1 San Juan 3

1Ee xaa nya'u, sata'aj saɨjna jetze tyu'umua'ati tɨ aɨn ɨ tyaj rajya'upua, ayan eihua huapɨ'ɨ taataxe'eve a'ini aɨ pu xaa taateya'upuataca'a. Aɨj tu cɨn, tu'uri yaujmua'ame'en pueen ɨ Dioj. Aɨj mu cɨn cai tamuajte aɨme ɨ maj yan huachaatɨme ɨ chaanaca japua maɨjna cɨme'e maj cai raamuá'a. 2Mɨ nyaj a'amuaxe'eve'e, tu'uri yaujmua'ame'en pueen ɨ Dioj. Ma ajta cai xɨ a'ij amiteere'e a'ij tyaj eenya'a ta'aju'un. Me tyajta ityan, ayaa tu ti'ijmua'aree tɨ ayan ti'itacɨ'ɨti ajna xɨcajra'a jetze ɨ tɨ jetzen huataseijre'esin. Aɨ pu saɨque taruuren ya ta jetze tej ti teyan che'eta tyana'a eenya'a ta'ara'ani tɨj ajta aɨn eenya'a seijre'e u tajapua a'ini ajna tu raseijran tyaɨjna a'ij tɨ een. 3Ajta a'atɨ tɨ na'a tɨ ayan ti'ijchu'eve'e aɨjna tɨ ayan tiraacɨ'ɨti, ayaa pu aɨjna cɨn rɨ'ɨ ruruuren tɨ ayan che'eta na'a urare'enya'acan cɨn seira'a a'ara'ani ɨ rutzajta'a tɨj ajta aɨjna ɨ Jesús tɨ ajta Cɨriistu'u pueen. 4Ma ajta, a'atɨ tɨ na'a tɨ ti'itɨ cɨn atya'ɨtza'ara ɨ Dioj jemi, aɨ pu ajta raatyaxaahuata aɨjna ɨ nyuucari tɨ cɨn Dioj tie'ijta. Ajta tɨj na'a ɨ maj cɨn atya'ɨtza'ara, ayaa pu seijre'e ɨ Dioj jemi tɨ ayan che'eta na'a een ɨ maj cɨn raatyaxaahuata maɨjna ɨ nyuucari tɨ ajta cɨn Dioj tie'ijta. 5Ajta, xu'uri ramua'aree tɨ ayan een cɨn huataseijre aɨjna ɨ Jesús tɨ ’ij ayan ra'urauuna ɨ tyaj cɨn autyajturaa ɨ Dioj jemi. Ajta, capu a'atzu ti'itɨ cɨn atya'ɨtza'ara ɨ Dioj jemi aɨjna ɨ Jesús, tɨ ajta Cɨriistu'u pueen. 6Ajta, a'atɨ tɨ na'a tɨ Dioj jemi seijre'e capu ajta a'atura ɨ jemin. Ma ajta, a'atɨ tɨ na'a tɨ ayan ti'itɨ cɨn atya'ɨtza'ara ɨ Dioj jemi, aɨjna ɨ a'atɨ capuu xɨ yau'eitaa a'araa a'ij tɨ een aɨjna, capu ajta xɨɨ raamuá'a. 7Mɨ sej tyaamua pueen ijii, caxu raata'acare'en tɨ a'atɨ ayan tyájá'amuacuanamua. A'atɨ tɨ na'a tɨ ayan xa'apɨ'ɨn ti'ityujcha'ɨ, aɨ pu ayan che'eta na'a urare'enya'acan cɨn seijre'e ɨ Dioj jemi tɨj ajta aɨjna ɨ Jesús, tɨ ajta Cɨriistu'u pueen. 