1 San Juan 2

1Mɨ sej tyaamua ijii, mɨ nyaj huapɨ'ɨ a'amuaxe'eve'e, ayaa nu een cɨn tyaja'amuayu'use'e sej si cai ti'itɨ cɨn autyaturan ɨ Dioj jemi. Ma ajta, tɨ pua'a a'atɨ ayan ti'itɨ cɨn tyautyáturan ɨ Dioj jemi, saɨj pu taya'upua jemi seijre'e tɨ tajetze ma'acan ti'ixa'apɨ'ɨntare'e. Ai pu aɨn pueen aɨjna ɨ Jesús tɨ ajta Cɨriistu'u pueen. Aɨ pu urare'enya'acan cɨn seijre'e ɨ Dioj jemi. 2Cɨriistu'u pu ajta tajetze ma'acan rɨ'ɨ tiraata'a ɨ Dioj tɨ ij cai pueijtzi taata'an aɨjna cɨme'e ɨ tyaj cɨn autyajturaa ɨ jemin. Ayaa pu ajta che'eta na'a hua'a japua huanyúu naijmi'ica a'achu maj pua'amua ɨ mej yan huachaatɨme ɨ chaanaca japua. 3Tɨ pua'a teyan tira'astijra'a a'ij tɨ aɨn titaataij, ayaa tu aɨjna cɨn teyan ti'ijmua'aree tyaj tzaahuati'ira'a cɨn teyan ti'ijmua'ate. 4Tɨ pua'a cai a'atɨ ra'astijra'a a'ij tɨ titaataij, ajta tɨ pua'a aɨjna ɨ a'atɨ ayan tyu'utaxaj yee tɨ ayan ti'ijmua'ate aɨjna ɨ Jesús, aɨjna ɨ a'atɨ, ayaa pu ti'ihue'itaca. Ajta, capu tzaahuati'ira'a cɨn ti'ityujcha'ɨ. 5Ma ajta, tɨ pua'a aɨjna ɨ a'atɨ ayan tira'ara'asten aijna i nyuucari ɨ tɨ tejmi jemi huatyatu'iihuaca'a, ayaa tu tyaɨjna cɨn ti'ijmua'aree tɨ ayan raanaijmi'ire ɨ tzajta'an aɨjna ɨ a'atɨ tɨ aɨn tzaahuati'ira'a cɨn raxe'eve'e ɨ Dioj nain cɨme'e. Ayaa tu tyajta tyaɨjna cɨn ti'ijmua'aree tyej teyan tyaɨjna jemi seijre'e ɨ Dioj. 6Ajta tɨ pua'a a'atɨ ayan tya'ujseijrata tɨ aɨ pu mijmu ayan urare'enya'acan cɨn seijre'e jemin ɨ Dioj, ayaa pu ajta tyu'ujxe'eve'e tɨ aɨn a'atɨ ayan che'eta na'a rɨ'ɨ ti'ityujcha'ɨ tɨj ajta rɨ'ɨ ti'ityújchaɨca'a aɨjna ɨ Jesús tɨ Cɨriistu'u pueen. 7Mɨ nyaj a'amuaxe'eve'e, canu jajcuacan cɨn tyaja'amuayu'use'e ɨ tɨ cɨn titaataij ɨ Dioj, silu aɨj nu cɨn tyaja'amuayu'use'e nyaɨjna ɨ nyuucari tɨ jajcua ɨmɨ Dioj ayan aɨjna cɨn titaataij tɨj na'a tɨ jajcua ɨmɨ seijra'acaa muejmi jemi, tɨj na'a tɨ yu e'ire'enye. Ajta aɨjna tɨ jajcua ɨmɨ cɨn titaataij ɨ Dioj, ai pu aɨn pueen ɨ nyuucari ɨ saj raanamuajri'i. 8Me nyajta inyaa, nyajta nu jajcuacan cɨn tyaja'amuayu'use'e tɨ ayan ti'ayajna aɨjna jemi, ajta muejmi jemi, a'ini pu'uri te'entipua'ari aɨjna tɨ aɨn e'eseijre'e a'u tɨ a'utɨca'a. Ajta pu'uri autyejche tɨ huatatátzave'en aɨjna tɨ tzaahuati'ira'a cɨn tatatzavi'i. 9Tɨ pua'a a'atɨ ayan tyu'ujseijrata tɨ aɨn mijmu ari an á'umej a'u tɨ á'unyeeri'i, ajta ɨ a'atɨ, aɨ pu ru'ihuaara'a tichaɨre'e, aɨ pu ajta auche'e an aume a'u tɨ a'utɨca'a, a'u tɨ cai a'atatzave'e. 10Ajta aɨn ɨ a'atɨ tɨ raxe'eve'e ɨ ru'ihuaara'a, aɨ pu xaa aun aume a'u tɨ a'atatzave'e ɨ tavastara'a. Ajta capu ti'itɨ cɨn a'aturaa ɨ Dioj jemi. 11Ma ajta aɨn ɨ tɨ rajchaɨre'e ɨ ru'ihuaara'a, aɨ pu aun e'eseijre'e a'u tɨ a'utɨca'a. Aɨ pu xaa auj aume a'u tɨ a'utɨca'a, ajta capu ramua'aree a'u tɨ a'uméj a'ini tɨca'ari pu ayan raaruu tɨ ij aracun. 