1 Corintios 9

1Nyajta inyaa, nyaxaahua nu a'ucha'acan. Nyajta nu nyaɨn pueen seij tɨ Dioj na'utaityaca'a nyej ni jetzen ma'acan tyu'utaxaj. Nyajta nu raaseij nyaɨjna ɨ Jesús, ɨ tavastara'a. Sajta muan, xu'uri nyeetzi jemi seijre'e aɨjna cɨme'e nyej ti'ivaɨre'e ɨ tavastara'a jemi. 2Tɨ pua'a cai ayan tihua'amitejte'e ɨ seica jemi tɨ Dioj ayan na'utaityaca'a, muejmi jemi pu xaa ayan tyajamua'amitejte'e a'ini muan xu saɨn pueen ɨ tyaj cɨn teyan ramua'aree tɨ Dioj ayan aɨjna cɨn tineijca. 3Ayaa nu huatyanna aɨme jemi ɨ mej nyaj cɨme'en ti'ihua'u. 4¿Ni cai ayan titata'aca tyej tyu'ucua'ani, ajta tyaj huaye'en? Ee xaa nya'u, ayaa pu ti'ayajna. 5¿Ni cai ayen che'eta na'a titata'aca tyej seij tyevi'itɨnye'en tɨ ajta tya'atzaahuate'e matɨj ɨ seica ɨ tɨ Dioj hua'utaityaca'a, majta aɨme ɨ ihuaamua'ame'en ɨ tavastara'a, ajta aɨjna ɨ Pedro? 6Ari ityan, i nyaj i'i Pablo, ajta aɨjna ɨ Bernabé, ¿ni qui tyan tyana'a tyaɨn pueen ɨ tɨ ayan ruxe'eve'e tyaj tamuajca'a cɨn tyu'umuare'en? 7Capu a'atɨ tɨ ayan ti'ivaɨre'e xantaaru'u cɨme'e ayan tihuaujnajchite'en rusaɨj. Ajta capu a'atɨ ayan cai racua'ani ɨ taca'ira'an ɨ tɨ raahuii. Capu ajta a'atɨ ayan cai ra'anti'isin hua'aleechi tɨ hua'asaɨre'e ɨ ya'amuaate. 8Canu neyan ti'ixa a'ij mej tirajtyau rujɨɨmua'a mana'a ɨ tyetyaca silu ayaa pu che'eta na'a te'eyu'usi'i jetzen ɨ nyuucari ɨ maj cɨn ti'ijta. 9- 10Ayaa pu tya'asɨɨmue'i ɨ yu'uxari jetze, tɨ Moisés tyaacan ra'uyu'uxaca'a tɨcɨn: “Capej ra'ancánaamɨn ɨ puuye tɨ'ɨj aɨn atáye'icaa rayuu ɨ triigu.” ¿Ni qui jetzen ruxe'eve'e ɨ Dioj aɨjna ɨ puuye, na'ari tyejmi na'a cɨme'en ayan ti'ixa? Ee xaa nya'u. Nain pu cɨn tyejmi cɨn ayan tyu'utaxajtaca'a. Ayaa pu een cɨn tyejmi cɨme'en ayan te'eyu'usi'ihuaca'a a'ini ayaa pu tiraavijte'e tɨ aɨn a'atɨ tɨ tasa'ahuaca ayan rachu'eve'e tɨ ti'itɨj raacɨ'ɨti aɨjna cɨme'e tɨ tyu'utasaahuaca'a. Ajta, aɨn tɨ ti'itza'anaca, ayaa pu ajta ayan tiraavijte'e tɨ ayan rachu'eve'e tɨ ti'itɨ raacɨ'ɨti aɨjna tɨ huacɨɨraca'a. 11Tɨ pua'a teri raatyajtua muejmi jemi tyaɨjna tɨ Dioj jemi e'ema'acan tɨ'ij rɨ'ɨ á'amuaruuren, ¿ni qui ayan a'ij pua'a tyaja'amuaseijrate'e tɨ ayan titáacɨ'ɨti a'icaj aɨjna ɨ saj cɨn huataujvaɨre'en iiyan chaanaca japua? 