8Ma ajta, a'atɨ tɨ na'a tɨ ti'itɨ cɨn tye'etya'ɨtza'ara ɨ Dioj jemi, aɨ pu aɨjna jetze ajtyama'acan ɨ tiyaaru'u, a'ini aɨjna ɨ tiyaaru'u, ayaa pu tɨj na'a jajcua jɨmɨ tya'utyejche tɨ ayan tye'etya'ɨtza'ara tɨj na'a ɨ tɨ'ɨri ye e'ire'enye. Ayaa pu een cɨn huataseijre aɨjna tɨ yaujra'an pueen ɨ Dioj tɨ ij raatyáuuna nain ɨ muáre'eri'ira'ara'an ɨ tiyaaru'u. 9Capu che'e atya'ɨtza'ara ɨ Dioj jemi a'atɨ tɨ na'a tɨ Dioj jetze airaanye. Capu che'e ti'itɨj cɨn atya'ɨtza'ara aɨjna cɨme'e tɨ jemin seijre'e aɨjna tɨ Dioj ayan raatyajtuaa. Capu rɨ'ɨri tɨ aɨn a'atɨ ayan ti'itɨ cɨn tye'etya'ɨtza'ara'an a'ini aɨ pu Dioj jetze airaanye. 10Ayaa pu aɨjna cɨn tye'emiteere'e a'atyaɨn maj pueen ɨ yaujmua'ame'en ɨ Dioj, ajta a'atyaɨn maj pueen ɨ yaujmua'ame'en ɨ tiyaaru'u. Capu Dioj jetze airaanye a'atɨ tɨ cai xa'apɨ'ɨn ti'ityujcha'ɨ, tɨ ajta cai raxe'eve'e ɨ ru'ihuaara'a. 11Ajta, ai pu aɨn pueen ɨ nyuucari tɨj na'a saj jajcua ɨmɨ raanamuajri'i tɨj na'a tɨ yu e'ire'enye tɨ ayan tyu'ujxe'eve'e tej teyan tityahuátaxe'eve'en seij tyajta seij. 12Tyej ti cai teyan huarɨni a'ij tɨ ti'itɨ cɨn huarɨj aɨjna ɨ Caín tɨ aɨjna jetze airaanye tɨ a'ij pua'a een. Ajta ayan tiraaje'ica ɨ ru'ihuaara'a. ¿Ni sacai ramua'aree a'ij tɨ een cɨn raaje'ica? Ayaa pu aɨjna cɨn tiraaje'ica aɨjna cɨme'e tɨ a'ij pua'a ti'ityújchaɨca'a aɨjna. Ma ajta xa'apɨ'ɨn pu ti'ityújchaɨca'a aɨjna ɨ ihuaara'ara'an. 13Ne'ihuaamua'a, caxu a'ij tyájá'useijra tɨ pua'a meyan tyajamuájchaɨra'a aɨme ɨ maj yan huachaatɨme iiyan chaanaca japua. 14Ayaa tu tyaɨjna cɨn ti'ijmua'aree tyaj cai che'e mɨ'ɨchijta seijre'e aun ɨ Dioj jemi silu tu'uri teyan ruurican jemin huatyajturaa aɨjna cɨme'e tyaj hua'axe'eve'e tyaɨme ɨ ta'ihuaamua'a. Ma ajta, a'atɨ tɨ na'a tɨ cai raxe'eve'e ɨ ru'ihuaara'a, aɨ pu auche'e ayan mɨ'ɨchijta seijre'e ɨ Dioj jemi. 15Ee xaa nya'u, aɨjna ɨ a'atɨ tɨ rajchaɨre'e ɨ ru'ihuaara'a, ai pu aɨn pueen tɨ ti'ityacui'ica. Sajta muan, xu'uri seyan ti'ijmua'aree tɨ cai rusen cɨn ruuri huatyaturaasin ɨ Dioj jemi a'atɨ tɨ na'a tɨ ayan ti'ityacui'ica. 16Ayaa tu tyaɨjna cɨn ti'ijmua'aree a'ij tɨ een, tɨ pua'a a'atɨ tzaahuati'ira'a cɨn raxe'eva'a ɨ ru'ihuaara'a tyaɨjna cɨme'e tɨ aɨn Jesús tɨ Cɨriistu'u pɨrɨcɨ, aɨ pu tajetze ma'acan huamɨ'ɨ. Aɨj pu cɨn, ayan tyu'ujxe'eve'e tej teyan che'eta tyana'a hua'a jetze ma'acan huacui'ini ɨ ta'ihuaamua'a. 17Ma ajta, capu a'atɨ jemi seijre'e aɨjna tɨ cɨn Dioj