12Ayaa nu een cɨn tyaja'amuayu'use'e muejmi mɨ sej tyaamua ijii, a'ini Dioj pu ayan tyajamuaatauuni'iri'i ɨ saj cɨn autyajturaa ɨ jemin aɨjna cɨme'e a'ij tɨ huarɨj aɨjna ɨ Jesús. 13Sajta muan, mɨ saj hua'avaujsimua'a pueen, ayaa nu een cɨn tyaja'amuayu'use'e a'ini muan xu ramua'ate saɨjna tɨj na'a tɨ jajcua ɨmɨ seijra'acaa tɨj na'a tɨ yu e'ire'enye. Sajta muan, mɨ saj tyaamua, ayaa nu een cɨn tyaja'amuayu'use'e a'ini muan xu seri ra'antimue'itɨ saɨjna ɨ xaijnyu'ucari tɨ a'ij pua'a een. Sajta muan, mɨ saj hua'ayaujmua'a pueen, ayaa nu een cɨn tyaja'amuayu'use'e a'ini muan xu ramua'ate saɨjna ɨ tyaj rajya'upua. 14Ayaa nu nyajta een cɨn tyaja'amuayu'use'e mɨ saj hua'ava'ujsimua'a pueen a'ini muan xu seri ramua'ate saɨjna tɨ jajcua ɨmɨ seijra'acaa tɨj na'a tɨ yu e'ire'enye. Ayaa nu nyajta een cɨn tyaja'amuayu'use'e mɨ saj tyaamua a'ini muan xu tyamua'a naa te'eviicue'i. Ajta aɨjna ɨ nyuucari tɨ Dioj ayan tejmi jemi raatyajtuaa, aɨ pu muejmi jemi seijre'e a'ini muan xu ra'astijre'e. Muan xu sajta seri ra'antimue'itɨ saɨjna ɨ xaijnyu'ucari tɨ a'ij pua'a een. 15Ayaa nu tyaja'amueijcate'e saj cai seyan tihua'ɨjchu aɨme ɨ maj yan japuan huachaatɨme ɨ chaanaca japua. Sata'aj cai sajta seyan ti'ijxe'eva'a tɨj na'a ɨ tɨ ti'iseijre'e iiyan chaanaca japua. A'atɨ tɨ na'a tɨ raxe'eve'e hua'aye'ira ɨ mej yan huachaatɨme iiyan chaanaca japua, capu ajta cui'i raxe'eve'e ɨ Dioj. 16Ayaa pu xaa nya'u ti'ayajna a'ini tɨj na'a tɨ ayan ti'iseijre'e iiyan chaanaca japua, yan pu ma'acan. Tɨj na'a ɨ mej meyan jetzen titya'ujca'ane a'ɨj tɨ tzajta'an tasiseiri, ajta tɨj na'a ɨ mej raseij tɨ ca'anijra'a hua'ata'aca mej mi maɨjna cɨme'en ti'inyacua'atzen, ajta naijmi'i tɨj na'a ɨ maj cɨme'en á'ujtzaahuate'e, nain tɨj na'a tɨ ayan een, aɨj pu jetze mej e'eve'eme ɨ hua'amua'atziira'a ɨ maj yan seijre'e iiyan chaanaca japua. Capu Dioj jemi e'ema'acan. 17Ajta tɨj na'a tɨ hua'a jetze ruxe'eve'e aɨme ɨ mej yan seijre'e iiyan chaanaca japua, ajta tɨj na'a ɨ mej jetzen titya'ujca'ane, aɨ pu te'entipua'arite'esin. Ma ajta aɨjna ɨ tɨ ayan tira'astijre'e a'ij tɨ ti'ijxe'eve'e ɨ Dioj, aɨ pu ruuri huatyaturaasin ɨ jemin tɨj na'a rusen cɨme'e. 18Mɨ sej tyaamua pueen ijii, pu'uri tɨn tyaja'ure'enyejsin ajna xɨcajra'a tɨ jetzen nain te'entipua'arite'esin. Muan xu sajta seri raanamuajri'i tɨ aɨn ayan huataseijre'esin aɨjna tɨ rajchaɨre'e ɨ Cɨriistu'u. Ee xaa nya'u, ayaa pu ti'ayajna maj meri mui'itɨ huataseijre ɨ maj rajchaɨre'e ɨ Cɨriistu'u. Aɨj tu cɨn teyan ti'ijmua'aree tɨ ari tɨmua'a tyaja'ure'enyejsin aɨjna xɨcajra'a jetze tɨ nain te'entipua'arite'esin. 19Aɨ mu ta jemi tihuii. Ma majta, camu tajetze ajtyama'acantaca'a. Tɨ pua'a meyan tajetze ajtyama'acantache'e, aɨ mu tajemi huatyaturanche'e. Ma majta, ayaa mu een cɨn ajtacɨ́j tɨ ij ayan huataseijre'en maj cai naijmi'i tajetze ajtyama'acan. 20Ajta aɨn ɨ xaijnyu'ucara'ara'an ɨ Dioj, aɨ pu ari huatyajturaa muejmi jemi, ajta aɨ pu ayan tyajamuaata'a ɨ mua'atziira'a sej si nain tzaahuati'ira'a cɨn tyu'umua'ati. 21Canu nyaɨjna cɨn tyaja'amuayu'use'e nyaɨjna cɨme'e saj cai tzaahuati'ira'a cɨn ramua'aree saɨjna tɨ ayan ti'ayajna silu nyaɨjna cɨme'e saj xaa seyan ramua'aree. Ajta ti'itɨ tɨ ayan hue'itzi pueen, capu aɨjna jetze airáninyei aɨjna jetze tɨ tzaahuati'ira'a cɨn ayan ti'ayajna. 22¿Ni sacai ramua'aree a'atɨ tɨ aɨn pueen tɨ ti'ihue'itaca? Ee xaa, ai pu aɨn pueen ɨ tɨ ayan ti'ixa yee tɨ cai Jesús aɨn pueen ɨ Cɨriistu'u. Ai pu aɨn pueen ɨ tɨ rajchaɨre'e aɨjna ɨ Cɨriistu'u. Aɨjna ɨ a'atɨ tɨ ayan che'eta na'a ma rúujɨpua aɨjna ɨ tyaj rajya'upua, aɨ pu ajta ma rúujɨpua aɨn tɨ yaujra'an pueen ɨ Dioj. 23A'atɨ tɨ na'a tɨ ma ruuraini aɨjna tɨ yaujra'an pueen, capu ajta rɨ'ɨ ti'iseijre'e aɨjna jemi ɨ tyaj rajya'upua. Ma ajta, aɨn tɨ ayan tiraataxaj yee Jesús pu aɨn pueen aɨjna tɨ yaujra'an pueen ɨ Dioj, tɨ pua'a ayan huarɨni, aɨ pu ajta rɨ'ɨ seijra'a a'ame ɨ Dioj jemi. 24Sajta muan, ayaa xu huarɨni. Che'e aɨn nyuucari ɨ saj jajcua ɨmɨ raanamuajri'i, che'e ayan muejmi jemi huatyaturan. Ajta aɨjna ɨ nyuucari ɨ saj jajcua ɨmɨ raanamuajri'i, tɨ pua'a ayan muejmi jemi huatyaturan, ayaa xu sajta muan naimi'i rɨ'ɨ ti'ityeseira'a xa'aju'un saɨjna jemi tɨ yaujra'an pueen ɨ Dioj, sajta saɨjna jemi ɨ tyaj rajya'upua. 25Ajta ai pu aɨn pueen ɨ tɨ cɨn tya'ataujratziiri'i itejmi jemi tɨ ayan titáacɨ'ɨti tej teyan rusen cɨn ruuri ta'ara'ani ɨ jemin. 26Ayaa nu tyaja'amuayu'use'e nyaɨme cɨme'en ɨ mej meyan tyaja'amuahue'itze'e. 27Ma sajta muan, auche'e pu muejmi jemi seijre'e aɨjna ɨ mua'atziira'a tɨ aɨn xaijnyu'ucara'ara'an ɨ Dioj ayan tyajamuaata'a. Aɨj pu cɨn cai ayan tyu'ujxe'eve'e tɨ a'atɨ ayan tyajamue'itii a'ini aɨjna ɨ mua'atziira'a, ayaa pu tyaja'amue'itii nain cɨme'e. Aɨ pu ajta tzaahuati'ira'a cɨn tyaja'amue'itii, ajta cai tyaja'amuahue'itze'e. Sata'aj seyan che'eta sana'a huarɨni a'ij tɨ ari tyajamuaata'itiiri'i, sata'aj naijmi'i huatyaturan ɨ jemin. 28Ajta i'i, mɨ sej yaujmua'ame'en pueen, sata'aj seyan naimi'i huatyaturan ɨ jemin tej ti teyan a'ataca'anyaacan cɨn ra'ancure'evi'itɨn ajna xɨcajra'a tɨ jetzen huataseijre'esin. Sata'aj sajta seyan huarɨni tɨ ij cai taatatyevi'iraste'en ɨ jemin. 29Tɨ pua'a muan seri ramua'areera tɨ urare'enya'acan cɨn seijre'e ɨ Dioj, xu'uri sajta ramua'aree tɨ ayan ti'ayajna tɨ a'atɨ tɨ na'a tɨ ayan xa'apɨ'ɨn ti'ityujcha'ɨ, aɨjna ɨ a'atɨ, aɨ pu xaa aɨn Dioj jetze eiraanye.

will be added

X\