1 San Pedro 1

1Inyaa, Pedro, tɨ Dioj naataityaca'a nyej tyu'utyavaɨre'en ɨ jemin, yaa nu á'amuataujte'e muejmi, mɨ saj seij chuejra'a japua a'uchaatɨme a'u maj amuaare'itixɨ, tɨj na'a a'u tɨ huatacá'a u Ponto, ajta aujna u Galacia, ajta aujna u Capadocia, ajta aujna u Asia, ajta aujna u Bitinia, a'u tɨ na'a saj a'utyáuu. 2Aɨ pu ayan amua'antihuau aɨjna cɨme'e tɨ jajcua ɨmɨ ayan tyajamuaaxa'apɨ'ɨntari'iri'i a'ij tɨ tyájamuáaruuren aɨjna ɨ Dioj ɨ tyaj rajya'upua. Ajta aɨn xaijnyu'ucara'ara'an ayan amue'iraavi'itɨ sej si seyan huatyaturan ɨ Dioj jemi, aɨjna cɨme'e sej seri ra'astijre'e saɨjna ɨ Cɨriistu'u tɨ ayan ra'iraaxɨre ɨ ruxuure'e tɨ ij ayan muejmi japua huanyuuni. Che'e aɨn Dioj ayan rɨ'ɨ tyajamuata'acare'en, ajta che'e ayan jamuaatyapua'arite'en tyamua'a naa. 3Tiche'e rɨ'ɨ tiraata'acare'en tyaɨjna ɨ Dioj, tɨ ajta ya'upuaara'an pueen ɨ tavastara'a, aɨjna ɨ Jesús tɨ ajta Cɨriistu'u pueen. A'ini aɨ pu eihua huapɨ'ɨ tá'ancu'uvajxɨ'ɨ, aɨ pu ayan taata'a tej ti jajcuacan cɨn huanunu'eihua tej ti teyan raachu'eve'en tyaɨjna, ɨ tyaj cɨn ruuri ta'aju'un aɨjna cɨme'e tɨ aɨn Dioj ayan ra'ajjáj hua'a tzajta'a ɨ mɨ'ɨchite aɨjna ɨ Jesús tɨ ajta Cɨriistu'u pueen. 4Aɨ pu ajta ayan titaata'asin tɨ ayan titáacɨ'ɨti aɨjna tɨ cai a'anaj huataujtu'isin, tɨ cai ajta a'anaj huatechuaamuari, tɨ ajta cai a'anaj ahuaujpua'arixɨ'ɨsin. Dioj pu ayan amuajtá'are aujna u tajapua. 5Aɨ pu ajta ayan rɨ'ɨ a'amuacha'ɨ aɨjna cɨme'e ɨ muáre'eri'ira'ara'an, a'ini muan xu seyan tya'atzaahuate'e. Ajta pu'uri ayan rɨ'ɨ ruurijhua tɨ ij aɨn ayan huataseijre'en aɨjna tɨ cɨn amue'irajtuaani ajna xɨcajra'an jetze tɨ jetzen nain cɨn te'entipua'ari. 6Aɨj xu cɨn seyan tyamua'a naa rutyamua'ava'a saɨjna cɨme'e tɨ Dioj ayan rɨ'ɨ tyajamuaata'asin. Ma ajta ijii, ayaa pu ruxe'eve'e saj seyan saɨjna cɨn ruxaamɨstya'a saj mui'icá cɨn rajpueijtzi. 7Ayaa pu een cɨn ayan a'amuaruure mej mi meyan rɨ'ɨ tiraata'acare'en ɨ Dioj muejmi cɨme'e ajna xɨcajra'an tɨ jetzen ajtahua'a huataseijre'en aɨjna ɨ Jesús tɨ ajta Cɨriistu'u pueen. Ee xaa nya'u, aɨ mu majta meyan rɨ'ɨ amuaatyatuaasin, majta rɨ'ɨ tyajamua'utaseijra a'ini muan xu seyan saɨjna cɨn tya'utaviicue'iri'i ɨ saj cɨn rajpueijtzica'a saɨjna cɨme'e saj tya'atzaahuate'e. Ayaa pu ti'ivaɨre'e sej seyan rajpueijtzi tɨ ij Dioj ayan raamua'aree saj tzaahuati'ira'a cɨn tya'atzaahuate'e. Aɨj pu cɨn eitze'e ayan ti'ivaɨre'e ɨ Dioj jemi sej seyan rajpueijtzi cai aɨjna ɨ ooro, ɨ maj taij cɨn raatyáuuna tɨ ij rumua'atɨ a'ara'ani. 8Ajta aɨn Cɨriistu'u, muan xu cai a'anaj