1 San Juan 4

1Mɨ nyaj a'amuaxe'eve'e, sata'aj cai ra'atzaahuatya'a a'atɨ tɨ na'a tɨ ayan ruseijrata tɨ nu'u aɨn xaijnyu'ucara'ara'an ɨ Dioj ca'anijra'a raata'a tɨ tyu'utaxaj, silu sata'aj anacaican hua'uteeseij sej si raamua'aree ti'itɨ tɨ xaijnyu'ucarijra'a ca'anijra'a hua'ata'aca maj meyan tyu'utaxaj. Sata'aj seyan huarɨni a'ini aɨme ɨ maj cai tzaahuati'ira'a cɨn ti'ixaxa'a ɨ Dioj jetze ma'acan, mui'itɨ mu meri hua'a tzajta'a huataseijre aɨme jemi ɨ maj yan seijre'e iyan chaanaca japua. 2Ayaa tu tyaɨjna cɨn tiraamua'aree tɨ pua'a aɨn xaijnyu'ucara'ara'an ɨ Dioj ayan ca'anijra'a rata'aca tɨ a'atɨ ayan tyu'utaxaj ɨ Dioj jetze ma'acan nusu cai. A'atɨ tɨ na'a tɨ ayan tiraataxaj yee tɨ aɨn Jesús tɨ Cɨriistu'u pueen, aɨ pu nu'u ajta ayan tyahué'ira'acán cɨn huataseijre iiyan chaanaca japua, tɨ pua'a aɨjna ɨ a'atɨ, ayan tiraataxaj, aɨ pu aɨn pueen tɨ aɨn xaijnyu'ucara'ara'an ɨ Dioj ayan ca'anijra'a rata'aca tɨ ayan tyu'utaxaj Dioj jetze ma'acan. 3Ma ajta a'atɨ tɨ na'a tɨ cai ayan tiraataxaj yee tɨ Jesús ayan tyahué'ira'acán cɨn huataseijre, aɨ pu cai tzaahuati'ira'a cɨn ti'ixaxa'a ɨ Dioj jetze ma'acan, silu aɨ pu ayan ca'anijra'a rata'aca a'ij tɨ tyu'utaxaj aɨjna ɨ xaijnyu'ucari tɨ rajchaɨre'e ɨ Cɨriistu'u. Xu'uri seyan tiraanamuajri'i tɨ aɨn yan huataseijre'esin iiyan chaanaca japua. Ee xaa nya'u, pu'uri yan seijre'e hua'a tzajta'a ɨ maj yan huachaatɨme iiyan chaanaca japua. 4Mɨ sej tyaamua ijii, muan xu Dioj jetze ajtyama'acan. Sajta seri hua'utyaamue'itɨ saɨme ɨ mej hue'itzi cɨn ti'ixaxa'a saɨjna cɨme'e tɨ aɨn ɨ tɨ muejmi jemi huatyajturaa, eitze'e pu va'acan cɨn antyujmua'aree cai aɨjna tɨ yan seijre'e iiyan ɨ chaanaca japua. 5Ma majta aɨme, aɨ mu hua'a jetze ajtyama'acan aɨme ɨ maj yan huachaatɨme iiyan chaanaca japua. Aɨj pu cɨn, tɨj na'a mej meyan ti'ixaata mua'aye'i, aɨ pu ca'anijra'a hua'ata'aca mej meyan tyu'utaxaj aɨjna ɨ hua'amua'atziira'a aɨme ɨ maj yan seijre'e iiyan chaanaca japua. Majta aɨme ɨ maj yan seijre'e, aɨ mu meyan tihua'anamua. 6Me tyajta ityan, tyan tu Dioj jetze ajtyama'acan. A'atɨ tɨ na'a tɨ ayan ramua'ate ɨ Dioj, aɨ pu ayan tanamua. Ajta aɨjna ɨ a'atɨ tɨ cai ramua'ate ɨ Dioj, aɨ pu ajta cai tanamua itejmi. Ayaa tu een cɨn teyan ti'ijmua'aree tɨ pua'a a'atɨ ayan tzaahuati'ira'a cɨn ti'ixaxa'a ɨ Dioj jetze ma'acan na'ari tɨ pua'a hue'itzi cɨn ti'ixaxa'a. 7Mɨ nyej a'amuaxe'eve'e, tiche'e teyan tityahuátaxe'eve'en seij tyajta seij a'ini Dioj pu rusaɨj ayan ca'anijra'a titata'aca tej ti teyan huátaxe'eve'en. Ajta aɨn tɨ hua'axe'eve'e ɨ ruxa'aj tyaɨte, aɨ pu Dioj jetze e'iraanye, ajta aɨ pu ramua'ate ɨ Dioj. 8Ma ajta, aɨn tɨ cai hua'axe'eve'e ɨ ruxa'aj tyaɨte, aɨ pu cai xɨ ramua'ate ɨ Dioj, a'ini Dioj pu tzaahuati'ira'a cɨn rusaɨj taxe'eve'e, nain xɨcaj tzajta'a, ajta nain tɨca'ari tzajta'a. 9Ayaa pu aɨjna cɨn tejmi jemi huataseijre tɨ Dioj ayan taxe'eve'e aɨjna cɨme'e tɨ aɨn ayan ya'utaityaca'a ɨ ruyauj tɨ saɨj na'a pueen tɨ ij ya uvé'enyen iiyan chaanaca japua tej ti ruuri huatyaturan ɨ Dioj jemi tyaɨjna cɨme'e tɨ aɨn tajapua huanyúu. 