1 Corintios 8

1Cɨme'en ɨ cue'ira ɨ maj ti'imuaɨ'ɨvajtaca ɨ rudioosi jemi, ayaa tu ramua'aree. Naijmi'i tu máumua'arejmee. Ajta, ayaa pu ti'irɨnyaca tɨ a'atɨ ayan aɨjna cɨn a'ujtzaahuatya'a tɨ eihua máumua'aree. Ma ajta, a'atɨ pu rɨ'ɨ a'ij ti'ijrɨ'ɨre tɨ pua'a rɨ'ɨ ti'ijxe'eve'e ɨ ruxa'aj tevi. 2Ajta aɨjna ɨ a'atɨ tɨ ayan ti'imua'atze ɨ rutzajta'a tɨ eihua máumua'aree, aɨ pu cai máumua'aree a'ij tɨ ye'i tyu'ujxe'eve'e ɨ Dioj jemi. 3Ma ajta, Dioj pu ramua'ate aɨjna ɨ a'atɨ tɨ rɨ'ɨ ti'ijxe'eve'e ɨ Dioj. 4Aɨj pu cɨn, cɨme'en aɨjna ɨ cue'ira ɨ maj tihua'amuaɨ'ɨvejte'e ɨ rudioosi, ayaa tu ramua'aree maj cai rɨ'ɨ meyan seijre'e iiyan chaanaca japua ɨ maj nu'u dioosi pueen. Tyajta, tyan tu ramua'aree tɨ saɨj na'a ɨ Dioj tɨ iiyan seijre'e. 5Ee xaa nya'u, ma mui'i ɨ mej jee dioosi pueen, tɨ pua'a iiyan mej seijre'e chaanaca japua nusu aun mej e'eseijre'e u tajapua, a'ini ayaa pu tita'amitejte'e mej i'imui'i ɨ mej dioosi pueen, majta i'imui'i ɨ mej ti'itɨj cɨn títyatatí. 6Me tyajta ityan, ayaa tu ti'ijmua'aree tɨ, ityejmi jemi, saɨj na'a ɨ Dioj ɨ tyaj rajya'upua. Nain pu aɨjna jemi tyu'utaseijre. Tyajta ityan, naimi'i tu tyaɨjna cɨn seijre'e tyej ti rɨ'ɨ tiraatyajtuaani ɨ jemin. Ajta seij pu'u ɨ tavastara'a, aɨjna ɨ Jesús tɨ ajta Cɨriistu'u pueen. Nain pu tyu'utaavijhuaca'a aɨjna jemi. Tyajta ityan, naimi'i tu tyaɨjna jetze arataca'anye tej ti ruuri. 7Ma majta, camu naimi'i meyan che'ata mana'a ti'ijmua'aree, silu seica, ayaa mu ti'ijrɨ'ɨrajcaa maj hua'ana'amiche'en ɨ maj cai dioosi pɨrɨcɨ. Aɨj pu cɨn, tɨ pua'a meyan raacua'ani ɨ cue'ira ɨ mej ramuaɨ'ɨvajtaca, auche'e pu ayan tihua'amityejte'e maj majta maɨjna na'amiche'e ɨ tɨ cai Dioj pueen maɨjna cɨme'e maj raacuaa maɨjna ɨ cue'ira maj raamuaɨ'ɨvajtaca'a. Ayaa mu aɨjna cɨn raacua'an, tɨ'ɨqui a'ij pua'a hua'ata'acara'a a'ame ɨ hua'axaijnyu'uca jetze aɨjna cɨme'e tɨ a'ij pua'a huarɨni aɨjna ɨ hua'axaijnyu'uca. 8Aru, casi'i muan, capu ti'itɨ cɨn titatyava'ɨri ɨ cue'ira ɨ Dioj jemi. Capu a'atzu a'uvaɨjtzi tɨ pua'a tyacai raacua'ani. Capu ajta titatyava'ɨri tɨ pua'a tyaraacua'ani. 9Ma sajta muan, rɨ'ɨ xu'u sej si cai seyan a'ij pua'a raaruuren saɨj ɨ a'atɨ tɨ cai eihua te'eviicue'i, sata'aj cai seyan ca'anijra'a tiraata'acare'en tɨ aɨn ayan autyaturan Dioj jemi saɨjna cɨme'e tɨ i'i xa'apɨ'ɨn muejmi jemi. 10Casi'i muaa, mɨ paj rɨ'ɨ ti'ijmua'aree. Tiche'e teyan tiraataxaj yee a'atɨ tɨ cai eihua te'eviicue'i ɨ rutzajta'a, ajta aɨ pu muaseij, paj paun tyaja'acua'a paujna teyujta'a a'u maj rana'amiche'e ɨ hua'adiooj. Tij ca'anijra'a papu'u raata'asin aɨjna ɨ a'atɨ tɨ'ij aɨn ajta raacua'ani ɨ cue'ira ɨ maj raatamuaɨ'ɨvajtaca'a. 11Ayaa pu aɨjna cɨn huarɨj, aj pu'i a'uvaɨjtzi aɨjna ɨ a'ihuaara'a tɨ cai eihua te'eviicue'i, tɨ ajta jetzen ma'acan huamɨ'ɨ ɨ Cɨriistu'u. A'uvaɨjtzi, icu, aɨjna cɨme'e paj ca'anijra'a raata'a paɨjna cɨme'e paj rɨ'ɨ ti'ijmua'aree a'ij tɨ een ɨ Dioj jemi. 12Aɨj pu cɨn, satɨ'ɨj seyan autyaturan aɨme jemi saɨjna cɨme'e saj a'ij pua'a hua'uruu ɨ hua'amua'atziira'a jetze ɨ maj cai eihua te'eviicue'i, muan xu sajta saɨjna cɨn autyaturaave ɨ Cɨriistu'u jemi. 13Aɨj pu cɨn, tɨ pua'a nye'ihuaara'a a'uvaɨjtzi aɨjna cɨme'e tɨ raacuaa ɨ cue'ira ɨ maj raamuaɨ'ɨvajtaca'a, canu a'anaj racua'ani nyaɨjna ɨ cue'ira nyej ni cai ca'anijra'a raata'an tɨ ayan huarɨni aɨjna tɨ cɨn a'uvaɨjtzi.

will be added

X\