raaseij, ayaa xu sauj raxe'eve'e. Sajta, cai xɨ raaseij ijii, sauche'e xu seyan tya'atzaahuate'e, sajta seyan saɨjna cɨn rɨ'ɨ rutyamua'ave'e. Capu ayan rɨ'ɨri tɨ a'atɨ ayan raataxaj yee a'achu tɨ caj rɨ'ɨ tirata'aca aɨjna cɨme'e tɨ ayan tyajamuaacɨ'ɨti aɨjna tɨ huapɨ'ɨ naa seiira'a a'ame. 9Ayaa xu ra'ancura'asin tɨ Dioj ayan amue'irajtuaani aɨjna cɨme'e sej seyan tya'atzaahuate'e. 10Majta aɨme ɨ maj ti'ixaxa'ata'a ɨ Dioj jetze ma'acan, aɨ mu mejmi'i meyan tyu'utaxajtaca'a maɨjna cɨme'e tɨ cɨn Dioj ayan rɨ'ɨ tyajamuaatá'aniche'e. Aɨ mu majta a'ujca'anyaacan cɨn ti'ihuauca'a, majta maɨjna cɨn ti'imua'atzɨjca'a mej mi yau'eitaa mua'ara'ani. 11Ayaa mu ti'ihuauca'a ti'itɨj tɨ xɨcajra'an jetze ayan tyaja'ure'enyejsin, ajta a'ij tɨ eenya'a a'ame'enche'e ajna xɨcajra'an jetze tɨ cɨme'en raataxajtaca'a aɨjna ɨ xaijnyu'ucara'ara'an ɨ Dioj tɨ ajta ayan huatyajturaa hua'a jemi. Camu a'atzu yau'eityajca'a a'ij tɨ huataujmua'an aɨjna tɨ cɨme'en anacai raataxajtaca'a yee tɨ aɨn Cɨriistu'u ayan rajpueijtzi a'ara'ani, tɨ ajta nu'u e'eyan Dioj rɨ'ɨ raatyatuasin mej mi rɨ'ɨ tiya'useiira mua'ara'ani. 12Ayaa pu Dioj hua'uta'a mej mi meyan raamua'aree maj cai rujɨme'e meyan tí'ixajtacaa silu ayaa mu maɨjna cɨn ti'ivaɨra'acaa muejmi cɨme'en, matɨ'ɨj meyan cɨn tyu'utaxajtaca'a a'ij tɨ aɨn xaijnyu'ucara'ara'an ɨ Dioj ayan ca'anijra'a hua'uta'a mej mi meyan tyu'utaxajtaca'a maɨjna cɨme'en ɨ nyuucari tɨ cɨn Dioj amue'iratuaasin a'ij sej sauchan tiraanamuajri'i. Dioj pu u tajapua ya'utaityaca'a ɨ ruxaijnyu'uca tɨ ij aɨn hua'a jamuan huatyaturan. Majta aɨme ɨ maj tajapua ti'ivaɨre'e, mauche'e mu meyan raxe'eve'e mej meyan yau'eitaa mua'ara'ani aɨjna tɨ cɨn Dioj amue'iratuaasin. 13Aɨj xu cɨn, sata'aj huatyaujca'anyen ɨ rutzajta'a. Sata'aj sajta rɨ'ɨ tya'utaujmua'ati sej si tyamua'a naa nain cɨn raachu'eve'en aɨjna tɨ ayan tyajamuaacɨ'ɨti ɨ tɨ cɨn Dioj rɨ'ɨ tyajamuaata'asin ajna xɨcajra'an jetze tɨ jetzen huataseijre'esin aɨjna ɨ Jesús tɨ ajta i'i Cɨriistu'u. 14Sata'aj seyan che'eta sana'a huarɨni matɨj tɨ'ɨrii ɨ maj hua'astijre'e ɨ ruvaujsimua'a. Sata'aj cai che'e seyan a'ij pua'a ti'ityujcha'ɨ a'ij tɨ ajmi'i ca'anijra'a amuata'acare'e aɨjna tɨ ru tzajta'a huiraninyeica'a satɨ'ɨj cai xɨ yau'eityajca'a a'ij tɨ tiraavijte'e ɨ Dioj jemi. 15- 16Ee xaa nya'u, sata'aj cai a'ij pua'a rɨjca, silu sata'aj seyan nain cɨn urare'enya'acan cɨn ti'iteseijra'a tɨj ajta urare'enya'acan cɨn ti'iseijre'e aɨjna tɨ amuaatajée. Sata'aj seyan nain cɨn huarɨni a'ij sej ti'ityujcha'ɨ a'ini ayaa pu te'eyu'usi'i tɨcɨn: “Sata'aj seyan urare'enya'acan cɨn ti'iteseijra'a a'ini nyaa nu nyajta urare'enya'acan cɨn seijre'e.” 17Ajta aɨn Dioj ayan ruxa'a na'a hua'axɨjte'en ɨ tyaɨte a'ij tɨ saɨj huarɨj. Aɨj pu cɨn, tɨ pua'a seyan raatamuá'amuate'en yee rutaata, sata'aj seyan ra'atesa'a satɨj sana'a sauj iiyan tipuasaaruve'e chaanaca japua. 