti'ityujcha'ɨ, mej mi majta rɨ'ɨ tihua'ata'acare'en aɨme ɨ maj meyan rɨcɨ a'ij tɨ tiraavijte'e. 15Ayaa pu xaa ti'ijxe'eve'e ɨ Dioj sej seyan rɨ'ɨ titetyújchaɨca sej si saɨjna cɨn hua'antimue'itɨn aɨme ɨ maj cai máumua'aree, mej mi cai che'e meyan a'ij pua'a ti'ixajta, tɨ cai ti'itɨ vaɨre'e. 16Sata'aj seyan rɨjca matɨj aɨme ɨ maj ruxaahua ti'imɨjhuaca. Ma sajta muan, caxu seyan titaatáujtuuhua'an saj a'ij pua'a huarɨni, sajta seyan jetzen rupua'aritya'a saj nu'u xa'apɨ'ɨn huarɨj saɨjna cɨme'e saj ruxaahua á'ujhua'an. Sata'aj seyan rɨ'ɨ titetyújchaɨca matɨj aɨme ɨ mej ravaɨre'e ɨ Dioj. 17Sata'aj rɨ'ɨ tihua'ajchaɨ naijmi'ica a'ij tɨ tiraavijte'e. Sata'aj hua'axe'eva'a ɨ ta'ihuaamua'a ɨ maj majta tya'atzaahuate'e. Sata'aj ra'atesa'a ɨ Dioj. Sata'aj sajta rɨ'ɨ tiraatyajtuaani aɨjna ɨ tajtuhuan tɨ nain cɨn ti'ijta iiya chuejra'a japua. 18Sajta muan, mɨ sej ca'anyejri cɨn ti'imɨjhuaca, sata'aj hua'ara'astijre'en a'ij tɨ tiraavijte'e aɨme ɨ mej tyaja'amue'ijte'e. Sata'aj hua'astijra'a a'achu maj pua'amua. Caxu aɨme sana'a tɨ pua'a meyan rɨ'ɨ tyajamuájchaɨ, na'ari maj rɨ'ɨ ti'itetyaɨte, na'ari tɨ pua'a a'ij pua'a meti'itetyaɨte, sata'aj naijmi'ica a'astijra'a. 19Ee xaa nya'u, ayaa pu Dioj rɨ'ɨ tiraatyatuaasin aɨjna ɨ a'atɨ tɨ pua'a aɨn ayan ra'utamua'aree ɨ Dioj, ajta aɨn ayan tya'utaviicue'i tɨ pua'a saɨj ayan pueijtzi raata'an tɨ cai ayan tiraavijte'e. 20Aru tɨ pua'a ayan pueijtzi muaacɨ'ɨti aɨjna cɨme'e pej peyan a'ij pua'a huarɨj, tɨ pua'a peyan paɨjna cɨn tya'utaviicue'i tyamua'a naa, capu a'atzu a'ij timuatyava'ɨri. Na'ari cai, tɨ pua'a peri xa'apɨ'ɨn huarɨj, tɨ pua'a paɨjna cɨn rajpueijtzi, pajta peyan tya'utaviicue'i tyamua'a naa, Dioj pu rɨ'ɨ timuaatyatuaasin. 21Ee xaa nya'u, Dioj pu ayan aɨjna cɨn amuaatajée sej seyan rajpueijtzi, sajta tya'utaviicue'i, a'ini aɨjna ɨ Cɨriistu'u a'amua jetze ma'acan pu rajpueiitzi a'araa. Ayaa pu aɨjna cɨn huarɨj, tɨ'ij muejmi huata'itii sej si seyan che'eta sana'a huarɨni a'ij tɨ aɨn anacai huarɨj. 22Capu ti'itɨj cɨn autyajturaa ɨ Dioj jemi. Capu ajta a'anaj tyu'uhue'itaca'a. 23Matɨ'ɨj meyan ra'ajtya'axɨ, aɨ pu cai ayan hua'ajtya'axɨ aɨme. Matɨ'ɨj pueijtzi raata'a, ni capu ayan tihua'uxájtzi'iri'i, silu ayaa pu huataujtuiiri'i aɨjna jemi tɨ ayan tzaahuati'ira'a cɨn tihua'axɨjte'e. 24Aɨ pu rusaɨj rajpueiitzi a'araa ɨ rujetze tajetze ma'acan aɨjna cɨme'e ɨ tyaj cɨn autyajturaa ɨ Dioj jemi. Ayaa pu aɨjna cɨn huarɨj tej ti teyan raatapua'ajta ɨ tyaj cɨn atya'ɨtza'ara ɨ Dioj jemi. Muan xu saɨjna cɨn huaruj saɨjna cɨme'e tɨ aɨn rajpueijtzica'a. 25Ajna'ɨmɨ, ayaa xu seijra'acaa matɨj ɨ canya'axɨ tɨ cai a'atɨ hua'asaɨre'e. Ma ajta ijii, xu'uri saɨjna jemi tyujsaɨj, saɨjna jemi tɨ a'amua cujta'a huame'en, tɨ ajta aɨjna cɨn antyujmua'aree tɨ nain cɨn a'amua japua huanyuuni.

will be added

X\