10Ayaa pu aɨjna cɨn ayan eenye'eque'e seijre'e tɨ Dioj ayan taxe'eve'e. Catu tyan anacai raataxe'eve ɨ Dioj, silu aɨ pu anacai taataxe'eve itejmi, ajta ayan ya'utaityaca'a ɨ ruyauj tɨ ij aɨn ayan ra'urauuna ɨ tyaj cɨn autyajturaa ɨ Dioj jemi tɨ ij cai Dioj ayan pueijtzi titata'acare'en. 11Mɨ nyaj a'amuaxe'eve'e, ja'ini Dioj pu'uri ayan titaataxé'eve, ayaa pu tyú'ujxe'eve'e tyej teyan che'eta tyana'a huátaxe'eve'en seij tyajta seij. 12Capu a'atɨ a'anaj raaseij ɨ Dioj. Ma ajta, tɨ pua'a teyan ti'itaxe'eva'a seij tyajta seij, Dioj pu ayan tejmi jemi seijre'e, ajta aɨ pu tejmi jemi runaijmi'ire'e aɨjna tɨ cɨn Dioj ayan ti'itaxe'eve'e. 13Ayaa tu een cɨn teyan ti'ijmua'aree tyej teyan jemin seijre'e, ajta tɨ ayan aɨn tejmi jemi seijre'e aɨjna cɨme'e tɨ ayan tejmi jemi raatyajtuaa ɨ ruxaijnyu'uca. 14Tyajta ityan, tyan tu teyan tiraaseij, tyajta teyan tiratyaxájta tɨ aɨn ɨ tyaj rajya'upua, aɨn ayan tiya'utaityaca'a ɨ ruyauj tɨ ij ayan hue'irajtuaani aɨme ɨ maj yan huachaatɨme iiyan chaanaca japua. 15A'atɨ tɨ na'a tɨ ayan tiraataxaj yee Jesús tɨ ajta Cɨriistu'u aɨ pueen, aɨ pu ajta aɨn pueen tɨ yaujra'an pɨrɨcɨ ɨ Dioj, Dioj pu jemin seijre'e aɨjna ɨ a'atɨ. Ajta aɨn ɨ a'atɨ, aɨ pu ayan che'eta na'a seijre'e ɨ Dioj jemi. 16Aɨj tu cɨn teyan ti'ijmua'aree, tyajta teyan tira'atzaahuate'e tɨ ayan ti'itaxe'eve'e ɨ Dioj, a'ini Dioj pu ayan a'anaj tɨ na'a ti'itaxe'eve'e. Ajta aɨn ɨ a'atɨ tɨ ayan seijre'e tɨ hua'axe'eve'e, aɨ pu ajta jemin seijre'e ɨ Dioj. Ajta Dioj pu ayan che'eta na'a jemin seijre'e aɨjna ɨ a'atɨ. 17Ayaa pu eenye'eque'e seijre'e tɨ ayan huaujnaijmi'ire itejmi jemi tej ti cai ti'itzɨɨnya'a ajna xɨcajra'a tɨ jetzen thuá'axɨjte'en aɨjna cɨme'e tej teyan che'eta tyana'a seijre'e iiyan chaanaca japua tɨj ajta aɨjna, tyaɨjna cɨme'e tyaj hua'axe'eve'e ɨ tyaxá'a tyaɨte. 18Tɨ pua'a a'atɨ ayan ti'ijxe'eva'a a'ame ajna xɨcajra'a jetze tɨ Dioj jetzen hua'axɨjte'en, capu ayan ti'itzɨɨnya'a, a'ini tɨ pua'a aɨjna ɨ a'atɨ nain cɨn ayan ti'ijxe'eva'a ɨ Dioj, aɨj pu cɨn raatyapua'arite'esin ɨ ru tzajta'a aɨjna tɨ cɨn ti'itzɨɨnye'e tɨ Dioj pueijtzi raata'an. Ayaa pu xaa nya'u ti'ayajna a'ini tɨ pua'a a'atɨ ayan ti'itzɨɨnya'a, aɨ pu ajta ti'itɨ cɨn rajpueijtzi a'aye'i, ajta aɨn tɨ ti'itzɨɨnye'e, capu u huatyaujnaijmi'ire ɨ rutzajta'a tɨ aɨn ayan ti'ijxe'eve'e ɨ ruxa'aj tevi. 19Ayaa tu tyaɨjna cɨn ti'ijxe'eve'e ɨ Dioj a'ini Dioj pu anacai ayan titaataxé'eve itejmi. 20Tɨ pua'a a'atɨ ayan ti'ixajta yee aɨ pu nu'u raxe'eve'e ɨ Dioj, ajta tɨ pua'a rajchaɨ́ɨra'a ɨ ru'ihuaara'a, ayaa pu ti'ihue'itaca aɨjna ɨ a'atɨ a'ini tɨ pua'a aɨn cai raxe'eva'a ɨ ru'ihuaara'a tɨ ayan me tíruusíse'iran, capu a'atzu a'ij ti'irɨ'ɨri tɨ aɨjna ɨ a'atɨ ayan raxe'eva'a aɨjna ɨ Dioj tɨ cai a'anaj rasise'ij. 21Ajta ai pu aɨn pueen ɨ nyuucari tɨ cɨn aɨn ayan titaataij. Che'e nu'u aɨn tɨ ayan ti'ijxe'eve'e ɨ Dioj, che'e aɨn ajta ayan ti'ijxe'eva'a ɨ ru'ihuaara'a.

will be added

X\