1 San Juan 1

1Cɨme'en aɨjna ɨ Jesús tɨ Cɨriistu'u pueen. Aɨ pu jajcua ɨmɨ seijra'acaa tɨj na'a tɨ yu e'ire'enye. Aɨ pu ajta aɨn pueen ɨ tyej raanamuajri'i a'ij tɨ ye'i tyu'utaxajtaca'a. Tyan tu tyajta tajɨ'ɨ cɨn raaseij, tyajta teyan raamuá'a a'atɨ tɨ puéenya'a, tyajta teyan tamuajca'a cɨn ra'ajtamuárej tyaɨjna tɨ nyuucari pueen tɨ ajta ruurican e'ihuatyajtuaani. 2Ajta, aɨ pu huataseijre aɨjna tɨ ruurican e'ihuatyajtuaani. Tyajta ityan, tyan tu raaseij. Tyajta teyan tiraatyáxajta, tyajta teyan tyaja'amue'ixaate'e tyaɨjna tɨ rusen cɨn i'i ruuri, tɨ ajta jemin seijre'e ɨ rutaata ɨ Dioj. Ajta, aɨ pu tejmi jemi huataseijre. 3Aɨj tu tyajta teyan tyaja'amue'ixaate'e tyaɨjna ɨ tyaj raaseij, tyajta ɨ tyaj raanamuajri'i, sej si sajta muan seyan che'eta sana'a tyu'umua'ati tyatɨj ityan ti'imua'atze tyej ti naijmi'i ta'ihuaamua'a ta'ara'ani. Ee xaa nya'u, tyan tu jemin seijre'e tyaɨjna ɨ Dioj jemi ɨ tyaj rajya'upua. Tyan tu tyajta teyan che'eta tyana'a jemin seijre'e tyaɨjna jemi ɨ tɨ yaujra'an pueen ɨ Dioj, aɨjna ɨ Jesús, ɨ tɨ ajta Cɨriistu'u pueen. 4Ayaa tu een cɨn teyan tyaja'amuayu'use'e tɨ ij ayan raanaijmi'ire'en ɨ saj cɨn rutyamua'ave'e. 5Ai pu aɨn pueen ɨ nyuucari ɨ tɨ Cɨriistu'u ayan titaata'ixaa tɨ nu'u aɨn Dioj ayan tejmi jemi seijre'e tɨj tatzari tɨ ayan tatatzavi'i ɨ ta tzajta'a, ajta nu'u capu a'atzu jemin seijre'e ti'itɨ tɨ a'ij pua'a een, tɨ ayan che'eta na'a een tɨj tɨca'ari. 6Tɨ pua'a teyan tyaɨjna jetzen teyan me títyajáuhuaanye'en tyará'antixáata tityaaju'un a'u tɨ a'utɨca'a, tyajta teyan yee tyej teyan Dioj jemi seijre'e, catu tzaahuati'ira'a cɨn teyan ti'ititacha'ɨ silu teti'ihue'itaca tu'u. 7Me tyajta ityan, tɨ pua'a teyan che'eta tyana'a tyaɨjna jetze tityaaju'un, aɨ pu rɨ'ɨ taruure tyej ti teyan tyamua'a naa ta'ihuaamua'a ta'ara'ani. Ajta, aɨjna tɨ yaujra'an pueen aɨjna ɨ Jesús, aɨ pu ajta ta'ari'ira nain tɨj na'a ɨ tyaj cɨn atyáturaavaca ɨ Dioj jemi. Aɨ pu ayan taruure aɨjna cɨme'e tɨ ari huamɨ'ɨ ta jetze ma'acan. Aɨj pu cɨn ayan tira'iraaxɨre ɨ ruxuure'e. 8Tɨ pua'a teyan tiraataxaj yee tyaj cai ti'itɨ cɨn atyáturaavaca ɨ Dioj jemi, ayaa tu tajɨɨmua'a tyana'a tacuanamua. Ajta, aɨjna ɨ nyuucari tɨ ayan ti'ayajna, capu tejmi jemi seijre'e. 9Me tyajta ityan, tɨ pua'a teyan tiraataxaj ɨ tyaj cɨn autyajturaa ɨ Dioj jemi, ayaa tu ti'ijmua'aree tɨ Dioj araurastejsin aɨjna cɨme'e tɨ cɨn tya'ataujratziiri'i tɨ nu'u ayan titaatauuni'i nain cɨme'e ɨ tyaj cɨn autyajturaa ɨ jemin. Tyan tu tyajta teyan ti'ijmua'aree tɨ ayan tiraavijte'e tɨ Dioj ayan titaatauuni'i. 10Tɨ pua'a teyan tiraataxaj yee tyaj cai a'anaj ti'itɨj cɨn autyajturaa ɨ Dioj jemi, ayaa pu huataujmua'a aɨjna ɨ tyej teri teyan tyaɨjna cɨn raatamuá'a ɨ Dioj tɨ nu'u ti'ihue'ita. Ajta aɨjna ɨ nyuucari tɨ ayan tejmi jemi raatyajtuaa, capu xaa nya'u a'atzu tejmi jemi seijre'e.

will be added

X\