18- 19Ayaa pu tiraavijte'e sej seyan rɨ'ɨ ti'ityujcha'ɨ a'ini xu'uri ramua'aree ti'itɨ tɨ pɨrɨcɨ tɨ cɨme'en Cɨriistu'u ayan tyu'utanajchitaca'a aɨjna ɨ saj cɨn té'echaɨca'a ɨ Dioj jemi sej si cai che'e seyan ti'ijrɨ'ɨraa a'ij sej sejmi'i ti'ijrɨ'ɨrajcaa saɨjna cɨme'e ɨ ye'ira tɨ cai ti'itɨ vaɨra'acaa, ɨ maj amuaata'itiiri'i ɨ a'amuavaujsicɨ'ɨ. Capu Cɨriistu'u aɨjna cɨn tyu'utanajchitaca'a aɨjna cɨme'e ɨ ooro, na'ari aɨjna cɨme'e ɨ plaata, tɨ ayan a'apua'are, silu aɨ pu aɨjna cɨn tyu'utanajchitaca'a aɨjna cɨme'e ɨ ruxuure'e tɨ huapɨ'ɨ ti'ivaɨre'e. Ayaa pu Cɨriistu'u huataujmuaɨ'ɨvajtaca'a tɨj canya'a, tɨ cai a'atzu cápita'ina, tɨ cai ti'itɨ cɨn a'atura. 20Ayaa pu Dioj ra'antihuau tɨ'ɨj cai xɨ raatyataahua aɨjna ɨ chaanaca tɨ'i ayan aɨjna cɨn tyu'utyavaɨre'en. Ajta, ijii tɨ nain te'entipua'ari, Cɨriistu'u pu ayan huataseijre tɨ ij a'amua japua huanyuuni. 21Ayaa xu een cɨn seyan ra'atzaahuate'e ɨ Dioj saɨjna cɨme'e a'ij tɨ huarɨj aɨjna ɨ Cɨriistu'u. Ajta Dioj ayan ra'ajjáj hua'a tzajta'a ɨ mɨ'ɨchite. Tɨ'ɨjta'i ayan rɨ'ɨ tiraatyajtuaa tɨ ij ayan nain cɨn antyujmua'aréera tɨj na'a rusen cɨme'e. Aɨj xu cɨn seyan tya'atzaahuate'e, sajta ti'ichue'eve'e. 22A'ini muan xu seyan rá'antzaahua saɨjna ɨ nyuucari tɨ ayan ti'ayajna sej si sajta seyan hua'axe'eva'a ɨ ru'ihuaamua'a, aɨj xu cɨn seri rɨ'ɨ uhuaujruu ɨ a'amua tzajta'a. Aɨj xu cɨn, sata'aj seyan a'ujca'anyaacan cɨn huaujxe'eve'en seij sajta seij, tyamua'a naa. 23Che'e ayan tyaja'ure'enyen a'ini caxu jajcuacan cɨn huanunu'eihuaca'a aɨjna cɨme'e tɨ á'apuapua'are silu aɨjna cɨme'e tɨ cai a'anaj á'apua'aren. Ai pu aɨn pueen ɨ nyuucari tɨ Dioj jemi a'uve'eye'i. Aɨ pu taarujte'eve, ajta ayan rusen cɨn a'ateeri. 24Ee xaa nya'u, ayaa pu che'eta na'a te'eyu'usi'i ɨ yu'uxari jetze tɨcɨn: Matɨj mana'a pua'amua mej tyahue'ira'a, ayaa mu e'en tɨj aɨjna ɨ ɨxaj. Ajta ɨ maj cɨn á'ujtzaahuate'e, ayaa pu een tɨj aɨjna ɨ xuuxu'ura'an aɨjna ɨ ɨxaj. Ayaa pu ti'irɨnyaca tɨ ayan huatyaahuan aɨjna ɨ ɨxaj, ajta cávatzɨjsin aɨjna ɨ xuuxu'ura'an. 25Ma ajta aɨn ɨ nyuucari tɨ Dioj jemi a'uve'eye'i, aɨ pu rusen cɨn seira'a a'ame. Ajta aɨn ɨ nyuucari, ai pu aɨn pueen ɨ mej tyajamuaata'ixaa, ɨ saj sajta cɨn huataujtyamua'ave.

will be added

X\