12Tɨ pua'a ayan tiraavijte'e tɨ ayan tihua'ucɨ'ɨti ɨ seica a'icaj ɨ saj cɨn huataujvaɨre'en, eitze'e pu ayan tiraavijte'e tɨ ayan titáacɨ'ɨti itejmi. Me tyajta ityan, catu teyan rɨcɨ silu nain tu cɨn te'eviicue'i tyej ti cai ra'antanaamɨn sej si cai che'e ra'ara'astijre'en ɨ nyuucari tɨ cɨme'en raxa ɨ Cɨriistu'u. 13Xu'uri ramua'aree a'ij mej rɨcɨ aɨme ɨ mej ti'ivaɨre'e u teyujta'a. Ayaa mu racua'aca maɨjna ɨ maj seica maun tya'utyatúutuhua'a mua'aye'i u teyujta'a. Majta aɨme ɨ mej maun ti'ivaɨre'e a'u maj tyaja'amuaɨ'ɨvajtaca, aɨ mu majta meyan racua'aca a'icaj ɨ maj maun raatamuaɨ'ɨvajtaca'a. 14Ayaa pu che'eta na'a een, tavastara'a pu ayan tyu'utaijtaca'a tɨ ayan tiraavijte'e tɨ ayan tihua'ucɨ'ɨti aɨme ɨ mej tihua'uta'ixaate'esin ɨ nyuucari tɨ cɨme'en raxa ɨ Dioj, mej mi maɨjna cɨn huataujvaɨre'en maj tyu'utaxajtaca'a maɨjna cɨme'e ɨ nyuucari tɨ cɨn Dioj hue'irajtuaani. 15Me nyajta inyaa, canu a'anaj huatannya'a nyej nyaɨjna cɨn huatyanvaɨre'en a'ij tɨ tiraavijte'e inyeetzi jemi. Canu nyajta nyaɨjna cɨn tyaja'amuayu'use'e sej si seyan huarɨni inyeetzi jemi. Eitze'e pu na'araanajchi nyaj huamɨ'ɨni cai a'atɨ ayan tina'ari'i aɨjna ɨ nyaj neyan nyaɨjna cɨn huatyaturaasin. 16Capu xaa nya'u ayan tinata'aca nyaj nyaɨjna cɨn ahuantzaahuate'en nyaɨjna cɨme'e nyej neyan tihua'uta'ixaate'en ɨ nyuucari tɨ cɨn Dioj hue'irajtuaani a'ini Dioj pu ayan aɨjna cɨn tineijca. Pueijtzi pu naata'asin tɨ pua'a nyacai neyan tihua'uta'ixaate'en. 17Ee xaa nya'u, ti'itɨ pu ayan ti'inyacɨ'ɨtiiche'en tɨ pua'a neyan nyexe'evi'ira'a cɨn tíhua'uta'ixáate'enche'e. Ma ajta cai, capu, a'ini Dioj ayan aɨjna cɨn tineijca. 18Tɨ pua'a ayan ti'ayajna, ¿ti'itajni ayan tinaacɨ'ɨti inyeetzi? Ai pu aɨn pueen, nyaj cai hua'ajijva'a nyetihue'ixaate'e, nyajta cai huatyanvaɨre'en nyaɨjna cɨme'e ɨ nyaj cɨn antinmua'aree. 19Aɨj pu cɨn, nyaa nu neyan nyaxaahua naa tyaja'ucha'acan nain cɨme'e. Capu a'atɨ tí'inyeijte'e. Me nyajta inyaa, nyaa nu neri huanruu naijmi'ica jemi tɨj a'atɨ tɨ ca'anyejri cɨn ti'imuare'e nyej ni eitze'e hua'umue'itɨn. 20Aɨme jemi ɨ mej