taxe'eve'e tɨ pua'a ayan huarɨni. Tɨ pua'a aɨn a'atɨ ayan eihua huapɨ'ɨ tí'ijcha'ɨ ɨ maj cɨn huataujvaɨre'en iiyan chaanaca japua, tɨ pua'a ajta ayan raseijra tɨ aɨn ihuaara'ara'an cai a'ij ti'ijviicue'i, ajta tɨ pua'a cai ra'ancu'uvajxɨ'ɨn tɨ ij ti'itɨ cɨn raatavaɨre'en, capu a'atzu jemin seijre'e aɨjna tɨ eihua tí'ijcha'ɨ aɨjna tɨ cɨn taxe'eve'e ɨ Dioj. 18Mɨ sej yaujmua'ame'en pueen, tiche'e cai teyan tyana'a ti'ixajta tyaj nu'u taxe'eve'e seij tyajta seij. Tiche'e cai tyaɨjna cɨn tyana'a teyan ti'ixajta tanyuuca cɨme'e silu tiche'e tyaɨjna cɨn tihua'utaseijrate'en tej tzaahuati'ira'a cɨn hua'axe'eve'e tyaɨjna cɨme'e tyaj ti'itɨ cɨn hua'uatyavaɨre'en ɨ ta'ihuaamua'a. 19Tɨ pua'a teyan tyaɨjna cɨn huarɨni, aj tu xaa teyan ti'ijmua'areeran tej teyan tzaahuati'ira'a cɨn rɨ'ɨ ti'ititacha'ɨ tyaɨjna jemi ɨ nyuucari tɨ ayan ti'ayajna. Tɨ pua'a tyajta tyaɨjna cɨn teyan huarɨni, aj tu ti cai che'e a'ij pua'a titya'utátamuajti ɨ taxaijnyu'uca jetze tyaɨjna jemi ɨ Dioj. 20Tɨ pua'a ayan ta'axɨjtya'a ɨ taxaijnyu'uca, capu ruxe'eve'e tyej teyan ti'itzɨɨnya'a a'ini eitze'e pu va'acan cɨn ti'itejvee ɨ Dioj cai ɨ taxaijnyu'uca. Ajta, aɨ pu nain tya'umua'aree. 21Mɨ nyaj a'amuaxe'eve'e, tɨ pua'a cai ti'itɨ cɨn ta'axɨjtya'a ɨ taxaijnyu'uca, ayaa pu een cɨn rɨ'ɨri tyaj cai ti'itɨ cɨn ti'itzɨɨnya'a ɨ Dioj jemi. 22Ayaa tu tyajta tyaɨjna cɨn teyan tira'ancura'asin tyaɨjna jemi ti'itɨ tɨ na'a tyaj raatahuaviira. Ayaa pu aɨjna cɨn ti'itacɨ'ɨti aɨjna cɨme'e tej teyan tira'astijre'e a'ij tɨ aɨn ti'itaijte'e, ajta aɨjna cɨme'e tej teyan rɨ'ɨ ti'ititacha'ɨ a'ij tɨ tira'araanajchi. 23Ai pu aɨn pueen aɨjna tɨ cɨn ayan ti'itaijte'e tej ti teyan tya'antzaahuate'en tɨ aɨn Jesús yaujra'an pueen ɨ Dioj, ajta ai pu aɨn pueen ɨ Cɨriistu'u Dioj tɨ ra'antihuau, tej ti tyajta teyan tityahuátaxe'eve'en seij tyajta seij a'ij tɨ aɨn titaataij. 24Ajta aɨn tɨ ayan ra'astijre'e a'ij tɨ Dioj tie'ijta, aɨ pu ayan che'eta na'a jemin seijre'e ɨ Dioj tɨj ajta Dioj jemin ti'iseijre'e aɨjna ɨ a'atɨ. Ayaa tu tyaɨjna cɨn ti'ijmua'aree tɨ aɨn Dioj ta jemi seijre'e aɨjna cɨme'e tɨ aɨn xaijnyu'ucara'ara'an ɨ Dioj ayan ta jemi huatyajturaa.

will be added

X\