Israel jetze ajtyama'acan, ayaa nu huanruu yaa cumu nyaj Israel jetze ajtyama'acanta nyej ni hua'umue'itɨn ɨ mej Israel jetze ajtyama'acan. Ee xaa nya'u, capu ruxe'eve'e nyej neyan ra'astijra'a ɨ nyuucari ɨ maj cɨn ti'ijta. Capu amɨn a'ij, ayaa nu huanruu tɨj a'atɨ tɨ ayan ra'astijre'e nyej ni hua'umue'itɨn aɨme ɨ mej ra'astijre'e ɨ nyuucari ɨ maj cɨn ti'ijta. 21Nyajta, aɨme jemi ɨ maj cai ra'astijre'e ɨ nyuucari ɨ maj cɨn ti'ijta, ayaa nu nyajta huanruu tɨj a'atɨ tɨ cai ayan ra'astijre'e nyej ni nyajta hua'umue'itɨn aɨme ɨ maj cai ra'astijre'e ɨ nyuucari ɨ maj cɨn ti'ijta. Me nyajta inyaa, nyaa nu xaa seij nyuucari ara'astejsin ɨ Dioj jemi, ɨ nyuucari tɨ cɨn tita'itiiri'i ɨ Cɨriistu'u. 22Aɨme jemi ɨ maj cai a'ij ti'ijviicue'i, nyajta nu neyan huanruu tɨj a'atɨ tɨ cai a'ij ti'ijviicue'i nyej ni hua'umue'itɨn aɨme ɨ maj cai a'ij ti'ijviicue'i. Naijmi'ica jemi nu neyan huanruu tɨj na'a tɨ seijre'e nyej ni seica huamué'itɨn nain cɨn a'ij nyej ye'i rɨcɨ. 23Ayaa nu een cɨn rɨcɨ nyaɨjna cɨme'e nyej ni tihua'uta'ixaate'en ɨ nyuucari tɨ cɨn Dioj hue'irajtuaani, tɨ ij ajta tinaacɨ'ɨti ɨ tɨ cɨn Dioj rɨ'ɨ tihua'uta'asin aɨme ɨ mej ra'ara'astijre'esin maɨjna ɨ nyuucari. 24Xu'uri ramua'aree a'ij mej ti'ijrɨ'ɨre aɨme ɨ mej ru'achaca a'u maj a'ahuajcaca. Naimi'i ɨ maj rua'achaca, ayaa mu che'eta mana'a ti'ityesa'a maj tyu'umue'itɨn. Ma ajta, seij pu'u aɨn pueen ɨ tɨ ti'imue'itɨn, ajta ra'ancura'asin ɨ maj raatapueijve'esin. Sata'aj seyan che'eta sana'a tyu'utese'en sej si sajta seyan ti'itɨ huamué'itɨn ɨ Dioj jemi. 25A'atɨ tɨ na'a tɨ hua'a jamuan ta'ichaca, ayaa pu a'ujcu'uve nain cɨme'e tɨ ij ayan curuun ancura'ɨn tɨ a'uvaɨjtzi. Me tyajta ityan, ayaa tu ti'ityese'e tyej ti curuun ancura'ɨn tɨ naa seira'a a'ame tɨj na'a rusen cɨme'e. 26- 27Aɨj nu cɨn, canu cha'a nyana'a ta'ichaca. Canu nyajta cha'a nyana'a tya'ancurá'atu'axa ɨ aaca tzajta'a, silu ayaa nu tye'ejtyantu'axa ɨ nyejetze, nyajta inyaa raatyamue'itɨ na'aye'i ca'anyejri cɨme'e tɨ'ij na'ara'astijre'en ɨ nyaj ratyáhue'ira'a. Ayaa nu een cɨn rɨcɨ tɨ ij cai Dioj naara'ite nyatɨ'ɨj neri neyan tihua'uta'ixaa ɨ seica.

will be added

X\